Xabakúku 2 - MAWUXÓWÉMA

¹ Nyɛ Xabakúku ɔ́, un ná ɖo te ɖo azɔ̌ ce jí, bó ná ɖo wunzɛn zǎncɔ́tɔ́ e ɖo mɛcɔ́tɔ́xɔ mɛ é ɖɔhun, bó ná se nǔ e Mawu Mavɔmavɔ ná ɖɔ nú mì é; nǔ e é ná ɖɔ dó hwɛ e un jɛ n'i ɔ́ wú é.

Mawu Mavɔmavɔ yí gbe nú Xabakúku

² Mawu Mavɔmavɔ yí gbe nú nyɛ Xabakúku ɖɔ: “Wlǎn nǔ e ɖe xlɛ́ we wɛ un ɖe ɔ́, wlǎn dó awǐnnyatɛ jí ní kló, bónú è nǎ sixú mɔ xa ganjí.

³ Đó nǔɖexlɛ́mɛ wɛ é nyí, bɔ è ko ɖó hwenu e é ná jɛ dó é. Hwe ɔ́ nu kó ɖo susu wɛ, bɔ é ká ná gblá ǎ. Nú hwe ɔ́ nu ná bo ɖo lǐnlín wɛ hǔn, nɔ te kpɔ́n, ɖó nǔ e un ɖɔ ɔ́ ná jɛ jɛ́n wɛ.

⁴ Wlǎn ɖɔ: gbɛtɔ́ ayixanyanyanɔ ɔ́, gbɛ tɔn ɔ́, gblě wɛ é nɔ gblé; lo ɔ́, hwɛjijɔnɔ ɔ́, é nɔ́ nɔ gbɛ gbɔn nǔɖiɖi tɔn gbla mɛ.

⁵ Dɔkun ɔ́, nǔ nyanya wɛ. Goyítɔ́ nɔ́ vo gbeɖé ǎ. É nɔ kɛ nu gblogblo ɖó te kútomɛ ɖɔhun. Abaɖaxwéjɛsú wɛ n'i; nǔɖé nɔ kpé e ǎ. É nɔ yí to lɛ́ɛ ɖě jɛ ɖě gúdo, bó nɔ́ fɔ bǐ dó acɛ tɔn mɛ.

⁶ Mɛ lɛ́ɛ bǐ wɛ ná nɔ gbɔ́ aca ta tɔn. É ná nyí slǎmɛ ɖɔ nú, bɔ è nǎ nɔ ɖɔ bɔnyijí xá ɛ.” “Nǔ e mɛ bǐ ná nɔ ɖɔ é ɖíe: yě ná ɖɔ: Heelú mi mɛ e nɔ xo nǔ e má nyí mitɔn ǎ lɛ́ɛ kplé dó jɛ dɔkun lɛ́ɛ é. Heelú mi mɛ e nɔ ɖo axɔ́gban dó dó axɔ́gban jí wɛ lɛ́ɛ é! Káká jɛ hwetɛ́nu wɛ mi nǎ nɔ wa nǔ gbɔn mɔ̌ yi jɛ?”

Nudómɛ atɔ́ɔ́n lɛ́ɛ

⁷ Mɛ e nya akwɛ́ nú mi lɛ́ɛ ná wá ɖo ajijimɛ. Yě ná sí te dó mi jí, bó ná dó xɛsi nú mi. Yě lɔmɔ̌ ná jɛ ajo dó mi.

⁸ Mi vɔ akɔta gěgé; énɛ́ wútu ɔ́, togun e kpo lɛ́ɛ bǐ ná vɔ mi, ɖó mi kɔn hun kɔn nyi ayǐ; mi xo dǎka gbɔn to ɔ́ mɛ, mi xo dǎka to ɔ́ kpódó mɛ e ɖo to ɔ́ mɛ lɛ́ɛ bǐ kpó wú.

⁹ Mi mɛ e nɔ xo ahizi dó dó dɔkun nú mɛ mitɔn lɛ́ɛ, bó nɔ mɔ ɖɔ émí kó hú gǎn nǔ bǐ, bɔ nǔ ɖěbǔ kún sɔ́ sixú kpé émí wú ó lɛ́ɛ ɔ́, heelú mi.

¹⁰ Togun wɔ̌buwɔ́bú énɛ́ e mi gblé gbɛ dó ná ɔ́, mi ɖésúnɔ wú wɛ mi wa nǔ dǒ. Winnyá sín wun wɛ mi kplá ɖ'ayǐ nú mɛ mitɔn lɛ́ɛ.

¹¹ Đó awǐnnya e è dǒ mɛ dǒ ná lɛ́ɛ ɖésú ná sú xó bó dó hwɛ mi, bɔ atín e è dǒ kɛ́ sɔ́ ná lɛ́ɛ ná yí gbe yětɔn hɛn yi zɔ.

¹² Mi mɛ e kɔn kanjɔ kɔn nyi ayǐ dó lí toxo lɛ́ɛ ɔ́, heelú mi. Heelú mi mɛ e lí toxo nyi nǔ nyanya wiwa jí lɛ́ɛ é!

¹³ Énɛ́ ɔ́ wɛ zɔ́n bɔ akɔta lɛ́ɛ ɖo tagba vɔ́ jɛ wɛ, bɔ azɔ̌ e wa wɛ yě ɖe ɔ́ nyí nǔ yǎyá. Mawu Mavɔmavɔ Nǔbǐwúkpétɔ́ ɔ́, lě e é jló gbɔn ɔ́ nɛ́ ǎ cé?

¹⁴ Mɛ e ná tunwun susu Mawu Mavɔmavɔ tɔn ɖo ayǐkúngban jí lɛ́ɛ ná sukpɔ́ sin e ɖo xu mɛ é ɖɔhun.

¹⁵ “Mi mɛ e nɔ ná ahan nɔzo mitɔn bɔ é ná nu mú, ɖó mi ná mɔ mɛ̌ tɔn wú lɛ́ɛ ɔ́, heelú mi.

¹⁶ Winnyá wɛ mi nǎ ɖu, susu wɛ mi ná xɔ ǎ. Mi lɔmɔ̌ ɔ́, mi nu ahan bó jɛ mɛ̌. Mawu Mavɔmavɔ ná kpé winnyá kɔ́fu e ɖo aɖisí tɔn mɛ é nú mi gǎnnugǎnnu, bɔ winnyá e mi ná ɖu ɔ́ ná hɛn susu e mi xɔ ɔ́ xo kɔ́.

¹⁷ Đó dǎka e mi xo Libáan to ɔ́ wú ɔ́ ná húzú kpan nukɔn mi; mi hu kanlin kɔn nyi kpɔ́. Kanlin ná dó xɛsi mi, ɖó mi kɔn hun kɔn nyi ayǐ, mi xo dǎka gbɔn to ɔ́ mɛ, mi xo dǎka to ɔ́ kpó mɛ e ɖo to ɔ́ mɛ lɛ́ɛ bǐ kpó wú.

¹⁸ Étɛ́ wa nú wɛ bǒcyɔ ká nyí tawun bɔ è nɔ bló? Gan kpowun wɛ, mɛblɛ́nú wɛ. Étɛ́wú gbɛtɔ́ ká nɔ ɖeji dó nǔmɛsɛn énɛ́ lɛ́ɛ e má nɔ ɖɔ xó ǎ é wú tawun? É ɖésú wɛ ká zé alɔ tɔn dó bló nɛ́.

¹⁹ Mi mɛ e nɔ ɖɔ nú kpo énɛ́ ɖɔ é ní sí te lɛ́ɛ, heelú mi! Mi mɛ e nɔ ɖɔ nú awǐnnya ɖɔ é ní fɔ́n sí te lɛ́ɛ heelú mi! Awǐnnya ká nɔ kɛ nu bo nɔ sixú ɖe nǔɖé xlɛ́ mɛ wɛ a? Énɛ́ è bɛ̌ siká kpódó kpatágan kpó dó va nɛ́! Yɛ e nɔ ná gbɛ mɛ ɔ́ ká ɖ'é mɛ ǎ.

²⁰ Lo ɔ́, Mawu Mavɔmavɔ ɔ́, éyɛ́ ɖo sinsɛnxɔ tɔn mímɛ́ ɔ́ mɛ, nǔ e ɖo ayǐkúngban jí lɛ́ɛ bǐ ní nɔ abwɛ̌ ɖo nukɔn tɔn.”