1 Joni 4 - Vakavakadewa Makawa

Sa vakavulici ira ko koya me ra kakua ni vakabauta nai vakavuvuli kecega era sa rogoca, me muri ira ga era sa tukuni Jisu, 1-6. Sa vakarota vei ira me ra veilomani, 7-21.

¹ Oi kemudou sa lomani, kakua ni vakadinata na yalo kecega, ia dou vakatovolei ira na yalo se ra yalo mai vua na Kalou, se segai: ni ra sa lewe vuqa na parofita vakailasu era sa lako voli yani e vuravura.

² O koya oqo dou sa kila kina na yalo sa mai vua na Kalou: a yalo kecega sa vakatusa ni sa liatamata mai ko Jisu Karisito, sa mai vua na Kalou:

³ ia na yalo kecega sa sega ni vakatusa ni sa liatamata mai ko Jisu Karisito, sa sega ni mai vua na Kalou: ia oqo sai koya na meca i Karisito, oqori dou a rogoca ni na lako mai, a sa tu e vuravura edaidai.

⁴ Oi kemudou na luvequ lomani, dou sa mai vua na Kalou, ia dou sa rawai ira: ni sa levu ko koya sa tiko e na lomamudou, ka lailai ko koya sa tiko e vuravura.

⁵ O ira era sa tamata vakavuravura: a ra sa vosataka kina na ka vakavuravura, a sa vakarogoci ira ko ira na kai vuravura.

⁶ Oi keda, eda sa tamata ni Kalou: sa vakarogoci keda ko koya sa kila na Kalou: sa sega ni vakarogoci keda ko koya sa sega ni tamata ni Kalou. E na ka oqo eda sa kila kina na yalo sa dina, kei na yalo sa dauveivakacalai.

⁷ Oi kemudou sa lomani, me da veilomani; ni sa mai vua na Kalou na loloma; ia ko koya yadua sa dauloloma, sa vakasucumi koya na Kalou, a sa kila na Kalou ko koya.

⁸ O koya sa sega ni dauloloma sa sega ni kila na Kalou; ni sa loloma na Kalou.

⁹ E na ka oqo sa vakaraitaki kina na loloma ni Kalou vei keda, ni sa tala ki vuravura na Luvena e dua bauga na Kalou, o koya ka vakatubura ko koya, me da bula e na vukuna.

¹⁰ E na ka oqo sa rairai kina na loloma, sa segai ni da a lomani koya na Kalou, ia ni sa lomani keda ko koya, a sa tala na Luvena mei bulubulu ni nodai valavala ca.

¹¹ Oi kemudou sa lomani, kevaka sa lomani keda vakaoqo na Kalou, sa dodonu me da veilomani vakai keda.

¹² Sa sega na tamata sa raica na Kalou e na dua na gauna. Kevaka eda sa veilomani, sa tiko e na lomada na Kalou, a sa levu sara na loloma vua e na lomada.

¹³ E na ka ga oqo eda sa kila ni da sa tiko sara vua, ia sa tiko ko koya e na lomada, e na vuku ni sa solia vei keda ko koya mai vua na Yalona.

¹⁴ Ia eda sa raica ka tukuna tiko ni sa tala na Luvena ko Tamada mei Vakabula kei vuravura.

¹⁵ O koya yadua ena vakatusa ni sa Luve ni Kalou ko Jisu, sa tiko sara na Kalou vei koya, ia sa tiko ko koya vua na Kalou.

¹⁶ Ia eda sa kila ka vakadinata na loloma ni Kalou vei keda. Sa loloma na Kalou; ia ko koya sa dautiko kei na loloma sa dautiko vata kei na Kalou, a sa tiko na Kalou e lomana.

¹⁷ E na ka oqo sa yaco kina me levu sara na loloma vei keda, ni da sa tautauvata kaya, ni da sa tiko e vuravura oqo, me da doudou kina e na siga ni lewa.

¹⁸ Sa sega ni tu vata na rere kei na loloma; ia sa biuta tani na rere na loloma levu sara; ni sa tiko vata na rere kei na yaluma. Ia ko koya sa rere, sa sega ni levu sara na nona loloma.

¹⁹ Eda sa lomani koya, e na vuku ni sa taumada na nona loloma vei keda.

²⁰ Kevaka sa kaya e dua, Au sa lomana na Kalou, a sa cata na wekana, sa lasulasu ko koya: kevaka sa sega ni lomana na wekana sa raica tiko ko koya, ena lomana vakaevei na Kalou ni sa sega ni raica?

²¹ Ia na vunau oqo eda sa rawata maivei koya, Me lomana talega na wekana ko koya sa lomana na Kalou.