Sɛ́nflínmɛ 5 - MAWUXÓWÉMA

¹ Mɔyízi kplé Izlayɛ́li ví lɛ́ɛ bǐ, bó ɖɔ nú yě ɖɔ: “Izlayɛ́li ví lɛ́ɛ e mi, mi ɖótó sɛ́n kpó nǔ e Mawu zɔ́n, bɔ è ja xixa nú mi gbé égbé din lɛ́ɛ kpó. Mi kpé nukún dó yě wú, bó kplɔ́n, bó zé yě dó wa azɔ̌ ná.

² Mawu Mavɔmavɔ, Mawu mǐtɔn jɛ akɔ xá mǐ ɖo Holɛ́bu só jí.

³ Ényí tɔ́gbó mǐtɔn lɛ́ɛ kɛ́ɖɛ́ wɛ é jɛ akɔ xá ǎ. Mǐ mɛ e kpo ɖo gbɛ ɖo fí égbé din lɛ́ɛ bǐ wɛ é jɛ xá.

⁴ Mawu Mavɔmavɔ kpó mi kpó kpé nu bó ɖɔ xó ɖo só jí, sín myɔ tɛ́ntin.

⁵ Hwenɛ́nu ɔ́, nyɛ ɖo Mawu Mavɔmavɔ kpó mi kpó tɛ́ntin, bó nɔ́ ɖɔ xó e Mawu Mavɔmavɔ ɖɔ é nú mi, ɖó mi ɖo xɛsi ɖi nú myɔ ɔ́ wɛ, bó glá xá só ɔ́ jí ǎ.” Mawu Mavɔmavɔ ɖɔ nú togun ɔ́ ɖɔ:

⁶ “Nyɛ wɛ nyí Mawu Mavɔmavɔ, Mawu towe e ɖe we tɔ́n sín Ejípu fí e a nyǐ kannumɔ ɖe é.

⁷ Ma sɛn nǔ ɖěvo zɛ nyɛ wú ó.

⁸ Ma ka kpa bǒcyɔ ó; ma kpa nǔ e ɖo jǐnukúnsin aga lɛ́ɛ, nǔ e ɖo ayǐkúngban jí ɖo do lɛ́ɛ, nǔ e ɖo sin mɛ ɖo ayǐkúngban glɔ́ lɛ́ɛ ɖě sín akpajlɛ́ ó.

⁹ Ma jɛ kpo bó ɖe kɔ́ nú yě ó; ma sɛn yě ó, ɖó nyɛ Mawu Mavɔmavɔ, Mawu towe ɔ́, un nɔ ba gbeɖé ɖɔ a nǐ sɛn nǔ ɖěvo zɛ nyɛ wú ǎ. Ényí mɛɖé gbɛ́ wǎn nú mì ɔ́, vǐ tɔn lɛ́ɛ ná sún sin tɔn, vǐvú tɔn lɛ́ɛ, vitikli tɔn lɛ́ɛ kpódó kpaba tɔn lɛ́ɛ kpó ná sún sin tɔn.

¹⁰ Lo ɔ́, mɛ e yí wǎn nú mì, bó nɔ́ nyi sɛ́n ce lɛ́ɛ ɔ́, un nɔ nyɔ́ xomɛ dó mɛ ɔ́ wú káká yi jijimɛ afatɔ́n (1.000).

¹¹ Ma zé nyɛ Mawu Mavɔmavɔ, Mawu towe ɔ́ sín nyǐkɔ dó da ayihún ó, ɖó nyɛ Mawu Mavɔmavɔ ɔ́, un nɔ gɔn tó dɔn nú mɛ e ná zé nyǐkɔ ce dó da ayihún ná é ǎ.

¹² Wlǐbo nú gbɔjɛzán ɔ́ bó sɔ́ ɖó vo nú nyɛ Mawu Mavɔmavɔ, Mawu towe lě e un ɖɔ gbɔn nú we é.

¹³ Azǎn ayizɛ́n wɛ ɖo te nú we ɖo aklúnɔzángbla ɖokpó mɛ bɔ a nǎ dó wa azɔ̌ towe lɛ́ɛ bǐ ná.

¹⁴ Lo ɔ́, azǎn tɛ́nwegɔ́ ɔ́, gbɔjɛzán wɛ; gbɔjɛzán ɔ́, nyɛ Mawu Mavɔmavɔ, Mawu towe ɔ́ tɔn wɛ. Ma wa azɔ̌ ɖěbǔ gbe énɛ́ gbe ó. Vǐ towe súnnu kpó nyɔ̌nu kpó ɖě ní má wa azɔ̌ ó; mɛsɛntɔ́ towe súnnu kpó nyɔ̌nu kpó ɖě ní má wa ó; jǒnɔ e ɖo xwé towe gbe lɛ́ɛ ɖěbǔ ní má wa azɔ̌ ó; nyibú towe lɛ́ɛ, tócí towe lɛ́ɛ, abǐ kanlin towe ɖě lɛ́ɛ ɖě ní má wa azɔ̌ ó. Mɛsɛntɔ́ towe súnnu kpó nyɔ̌nu kpó bǐ ɖó ná gbɔjɛ́ hwi ɖɔhun.

¹⁵ Flín ɖɔ kannumɔ wɛ émí nyí ɖo Ejípu, bɔ nyɛ Mawu Mavɔmavɔ, Mawu towe zé hlɔ̌nhlɔ́n ce e nukɔn nǔɖé má nɔ́ nɔ te ɖe ǎ é dó ɖe we tɔ́n. Énɛ́ ɔ́ wútu wɛ nyɛ Mawu Mavɔmavɔ, Mawu towe ɖɔ nú we ɖɔ hwi ní nyi gbɔjɛzánsɛ́n ɔ́.

¹⁶ Sí tɔ́ towe kpó nɔ towe kpó, lě e nyɛ Mawu Mavɔmavɔ, Mawu towe ɖɔ gbɔn nú we é; énɛ́ ɔ́, a nǎ dɔ́ ji, bɔ nǔ ná nyɔ́ nú we ɖo to e ná we wɛ nyɛ Mawu Mavɔmavɔ, Mawu towe ɖe ɔ́ mɛ.

¹⁷ Ma hu mɛ ó.

¹⁸ Ma lɛ aga ó.

¹⁹ Ma ja ajo ó.

²⁰ Ma ɖe kúnnu agɔ dó nɔzo towe wú ó.

²¹ Nukún towe ní má nɔ nɔzo towe sín asi wú ó; nukún towe ní má nɔ xwé tɔn wú ó; nukún towe ní má nɔ nɔzo towe sín gle wú ó; nukún towe ní má nɔ mɛsɛntɔ́ tɔn súnnu wú ó, nukún towe ní má nɔ mɛsɛntɔ́ tɔn nyɔ̌nu wú ó; nukún towe ní má nɔ nyibú tɔn wú ó, nukún towe ní má nɔ tócí tɔn wú ó; nukún towe ní má nɔ nǔ e nyí étɔn lɛ́ɛ ɖěbǔ wú ó.”

²² Xó e Mawu Mavɔmavɔ nɔ myɔ kpó zǐnflú kpó, kpó akpɔ́kpɔ́ kpó tɛ́ntin ɖo só jí, bó zé gbe d'aga bó ɖɔ nú mi é nɛ́. Mi togun Izlayɛ́li tɔn ɔ́ bǐ wɛ kplé ɖo só ɔ́ kpá bɔ é xa sɛ́n énɛ́ lɛ́ɛ nú mi; é dó ɖěbǔ jí ǎ bó wlán yě ɖó awǐnnyatɛ we jí, bó zé nú mì.

Gbeyíɖɔ Mawu tɔn Mɔyízi

²³ Mɔyízi ɖɔ: “Hwenu e mi se gbe ɔ́ sín ablu mɛ, bɔ myɔ ko vun blá só ɔ́ bǐ ɔ́, akɔtagán mitɔn lɛ́ɛ kpó tomɛxó mitɔn lɛ́ɛ kpó wá mɔ mì,

²⁴ bó ɖɔ: ‘Mawu Mavɔmavɔ, Mawu mǐtɔn ɖe susu tɔn kpó hlɔ̌nhlɔ́n tɔn kpó xlɛ́ mǐ, bɔ mǐ se gbe tɔn sín myɔ tɛ́ntin. Mǐ mɔ égbé din ɖɔ Mawu sixú ɖɔ xó nú gbɛtɔ́ cóbɔ é ná gɔn kúkú.

²⁵ Amɔ̌, din ɔ́, étɛ́wú mǐ ná jó mǐɖée nú myɔ ɖaxó énɛ́ ɔ́, bɔ é ná fyɔ́ mǐ? Ényí mǐ lɛ́ se Mawu Mavɔmavɔ, Mawu mǐtɔn sín gbe ɔ́, kú jɛ́n mǐ ná kú.

²⁶ Gbɛtɔ́ tɛ́ ká se Mawu gbɛɖe ɔ́ sín gbe sín myɔ tɛ́ntin mǐ ɖɔhun, bó gán bɔ a se kpɔ́n?

²⁷ Mɔyízi, hwɛ ɔ́, sɛkpɔ́ Mawu Mavɔmavɔ, Mawu mǐtɔn, bó ɖótó xó e ɖɔ wɛ é ɖe ɔ́. É ɖɔ nǔɖé ɔ́, a nǎ wá ɖɔ nú mǐ, bɔ mǐ ná se bó bló.’

²⁸ Mawu Mavɔmavɔ se xó e mi ɖɔ ɔ́, bó ɖɔ nú mì ɖɔ: ‘Un se xó e togun ɔ́ wá ɖɔ nú we é; nǔ e é ɖɔ é bǐ nyɔ́.

²⁹ Nú yě sixú ɖó ayixa mɔ̌hun, bó ɖó sísí nú mì, bó nyi sɛ́n ce lɛ́ɛ bǐ ɔ́, nǔ ná nyɔ́ nú yě kpó vǐ yětɔn lɛ́ɛ kpó káká yi.

³⁰ Din ɔ́, yi, bó ɖɔ nú yě ɖɔ yě ní lɛ́ kɔ yi goxɔ yětɔn lɛ́ɛ mɛ.

³¹ Amɔ̌, hwɛ ɔ́, nɔ gɔ̌n ce fí. Un ná ɖɔ gbetakɛ́n lɛ́ɛ, sɛ́n lɛ́ɛ, kpó nǔ e un ná zɔ́n lɛ́ɛ bǐ kpó nú we. A nǎ yi kplɔ́n yě, bɔ yě ná zé dó wa azɔ̌ ná, ɖo to e ná yě wɛ un ɖe, bɔ é ná nyí yětɔn ɔ́ mɛ.’ ”

³² Mɔyízi sú ta nú xó tɔn bó ɖɔ: “Mi ná wlíbo nú nǔ e Mawu Mavɔmavɔ, Mawu mitɔn ɖɔ é ganjí bó ná bló. Mi ná zɛ dó aɖisí ǎ, mi ka ná zɛ dó amyɔ ǎ.

³³ Mi ná wlí ali e Mawu Mavɔmavɔ, Mawu mitɔn ɖe nú mi ɔ́ télélé, bó ná sixú nɔ gbɛ bó j'awǎ, bó ná sixú dɔ́ ji ɖo to e ná yí wɛ mi ɖe é mɛ.”