Sɛ́nflínmɛ 3 - MAWUXÓWÉMA

¹ Mɔyízi ɖɔ: “Mǐ wlí ali ɖidó Basáni. Axɔ́sú Basáni tɔn Ɔgu kpó ahwangɔnu tɔn kpó ká wá mɔ mǐ, bó ná tɔ́n ahwan mǐ ɖo Edlɛyi.

² Lo ɔ́, Mawu Mavɔmavɔ ɖɔ nú mì ɖɔ: ‘Ma ɖi xɛsi n'i ó. Un ná jó é kpódó ahwangɔnu tɔn kpó to tɔn kpó nú we bɔ a nǎ wa nǔ tɔn lě e a wa Sihɔ́ni Amɔliti lɛ́ɛ xɔ́sú ɔ́ sín nǔ gbɔn é. Hɛcibɔ́ni wɛ é nɔ́ nɔ.’

³ Nǔgbó ɔ́, Mawu Mavɔmavɔ, Mawu mǐtɔn lɛ́ jó Basáni xɔ́sú Ɔgu kpódó ahwangɔnu tɔn kpó nú mǐ: Mǐ fun ahwan xá yě, bó hu mɛ e ɖo to ɔ́ mɛ lɛ́ɛ bǐ. Mǐ jǒ mɛ ɖěbǔ dó nyi gbɛ ǎ.

⁴ Ée mǐ hu yě mɔ̌ é ɔ́, mǐ yǐ toxo yětɔn lɛ́ɛ bǐ; toxo kwín ɖokpó kpo bó má ɖo acɛ mǐtɔn mɛ ǎ. Toxo kanɖé ko (60) wɛ bǐ nyǐ: toxo énɛ́ lɛ́ɛ bǐ ɖo Basáni, ɖo Aagɔ́vu yíkúngban jí, bɔ axɔ́sú Ɔgu kpa acɛ dó bǐ nu.

⁵ Toxo énɛ́ lɛ́ɛ ɔ́, ahohó wɛ è mɛ lɛ́ lɛ̌ dó, bɔ é yi jǐ bó syɛ́n ɖésú; è dó hɔn nú yě, bó dó sɛxlo ná. Mǐ lɛ̌ yí toxo gěgé ɖěvo lɛ́ɛ bɔ è mɛ ahohó lɛ́ lɛ̌ dó ǎ.

⁶ Mǐ gba toxo énɛ́ lɛ́ɛ bǐ hánnyá, bó hu mɛxó kpó yɔkpɔ́vú kpó bǐ, lě e mǐ wa Sihɔ́ni Hɛcibɔ́ni xɔ́sú ɔ́ sín nǔ gbɔn é.

⁷ Amɔ̌, mǐ bɛ́ kanlin yětɔn lɛ́ɛ kpó dɔkun e ɖo toxo yětɔn mɛ lɛ́ɛ kpó wá yi xwé.”

Mɔyízi flín lě e é má Galadi to ɔ́ gbɔn ɔ́ Izlayɛ́li ví lɛ́ɛ

⁸ Mɔyízi ɖɔ: “Hwenɛ́nu ɔ́, lě e mǐ yǐ axɔ́sú Amɔliti lɛ́ɛ tɔn we sín ayǐkúngban gbɔn é nɛ́. Mǐ yǐ ayǐkúngban énɛ́ lɛ́ɛ ɖo Judɛ́ɛn tɔ ɔ́ sín zǎnzǎnhwe jí, bɛ́ sín Aanɔ́ni tɔ ɔ́ kɔn káká wá Ɛmɔ́ɔ só ɔ́ kɔn.

⁹ Sidɔ́ɔnnu lɛ́ɛ nɔ́ ylɔ́ Ɛmɔ́ɔ só ɔ́ ɖɔ Siliyɔ́ni, bɔ Amɔliti lɛ́ɛ ká nɔ́ ylɔ́ ɖɔ Seníi.

¹⁰ Mǐ yǐ toxo e ɖo ayǐkúngban wɛnjɛ jí lɛ́ɛ bǐ, bó yí éé ɖo Galadi gbé jí lɛ́ɛ bǐ, bó yí éé ɖo Basáni gbé jí lɛ́ɛ bǐ, káká wá Saluka toxo ɔ́ kpó Edlɛyi toxo ɔ́ kpó. Axɔ́súɖuto Ɔgu tɔn sín toxo lɛ́ɛ wɛ, bó ɖo Basáni.

¹¹ Axɔ́sú Basáni tɔn Ɔgu wɛ nyí mɛ ɖokpó e kpo ɖo gbɛ ɖo Hlafa ví lɛ́ɛ mɛ hwenɛ́nu é; yɔdo tɔn kpo ɖo te ɖo Hlaba, Amumɔ́ɔ ví lɛ́ɛ sín tota mɛ. Awǐnnya Bazalu mɛ wɛ è kun yɔdo ɔ́ dó. Ga tɔn hú mɛ̌tlu ɛnɛ, gblǒ tɔn yi mɛ̌tlu we.

¹² “Mǐ yǐ to énɛ́ ɔ́ hwenɛ́nu, bɔ un ná ayǐkúngban e bɛ́ sín Alowɛ́ɛ ɖo Aanɔ́ni tɔ ɔ́ kɔn ɔ́ Hwlibɛ́ni ví lɛ́ɛ kpódó Gadi ví lɛ́ɛ kpó. Un lɛ́ ná Galadi só ɔ́ sín wevlɔ́ɖó kpódó toxo e ɖ'é jí lɛ́ɛ kpó yě.

¹³ Un ná Galadi sín ayǐkúngban e kpo ɔ́, kpódó axɔ́súɖuto Ɔgu tɔn e ɖo Basáni é kpó akɔta vlɔ́ Manasée tɔn; fí énɛ́ lɛ́ɛ wɛ nyí axɔ́súɖuto Ɔgu tɔn ɖ'ayǐ. Aagɔ́vu to ɔ́ kpódó Basáni to ɔ́ kpó bǐ wɛ è nɔ ylɔ́ ɖɔ Hlafa ví lɛ́ɛ sín to.

¹⁴ Yayíi yí Aagɔ́vu to ɔ́ bǐ káká jɛ to Gɛcúunu lɛ́ɛ kpó Maakatinu lɛ́ɛ tɔn kpó sín dogbó jí. Yayíi ɔ́, Manasée kún mɛ wɛ é jɔ ɖe. É ná nyǐkɔ tɔn Basáni to ɔ́, bɔ è nɔ ylɔ́ fínɛ́ ɖɔ gletoxo Yayíi tɔn lɛ́ɛ. Nyǐkɔ énɛ́ ɔ́ kpo ɖo te káká jɛ égbé.

¹⁵ Un ná Galadi to ɔ́ Makíi. Makíi lɔ ɔ́, Manasée kún mɛ wɛ é jɔ ɖe.

¹⁶ Un ná ayǐkúngban e ɖo Galadi kpó Aanɔ́ni kpó tɛ́ntin ɔ́ Hwlibɛ́ni ví lɛ́ɛ, kpó Gadi ví lɛ́ɛ kpó. Aanɔ́ni tɔ ɔ́ nyí dogbó ɖo tofɔligbé, bɔ Yabɔ́ku tɔ ɔ́ kplé dogbó xá Amumɔ́ɔ ví lɛ́ɛ sín to.

¹⁷ Dogbó e gbɔn zǎnzǎnhwe jí ɔ́ zɔn mɔ̌, bó gbɔn Judɛ́ɛn sín tɔdo mɛ, ɖo Jenɛzalɛ́ti tɔ ɔ́ kpó Jɛ xu ɔ́ kpó tɛ́ntin, káká wá Pisiga só e ɖo gbadahwe jí ɔ́ kɔn.

¹⁸ “Hwenɛ́nu ɔ́, un ɖɔ nú akɔta Hwlibɛ́ni tɔn, Manasée tɔn kpódó Gadi tɔn kpó ɖɔ: ‘Mawu Mavɔmavɔ, Mawu mitɔn ná to élɔ́ mi, bɔ é nyí mitɔn. É ká ɖo mɔ̌ có, mi ahwanfuntɔ́ lɛ́ɛ bǐ ní fɔ ahwanfunnú, bó nɔ nukɔn nú nɔví mitɔn Izlayɛ́li ví ɖě lɛ́ɛ bó ná gɔ́ alɔ nú yě.

¹⁹ Asi mitɔn lɛ́ɛ, vǐ mitɔn lɛ́ɛ kpó kanlin mitɔn lɛ́ɛ kpó kɛ́ɖɛ́ wɛ ná kpo ɖo toxo e un ná mi lɛ́ɛ é mɛ. Un ka tunwun ganjí ɖɔ kanlin mitɔn lɛ́ɛ sukpɔ́ ɖésú.

²⁰ Mi ɖo alɔ dó nɔví mitɔn lɛ́ɛ wɛ mɔ̌ káká jɛ hwenu e Mawu Mavɔmavɔ ná ná gbɔjɛ́ yě mi ɖɔhun é, bónú yě lɔmɔ̌ ná yí to e Mawu Mavɔmavɔ, Mawu mitɔn ɖɔ émí ná ná yě bɔ é ɖo Judɛ́ɛn tɔ ɔ́ sín gbadahwe jí é. Énɛ́ ɔ́, mi mɛ ɖokpó ɖokpó ná lɛ́ kɔ wá to e un ná mi é mɛ.’

²¹ “Hwenɛ́nu ɖokpó ɔ́, un lɛ́ ɖɔ nú Jozuwée lɔmɔ̌ ɖɔ: ‘Hwi ɖésú mɔ lě e Mawu Mavɔmavɔ, Mawu mǐtɔn wa axɔ́sú we énɛ́ lɛ́ɛ sín nǔ gbɔn ɔ́ ɖó nukún towe wú ganjí. Mɔ̌ wɛ Mawu Mavɔmavɔ ná wa axɔ́súɖuto e a nǎ tɔ́n ahwan lɛ́ɛ bǐ sín nǔ gbɔn.

²² Mi ma ɖi xɛsi nú yě ó, ɖó Mawu Mavɔmavɔ, Mawu mitɔn ɖésú ná fun ahwan nú mi.’ ”

Mɔyízi ná byɔ́ Kanáa to ɔ́ mɛ ǎ

²³ Mɔyízi ɖɔ hwenɛ́nu ɔ́ émí sa vo nú Mawu Mavɔmavɔ bó ɖɔ:

²⁴ “Aklúnɔ Mavɔmavɔ, a jɛ lě e a kló gbɔn ɔ́, lě e alɔ towe kpé nǔ wú sɔ ɔ́ ɖe xlɛ́ nyɛ mɛsɛntɔ́ towe jí. Nǔmɛsɛn ɖěbǔ ɖo ayǐkúngban jí, abǐ sɛ́xwé, bó sixú bló nǔ e a nɔ bló lɛ́ɛ é ǎ; ɖěbǔ ká sixú jlɛ́ nǔ hwi ɖɔhun ǎ.

²⁵ Kɛnklɛ́n gbɔ nú má yi kpɔ́n to ɖagbe ɖagbe énɛ́ e ɖo Judɛ́ɛn tɔ ɔ́ sín gbadahwe jí é, gbɔ nú má yi kpɔ́n só ɖagbe ɖagbe nɛ́ lɛ́ɛ kpó Libáan só ɔ́ kpó.”

²⁶ Lo ɔ́, Mawu Mavɔmavɔ sin xomɛ dó mì ɖó mi wú; é sɔ́ nɔ ɖótó mì ǎ. Mawu Mavɔmavɔ ɖɔ nú mì ɖɔ: “É kpé mɔ̌, ma sɔ́ ɖɔ xó énɛ́ ɖě nú má se ó.

²⁷ Xá Pisiga só jí, bó ván nukún, bó kpɔ́n totaligbé, bó kpɔ́n tofɔligbé, bó kpɔ́n zǎnzǎnhwe jí, bó kpɔ́n gbadahwe jí; a nǎ mɔ nǔ lɛ́ɛ ganjí, a ka ɖo Judɛ́ɛn tɔ ɔ́ ná dó asá wɛ ǎ.

²⁸ Đɔ xó e a ɖǒ ɔ́ nú Jozuwée, bó dó wǔsyɛ́n lanmɛ n'i, bó ná ɛ akɔ́nkpinkpan, ɖó é wɛ ɖo togun ɔ́ nukɔn ná nɔ wɛ, bɔ yě ná dó asá Judɛ́ɛn tɔ ɔ́, bɔ é ná yí to e a nǎ mɔ sɛ́ dó ɔ́ nú yě, bɔ é ná nyí yětɔn.”

²⁹ Sín hwenɛ́nu ɔ́, mǐ cí tɔdo mɛ fí ɖo Bɛti-Peɔ́ɔ toxo ɔ́ nukɔn.