Sofoníi 2 - MAWUXÓWÉMA

Mi zé miɖée hwe

¹ Akɔta e ma ɖó winnyá lɛ́ɛ mi, mi nɔ tɛ́nkpɔ́n bó nɔ́ lin tamɛ kpɛɖé vɔ́vɔ́, mi byɔ́ miɖée mɛ.

² É má nyí mɔ̌ ǎ ɔ́, xomɛsin ɖaxó Mawu Mavɔmavɔ tɔn sín azǎn ɔ́ ná wá su mi dó. Mi byɔ́ miɖée mɛ, é má nyí mɔ̌ ǎ ɔ́, mi ná wá cí nǔywɛ́ ɖɔhun, bɔ jɔhɔn ná fúnfún kpé gbe énɛ́ gbe. Mi yá wǔ, é má nyí mɔ̌ ǎ ɔ́, xomɛsin Mawu Mavɔmavɔ tɔn ná jɛ te.

³ Mi lɛ́ kɔ wá Mawu Mavɔmavɔ gɔ́n, mi mɛ e zé miɖée hwe ɖo to ɔ́ mɛ lɛ́ɛ; mi mɛ e nɔ se tónú nú sɛ́n tɔn lɛ́ɛ mi, mi ba Mawu Mavɔmavɔ mɔ. Mi wa nǔ jlɔ́jlɔ́, mi zé miɖée hwe ɖo Mawu nukɔn. Afɔ nyɔ́ ɔ́, mi sixú gán gbe e gbe xomɛsin Mawu Mavɔmavɔ tɔn ná wá é.

Mawu gblɔ́n adǎn nú togun e ɖo gbadahwe jí lɛ́ɛ

⁴ Gaza toxo ɔ́ ná jɛ vɔ̌, Acikelɔ́ni toxo ɔ́ ná gba. È nǎ nya mɛ e ɖo Acidɔ́di toxo ɔ́ mɛ lɛ́ɛ kéze ɖéɖé. È nǎ nya mɛ e ɖo Eklɔ́ni toxo ɔ́ mɛ lɛ́ɛ tɔ́n sín to yě ɖésúnɔ tɔn mɛ .

⁵ Heelú mi mɛ e gosín Kafutɔ́ɔ bó wá cí xutó lɛ́ɛ. Mawu Mavɔmavɔ ɖó hwɛ nú mi bo ɖɔ: “Kanáa, to Filisitɛ́ɛn lɛ́ɛ tɔn, un ná vívá kún nú we; a sɔ́ ná ɖó toví ɖěbǔ ǎ.

⁶ Ayǐkúngban towe e ɖo xutó lɛ́ɛ ná húzú amagbo nú kanlin lɛ́ɛ. Fínɛ́ wɛ lɛ̌ngbɔ́nyitɔ́ lɛ́ɛ ná nɔ́ kplá kanlin yětɔn lɛ́ɛ yi amagbo mɛ ɖe, bó ná bló kpó nú kanlin yětɔn lɛ́ɛ ɖó fínɛ́.”

⁷ Ayǐkúngban énɛ́ ɔ́ ná húzú Judáa ví e kpo ɖo gbɛ lɛ́ɛ tɔn, bɔ kanlin yětɔn lɛ́ɛ ná nɔ́ wá ɖu ama ɖo fínɛ́, bɔ gbadanu su ɔ́, yě ná nɔ́ yi dɔ́ xwé gbe, ɖo Acikelɔ́ni. Đó Mawu Mavɔmavɔ, Mawu yětɔn ná jɛ hun dó yě jí, bó ná zé nǔ e ɖo yě gbo wɛ é dó húzú ɖagbe nú yě.

Mawu gblɔ́n adǎn nú togun e ɖo zǎnzǎnhwe jí lɛ́ɛ

⁸ Mawu Mavɔmavɔ ɖɔ: “Un se Mɔwabu ví lɛ́ɛ kpó Amumɔ́ɔ ví lɛ́ɛ kpó ɖo togun ce ko wɛ, bó ɖo slǎmɛ ɖɔ wǔ tɔn wɛ. Yě zun togun ce, yě kán ayǐkúngban tɔn dó yětɔn jí.”

⁹ Énɛ́ ɔ́ wútu wɛ Mawu Mavɔmavɔ Nǔbǐwúkpétɔ́ ɔ́, Mawu Izlayɛ́li tɔn ɔ́ zin alɔ dó akɔ́n bó ɖɔ: “Un ɖɔ bo tɛ afɔ jí ɖɔ Mɔwabu to ɔ́ kpó Amumɔ́ɔ to ɔ́ kpó ná gba Sodɔ́mu kpó Gomɔ́ɔ kpó ɖɔhun . To yětɔn ná húzú gbětótló káká sɔ́yi. Wunkan kpó jɛ kpó kɛ́ɖɛ́ jɛ́n è nǎ nɔ mɔ ɖo fínɛ́. Mɛ e ná kpo ɖo gbɛ ɖo togun ce mɛ lɛ́ɛ ná wá fɔ nǔ yětɔn lɛ́ɛ, bó ná yí to yětɔn.”

¹⁰ Lě e Mawu Mavɔmavɔ ná dɔn tó nú yě ɖó jimakplɔ́n gbe yětɔn wú gbɔn ɔ́ nɛ́: yě zun Mawu Mavɔmavɔ Nǔbǐwúkpétɔ́ ɔ́ sín togun bo lɛ́ yí ayǐkúngban tɔn dó yětɔn jí.

¹¹ Mawu Mavɔmavɔ ná ɖó adohu nú yě, ɖó é ná sɔ́ vodún e ɖo ayǐkúngban jí lɛ́ɛ bǐ dó húzú nǔ yǎyá. Énɛ́ ɔ́, akɔta e ɖo fí má yá fí lɛ́ɛ bǐ ná nɔ sɛn ɛ. Akɔta lɛ́ɛ ɖokpó ɖokpó ná nɔ sɛn ɛ ɖo ayǐkúngban yětɔn yětɔn jí.

Mawu gblɔ́n adǎn nú togun e ɖo tofɔligbé lɛ́ɛ kpó ée ɖo totaligbé lɛ́ɛ kpó

¹² Mawu ɖɔ: “Etiopíinu lɛ́ɛ mi, mi lɔmɔ̌ ɔ́, un ná hu mi ɖo ahwangbénu.”

¹³ Mawu Mavɔmavɔ ná wa nǔ xá to e ɖo totaligbé lɛ́ɛ lɔmɔ̌; é ná vívá Asilíi to ɔ́ sín kún; é ná bló bɔ tota Ninívu tɔn ɔ́ ná gba bó ná húzú axéko, ayǐkúngban e jí nǔ ɖěbǔ má nɔ wú ɖe ǎ é.

¹⁴ Kanlin lɛ́ɛ ná wá sá xwé gbɔn Ninívu toxo ɔ́ bǐ mɛ. Kanlin tɛnmɛ tɛnmɛ lɛ́ɛ bǐ wɛ ná kplé ɖo fínɛ́. Kwlele kpódó ajijá kpó ná ɖo azakpo lɛ́ɛ jí. Xɛ ná nɔ́ ɖo finfan wɛ ɖo flɛtɛ́li lɛ́ɛ nu. È nǎ kó mɔ lě e xwé ɔ́ gba gbɔn ɔ́ sín gbɛnde mɛ. Sɛ́dlu sín xwlɛ e è dǒ ɖó acɔ́ nú xɔ lɛ́ɛ ná é bǐ nǎ sún wá yi.

¹⁵ Nǔ e ná wá gbo toxo élɔ́ e nɔ ɖo afɔ tɛ ayǐ wɛ, bó nɔ́ mɔ ɖɔ nǔɖé kún ná jɛ ó, émí kún nyí mɛ ɖé gbɛ́ ó é nɛ́. Yéége! É gba bǐ. É húzú adɔ̌tɛn nú kanlin lɛ́ɛ. Mɛ e ná gbɔn toxo élɔ́ kpá dín lɛ́ɛ bǐ ná sɔ́ alɔ ɖó nu bo sú xó.