Sɛ́nflínmɛ 32 - MAWUXÓWÉMA

¹ “Jǐxwé! Đǒtó mì! Un ɖo xó ná ɖɔ wɛ. Ayǐkúngban! Đǒtó xó e ɖo nu ce mɛ ná tɔ́n sín wɛ lɛ́ɛ.

² Kplɔ́n ce lɛ́ɛ ní ja jǐ ɖɔhun. Xó ce lɛ́ɛ ní ja ahǔn ɖɔhun. Ní gba, fo ɖo gbigba kɔn nyi gbě jí wɛ ɖɔhun. Ní ja kwín kloklo, jǐ ɖo jija wɛ katakata kɔn nyi gběhan jí wɛ ɖɔhun.

³ Đó un ná jlá Mawu Mavɔmavɔ sín nyǐkɔ. Mi kpa susu nú Mawu mǐtɔn.

⁴ É wɛ nyí só ɔ́; nǔwiwa tɔn lɛ́ɛ nyɔ́ bɔ nǔ vɔ ɖ'é wú. Đó ali tɔn lɛ́ɛ bǐ jlɔ́. Mawu gbejínɔtɔ́ wɛ. É nɔ́ wa nǔblíblí ǎ. É jlɔ́ bó ɖo xwi jí.

⁵ Amɔ̌, mi togun nyanya, togun hízíhízí e mi! Mi hu hwɛ dó Mawu Mavɔmavɔ. Winnyá ní hu mi. Mi sɔ́ nyí vǐ tɔn ǎ.

⁶ Togun xlonɔ, nǔmanywɛ́tɔ́ e mi! Mawu Mavɔmavɔ wɛ zɔ́n wɛ mi ná ɖɔ a? É wɛ nyí tɔ́ mitɔn, bó ɖó mi a cé? É wɛ bló mi a cé? É wɛ zɔ́n bɔ mi ɖo te a cé?

⁷ Mi flín azǎn xóxó lɛ́ɛ sɛ́ dó. Mi flín nǔ e jɛ ɖo mɛ xóxó lɛ́ɛ hwenu e é sɛ́ dó. Mi kan nǔ byɔ́ tɔ́ mitɔn lɛ́ɛ. Mɛxó lɛ́ɛ ní kpi tan nú mi.

⁸ Hwenu e Mawu Ajalɔ̌nlɔn má to ɔ́ nú gbɛtɔ́ lɛ́ɛ ɔ́, é ɖó dogbó nú akɔta lɛ́ɛ. É sɔ́ togun lɛ́ɛ ɖokpó ɖokpó ɖó wɛnsagun ɖokpó glɔ́.

⁹ Izlayɛ́li togun ɔ́ wɛ nyí Mawu Mavɔmavɔ tɔn, Jakɔ́bu ví lɛ́ɛ wɛ nyí étɔn.

¹⁰ É mɔ Izlayɛ́li togun ɔ́ ɖo gbětótló mɛ, ɖo cukú gbě tɔn e ɖo nǔ hó wɛ lɛ́ɛ tɛ́ntin. É wlíbo n'i, é ná ɛ kplɔ́n. É hɛn ɛ kɛ́ɖɛ́ kɛ́ɖɛ́ nukúnzin ɖɔhun.

¹¹ Lě e gangan nɔ ɖo zinzɔn gbɔn adɔ̌ta nu wɛ, bó nɔ́ ɖo ɖiɖɔ nú vǐ tɔn lɛ́ɛ wɛ ɖɔ yě ní zɔn é ɖɔhun wɛ é cí nú yě. Abǐ lě e gangan nɔ vlɔ́n awa tɔn lɛ́ɛ ɖó vǐ tɔn lɛ́ɛ glɔ́ bó nɔ́ hɛn yě ɖó te bónú yě má jɛ ayǐ ó ɔ́ ɖɔhun wɛ é cí nú yě.

¹² Nǔgbó wɛ, Mawu Mavɔmavɔ ɖokpónɔ géé wɛ kplá togun tɔn; é ba vodún ɖěbǔ sín alɔdó ǎ.

¹³ É ba tɛn nú yě ɖó sókan mɛ; é ná yě nǔɖuɖu e ɖo gle mɛ lɛ́ɛ, é bló bɔ wǐin tɔ́n sín só mɛ wá nú yě; é bló bɔ olívutín wú ɖo sókan mɛ.

¹⁴ Nyibú asi lɛ́ɛ kpó gbɔ̌ lɛ́ɛ kpó sín anɔ̌sin wɛ yě nɔ́ nu. Lɛ̌ngbɔ́ lɛ́ɛ kpó agbo lɛ́ɛ kpó, kpó gbǎgbá kloklo lɛ́ɛ kpó sín lan wɛ yě nɔ́ ɖu. Yě nɔ́ ɖu jinukún ɖagbe ɖagbe, bó nɔ́ nu vɛ̌ɛn e vǐwungbo yětɔn ná é.

¹⁵ Ée Yeculunu ɖu nǔ gɔ́ xo bó kló, bó nyɔ́ wǔ ɔ́, é fɔ́n gǔ; é jó Mawu e ɖó e ɔ́ dó; é dó winnyá só tɔn, hwlɛngán tɔn ɔ́.

¹⁶ É nɔ́ zé walɔ tɔn e nɔ́ vɛ́ mɔ nú Mawu Mavɔmavɔ lɛ́ɛ dó fɔ́n wǔhwan Mawu Mavɔmavɔ tɔn dó jǐ. É nɔ́ sɛn nǔ ɖěvo lɛ́ɛ, dó dó xomɛsin n'i.

¹⁷ É nɔ́ xwlé vɔ̌sánú yɛ nyanya lɛ́ɛ; yɛ énɛ́ lɛ́ɛ ká nyí Mawu ǎ; é nɔ́ xwlé vɔ̌sánú vodún e é má tunwun kpɔ́n gbeɖé ǎ lɛ́ɛ, vodún yɔ̌yɔ́ énɛ́ lɛ́ɛ e tɔ́gbó tɔn lɛ́ɛ má ké ya ná ǎ lɛ́ɛ.

¹⁸ ‘Nǔgbó wɛ, Izlayɛ́li ví e mi! Mi wɔn alɔcyɔ́nmɛjítɔ́ mitɔn e dó kún mitɔn é. É wɛ nyí só mitɔn. Mi dó vɛ̌ nú Mawu e ná gbɛ mi é!’

¹⁹ Ée Mawu Mavɔmavɔ mɔ lě e vǐ tɔn lɛ́ɛ ɖo xomɛsin dó n'i wɛ gbɔn ɔ́, akpɔ ɖó e ɖésú.

²⁰ Bɔ é ɖɔ: ‘È sixú ɖeji dó yě wú ǎ. Yě nɔ́ sí nǔ ɖěbǔ ǎ. Un sɔ́ ná nya xɛ ɖo yě jí ǎ, bó ná kpɔ́n lě e nǔ ná cí gbɔn nú yě ɔ́.

²¹ Yě zé nǔmɛsɛn nyanya lɛ́ɛ dó fɔ́n wǔhwan ce dó jǐ. Yě dó xomɛsin nú mì kpó vodún yětɔn lɛ́ɛ kpó. Din ɔ́, nyɛ lɔ ná zé mɛ e ma nyí togun nǔgbó nǔgbó ɔ́ ǎ lɛ́ɛ, dó fɔ́n wǔhwan yětɔn dó jǐ, akɔta e ma ɖó nǔnywɛ́ ǎ é, dó dó xomɛsin nú yě.

²² Un sin xomɛ nǔgbó: Xomɛsin ce cí zo ɖɔhun. É fyɔ́ nǔ káká yi kútomɛ, ɖo do gɔngɔn mɛ; é fyɔ́ jinukún e ɖo ayǐkúngban jí é bǐ. É fyɔ́ nǔ káká yi sózan jí.

²³ Un ná sɛ́ awě ɖě ɖo ɖě jí dó yě. Un ná da gǎ ce lɛ́ɛ bǐ dó yě.

²⁴ Hwenu e xovɛ́ ná sin yě bɔ avivɔ kpó jɛmɛjí kpó ná ɖo yě jí bɔ yě ná ba hlɔ̌nhlɔ́n kpo é ɔ́, un ná sɛ́ adǎnkanlin lɛ́ɛ kpó dan aɖǐnɔ lɛ́ɛ kpó dó yě.

²⁵ È nǎ hu gbɛtɔ́ ɖó hwǐ wú, gbɔn ali lɛ́ɛ jí; mɛ bǐ ná ɖo síja jí ɖo xwé lɛ́ɛ gbe. Mɛ bǐ ná kú. Dɔ̌nkpɛvú kpó ɖyɔ̌vǐ kpó, kpó degénɔ kpó vǐ ɖo anɔ̌ nu kpó bǐ ná kú.’

²⁶ ‘Un ko jló ná vívá kún yětɔn bǐ gbídígbídí, bɔ mɛɖé sɔ́ ná nɔ́ flín yě ǎ.

²⁷ Lo ɔ́, un ɖo xɛsi ɖi wɛ ɖɔ kɛntɔ́ yětɔn lɛ́ɛ ní má ko mì ó; yě táá vɛdó ɖɔ émí wɛ bló bɔ nǔ cí mɔ̌ nú yě sín, lobo ná lin ɖɔ nyi kún mɔ do nú nǔɖé ó.

²⁸ Izlayɛ́li ví lɛ́ɛ ɔ́, akɔta ɖé wɛ yě nyí, bó ɖó tamɛ ǎ; yě bí ǎ.

²⁹ Nǔnywɛ́ kpɛɖé jɛ́n hwedó yě, bɔ yě ná tunwun fí e nǔ e wa wɛ yě ɖe ɔ́ kplá yě xwe é.

³⁰ Kɛntɔ́ ɖokpó sixú sí te é ɖokpó géé bó gba Izlayɛ́li ví afatɔ́n (1.000) dó a? Kɛntɔ́ we sixú nya Izlayɛ́li ví děgba we afɔwó (10.000) a? Cóbónú nǔ ná cí mɔ̌ ɔ́, nyɛ mɛ e nyí Só yětɔn ɔ́ jɛ́n ná jó yě nú kɛntɔ́ yětɔn lɛ́ɛ.

³¹ Kɛntɔ́ yětɔn lɛ́ɛ ɖésú ká tunwun ɖɔ nǔmɛsɛn émítɔn e nɔ́ ɖo alɔ cyɔ́n émí jí wɛ ɔ́ kún sixú nɔ te nyɛ Mawu Izlayɛ́li ví lɛ́ɛ tɔn nukɔn ó.

³² È ka ná ɖɔ ɔ́, kɛntɔ́ yětɔn lɛ́ɛ ɔ́, nyɔ̌ wɛ yě nyɔ́ hú Izlayɛ́li Sodɔ́munu lɛ́ɛ kpó Gomɔ́ɔnu lɛ́ɛ kpó ǎ; yě bǐ wɛ cí vǐwuntín e nɔ́ ná sínsɛ́n vlɛ́vlɛ́, sínsɛ́n aɖǐnɔ é ɖɔhun.

³³ Vɛ̌ɛn yětɔn cí dan sín aɖǐvɛ́ ɖɔhun.

³⁴ Wě e ɖe dó yě wǔ wɛ nyɛ Mawu Mavɔmavɔ ɖe bɔ yě ma tunwun ǎ é ɖíe: Nǔ e ná wa xá yě wɛ un ɖe ɔ́ ɖíe:

³⁵ Gbe e gbe yě ná jɛ ayǐ ɔ́, un ná ba hlɔn, un ná sú nǔ e yě wa ɔ́ sín axɔ́ yě. Nǔgbó wɛ, nǔ nyanya sín azǎn énɛ́ ɔ́ kó sɛkpɔ́ bǐ; nǔ e ɖo yě ná xá wɛ ɔ́ sɔ́ ɖo lǐnlín mɛ ǎ.’

³⁶ Nǔgbó ɔ́, Mawu Mavɔmavɔ ná wa nǔ jlɔ́jlɔ́ nú togun tɔn; mɛsɛntɔ́ tɔn lɛ́ɛ sín nǔ ná blá wǔ n'i, hwenu e é ná mɔ ɖɔ hlɔ̌nhlɔ́n hwedó yě bɔ yě ma sɔ́ ɖó gǎnjɛwú ɖěbǔ ǎ, bó má sɔ́ ɖó ɖɔxátɔ́ ɖěbǔ ǎ é.

³⁷ É ná kanbyɔ́ yě ɖɔ: ‘Fítɛ́ vodún mitɔn e mi nɔ hɔn yi su lɛ́ɛ ɖe?

³⁸ Mi nɔ hu kanlin dó yě; mi nɔ ba ahan nú yě. Din ɔ́, yě bó bló nǔɖé bó hwlɛ́n mi gán bó cyɔ́n alɔ mi jí bó.

³⁹ Mi mɔ din ɖɔ nyɛ ɖokpó géé wɛ nyí Mawu. Mi mɔ din ɖɔ nǔ e è ɖǒ ná sɛn ɔ́ ɖě kún tíin zɛ nyɛ wú ó. Un nɔ hɛn mɛ ɖó gbɛ, un nɔ hu mɛ. Un nɔ gblé wǔ mɛ, un nɔ hu akpa nú mɛ. Mɛɖé nɔ yí mɛ sín alɔ ce mɛ ǎ.

⁴⁰ Un dlɛ́n alɔ dó jǐ, bó ɖe gbeta tɔ́n ɖɔ: Un ɖo gbɛ tɛgbɛ!

⁴¹ Un gan hwǐ ce bó blóɖó ganjí; un sɔ́ hwɛ jlɔ́jlɔ́ sín afɔ ɖó te; un ná ba hlɔn kɛntɔ́ ce lɛ́ɛ, bó ná dɔn tó nú mɛ e gbɛ́ wǎn nú mì lɛ́ɛ.

⁴² Gǎ ce lɛ́ɛ ná nu hun. Hwǐ ce ná kán lan hɛn nu. Kɛntɔ́ ce syɛ́nsyɛ́n lɛ́ɛ ɖěbǔ ná gán ǎ; mɛ e è gblě wǔ lɛ́ɛ kpó mɛ e è wlǐ lɛ́ɛ kpó bǐ ná kú.’

⁴³ Akɔta lɛ́ɛ bǐ ní kpa awǒbóbó nú togun Mawu Mavɔmavɔ tɔn! Mawu Mavɔmavɔ ná ba hlɔn nú mɛsɛntɔ́ tɔn e kú lɛ́ɛ. É ná dɔn tó nú kɛntɔ́ tɔn lɛ́ɛ. É ná bló mɔ̌ dó slá wǔ nú to tɔn. É ná slá wǔ nú togun tɔn.”

⁴⁴ Mɔyízi kpódó Jozuwée Nuni ví ɔ́ kpó wá togun ɔ́ nukɔn, bó zé gbe d'aga bó ɖɔ xó e ɖo han énɛ́ mɛ lɛ́ɛ.

⁴⁵ Ée Mɔyízi ná kplɔ́n Mawu tɔn Izlayɛ́li ví lɛ́ɛ fó ɔ́,

⁴⁶ é ɖɔ nú yě ɖɔ: “Mi zé xó e ɖɔ nú mi wɛ un ɖe égbé lɛ́ɛ ylɔ́ ɖɔ nǔ. Mi xa yě nú vǐ mitɔn lɛ́ɛ, bónú yě ní wa nǔ e sɛ́n ɔ́ ɖɔ é.

⁴⁷ Nǔgbó ɔ́, sɛ́n énɛ́ lɛ́ɛ nyí xó tófwe ǎ. Nú mi nyi sɛ́n énɛ́ lɛ́ɛ ɔ́, mi ná nɔ gbɛ bó ná dɔ́ ji ɖo to e mi ná yí ɖo Judɛ́ɛn tɔ ɔ́ gúdo é mɛ.”

È ɖɔ Mɔyízi ná kú

⁴⁸ Gbe nɛ́ gbe ɖokpó ɔ́, Mawu Mavɔmavɔ ɖɔ nú Mɔyízi ɖɔ:

⁴⁹ “Yi Avalímu sókan ɔ́ mɛ ɖo Mɔwabu, ɖo Jeliko nukɔn, bó xá Nɛbo só ɔ́ ta. Kpɔ́n Kanáa to e ná ná Izlayɛ́li ví lɛ́ɛ wɛ un ɖe é sɛ́ dó sín fínɛ́.

⁵⁰ Só énɛ́ e jí ná xá wɛ a ɖe ɔ́ jí wɛ a nǎ kú jɛ, bó ná yi mɔ tɔ́gbó towe lɛ́ɛ, lě e nɔví towe Aalɔ́ɔn kú gbɔn ɖo Hɔ́ɔ só jí, bó yi mɔ tɔ́gbó tɔn lɛ́ɛ é.

⁵¹ Nǔ cí mɔ̌, ɖó Aalɔ́ɔn kpó hwi kpó hu hwɛ ɖaxó ɖé dó mì ɖo Izlayɛ́li ví lɛ́ɛ nukún mɛ, ɖo Mɛliba sín sin ɔ́ kɔn, ɖo Kadɛ́ci, ɖo Síni gbětótló mɛ. Mi ɖe lě e un nyí mɛ mímɛ́ gbɔn é xlɛ́ ɖo Izlayɛ́li ví lɛ́ɛ tɛ́ntin ǎ.

⁵² Énɛ́ ɔ́ wú wɛ a nǎ mɔ to e ná Izlayɛ́li ví lɛ́ɛ wɛ un ɖe é sɛ́ dó, lo ɔ́, hwɛ ná byɔ́ to ɔ́ mɛ ǎ.”