1 Cesalonaika 3 - Vakavakadewa Makawa

Sa vakatakila na nona loloma vei ira ko koya, ni sa talai Timoci vei ira, ka sa daureki e na vukudra, ka sa daumasulaki ira, ka sa via raici ira, me vakataudeitaki ira, 113.

¹ O koya oqo, ni keitou a sega tiko ni vosota rawa, keirau sa vinakata me keirau biu duaduaga mai Aceni;

² ia keirau sa talai Timoci, na weka i keirau, kei nai talatala ni Kalou, kei na neirau i tokani e nai tukutuku-vinaka kei Karisito, me vakataudeitaki kemudou, ka vakaroti kemudou e na vuku ni nomudou vakabauta:

³ me kakua e dua me vakayavalati e na vuku ni rarawa oqo: ni dou sa kila sai koya eda sa lesi kina.

⁴ Sa dina, ni keitou a tiko kei kemudou, keitou a tukuna mada eliu vei kemudou ni da na vakararawataki: a sa yaco vakakina, ia dou sa kila ga.

⁵ E na vuku ni ka oqo, niu a sega tiko ni vosota rawa, au a qai talatala yani meu kila na nomudou vakabauta, de sa veretaki kemudou beka ko koya na dauvere, a sa yaco kina me ka walega na neitou cakacaka.

⁶ Ia ni sa qai lako maivei kemudou ko Timoci vei keitou, a sa kauta mai nai rogorogo vinaka ni nomudou vakabauta kei na loloma, kei na nomudou nanumi keitou vinaka tikoga, kei na nomudou gadreva vakalevu mo dou raici keitou, me vaka na neitou gadreva talega me raici kemudou:

⁷ o koya oqo keitou sa vakacegui kina e na vukumudou, na veiwekani, e na vuku ni nomudou vakabauta, e na neitou rarawa kecega kei na vuturi:

⁸ ni keitou sa qai bula, kevaka dou sa tu dei tiko vua na Turaga.

⁹ Ia ka vakaevei na levu ni vakavinavinaka me keitou ia tale vua na Kalou e na vukumudou, e na vuku ni reki kecega keitou sa reki kina e na vukumudou e na mata ni noda Kalou:

¹⁰ ni keitou sa masu vakalevu sara e na bogi kei na siga, me keitou raica na matamudou, me keitou tinia vinaka talega na ka sa sega e na nomudou vakabauta?

¹¹ Ia me tuberi keitou mada vei kemudou na Kalou na Tamada, kei na noda Turaga ko Jisu.

¹² Ia me vakalevutaki kemudou na Turaga mo dou uasivi cake e na loloma vakai kemudou, ka vei ira kecega na tamata, me vaka na neitou vei kemudou:

¹³ me vakataudeitaka kina ko koya na yalomudou me tawa ca ni sa savasava e na mata ni Kalou na Tamada, ni na lako mai na noda Turaga ko Jisu Karisito kei ira vata kaya na nona yalosavasava kecega.