Zakalíi 3 - MAWUXÓWÉMA

Nǔmimɔ ɛnɛgɔ́ ɔ́: Vɔ̌sánú-xwlémawutɔ́ ɖaxó Jozuwée

¹ Mawu Mavɔmavɔ ɖe vɔ̌sánú-xwlémawutɔ́ ɖaxó Jozuwée xlɛ́ mì, bɔ é ɖo te ɖo wɛnsagun Mawu Mavɔmavɔ tɔn sín nukɔn; Satáan ka ɖo te ɖo ɖisí tɔn xwé bó ná dó hwɛ ɛ.

² Wɛnsagun Mawu Mavɔmavɔ tɔn ɔ́ ɖɔ nú Satáan hwɛdómɛtɔ́ ɔ́ ɖɔ: “Mawu Mavɔmavɔ ní sú nu towe dó Satáan! Ɛɛn, éyɛ́ mɛ e sɔ́ Jeluzalɛ́mu ɔ́ ní sú nu towe dó! Jozuwée ɔ́, myɔtín e è ɖe sín myɔ mɛ ɔ́ ɖɔhun wɛ é cí nǔgbó ǎ cé?”

³ Jozuwée ɔ́, awu kwíji kwíji ɖé mɛ wɛ é ɖe, bó ɖo te ɖo wɛnsagun ɔ́ nukɔn.

⁴ Wɛnsagun ɔ́ ná gbe mɛ e kpódó é kpó zɔn lɛ́ɛ ɖɔ yě ní ɖe awu lɛ́ɛ n'i, bó ká ɖɔ nú Jozuwée ɖɔ: “Un ɖe hwɛ e a hu lɛ́ɛ sín kɔ nú we, bó ná fɔ acɔ́wu dó nú we.”

⁵ É lɛ́ ná gbe ɖɔ è nǐ zé tablá mímɛ́ xwe n'i. Đěe é ɖɔ mɔ̌ ɔ́, è zě tablá mímɛ́ ɖokpó xwe nú Jozuwée, bó zé awu dó n'i ɖo wɛnsagun ɔ́ nukún mɛ.

⁶ Énɛ́ ɔ́ gúdo ɔ́, wɛnsagun ɔ́ ɖɔ nú Jozuwée ɖɔ:

⁷ Akpá e Mawu Mavɔmavɔ Nǔbǐwúkpétɔ́ ɔ́ dó ɔ́ ɖíe: “Nú a nyi sɛ́n ce lɛ́ɛ ɔ́, nú a wa nǔ ɖó tito ce lɛ́ɛ jí ɔ́, a nǎ kpa acɛ dó sinsɛnxɔ ce nu, bó ná kpa acɛ gbɔn kɔ́xo tɔn lɛ́ɛ ta, bɔ un ná zé we dó mɛ e ɖo fí, bó ɖo azɔ̌ wa nú mì wɛ lɛ́ɛ mɛ.”

Mawu ná ɖe mɛsɛntɔ́ tɔn xlɛ́

⁸ Wɛnsagun ɔ́ ɖɔ: “Hǔn Jozuwée, hwi vɔ̌sánú-xwlémawutɔ́ ɖaxó ɔ́, ɖǒtó: mi hǎgbɛ́ tɔn lɛ́ɛ, mi vɔ̌sánú-xwlémawutɔ́ e nyí hwlɛngán e jǎwe ɔ́ sín xlɛ́ lɛ́ɛ ɔ́, mi lɔmɔ̌ ní ɖótó. Un ná ɖe mɛsɛntɔ́ ce e è nɔ ylɔ́ ɖɔ ‘Kun’ ɔ́ xlɛ́.

⁹ Un dó awǐnnya ɖé do nyi Jozuwée nukɔn; awǐnnya ɖokpó géé wɛ, bó ká ɖó nukún tɛ́nwe, bɔ yě nɔ́ kɔ́n . Nyɛ ɖésúnɔ ná wlán nǔɖé d'é wú, bó ná ɖe hwɛ e ɖo to élɔ́ hɛn kwíji wɛ lɛ́ɛ síin kéze ɖokpó mɛ. Ɛɛn, un ɖɔ mɔ̌! Nyɛ Mawu Mavɔmavɔ Nǔbǐwúkpétɔ́ ɔ́ wɛ ɖɔ mɔ̌.

¹⁰ Gbe énɛ́ ɔ́ gbe ɔ́, mi ná ylɔ́ miɖée kplé dó vǐwungbo mitɔn lɛ́ɛ, kpódó fígigbo mitɔn lɛ́ɛ kpó mɛ, bó ná vo bó j'awǎ.”