Sɛ́nflínmɛ 6 - MAWUXÓWÉMA

¹ Mɔyízi ɖɔ: “Mawu Mavɔmavɔ, Mawu mitɔn ɖɔ nyɛ ní kplɔ́n gbetakɛ́n tɔn lɛ́ɛ, sɛ́n tɔn lɛ́ɛ kpó nǔ e é zɔ́n lɛ́ɛ kpó mi. Yě wɛ mi ná zé dó wa azɔ̌ ná ɖo to e ná yí wɛ mi ɖe ɔ́ mɛ.

² Énɛ́ ɔ́, ɖo gbɛzán mitɔn bǐ mɛ ɔ́, mi ná nɔ́ ɖó sísí nú Mawu Mavɔmavɔ, Mawu mitɔn, bó ná nɔ́ se tónú nú sɛ́n tɔn lɛ́ɛ, kpó nǔ e é zɔ́n bɔ un ɖɔ nú mi lɛ́ɛ kpó. Mi kpó vǐ mitɔn lɛ́ɛ kpó wɛ ná nɔ́ ɖó sísí nú gbetakɛ́n tɔn lɛ́ɛ, sɛ́n tɔn lɛ́ɛ kpó nǔ e é zɔ́n lɛ́ɛ kpó, bó ná dɔ́ ji.

³ Izlayɛ́li ví lɛ́ɛ mi! Mi ɖótó xó énɛ́ lɛ́ɛ ganjí, bó wlíbo nú yě, bó xwedó yě dó wa nǔ, bónú nǔ ná nyɔ́ nú mi, bɔ mi ná gba kún ɖo to e sín akpá Mawu Mavɔmavɔ, Mawu tɔ́gbó mitɔn lɛ́ɛ tɔn dó nú mi, bɔ anɔ̌sin kpó wǐin kpó ɖo sisa ɖe wɛ é mɛ.”

⁴ Mɔyízi ɖɔ: “Izlayɛ́li, ɖǒtó: Mawu Mavɔmavɔ, Mawu mǐtɔn wɛ nyí Mawu ɖokpó géé e ɖe é.

⁵ A nǎ yí wǎn nú Mawu Mavɔmavɔ, Mawu towe kpódó ayi towe bǐ kpó, kpódó lǐndɔ̌n towe bǐ kpó, kpódó hlɔ̌nhlɔ́n towe bǐ kpó.

⁶ Xó élɔ́ lɛ́ɛ e xa nú we wɛ un ɖe égbé din lɛ́ɛ ká ná nɔ ayixa towe mɛ.

⁷ A nǎ kplɔ́n yě vǐ towe lɛ́ɛ. Ayǐjínjɔ́n wɛ a ɖe ɖo xwé towe gbe oo, ali jí wɛ a ɖe bó ɖo yiyi wɛ oo, ayǐmlɔ́mlɔ́ wɛ a ɖe oo, fɔ́n wɛ a fɔ́n oo, a nǎ nɔ́ ɖo xó ɖɔ d'é wú wɛ.

⁸ A nǎ blá xó énɛ́ lɛ́ɛ dó awa, abǐ nukɔn, bó má wá wɔn ó.

⁹ A nǎ wlán yě ɖó xwé towe sín hɔnkpo wú, bó wlán ɖó hɔntogbó toxo lɛ́ɛ tɔn sín kpo lɛ́ɛ wú.”

Izlayɛ́li togun ɔ́ ɖó ná wɔn Mawu tɔn ǎ

¹⁰ Mɔyízi ɖɔ: “Ée Mawu Mavɔmavɔ, Mawu mitɔn ná kplá mi byɔ́ to e ná mi wɛ é ɖe ɔ́ mɛ, lě e é ɖɔ nú tɔ́gbó mitɔn Ablaxámu, Izáki, kpó Jakɔ́bu kpó gbɔn é ɔ́, mi ná mɔ toxo ɖaxó ɖaxó, toxo ɖagbe ɖagbe; mi wɛ ka gbá yě ǎ.

¹¹ Mi ná mɔ xɔ lɛ́ɛ, bɔ dɔkun tɛnmɛ tɛnmɛ e mi ma kplé ǎ lɛ́ɛ gɔ́; mi ná mɔ sɛ́tɔ e mi ma kun ǎ lɛ́ɛ; mi ná mɔ vǐwungbo kpó olívugbo e mi ma dó ǎ lɛ́ɛ kpó. Mi ná mɔ nǔ bó ɖu bó gɔ́ xo ganjí.

¹² Ée mi ka ná ɖu nǔ bó gɔ́ xo ɔ́, mi ma wɔn Mawu Mavɔmavɔ e ɖe mi tɔ́n sín Ejípu fí e mi nyí kannumɔ ɖe ɔ́ ó.

¹³ Mi ná ɖó sísí n'i, bó ná sɛn é ɖokpónɔ géé. É ɖokpónɔ sín nyǐkɔ wɛ mi ná nɔ́ xwlé.

¹⁴ Mi ná sɛn vodún ǎ; mi ná sɛn togun e lɛ́ lɛ̌ dó mi lɛ́ɛ sín vodún lɛ́ɛ ǎ.

¹⁵ Đó Mawu Mavɔmavɔ, Mawu mitɔn ɖo tɛ́ntin mitɔn. É nɔ́ ba gbeɖé ɖɔ mi ní sɛn nǔ ɖěvo zɛ éyɛ́ wú ǎ. Mi bo cɔ́ miɖée, bó má dó xomɛsin n'i ó. Đó mi dó xomɛsin n'i ɔ́, é sixú hu mi sín ayǐkúngban ɔ́ jí.

¹⁶ Mi ma sɔ́ tɛ́n Mawu Mavɔmavɔ, Mawu mitɔn kpɔ́n ɖě ó; mi ko bló ɖě ɖo Masa, mi ma sɔ́ bló ɖě ó.

¹⁷ Đo tají ɔ́, mi ná xwedó gbetakɛ́n tɔn lɛ́ɛ, sɛ́n tɔn lɛ́ɛ, kpó nǔ e é zɔ́n lɛ́ɛ kpó ganjí.

¹⁸ Mi wa nǔ e nyɔ́ bó sɔgbe Mawu Mavɔmavɔ nukún mɛ lɛ́ɛ; énɛ́ ɔ́, nǔ ná nyɔ́ nú mi, bɔ mi ná yí to ɖagbe e Mawu Mavɔmavɔ zin alɔ dó akɔ́n ɖɔ émí ná ná tɔ́gbó mitɔn lɛ́ɛ é;

¹⁹ mi ná nya kɛntɔ́ mitɔn lɛ́ɛ, lě e Mawu Mavɔmavɔ ɖɔ gbɔn é.

²⁰ “É wá jɛ sɔ gúdo bónú vǐ mitɔn lɛ́ɛ kanbyɔ́ mi ɖɔ: ‘Étɛ́wú wɛ Mawu Mavɔmavɔ, Mawu mǐtɔn ná gbetakɛ́n énɛ́ lɛ́ɛ, sɛ́n énɛ́ lɛ́ɛ, kpó nǔ e é zɔ́n énɛ́ lɛ́ɛ kpó mi a jí’ ɔ́,

²¹ mi ná yí gbe nú yě ɖɔ: ‘Kannumɔ Ejípu xɔ́sú ɔ́ tɔn wɛ mǐ nyǐ ɖ'ayǐ ɖo to tɔn mɛ, bɔ Mawu Mavɔmavɔ zé hlɔ̌nhlɔ́n tɔn e nukɔn nǔɖé má nɔ́ nɔ te ɖe ǎ é dó ɖe mǐ tɔ́n.

²² Mawu Mavɔmavɔ jlɛ́ nǔ ɖaxó ɖaxó lɛ́ɛ, nǔdábaɖa lɛ́ɛ, ɖo nukún mǐtɔn mɛ, bó dó wa nǔ xá Ejípu kpó axɔ́sú ɔ́ kpó xwédo tɔn kpó, togun tɔn bǐ kpó.

²³ Bó ká ɖe mǐ tɔ́n sín Ejípu, bó ná kplá mǐ wá to e é zin alɔ dó akɔ́n ɖɔ émí ná ná tɔ́gbó mǐtɔn lɛ́ɛ é mɛ.

²⁴ Mawu Mavɔmavɔ ɖɔ mǐ ní nyi sɛ́n énɛ́ lɛ́ɛ bǐ, bó ɖó sísí nú émí Mawu Mavɔmavɔ, Mawu mǐtɔn; énɛ́ ɔ́, nǔ ná nyɔ́ nú mǐ tɛgbɛ, bɔ é ná hɛn mǐ ɖó gbɛ lě e mǐ ɖe gbɔn égbé din é.

²⁵ Ényí mǐ wlíbo nú sɛ́n e Mawu Mavɔmavɔ ná mǐ lɛ́ɛ bǐ, bó nyi ganjí ɔ́, zǐnzán mǐtɔn ná sɔgbe xá lě e é jló gbɔn é.’ ”