Sɛ́nflínmɛ 33 - MAWUXÓWÉMA

¹ Đɛ e Mɔyízi ɖɛ̌mɛnu Mawu tɔn ɔ́ xo dó Izlayɛ́li ví lɛ́ɛ jí cóbó kú é ɖíe:

² “Mawu Mavɔmavɔ gosín Sinayíi só jí bó wá. É tɔ́n ɖo Seyíi to ɔ́ ta nu hwe ɖɔhun. É tɔ́n ɖo Paláni só lɛ́ɛ jí, bó za wě dó togun ɔ́ bǐ jí. Wɛnsagun wɔ̌buwɔ́bú ɖé xwedó e bɔ é wá mɛ tɔn lɛ́ɛ gɔ́n, bó hɛn sɛ́n ɔ́ alɔ mɛ, bɔ é ɖo jiji wɛ myɔ ɖɔhun.

³ Mawu Mavɔmavɔ yí wǎn nú Izlayɛ́li sín akɔta lɛ́ɛ. Izlayɛ́li ví súnnu e nyí étɔn, bó nɔ́ wá kplé ɖo asá tɔn mɛ, bó ná yí kplɔ́n lɛ́ɛ ɔ́, é nɔ́ cyɔ́n alɔ yě jǐ.

⁴ Sɛ́n e Mɔyízi ná mǐ ɔ́ nyí dɔkun ɖaxó ɖé nú Jakɔ́bu ví lɛ́ɛ.

⁵ Hwenu e togán lɛ́ɛ kpó akɔta Izlayɛ́li tɔn lɛ́ɛ bǐ kpó kplé ɔ́, yě tunwun ɖɔ Mawu Mavɔmavɔ wɛ nyí Yeculunu xɔ́sú.”

⁶ Mɔyízi lɛ́ ɖɔ: “Hwlibɛ́ni sín akɔta ɔ́ ní nɔ gbɛ. Vǐ tɔn lɛ́ɛ ná bó má sukpɔ́ ǎ hǔn, kún tɔn ní má sú dó ó.”

⁷ Xó e é ká ɖɔ dó Judáa ví lɛ́ɛ wú é ɖíe, é ɖɔ: “Mawu Mavɔmavɔ, ɖǒtó xó e sú ylɔ́ we wɛ Judáa ví lɛ́ɛ ɖe é! Dɔn Judáa ví lɛ́ɛ kpó togun ɖě lɛ́ɛ kpó ɖó bǔ. Yě ɖó akɔ́n nǔ e ɖo yě gbo wɛ é nu. Kɛnklɛ́n d'alɔ yě hwenu e kɛntɔ́ yětɔn lɛ́ɛ ná wá tɔ́n ahwan yě é.”

⁸ Xó e Mɔyízi ɖɔ dó Levíi ví lɛ́ɛ wú é ɖíe: “Mawu Mavɔmavɔ, a zě Tumímu kpó Wulímu kpó dó así nú Levíi ví mɛsɛntɔ́ gbejínɔtɔ́ towe lɛ́ɛ, a ko tɛ́n yě kpɔ́n ɖo Masa hwɛ̌, bó ɖɔ hwɛ xá yě ɖó Mɛliba sin xó ɔ́ wú.

⁹ Yě nɔ́ se tónú nú we, bó nɔ́ nɔ gbejí nú akɔ e a jɛ xá yě ɔ́, dó ɖe xlɛ́ ɖɔ émí yí wǎn nú we hú tɔ́ émítɔn lɛ́ɛ, nɔ émítɔn lɛ́ɛ, nɔví émítɔn lɛ́ɛ kpó vǐ émítɔn lɛ́ɛ kpó.

¹⁰ Yě wɛ nɔ́ kplɔ́n sɛ́n towe lɛ́ɛ Izlayɛ́li ví lɛ́ɛ, bó nɔ́ sá vɔ̌ wǎnɖagbenɔ lɛ́ɛ kpó vɔ̌ e è nɔ dó zo lɛ́ɛ kpó ɖo vɔ̌sákpe towe jí.

¹¹ Mawu Mavɔmavɔ, nǎ hlɔ̌nhlɔ́n yě, bó dó acɛ nǔ e yě ná wa lɛ́ɛ bǐ jí. Wɛ̌n alin nú kɛntɔ́ yětɔn lɛ́ɛ, bónú yě má sɔ́ sí te gbeɖé ó!”

¹² Xó e Mɔyízi ɖɔ dó Bɛnjamɛ́ɛ ví lɛ́ɛ wú é ɖíe: “Bɛnjamɛ́ɛ ví lɛ́ɛ wɛ nyí akɔta wǎnyínánɔ Mawu Mavɔmavɔ tɔn, yě nɔ́ nɔ vivo mɛ ɖo Mawu Mavɔmavɔ kpá. Mawu Mavɔmavɔ nɔ cyɔ́n alɔ yě jí ayǐhɔ́ngbe ayǐhɔ́ngbe; é nɔ́ nɔ yě tɛ́ntin.”

¹³ Xó e Mɔyízi ɖɔ dó Jozɛ́fu ví lɛ́ɛ wú é ɖíe: “Mawu Mavɔmavɔ dó acɛ ayǐkúngban yětɔn jí: ahǔn nɔ́ ja dó ayǐkúngban yětɔn jí sín jǐxwé, bɔ sin nɔ tɔ́n sín ayǐkúngban glɔ́.

¹⁴ Hwesivɔ́ nɔ́ hun, bɔ atín lɛ́ɛ nɔ́ wú, jinukún nɔ́ nyɔ́ sun mɛ sun mɛ.

¹⁵ Só lɛ́ɛ húzú gbeɖé ǎ; lě e yě ɖe ɔ́ jɛ́n yě kpo ɖe. Nǔ nɔ nyɔ́ ɖo só lɛ́ɛ jí kpɔ́ gěgé gbɔn fí bǐ.

¹⁶ Dɔkun ɖaxó e ɖo to ɔ́ mɛ lɛ́ɛ kpódó fɛ́nú Mawu e nɔ zungodwe mɛ bó ɖɔ xó ɔ́ tɔn kpó ní kɔn dó Jozɛ́fu e nyí gǎn nú nɔví tɔn lɛ́ɛ é sín akɔta jí.

¹⁷ Jɛlijɛli nú Jozɛ́fu! É dó hlɔ̌nhlɔ́n nyibúsú ɖɔhun. É ɖó zo jangan jangan we agbo ɖɔhun, bó nɔ́ zé dó xo akɔta lɛ́ɛ ná, bó nɔ́ nya togun lɛ́ɛ sín ayǐkúngban ɔ́ jí káká yi fí e gbɛ ɔ́ kponu ɖó é. Zo lɛ́ɛ ɖokpó nyí Eflayímu ví wɔ̌buwɔ́bú lɛ́ɛ, zo wegɔ́ ɔ́, Manasée sín ahwangɔnu tobutóbú lɛ́ɛ wɛ.”

¹⁸ Xó e Mɔyízi ɖɔ dó Zabulɔ́ɔn ví lɛ́ɛ kpó Isakáa ví lɛ́ɛ kpó wú é ɖíe: “Zabulɔ́ɔn ví lɛ́ɛ e mi! Mi j'awǎ ɖó hwɛzizɛ mitɔn lɛ́ɛ kpó wǐwá mitɔn lɛ́ɛ kpó wú, Isakáa ví lɛ́ɛ e mi! Mi j'awǎ ɖó mi vo ɖo goxɔ mitɔn lɛ́ɛ sá.

¹⁹ Mi ná ylɔ́ akɔ ɖě lɛ́ɛ bǐ kplé ɖo só ɔ́ jí, bó ná xwlé vɔ̌sánú lɛ́ɛ Mawu Mavɔmavɔ lě e sɛ́n ɔ́ zɔ́n gbɔn é, ɖó mi ná dɔn dɔkun mitɔn lɛ́ɛ sín xu mɛ, mi ná dɔn dɔkun e ɖo xuta, ɖo kɔ́ glɔ́ lɛ́ɛ tɔ́n.”

²⁰ Xó e Mɔyízi ɖɔ dó Gadi ví lɛ́ɛ wú é ɖíe: “Susu nú Mawu Mavɔmavɔ e ná ayǐkúngban gěgé Gadi é! Gadi tɔ wu kinnikínní ɖɔhun, bó ná wlí kanlin bó tlɛ́n ɖu sín afɔ káká yi ta.

²¹ Gadi kpɔ́n ayǐkúngban ɖagbe ɖagbe e ɖo to ɔ́ mɛ ɔ́ bó sɔ́. É kpɔ́n fí e jɛ xá gǎn ɔ́, bó sɔ́. É nɔ togun ɔ́ nu. É bló nǔ e Mavɔmavɔ zɔ́n lɛ́ɛ kpó gbeta tɔn lɛ́ɛ kpó, nú ɖagbe Izlayɛ́li ví lɛ́ɛ tɔn.”

²² Xó e Mɔyízi ɖɔ dó Dan ví lɛ́ɛ wú é ɖíe: “Dan cí kinnikínní wínnyáwínnyá e lɔ́n sín Basáni gbé jí é ɖɔhun.”

²³ Xó e Mɔyízi ɖɔ dó Nɛfutali ví lɛ́ɛ wú é ɖíe: “Nǔ nyɔ́ nú Nɛfutali bó túnflá, Mawu Mavɔmavɔ wa ɖagbe n'i bɔ é vɛ́ jlɛ́. É ní gbló ada nú ayǐkúngban tɔn yi gbadahwe jí; é ní lɛ́ gbló ada ná yi tofɔligbé.”

²⁴ Xó e Mɔyízi ɖɔ dó Acɛ́ɛ ví lɛ́ɛ wú é ɖíe: “Susu nú Acɛ́ɛ ɖo Jakɔ́bu ví lɛ́ɛ mɛ. Nɔví tɔn lɛ́ɛ ní ɖe lě e yě yí wǎn n'i gbɔn é xlɛ́. Olívumi tɔn sukpɔ́ káká bɔ é nɔ́ sɔ́ dó klɔ́ afɔ ná.

²⁵ To tɔn sín hɔntogbó ɔ́, gan kpó ganvɔ kpó wɛ è dǒ sú, bɔ é vo ɖo to tɔn mɛ. Nú afɔ tɔn ɖo kɔ́ gbo wɛ jɛ́n wɛ ɔ́, hlɔ̌nhlɔ́n tɔn ná ɖo te tɛgbɛ.”

²⁶ Énɛ́ ɔ́ gúdo ɔ́, Mɔyízi ɖɔ: “Yeculunu ví lɛ́ɛ e mi! Nǔmɛsɛn ɖěbǔ cí Mawu ɖɔhun ǎ. É nɔ́ zɔn akpɔ́kpɔ́ jí kpó susu kpó, bó nɔ́ gosín jǐxwé bó nɔ́ wá d'alɔ mi.

²⁷ É wɛ nyí bibɛtɛn mitɔn sín do. Acɛkpikpa tɔn ko nyí nǔɖaxó ɖo hwe glɔ́ fí sín do. É wɛ nya kɛntɔ́ mitɔn lɛ́ɛ ɖo nukɔn mitɔn, bó ná gbe mi ɖɔ mi ní hu yě.

²⁸ Izlayɛ́li ví lɛ́ɛ sín ayi jɛ ayǐ ɖo xwé yětɔn lɛ́ɛ gbe. Jakɔ́bu ví lɛ́ɛ vo ɖo to e mɛ ahǔn nɔ́ ja kpɔ́ gégé sín jǐxwé, bɔ jinukún kpó vǐwuntín kpó nɔ́ nyɔ́ ɖe é mɛ.

²⁹ Izlayɛ́li ví lɛ́ɛ e mi! Nǔ nyɔ́ nú mi. Mi ɖokpónɔ géé wɛ nyí togun e Mawu Mavɔmavɔ hwlɛ́n gán é. Mawu Mavɔmavɔ wɛ nyí gǎglónú mitɔn bó gló nǔ nú mi; é wɛ nyí hwǐ e ná ɖuɖéjí mi é. Hwenu e kɛntɔ́ mitɔn lɛ́ɛ ná ja mi klɔ́ gbé ɔ́, mi ná dó winnyá yě.”