Zakalíi 7 - MAWUXÓWÉMA

È blǎ nu bo dó flín hwenu e è gba Jeluzalɛ́mu é

¹ Hwenu e axɔ́sú Daliwúsi ɖo xwe ɛnɛ bló wɛ ɖo zinkpo jí ɔ́, sun tɔn tɛ́nnɛgɔ́ ɔ́ e è nɔ ylɔ́ ɖɔ “Kisiléwu” ɔ́ sín azǎn ɛnɛgɔ́ ɔ́ gbe ɔ́, Mawu Mavɔmavɔ ɖɔ xó ɖé nú mì.

² Betɛ́linu lɛ́ɛ kó sɛ́ Salɛsɛ́ɛ kpódó Hlɛgɛ́mu-Mɛlɛ́ki kpó dó sinsɛnxɔ Mawu Mavɔmavɔ Nǔbǐwúkpétɔ́ ɔ́ tɔn mɛ, bó ɖe mɛ dó yě jí, bónú yě ná yi sa vo nú Mawu Mavɔmavɔ,

³ bó ná kanbyɔ́ vɔ̌sánú-xwlémawutɔ́ lɛ́ɛ kpódó gbeyíɖɔ Mawu tɔn lɛ́ɛ kpó ɖɔ: “É lɛ́ byɔ́ ɖɔ mǐ ní nɔ́ ya avǐ ɖo sun atɔ́ɔ́ngɔ́ ɔ́ mɛ, bó nɔ́ blá nu lě e mǐ kó nɔ́ bló gbɔn sín do ɔ́ a?”

⁴ Énɛ́ ɔ́, Mawu Mavɔmavɔ Nǔbǐwúkpétɔ́ ɔ́ ɖɔ nú mì ɖɔ

⁵ má ɖɔ nú vɔ̌sánú-xwlémawutɔ́ lɛ́ɛ kpódó to ɔ́ mɛ nu lɛ́ɛ bǐ kpó ɖɔ: “Sín xwe kanɖé gban (70) ɖíe ɖokpóó wɛ, mi nɔ ɖo nu blá wɛ, bó nɔ ɖo vo sa wɛ ɖo sun atɔ́ɔ́ngɔ́ ɔ́ kpódó tɛ́nwegɔ́ ɔ́ kpó mɛ. É ka nyí ɖɔ mi ná nyɔ́ ɖo así ce wútu wɛ mi nɔ ɖo nu énɛ́ lɛ́ɛ blá wɛ ǎ.

⁶ Mi ɖo nǔ ɖu wɛ, bó ɖo ahan nu wɛ ɔ́, gbɛ mitɔn ɖu wɛ mi ɖe kpowun.”

⁷ Đ'ayǐ ɔ́, Mawu Mavɔmavɔ kó nɔ ɖɔ xó mɔ̌hunkɔtɔn lɛ́ɛ nú mi gbɔn gbeyíɖɔ tɔn nukɔntɔn lɛ́ɛ jí. Hwenɛ́nu ɔ́, gbɛtɔ́ gɔ́ Jeluzalɛ́mu toxo ɔ́, kpódó toxo e lɛ́ lɛ̌ dó e lɛ́ɛ kpó, bɔ yě bǐ ɖo vivo mɛ. Hwe énɛ́ ɔ́ nu ɖokpó ɔ́, gbɛtɔ́ ɖo to ɔ́ sín afɔligbé, bó lɛ́ ɖo ayǐkúngban wɛnjɛ ɔ́ jí.

⁸ Mawu Mavɔmavɔ Nǔbǐwúkpétɔ́ ɔ́ ɖɔ nú mì ɖɔ:

⁹ “Mi ɖɔ hwɛ jlɔ́jlɔ́, mi yí wǎn nú miɖée, bó nyɔ́ xomɛ dó miɖée wú.

¹⁰ Mi ma táfú asúkúsi lɛ́ɛ ó, mi ma táfú tɔ́cyɔvǐ lɛ́ɛ ó, mi ma táfú jǒnɔ lɛ́ɛ ó, mi ma táfú wamamɔnɔ lɛ́ɛ ó, mi ma ka lin nǔ nyanya ɖěbǔ dó miɖée wú ó.”

¹¹ Mɛ lɛ́ɛ ká gbɛ́ ɖɔ émí kún ná se ó, yě nyɛ́ abɔ̌ d'é mɛ, bó sú tó, ɖó yě táá wá se.

¹² Yě hɛn ayixa yěɖée tɔn syɛ́n awǐnnya ɖɔhun, bónú yě ní má se kplɔ́n e Mawu Mavɔmavɔ Nǔbǐwúkpétɔ́ ɔ́ sín Yɛ ɖo nǐná yě wɛ gbɔn gbeyíɖɔ Mawu tɔn nukɔntɔn lɛ́ɛ jí é ó. Énɛ́ ɔ́, Mawu Mavɔmavɔ sin xomɛ dó yě, bɔ é syɛ́n ɖésú.

¹³ Mawu Mavɔmavɔ ɖɔ: “Ée un ylɔ́ yě bɔ yě dǒ tókúse mɛ ɔ́, yě lɔ wá ylɔ́ mì ɔ́, nyi lɔ ná dó tókúse mɛ.

¹⁴ Un gba yě kpé akɔta tɛnmɛ tɛnmɛ lɛ́ɛ mɛ, yě tunwun akɔta énɛ́ lɛ́ɛ kpɔ́n gbeɖé ǎ. Yě jǒ to yětɔn dó nyi vɔ̌. Mɛ ɖé sɔ́ nɔ yi to ɔ́ mɛ ǎ, mɛ ɖé ká sɔ́ nɔ́ tɔ́n sín mɛ ǎ. To e mɛ yě nɔ́ ɖu gbɛ ɖe ɖ'ayǐ ɔ́, yě zé dó húzú gbětótló.”