Zakalíi 13 - MAWUXÓWÉMA

¹ Mawu Mavɔmavɔ Nǔbǐwúkpétɔ́ ɔ́ lɛ́ ɖɔ: “Hwenɛ́nu ɔ́, sin ná sa sín tɔjɔtɛn ɖé mɛ, bó ná lɛ hwɛ e Davídi ví lɛ́ɛ kpó Jeluzalɛ́munu lɛ́ɛ kpó hu ɔ́ sín kɔ nú yě, bó ná lɛ nǔ blíblí e yě wa lɛ́ɛ sín kɔ nú yě.”

Mawu sú vodún lɛ́ɛ kpó gbeyíɖɔnyíjɛtɔ́ lɛ́ɛ kpó sín kún dó

² Hwenɛ́nu ɔ́, Mawu Mavɔmavɔ Nǔbǐwúkpétɔ́ ɔ́ ɖɔ: “Un ná sú vodún lɛ́ɛ sín kún dó ɖo to ɔ́ mɛ, bɔ mɛ ɖěbǔ sɔ́ ná nɔ́ flín yě ǎ. Mɔ̌ ɖokpó ɔ́, un ná sú mɛ e nɔ ylɔ́ yěɖée ɖɔ gbeyíɖɔ ce lɛ́ɛ sín kún dó, bó ná ɖe nǔ e nɔ́ zɔ́n bɔ mi nɔ yí wǎn nú vodún sinsɛn ɔ́ sín ayi mitɔn mɛ.

³ Ényí mɛɖé sɔ́ ɖo adingban ɖó wɛ, bó ɖɔ nyǐkɔ ce mɛ ɖɔ xó dó wɛ émí ɖe ɔ́, tɔ́ e ji i ɔ́, kpó nɔ e ji i ɔ́ kpó ná ɖɔ n'i ɖɔ: ‘A nǎ kú, ɖó xó ɖɔ dó Mawu Mavɔmavɔ nyǐkɔ mɛ wɛ a ɖe bo ɖɔ, adingban kɛ́ɖɛ́ ɖó wɛ a ka ɖe.’ Bɔ hwenu e é ná ɖo xó ɔ́ ɖɔ wɛ ɔ́, mɛ e ji i lɛ́ɛ ɖésú ná xo e hu.

⁴ Hwenɛ́nu ɔ́, winnyá ná hu gbeyíɖɔnyíjɛtɔ́ lɛ́ɛ dó nǔmimɔ yětɔn lɛ́ɛ wú, hwenu e yě ná ɖo xó ɖɔ dó nyǐkɔ ce mɛ wɛ é. Yě sɔ́ ná nɔ glá dó awu gaga fúnnɔ e gbeyíɖɔ ce lɛ́ɛ nɔ́ dó ɔ́ ɖě, bó dó blɛ́ mɛ ǎ.

⁵ Yě mɛ ɖokpó ɖokpó ná ɖɔ: ‘Nyɛ ɔ́, un nyí gbeyíɖɔ Mawu tɔn ǎ; glesi wɛ un nyí. Sín vǔ ɖokpóó wɛ un kó ɖó ayǐkúngban.’

⁶ Ényí mɛɖé kanbyɔ́ ɛ ɖɔ: ‘Fítɛ́ wɛ a ba akpa e ɖo akɔ́nnu towe lɛ́ɛ sín’ ɔ́, é ná nɔ́ yí gbe ɖɔ: ‘Xɔ́ntɔn ce lɛ́ɛ sín xwé gbe wɛ è gblě wǔ mì ɖe .’ ”

Mawu Mavɔmavɔ wɛ nyí Mawu

⁷ Mawu Mavɔmavɔ Nǔbǐwúkpétɔ́ ɔ́ ɖɔ: “Hwǐ, sí te, tɔ́n ahwan lɛ̌ngbɔ́nyitɔ́ ɔ́, lɛ̌ngbɔ́nyitɔ́ e un sɔ́ bɔ é ná wa azɔ̌ xá mì é. Hu i, énɛ́ ɔ́ lɛ̌ngbɔ́ lɛ́ɛ ná gba dó, bɔ un ná tɔ́n ahwan lɛ̌ngbɔ́ e má ɖó hlɔ̌nhlɔ́n ǎ lɛ́ɛ.”

⁸ Mawu Mavɔmavɔ lɛ́ ɖɔ: “Mɛ e ɖo to ɔ́ mɛ lɛ́ɛ ɔ́, è mǎ yě ɖó donu atɔn ɔ́, donu we ná kú, ɖokpó e kpo ɔ́ jɛ́n ná gán.

⁹ Un ná zé atɔnvlɔ́ɖó énɛ́ ɔ́ dó myɔ mɛ, bó ná ɖe nǔ kwíji e ɖo yě wú ɔ́ síin, lě e è nɔ zé kpatágan dó myɔ mɛ bó nɔ ɖe nǔ blíblí e ɖ'é mɛ lɛ́ɛ síin é ɖɔhun. Un ná tɛ́n yě kpɔ́n lě e è nɔ tɛ́n siká kpɔ́n gbɔn ɖo myɔ mɛ é. Énɛ́ ɔ́, yě ná sú xó ylɔ́ mì, bɔ un ná yí gbe nú yě. Un ná ɖɔ: ‘Togun ce wɛ mi nyí’, bɔ yě ná nɔ yí gbe ɖɔ: ‘Nǔgbó wɛ Mawu Mavɔmavɔ, hwi wɛ nyí Mawu mǐtɔn!’ ”