Xabakúku 1 - MAWUXÓWÉMA

¹ Xó e Mawu ɖɔ nú gbeyíɖɔ tɔn Xabakúku bo ɖe xlɛ́ ɛ ɔ́ ɖíe.

Xabakúku byɔ́ alɔdó Mawu tɔn

² Mawu Mavɔmavɔ, un ɖo ylɔ̌ylɔ́ we wɛ ɖɔ hwi ní wá dó alɔ mì, bɔ a tin dó mì. Káká jɛ hwetɛ́nu a ka ná tin dó mì yi jɛ? Un ná ɖɔ dǎka e xo wɛ yě ɖe ɔ́ nú we, bɔ a nǎ gɔn hwlɛ̌nhwlɛ́n mǐ gán ɖ'é mɛ wɛ a?

³ Étɛ́wú a ka gbɔ bɔ nukún ce ɖo nǔ nyanya mɔ wɛ sɔ mɔ̌? Nɛ̌ awě ná ɖo mɛ xo wɛ mɔ̌, bɔ é ká ná nɔ nyɔ́ kpɔ́n nú we gbɔn? Nɛ̌ ká gbɔn bɔ è nɔ ɖo mɛ táfú wɛ, bó nɔ ɖo dǎka xo lɛ́ lɛ̌ dó mì wɛ mɔ̌? Jlɛ nɔ jɛ ayǐ, bɔ kɛn nɔ wá.

⁴ Mɛ ɖé sɔ́ nɔ xwedó sɛ́n ǎ, mɛɖé ká sɔ́ nɔ xwedó hwɛjijɔ ǎ. Đó mɛdídá ɖu ɖo hwɛjijɔnɔ jí, bɔ è nɔ ɖo hwɛ agɔ dó wɛ.

Mawu yí gbe nú Xabakúku

⁵ Mi sɔ́ nukún ɖó te bó ná kpɔ́n nǔ e ná jɛ dó akɔta lɛ́ɛ jí é. Nú mi mɔ ɔ́, é ná kpácá mi bɔ ahwi ná xo mi. Đó un ná dó nǔɖé sin ɖo hwe mitɔn nu, bɔ nú ɖɔ wɛ è wǎ ɖɔ nú mi ɔ́, mi ná ɖi ǎ.

⁶ Éɖíe: un ná sɛ́ Babilɔ́nunu lɛ́ɛ dó; togun dídá énɛ́ e ɖo adǎn jí ɔ́, un ná sɛ́ ɛ dó bɔ é ná gbɔn gbɛ ɔ́ bǐ mɛ, bó ná klá jɛ ayǐkúngban e ma nyí étɔn ǎ lɛ́ɛ nu.

⁷ Togun énɛ́ ɔ́ syɛ́n bó dó xɛsi. Đó gǎn e é hú nǔ é wú ɔ́, é ɖésúnɔ wɛ nɔ ɖɔ lě e nǔ ná nɔ bó ná nyɔ́ n'i é.

⁸ Sɔ́ tɔn lɛ́ɛ yá afɔ hú kpɔ. Yě bí hú hla e ɖo gbadagbé nya wɛ é. Sɔ́xátɔ́ tɔn lɛ́ɛ jǎwe kpódó goyíyí kpó, yě jǎwe sín zɔ. Yě kpɔ́ ja gangan ɖo nǔ ná sá wɛ ɖɔhun.

⁹ Togun énɛ́ ɔ́ bǐ jǎwe, bó ná vɔ mɛ. Nukún yětɔn nɔ ɖo nǔ e yě mɔ é bǐ wú. Yě wlí ahwankannumɔ lɛ́ɛ kplé kpɔ́ gégé kɔ́gúdu ɖɔhun.

¹⁰ Yě nɔ́ ɖɔ slǎmɛ axɔ́sú lɛ́ɛ wú, bɔ gǎn lɛ́ɛ nɔ nyí nǔkiko nú yě. Ahohó lɛ́ɛ ɖɔ nǔɖé nú yě ǎ. Yě nɔ́ kplé kɔ́ bó nɔ xá jí, bó nɔ sixú fán ahohó lɛ́ɛ.

¹¹ Yě nɔ́ dín jɔhɔn ɖaxó ɖé ɖɔhun, bó nɔ́ lɛ́ yi tɔ́n ɖo fí ɖěvo. Hlɔ̌nhlɔ́n yětɔn wɛ nyí mawu e yě nɔ́ sɛn é.

Xabakúku lɛ́ byɔ́ alɔdó Mawu tɔn

¹² Sín xóxó hwenu ɖokpóó ɔ́, hwi wɛ nyí Mawu Mavɔmavɔ, hwi wɛ nyí Mawu ce, Mawu mímɛ́ ce, Mawu Mavɔmavɔ ce. Áo! Mawu Mavɔmavɔ, a ɖǒ togun élɔ́ e nyí kɛntɔ́ mǐtɔn ɔ́ ayǐ, bɔ é ná nɔ ɖɔ hwɛ lě e a ba gbɔn é. Áo! Só ce, a sɔ́ ɛ bɔ é ná nɔ dɔn tó nú mɛ lě e a ba gbɔn é.

¹³ Nukún towe mɛ́ dín, bɔ nǔ nyanya nɔ nyɔ́ mɔ nú we ǎ, nǔwanyido nɔ nyɔ́ kpɔ́n nú we ǎ. Ée nǔ nyí mɔ̌ ɔ́, aniwú wɛ a ka ná ɖo mɛsaɖutɔ́ lɛ́ɛ kpɔ́n wɛ, bó ná tin? Hwenu e mɛdídá ɔ́ ɖo mɛ e nyí hwɛjijɔnɔ hú i ɔ́ wlí cán wɛ ɔ́, nɛ̌ ká gbɔn bɔ a tin?

¹⁴ A nǎ wa nǔ xá gbɛtɔ́ lɛ́ɛ xumɛhweví, abǐ kanlin e nɔ sá gbɔn kɔ́ mɛ, bó má ɖó mɛɖé bɔ é ná xlɛ́ ali yě ǎ lɛ́ɛ ɖɔhun wɛ a?

¹⁵ Babilɔ́nunu lɛ́ɛ nɔ wlí mɛ lɛ́ɛ lě e è nɔ zé mlɛ dó wlí hweví é ɖɔhun; yě nɔ́ dɔn yě dó ɖɔ yětɔn mɛ, bó nɔ kplé yě dó aja yětɔn lɛ́ɛ mɛ, bɔ xomɛ nɔ hun yě, bɔ yě nɔ́ j'awǎ.

¹⁶ Énɛ́ ɔ́, yě nɔ́ sá vɔ̌ nú ɖɔ yětɔn lɛ́ɛ, bó nɔ dó zǎlínkpɔ́n zo nú aja yětɔn lɛ́ɛ. Đó nǔ énɛ́ lɛ́ɛ wɛ nyí mɔ̌ bɔ yě nɔ́ sixú mɔ nǔ ɖu ganjí, bɔ nǔɖuɖu yětɔn nyí nǔɖuɖu ɖagbe.

¹⁷ Énɛ́ ɔ́ wú wɛ yě ná húzú nǔ e ɖo ɖɔ yětɔn mɛ lɛ́ɛ kɔn nyi ayǐ, bó ná nɔ́ ɖo gbe gbo akɔta lɛ́ɛ wɛ ma gbɔjɛ́, ma kú nǔbláwǔ nú yě a?