Sɛ́nflínmɛ 9 - MAWUXÓWÉMA

¹ Mɔyízi ɖɔ: “Izlayɛ́li ví lɛ́ɛ e mi, mi ɖótó mì; mi ɖíe ja Judɛ́ɛn tɔ ɔ́ d'asá gbé e. Mi ná nya akɔta wɔ̌buwɔ́bú ɖé lɛ́ɛ, bó ná yí toxo yětɔn lɛ́ɛ; toxo ɖaxó ɖaxó ɖé lɛ́ɛ wɛ, bɔ è mɛ ahohó lɛ́ lɛ̌ dó bɔ é yi jǐ ɖésú. Akɔta énɛ́ lɛ́ɛ sukpɔ́ hú mi bó syɛ́n hú mi.

² Mi ná mɔ Anáki ví lɛ́ɛ; gbɛtɔ́ sakasaka hlɔ̌nhlɔ́nnɔ wɛ yě nyǐ. Mi ɖésú tunwun yě. Yě xó ɖɔ wɛ è nɔ ɖe bó nɔ́ ɖɔ: ‘Mɛ̌ ká sixú nɔ te Anáki ví lɛ́ɛ nukɔn?’

³ Zaanɖé din ɔ́, mi ná mɔ Mawu Mavɔmavɔ, Mawu mitɔn ɖo yiyi wɛ ɖo nukɔn mitɔn myɔ ɖo nǔ fyɔ́ wɛ ɖɔhun. Mawu mitɔn wɛ ná dó winnyá yě ɖo nukɔn mitɔn. É wɛ ná vívá kún yětɔn; mi ná hu yě cɛ́jú mɛ; mi ná yí to yětɔn lě e é kó ɖɔ gbɔn nú mi é.

⁴ “Ée Mawu Mavɔmavɔ, Mawu mitɔn ná nya yě nú mi ɔ́, mi ma yí nugo, bó ɖɔ nǔnyɔ́wa émítɔn wɛ zɔ́n bɔ Mawu Mavɔmavɔ ná to ɔ́ émí ó. Walɔ baɖabaɖa e akɔta énɛ́ lɛ́ɛ ɖó ɔ́ wɛ zɔ́n bɔ Mawu Mavɔmavɔ nya yě,

⁵ bɔ mi yí to yětɔn. É nyí nǔnyɔ́wa mitɔn ɖé wɛ zɔ́n bɔ nǔ cí mɔ̌ ǎ. Mawu Mavɔmavɔ nya togun énɛ́ lɛ́ɛ ɖó walɔ baɖabaɖa yětɔn wú, bó ná ɖe akpá e é zin alɔ dó akɔ́n bó dó nú tɔ́gbó mitɔn Ablaxámu kpó Izáki kpó Jakɔ́bu kpó é.

⁶ Hǔn mi bo tunwun ɖɔ Mawu Mavɔmavɔ, Mawu mitɔn ná jó to ɖagbe énɛ́ nú mi, bɔ mi ná yí; é ká nyí nǔnyɔ́wa mitɔn wú wɛ ǎ, ɖó togun ɖé wɛ mi nyí, bó tlí tó.”

Hwɛ e togun ɔ́ hu é

⁷ Mɔyízi ɖɔ: “Mi flín lě e mi dó xomɛsin nú Mawu Mavɔmavɔ, Mawu mitɔn gbɔn, ɖo gbětótló mɛ é. Mi ma wɔn gbeɖé ó. Sín gbe e gbe mi tɔ́n sín Ejípu, káká bó wá ɖo fí égbé din ɔ́, mi gɔn gǔ fɔ́n dó Mawu Mavɔmavɔ jí gbeɖé ǎ.

⁸ Đo tají ɔ́, mi dó xomɛsin ɖaxó ɖokpó nú Mawu Mavɔmavɔ ɖo Holɛ́bu só jí, bɔ é jló ná sú kún mitɔn dó.

⁹ Hwenɛ́nu ɔ́, un ko xá só ɔ́ jí, bó xwe awǐnnyatɛ e jí akɔ e Mawu Mavɔmavɔ jɛ xá mi é ɖe ɔ́ yí gbé. Un nɔ só ɔ́ jí xɔ zǎn kanɖé (40), kéze kanɖé (40), nǔ má ɖu, sin ma nu.

¹⁰ Xó e Mawu Mavɔmavɔ nɔ myɔ tɛ́ntin, bó ɖɔ nú mi gbe e gbe mi kplé ɖo só ɔ́ kpá é ɔ́, é ɖésúnɔ wlán bǐ dó awǐnnyatɛ we jí, bó bɛ́ nú mì.

¹¹ “Ée un bló zǎn kanɖé (40), kéze kanɖé (40) lɛ́ɛ fó bɔ é zé awǐnnyatɛ we e jí é wlán akɔjijɛsɛ́n lɛ́ɛ ɖó é nú mì ɔ́,

¹² é ɖɔ: ‘Yǎ wǔ jɛ te, togun towe énɛ́ e a kplá tɔ́n sín Ejípu é jɛ agɔ ɖaxó ɖé. Ali e un xlɛ́ yě ɔ́, bléwún jɛ́n yě gosín jí; yě sínsín siká dó bló bǒcyɔ.’

¹³ Bɔ Mawu Mavɔmavɔ lɛ́ ɖɔ: ‘Din ɔ́, un mɔ ɖɔ togun élɔ́ ɔ́, togun tótlítɔ́ wɛ.

¹⁴ Gbɔ nú má wa nǔ yětɔn: un ná vívá kún yětɔn bɔ mɛ ɖěbǔ sɔ́ ná flín yě ɖo ayǐkúngban ɔ́ jí ǎ. Énɛ́ ɔ́ gúdo ɔ́, un ná dó akɔta ɖokpó sín kún gbɔn jǐ towe; é ná nyí akɔta ɖé bó ná syɛ́n, bó ná sukpɔ́ hú yě.’

¹⁵ Ée Mawu Mavɔmavɔ ɖɔ mɔ̌ ɔ́, un jɛ te sín só ɔ́ jí, bɔ awǐnnyatɛ e jí akɔjijɛsɛ́n ɔ́ ɖe lɛ́ɛ ɖo alɔ ce we lɛ́ɛ mɛ. Só ɔ́ bǐ wɛ ká nyí myɔ.

¹⁶ Ée un jɛ te ɔ́, un ná mɔ nǔɖé kpowun ɔ́, un mɔ ɖɔ mi ko hu hwɛ dó Mawu Mavɔmavɔ, Mawu mitɔn nǔgbó; mi sínsín siká dó bló bǒcyɔ. Mi yá wǔ gosín ali e Mawu Mavɔmavɔ xlɛ́ mi é jí ɖo cɛ́jú mɛ.

¹⁷ Énɛ́ ɔ́ wú wɛ un zé awǐnnyatɛ e un hɛn alɔ mɛ lɛ́ɛ nyi gbě, bó gba yě hánnyá ɖo nukún mitɔn mɛ.”

Mɔyízi sa vo nú Mawu

¹⁸ Mɔyízi ɖɔ: “Un lɛ́ jɛ kpo fínɛ́, ɖo Mawu Mavɔmavɔ nukɔn bó nɔ mɔ̌ káká nú zǎn kanɖé (40), kéze kanɖé (40), nǔ má ɖu sin ma nu lě e un bló gbɔn ɖ'ayǐ é. Un bló mɔ̌ ɖó hwɛ e mi hu lɛ́ɛ wú. Mi hu hwɛ dó Mawu Mavɔmavɔ, bɔ é sin xomɛ n'i ɖésú.

¹⁹ Lě e Mawu Mavɔmavɔ sin xomɛ dó mi gbɔn ɔ́ hu ado nú mì; xomɛ sin i káká bɔ é jló ná vívá kún mitɔn. Lo ɔ́, Mawu Mavɔmavɔ lɛ́ yí vosisa ce hwenɛ́nu.

²⁰ Xomɛ e Mawu Mavɔmavɔ sin dó Aalɔ́ɔn ɔ́ syɛ́n ɖésú; é sin xomɛ dó e káká bó jló ná hu i. Lo ɔ́, un sa vo nú Mawu Mavɔmavɔ dó é lɔmɔ̌ tamɛ hwe énɛ́ nu,

²¹ lobo zé nyibúví sín bǒcyɔ e mi bló bó hu hwɛ dó Mawu Mavɔmavɔ ɔ́ dó myɔ mɛ. Énɛ́ ɔ́ gúdo ɔ́, un gba nǔ e kpo lɛ́ɛ, bó li bǐ, bɔ é húzú linfín, bɔ un bɛ́ kɔn nyi tɔ e nɔ sa sín só ɔ́ jí é mɛ.

²² “Mɔ̌ ɖokpó ɔ́, mi dó xomɛsin nú Mawu Mavɔmavɔ ɖo Taveéla, bó dó n'i ɖo Masa, bó lɛ́ dó n'i ɖo Kivlɔti-Taawa.

²³ Mɔ̌ jɛ́n hwenu e Mawu Mavɔmavɔ sɛ́ mi dó Kadɛ́ci-Baanɛ́ya, bó ɖɔ mi ní yi to e émí ná mi é mɛ ɔ́, mi ma se tónú nú Mawu Mavɔmavɔ, Mawu mitɔn ǎ é nɛ́; mi ɖeji dó wǔ tɔn ǎ; mi ké ya nú xó e ɖɔ wɛ é ɖe lɛ́ɛ é ǎ.

²⁴ Sín gbe e gbe un tunwun mi ɔ́, mi gɔn gǔ fɔ́n dó Mawu Mavɔmavɔ jí gbeɖé kpɔ́n ǎ.

²⁵ “Lě e un ko ɖɔ gbɔn ɔ́, éé Mawu Mavɔmavɔ ɖɔ émí ná vívá kún mitɔn ɔ́, un jɛ kpo ɖo nukɔn tɔn, bó nɔ mɔ̌ káká nú zǎn kanɖé kéze kanɖé.

²⁶ Un sa vo n'i bó ɖɔ: ‘Aklúnɔ Mavɔmavɔ, ma sú togun towe sín kún dó ó; togun towe wɛ, bɔ a zě acɛkpikpa towe e hú gǎn nǔ bǐ ɔ́, kpó hlɔ̌nhlɔ́n towe e nukɔn nǔɖé má nɔ́ nɔ te ɖe ǎ é kpó, dó hwlɛ́n yě bó ɖe yě tɔ́n sín Ejípu.

²⁷ Flín mɛsɛntɔ́ towe Ablaxámu kpó Izáki kpó Jakɔ́bu kpó; ma kpɔ́n dó tónúmase togun ɔ́ tɔn wú ó; ma kpɔ́n dó adǎkaxixo togun ɔ́ tɔn kpó hwɛ tɔn lɛ́ɛ kpó wú ó.

²⁸ Ma lɔn nú mɛ e ɖo to e mɛ a ɖe mǐ tɔ́n sín lɛ́ɛ é ɖɔ: Mawu Mavɔmavɔ sixú kplá yě yi to e sín akpá é dó nú yě é mɛ ǎ, abǐ yě ná ɖɔ: É yí wǎn ɖěbǔ nú yě ǎ, kplá wɛ é kplá yě kpowun, bó ná yi hu yě ɖo gbětótló mɛ. Ma lɔn nú yě ɖɔ mɔ̌ ó.

²⁹ Mawu Mavɔmavɔ, togun towe wɛ yě nyí. Yě mɛ e wú a zǎn hlɔ̌nhlɔ́n towe kpó acɛ towe e nukɔn nǔɖé má nɔ́ nɔ te ɖe ǎ é dó, dó ɖe yě tɔ́n sín Ejípu ɔ́, towe wɛ yě nyí tɛgbɛ.’ ”