Zakalíi 11 - MAWUXÓWÉMA

È hu acɛ nú acɛkpikpa ɖaxó ɖaxó lɛ́ɛ

¹ Libáan e, hun hɔn towe lɛ́ɛ kɛ́, bónú myɔ ní fyɔ́ sɛ́dlutín towe lɛ́ɛ.

² Siplɛtín lɛ́ɛ mi, mi wɛn azɔn, è sɛ́n sɛ́dlutín lɛ́ɛ; atín ɖagbe ɖagbe énɛ́ lɛ́ɛ ɔ́, è sú kún yětɔn dó. Basáni sín atín ɖaxó ɖaxó lɛ́ɛ mi, mi wɛn azɔn, ɖó è xo zungbó mitɔn e mɛ mɛ ɖé ma nɔ́ sixú byɔ́ ǎ é.

³ Lɛ̌ngbɔ́nyitɔ́ togun lɛ́ɛ tɔn ɖo azɔn wɛn wɛ, ɖó hwenu e yě ná xɔ susu dó ɔ́ kó dín. Kinnikínní lɛ́ɛ ɖo avǐ ya wɛ, ɖó è xo zun e mɛ yě nɔ́ nɔ, ɖo Judɛ́ɛn tɔ ɔ́ tó lɛ́ɛ.

Lɛ̌ngbɔ́nyitɔ́ we lɛ́ɛ

⁴ Mawu Mavɔmavɔ, Mawu ce ɖɔ nú mì gbe ɖokpó ɖɔ: “Kpé nukún dó lɛ̌ngbɔ́ e ɖo te bɔ è nǎ wá kplá yi lanhutɛn lɛ́ɛ wú.

⁵ Mɛ e xɔ yě lɛ́ɛ nɔ́ gbo gbe yě, bó ká tunwun ɖɔ émí ɖo nǔ wa nyi do wɛ ǎ. Mɛ e ka sa yě lɛ́ɛ nɔ́ ɖɔ: ‘Mi wá mǐ ní dó kú nú Mawu Mavɔmavɔ, mǐ ɖíe jɛ dɔkun e!’ Lɛ̌ngbɔ́nyitɔ́ yě ɖésúnɔ tɔn lɛ́ɛ ɖésú kú nǔbláwǔ nú yě ǎ.

⁶ Nyɛ Mawu Mavɔmavɔ ɔ́ lɔmɔ̌ ɖo ɖiɖɔ wɛ ɖɔ un kún ná kú nǔbláwǔ nú mɛ e ɖo ayǐkúngban jí lɛ́ɛ ó. Un ná jó gbɛtɔ́ ɖokpó ɖokpó dó nyi mɛ e ɖo akpá tɔn ɔ́ kpódó axɔ́sú kpó sín acɛ mɛ. Axɔ́sú lɛ́ɛ ná sú nǔ e ɖo ayǐkúngban jí lɛ́ɛ sín kún dó. Un ka ɖo mɛ ɖěbǔ ná hwlɛ́n gán sín alɔ yětɔn mɛ wɛ ǎ.”

⁷ Ée Mawu Mavɔmavɔ ɖɔ mɔ̌ nú mì ɔ́, un jɛ nukún kpé dó lɛ̌ngbɔ́ e lɛ̌ngbɔ́satɔ́ lɛ́ɛ sɔ́ ɖo te bɔ è nǎ wá kplá yi lanhutɛn lɛ́ɛ wú jí. Lɛ̌ngbɔ́ énɛ́ lɛ́ɛ sín gbɛ blá wǔ hú ɖě lɛ́ɛ bǐ tɔn. Un zé lɛ̌ngbɔ́nyitɔ́kpogɛ we: un sun nyǐ kpogɛ ɔ́ ɖokpó ɖɔ “Fɛ́nú”, bó sun nyǐ wegɔ́ ɔ́ ɖɔ “Bǔninɔ”, bó jɛ nukún kpé dó lɛ̌ngbɔ́ lɛ́ɛ wú jí.

⁸ Un zé sun ɖokpó ɖó te bo ɖe ɖɛ lɛ̌ngbɔ́nyitɔ́ yětɔn atɔn lɛ́ɛ. Un sɔ́ ɖó suúlu ɖěbǔ dó yě wú ǎ. Yě lɔmɔ̌ ká sɔ́ ba xó ce ɖě ǎ.

⁹ Énɛ́ ɔ́, un ɖɔ nú yě ɖɔ: “Un sɔ́ ná kpé nukún dó mi wú ɖě ǎ. Mɛ e ná kú lɛ́ɛ ní kú, mɛ e è ná hu lɛ́ɛ ɔ́, è nǐ hu yě; yě mɛ e ná kpo lɛ́ɛ ní wlí yěɖée ɖu.”

¹⁰ Un zé lɛ̌ngbɔ́nyitɔ́ kpogɛ Fɛ́nú ɔ́ bó wɛ́n bó dó gba akɔ e un jɛ xá togun lɛ́ɛ bǐ é ná.

¹¹ Gbe énɛ́ ɔ́ gbe wɛ un gba akɔ e un jɛ xá yě ɔ́, bɔ lɛ̌ngbɔ́satɔ́ e ɖo kpínkpɔ́n mì wɛ lɛ́ɛ mɔ ɖɔ Mawu Mavɔmavɔ wɛ ɖo xó ɖɔ wɛ gbɔn nǔ e wa wɛ un ɖe lɛ́ɛ mɛ.

¹² Énɛ́ ɔ́, un ɖɔ nú yě ɖɔ: “Ényí é jló mi, nú mi ná sú azɔ̌ e un wa ɔ́ sín axɔ́ mì hǔn, mi sú mì. Mi ma ka ná sú mì ǎ hǔn, mi gbɔ.” Ée un ɖɔ mɔ̌ ɔ́, yě xa kpatágankwɛ́ gban (30), bó dó sú azɔ̌ e un wa ɔ́ sín axɔ́ mì.

¹³ Mawu Mavɔmavɔ ɖɔ nú mì ɖɔ: “É má nyí akwɛ́ e un xɔ yě nukún mɛ ɔ́ nɛ́ a? Zě kpatágankwɛ́ lɛ́ɛ yi jó nú fletuntɔ́.” Ée é ɖɔ mɔ̌ ɔ́, un bɛ́ kpatágankwɛ́ gban (30) lɛ́ɛ yi jó nú fletuntɔ́ ɖo sinsɛnxɔ Mawu Mavɔmavɔ tɔn mɛ.

¹⁴ Énɛ́ ɔ́ gúdo ɔ́, un hɛn lɛ̌ngbɔ́nyitɔ́ kpogɛ ce “Bǔninɔ” ɔ́ wɛ́n, bó dó gba nɔví nɔví nyínyí e ɖo Judáanu lɛ́ɛ kpó Izlayɛ́li ví lɛ́ɛ kpó tɛ́ntin ɔ́ dó.

¹⁵ Mawu Mavɔmavɔ lɛ́ ɖɔ nú mì ɖɔ: “Din ɔ́, bo wa azɔ̌ lɛ̌ngbɔ́nyitɔ́ xlonɔ ɖɔhun.

¹⁶ Đó un ná sɛ́ lɛ̌ngbɔ́nyitɔ́ ɖěvo dó to ɔ́ mɛ: é ná nɔ́ kpé nukún dó lɛ̌ngbɔ́ e è sɔ́ ɖó te bo ná wá hu lɛ́ɛ wú ǎ; é ná ba éé bú lɛ́ɛ ǎ, é ná blá akpa nú éé gblé wǔ lɛ́ɛ ǎ; é ká ná ná nǔɖuɖu éé kpo ɖo ganjí lɛ́ɛ é ǎ. Nǔ e é ná wa ɔ́ wɛ nyí ɖɔ é ná ɖu lɛ̌ngbɔ́ e dó jǒ hú ɖě lɛ́ɛ bǐ é. É ná ɖu káká bó ɖu afɔkpa tɔn lɛ́ɛ d'é jí.

¹⁷ Heelú lɛ̌ngbɔ́nyitɔ́ nǔvɔ́nɔ e nɔ́ jó lɛ̌ngbɔ́ tɔn lɛ́ɛ dó é. Hwǐ ní vún awa tɔn, bó tɔ́n nukún tɔn ɖisíxwé tɔn ɔ́. Alɔ tɔn ní kú. Nukún tɔn ɖisíxwé tɔn ɔ́ ní ba nǔ kpo!”