1 Joni 2 - Vakavakadewa Makawa

Ai bulubulu ni valavala ca ko Jisu, 1,2. Sa qai tukuni ko ira era sa kila na Kalou, 3-17. Me da qarauni keda mai nai vakavuvuli ca, ni da sa gumatua e na vakabauti Jisu, kei nai valavala vinaka, 18-29.

¹ Na luvequ lomani, au sa vola yani vei kemudou na veika oqo, mo dou kakua kina ni valavala ca. Ia kevaka sai valavala ca e dua, sa dua na noda Dautataro vei Tamada, ko Jisu Karisito, na yalododonu:

² ia sai bulubulu ni nodai valavala ca ko koya; a sa sega e na vuku ni noda walega, e na vuku talega ni nodra na kai vuravura kecega.

³ Ia na ka oqo eda sa kila kina ni da sa kilai koya, kevaka eda sa muria na nona vunau.

⁴ O koya sa kaya, Au sa kilai koya, ia ka sega ni muria na nona vunau, sa vosa lasu, a sa sega ni tu vei koya na dina.

⁵ Ia ko koya yadua sa muria na nona vosa, sa dina sa qai levu sara na nona loloma vua na Kalou: e na ka oqo eda sa kila ni da sa tu vata kaya.

⁶ O koya sa kaya erau sa tu vata kaya, e kilikili kaya me ia nai valavala sa vaka na nonai valavala.

⁷ Oi kemudou na veiwekani, sa sega ni dua na vunau vou kau sa vola vei kemudou, na vunau makawa ga ka tu vei kemudou mai nai vakatekivu. A vunau makawa na vosa dou a rogoca mai nai vakatekivu.

⁸ E dua tale, na vunau vou kau sa vola vei kemudou, ia na ka oqo sa dina vua, vei kemudou talega: ni sa qai takali na butobuto, a sa cila mai na rarama dina.

⁹ O koya sa kaya sa tu e na rarama, ka sa cata ga na wekana, sa tu ga e na butobuto ka yacova na siga oqo.

¹⁰ Sa tu e na rarama ko koya sa lomana na wekana, a sa sega vua na ka me tarabe kina.

¹¹ Ia sa tu e na butobuto ko koya sa cata na wekana, a sa ia nai valavala ni butobuto, a sa sega ni kila na vanua sa lako kina, ni sa vakabutobutotaka na matana na butobuto.

¹² Au sa vola vei kemudou, na luvequ lomani, ni sa bokoci na nomudou i valavala ca e na vuku ni yacana.

¹³ Au sa vola vei kemudou, na qase, ni dou sa kilai koya sa bula mai nai vakatekivu. Au sa vola vei kemudou, na cauravou, ni dou a rawai koya na vu-ni-ca. Au sa volavola vei kemudou, na gone lomani, ni dou sa kilai koya na Tamada.

¹⁴ Au a volavola vei kemudou, na qase, ni dou a kilai koya sa bula mai nai vakatekivu. Au a volavola vei kemudou, na cauravou, ni dou sa kaukauwa, a sa tu vei kemudou na vosa ni Kalou, ia dou a rawai koya na vu-ni-ca.

¹⁵ Dou kakua ni lomani vuravura, se na veika sa vakavuravura. Kevaka sa lomani vuravura e dua, sa sega e na lomana na loloma vua na Tamada.

¹⁶ Na ka kecega sa tu e vuravura, na gagadre ca ni yago, na gagadre ca ni mata, kei na dokadokai keda e na ka ni bula oqo, sa sega ni tubu maivei Tamada, mai vuravura ga.

¹⁷ Ia ko vuravura sa lako tani yani, kei na kena gagadre talega; ia ko koya sa cakava na ka sa vinakata na Kalou, sa tu dei ga ka sega ni mudu.

¹⁸ Oi kemudou na luvequ lomani, sa gauna emuri sara oqo: ia me vaka dou a rogoca ni na lako mai ko koya na meca i Karisito sa qai lewe vuqa na meca i Karisito edaidai; sai koya eda sa kila kina ni sa gauna emuri sara oqo.

¹⁹ Era a lako tani vei keda ko ira oqori, ia era a sega ga ni nodai tokani; ke ra sa nodai tokani, ke ra sa tiko ga kei keda: ia era sa lako tani me ra vakaraitaki ni ra a sega ni nodai tokani ko ira kecega ko ya.

²⁰ Ia sa tu vei kemudou nai lumu mai vua na Yalosavasava, ia dou sa kila kina na ka kecega.

²¹ Au sa sega ni volavola vei kemudou ni dou sa lecava nai vakavuvuli dina, o koya ga ni dou sa kila, ia ka sa sega sara ni tubu mai nai vakavuvuli dina na lasulasu.

²² O cei na daulasu, o koya ga sa cakitaka ni sa Karisito ko Jisu? Sai koya na meca i Karisito, o koya sa cakitaka na Tamada kei na Luvena.

²³ O koya yadua sa cakitaka na Luvena, sa sega ni tu vua ko Tamada; ko koya sa vakatusa na Luvena sa tu talega vua ko Tamana.

²⁴ O koya oqo me qai tu dei, e na lomamudou, na ka dou a rogoca mai nai vakatekivu. Kevaka sa tu ga vei kemudou na ka dou a rogoca mai nai vakatekivu, dou na tu ga vua na Luvena, vua talega na Tamada.

²⁵ Ia oqo na ka ni yalayala sa yalataka vei keda ko koya, na bula tawa mudu.

²⁶ A veika oqo kau sa volavola kina vei kemudou e na vukudra era sa vakacalai kemudou.

²⁷ Ia sa tu vei kemudou nai lumu dou a rawata maivei koya, a sa sega ni yaga me vakavulici kemudou e dua: ia me vaka sa vakavulici kemudou e na ka kecega na nona lumuti kemudou, a sa dina ga, ka sa sega ni lasu, io me vaka sa vakatavulici kemudou, dou tu dei vakakina vei koya.

²⁸ Ia oqo, na luvequ lomani, mo dou tu dei vua; me da doudou kina, ni na rairai mai ko koya, ka me da kakua ni madua vua e na nona lako mai.

²⁹ Kevaka dou sa kila sa yalododonu ko koya, dou sa kila sa sucu vei koya ko koya yadua sa caka dodonu.