1 Cesalonaika 4 - Vakavakadewa Makawa

Sa vakavulici ira ko koya me ra gumatua, ka yalosavasava, ka veilomani, ka daucakacaka, 112. Me ra kakua ni tagicaki ira vakalevu na mate, 1318.

¹ Sa vo ga na veiwekani, me keitou vakamasuti kemudou, ka vakarota e na vuku ni Turaga ko Jisu, mo dou uasivi cake vakalevu sara, me vaka dou a vakatavulici maivei keitou e nai valavala sa kilikili kei kemudou mo dou ia tiko, mo dou vinaka vua na Kalou.

² Ni dou sa kila nai vakaro keitou a tukuna vei kemudou e na vuku ni Turaga ko Jisu.

³ Ni sa loma ni Kalou oqo, mo dou yalosavasava, mo dou kakua ni dauyalewa:

⁴ ia mo dou dui kila yadua mo dou maroroya na yagomudou me vakasavasavataki ka me dokai;

⁵ me kakua ni rawai koya na dodomo ca, me vakataki ira na veimatanitu era sa sega ni kila na Kalou:

⁶ me kakua e dua me laki lawaki ca se vakacacana na kai nona e na ka oqo; ni sa cudrutaka na ka kecega oqo na Turaga, me vaka talega ni keitou a vakasalataki kemudou kina eliu ka dautukuna.

⁷ Ni sa sega ni kacivi keda na Kalou me da dukadukali, me da yalosavasava ga.

⁸ Ia ko koya sa beca, sa sega ni beca na tamata, sa beca na Kalou, o koya ka solia mai vei keda na nona Yalo Tabu.

⁹ Ia e na vuku ni veilomani vakaveitacini, sa sega ni yaga meu vola vei kemudou; ni dou sa vakatavulici mai vua na Kalou mo dou veilomani tiko.

¹⁰ Ka sa dina dou sa kitaka vakakina vei ira kece na veiwekani mai Masitonia taucoko: ia keitou sa vakamasuti kemudou, na veiwekani, mo dou uasivi cake vakalevu sara;

¹¹ ka mo dou gumatua sara mo dou tiko malua, ka dauia na nomudou cakacaka, ka daucakacaka e na ligamudou, me vaka keitou a vakarota vei kemudou;

¹² mo dou ia tiko nai valavala e kilikili kivei ira e taudaku, ka mo dou kakua ni dravudravua e na dua na ka.

¹³ IA kau sa vinakata, oi kemudou na veiwekani, mo dou kakua ni lecava e na vukudra era sa moce tu, mo dou kakua kina ni yasovaka, me vakataki ira na tani sa sega na nodra i nuinui.

¹⁴ Ia kevaka eda sa vakadinata ni sa mate ko Jisu ka tu cake tale mai, ena vaka talega kina ko ira era sa moce ni ra tu vata kei Jisu, ena kauti ira tale kei koya na Kalou.

¹⁵ Ni keitou sa tukuna ga oqo vei kemudou me vaka na vosa ni Turaga, ni da na sega ni liu vei ira era sa moce tu koi keda eda sa bula tiko me yacova na nona lako tale mai na Turaga.

¹⁶ Ni na lako sobu mai lomalagi ko koya na Turaga e na kaila, kei na domo ni agilose turaga, kei na davui ni Kalou: ena qai tu cake taumada ko ira na mate era sa tu vata kei Karisito:

¹⁷ emuri koi keda, eda sa bula tikoga, eda na kau cake vata kei ira e na o, me da veitata kei na Turaga e na macawa: ia ena vakakina eda na qai tiko vata kaya na Turaga ka sega ni mudu.

¹⁸ O koya mo dou qai ia na veivakacegui vakataki kemudou e na vosa oqo.