Sɛ́nflínmɛ 34 - MAWUXÓWÉMA

¹ Mɔyízi gosín ayǐkúngban wɛnjɛ e ɖo Mɔwabu é jí, bó xá Nɛbo, só ɖaxó e ɖo Pisiga sókan mɛ ɔ́ jí. Pisiga ɔ́ ɖo zǎnzǎnhwe jí nú Jeliko; Mawu Mavɔmavɔ xlɛ́ ɛ to ɔ́ bǐ. É jɛ to ɔ́ xlɛ́ ɛ jí sín Galadi gbé jí káká yi Dan.

² É xlɛ́ ɛ sín Nɛfutali, Eflayímu, Manasée, Judáa, káká yi Mɛditɛlanɛ́ɛ xu ɔ́ tó.

³ É xlɛ́ ɛ Nɛgɛ́vu, ɖo Judáa tofɔligbé kpó Jeliko děkan toxo ɔ́ kpó, ɖo Judɛ́ɛn tɔdo ɔ́ mɛ káká wá Sowáa.

⁴ Énɛ́ ɔ́ gúdo ɔ́, Mawu Mavɔmavɔ ɖɔ nú Mɔyízi ɖɔ: “Kpɔ́n to e sín akpá un dó nú Ablaxámu kpó Izáki kpó, kpódó Jakɔ́bu kpó, hwenu e un ɖɔ: ‘Un ná ná to élɔ́ vǐ mitɔn lɛ́ɛ’ é. Un xlɛ́ to ɔ́ we, a ka ɖo nǎ byɔ́ mɛ wɛ ǎ.”

⁵ Mɔyízi mɛsɛntɔ́ Mawu Mavɔmavɔ tɔn ɔ́ kú ɖo Mɔwabu tomɛ fínɛ́, lě e Mawu Mavɔmavɔ ko ɖɔ gbɔn é.

⁶ Mawu Mavɔmavɔ ɖésúnɔ wɛ ɖi Mɔyízi ɖo tɔdo ɖé mɛ, ɖo Mɔwabu. Tɔdo ɔ́ kpan nukɔn Bɛti-Peɔ́ɔ. Mɛ ɖěbǔ kó tunwun fí e Mɔyízi sín yɔdo ɖe ɔ́ káká jɛ égbé ǎ.

⁷ Xwe kantɔn (120) wɛ Mɔyízi ɖó bó kú. Nukún tɔn ká kpo ɖo nǔ mɔ wɛ ganjí, bɔ gǎn kpó ɖo wǔ tɔn titewungbe.

⁸ Izlayɛ́li ví lɛ́ɛ ví i xɔ azǎn gban (30) e yě nɔ́ nɔ aluwɛ mɛ xɔ é.

⁹ Nǔnywɛ́ sín yɛ ɖaxó ɖé gɔ́ Jozuwée Nuni ví ɔ́, ɖó Mɔyízi dlɛ́n alɔ dó jǐ tɔn. É wɛ Izlayɛ́li ví lɛ́ɛ jɛ tónú se ná jí sín hwenɛ́nu, bó nɔ́ nyi sɛ́n e Mawu Mavɔmavɔ ná yě gbɔn Mɔyízi jí lɛ́ɛ.

¹⁰ È sɔ́ mɔ gbeyíɖɔ Mɔyízi tɔn ɖɔhun ɖěbǔ ɖo Izlayɛ́li ǎ. Mawu Mavɔmavɔ kpó é kpó nɔ́ kpé nu bó nɔ́ ɖɔ xó.

¹¹ Mawu Mavɔmavɔ sɛ́ ɛ dó Ejípu bɔ é bló nǔjíwǔ gěgé ɖo Ejípu xɔ́sú ɔ́ kpó gǎn hɔn-yitɔ́ tɔn lɛ́ɛ kpó togun tɔn bǐ kpó nukɔn.

¹² Izlayɛ́li ví lɛ́ɛ bǐ nukún mɛ wɛ Mɔyízi jlɛ́ nǔ kpó acɛ kpó ɖe; acɛ e nukɔn mɛ ɖěbǔ má nɔ́ sixú nɔ te ɖe ǎ é.