1 Cesalonaika 1 - Vakavakadewa Makawa

Sa tukuna vei ira ko Paula ni sa daunanumi ira tiko, ka masulaki ira, ni sa kila era sa lotu dina sara, 110.

¹ Koi keitou ko Paula, kei Silivenuse, kei Timoci, ki na nodra i soqosoqo lewe ni lotu na kai Cesalonaika, o ira sa tu vua na Kalou ko Tamada kei na Turaga ko Jisu Karisito: Me nomudou na loloma, kei na vakacegu, mai vua na Kalou ko Tamada, kei na Turaga ko Jisu Karisito.

² Keitou sa vakavinavinaka tikoga vua na Kalou e na vukumudou kecega ni keitou sa cavuti kemudou e na neitou masu;

³ keitou sa sega ni mudu ni nanuma na nomudou daucakacaka e na vakabauta, kei na nomudou oca e na loloma, kei na nomudou vosota e nai nuinui vua na noda Turaga ko Jisu Karisito, e na mata ni Kalou ko Tamada;

⁴ ni keitou sa kila na nomudou digitaki, oi kemudou na veiwekani ka daulomani kemudou na Kalou;

⁵ ni sa sega ni yaco vei kemudou na neitou i tukutuku-vinaka e na vosa walega, e na kaukauwa talega, kei na Yalo Tabu, ka ni sa vakadinadinataki vakalevu; ni dou sa kila na neitou i valavala e na vukumudou ni keitou a tiko vata kei kemudou.

⁶ Ia dou a dauvakadamurimuri keitou, kei na Turaga, ni dou a vakabauta na vosa e na veivakararawataki levu, kei na reki e na Yalo Tabu;

⁷ dou a yaco kina mo dou nodra i vakarau kecega era sa vakabauta mai Masitonia kei Akaia.

⁸ Ni sa rogovaki yani maivei kemudou na vosa ni Turaga ki Masitonia kei Akaia, a sa sega ni koya walega, sa yaco yani talega nai rogorogo ni nomudou vakabauta na Kalou ki na veiyasana kecega, a sa sega kina ni yaga me keitou kaya e dua na ka.

⁹ Ni ra sa tukuna ga ko ira e na vuku i keitou nai valavala ni neitou laki tiko vei kemudou, ni dou sa saumaki mai na veimatakau vua na Kalou, mo dou qarava na Kalou bula ka dina;

¹⁰ mo dou waraka talega na Luvena mai lomalagi, sa vakatura cake tale ko koya mai na mate, ko Jisu, o koya sa vakabulai keda mai na cudru sa bera mai.