Zakalíi 10 - MAWUXÓWÉMA

Mawu Mavɔmavɔ wɛ è nǎ nɔ́ byɔ́ nǔ, é nyí vodún lɛ́ɛ wɛ ǎ

¹ Mi byɔ́ jǐ Mawu Mavɔmavɔ, mi byɔ́ xwejí. É wɛ nɔ́ bló bɔ jɔhɔn nɔ́ nyi. É ná ná jǐ mi, bɔ é ná ja ɖésú kpó zǐngídi kpó. É ná bló bɔ jinukún ná wú ganjí bɔ ji ná jɛ ɖo mɛ ɖokpó ɖokpó sín gle mɛ.

² Vodún e kan nǔ byɔ́ wɛ mi nɔ ɖe lɛ́ɛ ɔ́, adingban ɖó nú mi wɛ yě nɔ́ ɖe. Bokɔ́nɔ lɛ́ɛ ɔ́, nǔ e kan wɛ yě nɔ́ ɖe bó nɔ́ ɖo ɖiɖɔ nú mi wɛ lɛ́ɛ ɔ́, nǔvú ɖó wɛ yě nɔ́ ɖe. Dlɔ̌ e tínmɛ nú mi wɛ yě nɔ́ ɖe lɛ́ɛ nyí nǔɖé wa nú ǎ. Hwihwɛ́ e xo mi wɛ yě nɔ́ ɖe ɔ́, blɛ̌blɛ́ mi wɛ yě nɔ́ ɖe. Énɛ́ ɔ́ wú wɛ togun ɔ́ ɖo flúflú wɛ wǔbláwúblá, kanlin e ma ɖó nyinyitɔ́ ǎ é ɖɔhun.

Mawu Mavɔmavɔ dó akpá ɖɔ émí ná hwlɛ́n togun ɔ́ gán

³ Mawu Mavɔmavɔ ɖɔ: “Un sin xomɛ dó lɛ̌ngbɔ́nyitɔ́ lɛ́ɛ. Un ná dɔn tó nú gbɔ̌sú lɛ́ɛ . Đó nyɛ Mawu Mavɔmavɔ Nǔbǐwúkpétɔ́ ɔ́, un ná kpé nukún dó kanlinkpó ce, Judáa togun ɔ́ wú. Un ná kplá ɛ yi ahwan fun gbé sɔ́ e xɔ susu é ɖɔhun.

⁴ Judáa togun ɔ́ mɛ wɛ gǎn alɔkpa alɔkpa lɛ́ɛ ná tɔ́n sín, bó ná syɛ́n awǐnnya e ɖo xɔzwe jí é ɖɔhun. Yě ná syɛ́n goxɔ sín dotín ɖɔhun. Yě ná ɖó hlɔ̌nhlɔ́n da e è nɔ dó fun ahwan ná é ɖɔhun.

⁵ Yě ná nyí ahwanfuntɔ́ syɛ́nsyɛ́n, bó ná nɔ́ gbídí mɛ e ɖo ahwan fun xá yě wɛ lɛ́ɛ ɖó afɔ wú babá e ɖo ali jí é ɖɔhun. Yě ná fun ahwan gbɔn mɔ̌ ɖó nyɛ Mawu Mavɔmavɔ ɔ́, un ɖo kpɔ́ xá yě. Énɛ́ ɔ́, winnyá ná hu kɛntɔ́ sɔ́xátɔ́ lɛ́ɛ.

⁶ Un ná dó wǔsyɛ́n lanmɛ nú togun Judáa tɔn ɔ́; un ná hwlɛ́n togun Izlayɛ́li tɔn ɔ́ gán. Un ná lɛ́ kɔ nú yě wá to yětɔn mɛ, bó ná ɖe wǎn yíyí e un ɖó nú yě ɔ́ xlɛ́ yě, un gbɛ́ yě kpɔ́n gbeɖé ǎ ɖɔhun. Mawu Mavɔmavɔ, Mawu yětɔn wɛ un nyí bó ná yí ɖɛ yětɔn.

⁷ Eflayímunu lɛ́ɛ ná cí ahwanfuntɔ́ syɛ́nsyɛ́n ɖé ɖɔhun. Yě ná j'awǎ mɛ e nu vɛ̌ɛn é ɖɔhun. Vǐ yětɔn lɛ́ɛ mɔ mɔ̌ ɔ́, xomɛ ná hun yě, awǎjijɛ ná gɔ́ ayi mɛ nú yě ɖó nyɛ Mawu Mavɔmavɔ ɔ́ wú.

⁸ Un ná ylɔ́ togun ce kplé, ɖó un ko ɖɔ un ná hwlɛ́n yě gán, bɔ yě ná gba kún lě e yě kó gba kún gbɔn ɖ'ayǐ é.

⁹ Un gba yě kpé togun lɛ́ɛ mɛ. Yě ná bó ɖo zɔ ɔ́, yě ná nɔ flín mì sɛ́ dó. Yě ná nɔ dɔ̌n kpó vǐ yětɔn lɛ́ɛ kpó, bó ná lɛ́ kɔ wá.

¹⁰ Un ná ɖe yě tɔ́n sín Ejípu kpó Asilíi kpó, bó ná lɛ́ kɔ nú yě wá to yětɔn lɛ́ɛ mɛ. Un ná lɛ́ kplá yě yi Galadi kpó Libáan kpó. Tɛn ka na lɛ́ kpé yě ɖo fí énɛ́ lɛ́ɛ ǎ.

¹¹ Yě ná dó asá adǎngbomɛ xu ɔ́. Nyɛ Mawu Mavɔmavɔ ɔ́, un ná hwíhwɛ́ aslɔkɛ́ lɛ́ɛ, tɔsisa ɖaxó Nilu ɔ́ ná xú bǐ. Go e yí wɛ Asilíi ɖe ɔ́ ná yi xɔ. Ejípu sɔ́ ná ɖó acɛ ɖěbǔ ǎ.

¹² Un ná dó wǔsyɛ́n lanmɛ nú togun ce, bɔ yě ná nɔ wa nǔ e nɔ nyɔ́ nukún ce mɛ lɛ́ɛ tɛgbɛ.” Mawu Mavɔmavɔ wɛ ɖɔ mɔ̌.