1 Joni 3 - Vakavakadewa Makawa

Sa tukuna ko koya na loloma ni Kalou ni sa vakabauti keda tale me da luvena, kei na nodra i valavala na luve ni Kalou, 1-24.

¹ Raica na kena levu ni loloma sa ia vei keda na Tamada, me da vakatokai kina me da luve ni Kalou: ia eda sa vakakina. O koya oqo sa sega kina ni kilai keda ko ira na kai vuravura, ka ni ra a sega ni kilai koya.

² Oi kemudou sa lomani, eda sa qai luve ni Kalou, ia sa sega ni rairai se da na vakaevei maimuri: oqo ga eda sa kila, ni na rairai mai ko koya, eda na tautauvata kaya; ni da na raica na matana dina.

³ Ia na tamata yadua sa tu vua nai nuinui oqo vei Koya, sa vakasavasavataki koya, me vaka sa savasava ko koya.

⁴ O koya yadua sai valavala ca sa talaidredre ki na vunau: ni sai valavala ca oqo na talaidredre ki na vunau.

⁵ Ia dou sa kila ni sa vakaraitaki ko koya me kauta tani na nodai valavala ca; a sa sega na nonai valavala ca.

⁶ O koya sa tu dei vata kaya sa sega ni valavala ca; o koya sai valavala ca tiko sa sega ni raici koya, se kilai koya.

⁷ Oi kemudou na luvequ lomani, me kakua ni vakacalai kemudou e dua: o koya sai valavala dodonu sa dodonu ga, me vaka sa dodonu ko koya.

⁸ A luve ni tevoro ko koya sai valavala ca tiko; ni sai valavala ca na tevoro mai nai vakatekivu. E na vuku ni ka oqo sa vakaraitaki kina na Luve ni Kalou, me vaqeavutaka na cakacaka ni tevoro.

⁹ Sa sega ni valavala ca ko koya yadua sa vakasucumi koya na Kalou; ni sa tu e lomana na sorena: a sa sega ni ia rawa nai valavala ca ko koya, e na vuku ni sa vakasucumi koya na Kalou.

¹⁰ E na ka oqo sa rairai kina ko ira na luve ni Kalou, kei ira na luve ni tevoro: sa sega ni luve ni Kalou ko koya yadua sa sega ni ia tiko nai valavala dodonu, se ko koya sa sega ni lomana na wekana.

¹¹ Ni sai koya ga oqo nai vakaro dou a rogoca mai nai vakatekivu, me da veilomani:

¹² me kakua ni vakataki Keni, a luve ni vu-ni-ca, o koya sa vakamatea na tacina. A sa vakamatei koya e na vuku ni cava? Ni sa ca na nonai valavala, ia sa dodonu nai valavala nei tacina.

¹³ Kakua ni kidacala, oi kemudou na wekaqu, kevaka sa cati kemudou ko ira na kai vuravura.

¹⁴ Eda sa kila ni da sa lako tani mai na mate ki na bula, ni da sa lomani ira na veiwekani. O koya sa sega ni lomana na wekana sa tiko ga e na mate.

¹⁵ Na daulaba ko koya yadua sa cata na wekana: ia dou sa kila ni sa sega sara ni tiko e lomana na daulaba na bula tawa mudu.

¹⁶ E na ka oqo eda sa kunea kina na loloma, ni sa solia ko koya na nona bula e na vukuda: e dodonu me da solia na noda bula koi keda talega e na vukudra na veiwekani.

¹⁷ Ia ko koya sa tu vua nai yau ni vuravura oqo, a sa raica na wekana ni sa dravudravua, a sa sogota na lomana vua, sa tiko vakacava e na lomana na loloma vua na Kalou?

¹⁸ Oi kemudou na luvequ lomani, me da kakua ni loloma e na vosa ga, se e na yameda; e na cakacaka ga kei na lomadina.

¹⁹ Ia na ka oqo eda sa kila kina ni da sa dina; eda na vakadinadinataka talega kina na yaloda vua.

²⁰ Ia kevaka sa beitaki keda na yaloda ni da sa ca sa uasivi cake e na yaloda na Kalou, a sa kila na ka kecega.

²¹ Oi kemudou sa lomani, kevaka sa sega ni beitaki keda na yaloda ni da sa ca, eda sa qai doudou rawa vua na Kalou.

²² Ia na ka kecega eda sa kerea, eda sa rawata maivei koya, ni da sa muria na nona vunau, ka kitaka na veika sa vinaka vua.

²³ Ia oqo na nona vunau, Me da vakabauta na yaca ni Luvena ko Jisu Karisito, ka veilomani, me vaka sa vakarota vei keda ko koya.

²⁴ Ia sa tu dei vei koya ko koya sa muria na nona vunau, a sa tu sara vua ko koya. Ia na ka oqo eda sa kila kina ni sa tiko e na lomada ko koya, e na vuku ga ni Yalo Tabu sa solia mai vei keda ko koya.