1 Cesalonaika 2 - Vakavakadewa Makawa

Sa tukuna ko koya ni ratou sa tukuna vaka vinaka nai tukutuku-vinaka kei Karisito vei ira, a ra sa vakadinata sara, 116. Sa kaya ni sa tarovi koya ko Setani me kakua ni laki raici ira, ia sa via lako vakalevu, 1720.

¹ Ni dou sa kila, na veiwekani, na neitou laki tiko vei kemudou, ni sa sega ni ka walega:

² ia ni keitou a vakararawataki mada eliu, ka vakacacani sara mai Filipai, me vaka dou sa kila, keitou sa qai doudou ga e na vuku ni neitou Kalou me tukuna sara vei kemudou nai tukutuku-vinaka ni Kalou, a sa ka levu na veivorati.

³ Ni sa sega sara ni ia na neitou i vakaro e na veivakacalai, se na yalo tawa-savasava, se na veivakaisini:

⁴ ia ni sa vinakati keitou na Kalou me keitou lesi me vunautaka nai tukutuku-vinaka, keitou sa vosa vakakina; sa sega ga me keitou vinaka vei ira na tamata, vua ga na Kalou, o koya sa lewa na yalo i keitou.

⁵ Ni dou sa kila keitou sa sega sara ni vosa vakaveicavilaki, se ia na kocokoco e nai lawaki rairai vinaka; sa kila na Kalou e segai:

⁶ keitou sega talega ni qara me ra dokai keitou ko ira na tamata, se koi kemudou, se ko ira na tamata tani, ia sa rawarawa me keitou veivakaocataki, ni keitou sai apositolo i Karisito.

⁷ Ia keitou a yalovinaka e na kemudou maliwa, me vaka na dau meimei ni sa susugi ira na luvena;

⁸ ia sa vakakina, ni keitou sa yalololoma sara vei kemudou, keitou sa vinakata me solia vei kemudou nai tukutuku-vinaka ni Kalou, ia ka sega ni koya walega, a neitou bula talega, ni keitou sa lomani kemudou vakalevu.

⁹ Ni dou sa nanuma, na veiwekani, na neitou daucakacaka kei na neitou oca ni keitou sa daucakacaka tiko e na bogi kei na siga, me keitou kakua sara kina ni vakabibitaki kemudou, ni keitou sa vunautaka vei kemudou nai tukutuku-vinaka ni Kalou.

¹⁰ Dou a raica dina, kei na Kalou talega, ni sa savasava ka dodonu ka sega ni cala na neitou i valavala e na kemudou maliwa, oi kemudou sa vakabauta:

¹¹ ni dou sa kila keitou sa vakarota vei kemudou ka vakamasuti kemudou ka vakadreti kemudou yadua, me vaka na tamana vei ira na luvena,

¹² mo dou ia nai valavala sa kilikili kei ira sa nona na Kalou, o koya sa kacivi kemudou ki na nona matanitu kei na vanua vakaiukuuku.

¹³ E na vuku ni ka oqo keitou sa tawa mudu kina ni vakavinavinaka vua na Kalou, ni dou a vakabauta na vosa ni Kalou dou a rogoca maivei keitou dou sa sega ni vakabauta me vaka e vosa ni tamata, me vaka ga na kena dina, na vosa ni Kalou, oqori sa cakacaka yaco talega vei kemudou sa vakabauta.

¹⁴ Ni dou a mai vakadamurimuri ira na veisoqosoqo lewe ni lotu ni Kalou mai Jutia era sa tu vata kei Karisito Jisu, oi kemudou na veiwekani: ni dou a vosota na veika ca maivei ira na kai nomudou, me vaka era sa vosota maivei ira na kai Jutia;

¹⁵ o ira era a vakamatea na Turaga ko Jisu, kei ira talega na parofita, a ra sa vakacacani keitou; a ra sa sega ni vinaka vua na Kalou, a ra sa veicati talega kei ira kecega na tamata;

¹⁶ a ra sa tarovi keitou ni keitou sa vosa vei ira era sa sega ni lotu me ra bula kina, era sa vakasinaita tikoga kina na nodra i valavala ca: ia sa yaco vei ira na cudruvi me ra sa ca sara.

¹⁷ IA koi keitou, ni keitou sa kau tani vakayago maivei kemudou, na veiwekani, e na gauna lekaleka ga, ia ka sa segai vakayalo, keitou sa gumatua sara kina ka gadreva vakalevu me raica na matamudou.

¹⁸ O koya oqo keitou a via lako kina vei kemudou, oi au ko Paula, kau a vakakina vakadua, io vakarua; ia ka sa tarovi keitou ko Setani.

¹⁹ Ia ka cava na neitou i nuinui se marau, se neitou i sala ni reki? sa sega li ni koi kemudou e na mata ni noda Turaga ko Jisu e na nona lako tale mai?

²⁰ Ni sai kemudou na vu ni neitou i ukuuku kei na vu ni neitou reki.