Zakalíi 6 - MAWUXÓWÉMA

Nǔmimɔ tántɔngɔ́ ɔ́: ahwankɛkɛ́ví ɛnɛ lɛ́ɛ

¹ Un lɛ́ mɔ nǔ ɖokpó. Un mɔ ahwankɛkɛ́ví ɛnɛ, bɔ yě ɖo tíntɔ́n sín ganvɔsó we tɛ́ntin wɛ.

² È sin ahwankɛkɛ́ví nukɔntɔn ɔ́ dó sɔ́ vɔvɔ ɖé lɛ́ɛ wú, bó sin wegɔ́ ɔ́ dó sɔ́ wiwi ɖé lɛ́ɛ wú.

³ È sin ahwankɛkɛ́ví atɔngɔ́ ɔ́ dó ahwansɔ́ wěwé ɖé lɛ́ɛ wú, bó sin ɛnɛgɔ́ ɔ́ dó sɔ́ wlanwlan ɖé lɛ́ɛ wú.

⁴ Bɔ un kanbyɔ́ wɛnsagun e nɔ ɖɔ xó nú mì ɔ́ ɖɔ: “Sɛ́mɛɖó ce, étɛ́ nyí wɛ sɔ́ énɛ́ lɛ́ɛ kpódó ahwankɛkɛ́ví énɛ́ lɛ́ɛ kpó ká ɖe?”

⁵ Bɔ é yí gbe nú mì ɖɔ: “Wɛ̌kɛ́zo ɛnɛ lɛ́ɛ wɛ. Aklúnɔ e kpa acɛ dó ayǐkúngban ɔ́ bǐ nu ɔ́ gɔ́n wɛ yě nɔ́ nɔ. Gɔ̌n tɔn wɛ yě gosín din.”

⁶ Ahwankɛkɛ́ví e dɔn wɛ sɔ́ wiwi lɛ́ɛ ɖe ɔ́, totaligbé wɛ yě dɔn ɖidó. Sɔ́ wěwé lɛ́ɛ jɛ gǔdo yětɔn, bɔ wlanwlan lɛ́ɛ ɖidó tofɔligbé.

⁷ Sɔ́ vɔvɔ lɛ́ɛ dɔn yětɔn bó ɖidó, bó byɔ́ ɖɔ émí ní gbɔn ayǐkúngban ɔ́ bǐ jí, bɔ é ɖɔ nú yě ɖɔ: “Mi bo yi.” Bɔ yě yi gbɔn ayǐkúngban ɔ́ bǐ jí.

⁸ Énɛ́ ɔ́, é ylɔ́ mì, bó ɖɔ nú mì ɖɔ: “Kpɔ́n! Mɛ e ɖidó totaligbé lɛ́ɛ ɔ́, yě ná dɔn xomɛsin ce dó gbě énɛ́ ɔ́ jí.”

È blǎ ta nú Jozuwée

⁹ Mawu Mavɔmavɔ ɖe gbe nú mì ɖɔ:

¹⁰ “Yǐ nǔníná e mɛ e è kplá yi kannumɔgbénu lɛ́ɛ ná, gbɔn Heludayi kpódó Toviya kpó, kpódó Yedaya kpó jí lɛ́ɛ. A nǎ yi Yociya, Sefaníya ví ɔ́ xwé égbé. Xwé énɛ́ ɔ́ gbe wɛ yě jɛ hwenu e yě lɛ́ kɔ sín Babilɔ́nu wá é.

¹¹ A nǎ zé kpatágan kpódó siká kpó, bó ná dó bló ɖuɖéjígbákún ɖokpó ná, bó ná xwe nú vɔ̌sánú-xwlémawutɔ́ ɖaxó Jozuwée Yexosadaki ví ɔ́.

¹² A nǎ ɖɔ n'i ɖɔ: Mawu Mavɔmavɔ Nǔbǐwúkpétɔ́ ɔ́ ɖɔ: ‘Gbɛtɔ́ ɖokpó ɖo fí, bɔ è nɔ ylɔ́ ɖɔ Kun.’ Afɔ tɔn lɛ́ɛ glɔ́ wɛ gbɛ ná tɔ́n kun sín; é wɛ ná vɔ́ sinsɛnxɔ ce gbá.

¹³ Nǔgbó wɛ, é wɛ ná vɔ́ gbá. Axɔ́súwuntun lɛ́ɛ ná nɔ wǔ tɔn, bɔ é ná ɖo axɔ́súzinkpo tɔn jí, bó ná kpa acɛ nú togun ɔ́. Vɔ̌sánú-xwlémawutɔ́ ɖokpó ná ɖo akpá tɔn; yě mɛ we lɛ́ɛ ɖó gbe kpɔ́, bɔ nǔ ná vɔ ɖ'é wú.

¹⁴ “Đuɖéjígbákún ɔ́ ná nɔ sinsɛnxɔ ɔ́ mɛ, bɔ è nǎ nɔ́ dó flín Heludayi kpódó Toviya kpó, kpódó Yedaya kpó, kpódó xomɛnyínyɔ́ Sefaníya ví ɔ́ tɔn kpó.”

¹⁵ Mɛ ɖé lɛ́ɛ ná gosín zɔ wá, bó ná dó alɔ mɛ e ɖo sinsɛnxɔ Mawu Mavɔmavɔ tɔn vɔ́ gbá wɛ lɛ́ɛ. Hwe énɛ́ ɔ́ nu ɔ́, mi ná tunwun ɖɔ Mawu Mavɔmavɔ Nǔbǐwúkpétɔ́ ɔ́ wɛ sɛ́ mì dó mi gɔ́n nǔgbó. Nú mi se tónú nú Mawu Mavɔmavɔ, Mawu mitɔn ɔ́, nǔ ná nyí mɔ̌.