1 Cesalonaika 5 - Vakavakadewa Makawa

Sa tukuna na siga ni lewa, a sa vakarota vei ira me ra gumatua sara e nai valavala vinaka kecega, a sa qai masulaki ira, ka sa tinia na nonai vola, 128.

¹ Ia sa sega ni yaga meu volavola vei kemudou, na veiwekani, meu tukuna na veigauna kei na veiyabaki.

² Ni dou sa kila dina sara vakataki kemudou ni na lako mai na siga ni Turaga, me vaka na daubutako e na bogi.

³ Ni ra kaya tiko, Sa mai vakacegu ka tiko vinaka; ena qai yaco vakidacala vei ira na rusa, me vaka na yaluma vua na yalewa sa bukete; a ra na sega ni dro tani rawa.

⁴ Io koi kemudou na veiwekani, dou sa sega ni tiko e na butobuto, me yacovi kemudou kina na siga ko ya me vaka na daubutako.

⁵ Oi kemudou kecega na gone ni rarama, kei na gone ni siga: eda sa sega ni gone ni bogi, se gone ni butobuto.

⁶ O koya oqo me da qai kakua ni moce, me vakataki ira na tani; me da vakatawa ga ka yalomatua.

⁷ Ia ko ira era daumoce era sa moce e na bogi; kei ira era daumateni era sa mateni e na bogi.

⁸ Ia koi keda, eda sa gone ni siga, me da yalomatua, me da vauca na vakabauta kei na loloma mei sasabai ni lomasereda: kei na vakanuinuitaka na bula, mei vakaruru ni uluda.

⁹ Ni sa sega ni lesi keda na Kalou me da rusa me da rawata ga na bula e na vuku ni noda Turaga ko Jisu Karisito;

¹⁰ o koya ka mate e na vukuda, me da bula vata kaya, se da yadra se da moce.

¹¹ O koya oqo mo dou qai ia na veivakacegui vakai kemudou, ka veivakatataki cake vakai kemudou, me vaka dou sa kitaka tiko.

¹² Ia keitou sa vakamasuti kemudou, na veiwekani, mo dou kilai ira era sa daucakacaka vei kemudou, ka lewai kemudou e na Turaga, ka vakavulici kemudou;

¹³ ka mo dou vakarokorokotaki ira, ka lomani ira vakalevu sara, e na vuku ni nodra cakacaka. Ka mo dou veivinakati vakai kemudou.

¹⁴ Ia keitou sa vakarota vei kemudou, na veiwekani: mo dou vunauci ira era sa talaidredre, vakacegui ira era sa yalolailai, vukei ira era sa malumalumu, dauvosoti ira kecega na tamata.

¹⁵ Raica me kakua e dua sa veisausaumitaka na ca vua e dua; ka mo dou dui muria tikoga na ka e vinaka vei kemudou yadua, vei ira talega na tamata kecega.

¹⁶ Dou reki tikoga.

¹⁷ Dou masu tikoga ka kua ni mudu.

¹⁸ Dou ia na vakavinavinaka e na vuku ni ka kecega: ni sa loma ni Kalou oqo vei kemudou e na vuku i Karisito Jisu.

¹⁹ Dou kakua ni bokoca na Yalo Tabu.

²⁰ Dou kakua ni beca na vosa ni parofisai.

²¹ Vakatovolea na ka kecega; taura matua na ka e vinaka.

²² Qarauni kemudou mai nai valavala kecega sa ca.

²³ Ia me vakasavasavataki kemudou sara na Kalou ni veivakacegui; ka me sa maroroi taucoko, me kakua sara ni cala, na yalomudou kei na lomamudou kei na yagomudou, ka yacova na siga ena lako tale mai kina na noda Turaga ko Jisu Karisito.

²⁴ Sa dina ko koya sa kacivi kemudou, ena kitaka talega ko koya.

²⁵ Oi kemudou na veiwekani, masulaki keitou.

²⁶ Dou loloma vei ira kecega na veiwekani ka dou veireguci e na yalosavasava.

²⁷ Au sa vakarota vei kemudou e na yaca ni Turaga, me wili nai vola oqo vei ira kecega na veiwekani yalosavasava.

²⁸ Me nomudou na loloma ni noda Turaga ko Jisu Karisito. Emeni.