Sɛ́nflínmɛ 29 - MAWUXÓWÉMA

¹ Mɔyízi ylɔ́ Izlayɛ́li togun ɔ́ bǐ bó ɖɔ nú yě ɖɔ: “Mi ɖésú mɔ nǔ e Mawu Mavɔmavɔ bló ɖo Ejípu xá Ejípu xɔ́sú ɔ́ kpó mɛsɛntɔ́ tɔn lɛ́ɛ bǐ kpó, kpó to ɔ́ bǐ kpó ɖo nukún mitɔn mɛ é.

² Mi ɖésú mɔ ya tobutóbú e Mawu Mavɔmavɔ dó nú yě lɛ́ɛ, nǔjíwǔ ɖaxó ɖaxó lɛ́ɛ kpó nǔdábaɖa e é jlɛ́ lɛ́ɛ kpó.

³ Nǔ ɖo mɔ̌ có, káká wá jɛ égbé din ɔ́, Mawu Mavɔmavɔ sɔ́ ayi dó xomɛ nú mi, nú mi ná mɔ nǔ jɛ nǔ e ɖo jijɛ wɛ lɛ́ɛ wú ǎ. É ká ná nukún mi nú mi ná dó mɔ nǔ ǎ. É ká ná tó mi, nú mi ná dó se nǔ ǎ.”

⁴ É kplá mi gbɔn gbětótló mɛ nú xwe kanɖé. Awu e ɖo kɔ mitɔn é ká dóxó ǎ, afɔkpa e ɖo afɔ nú mi é ká dóxó ɖo afɔ nú mi ǎ.

⁵ Wɔ̌xúxú wɛ nyí nǔɖuɖu e mi nɔ ɖu é ǎ, é ká nyí vɛ̌ɛn abǐ ahan syɛ́nsyɛ́n ɖé wɛ mi nɔ nu hwenu e kɔ nɔ xú mi é ǎ. Nǔ nyí mɔ̌, bónú mi ná tunwun ɖɔ nyɛ Mawu Mavɔmavɔ wɛ nyí Mawu mitɔn.

⁶ Ée mǐ wá fí ɔ́, Sihɔ́ni Hɛcibɔ́ni xɔ́sú ɔ́ kpó Ɔgu, Basáni xɔ́sú ɔ́ kpó wá tɔ́n ahwan mǐ; mǐ ká ɖu ɖo yě jí.

⁷ Mǐ yí to yětɔn, bó má nú akɔta Hwlibɛ́ni tɔn kpó Gadi tɔn kpó, kpó akɔta vlɔ́ Manasée tɔn kpó.

⁸ Énɛ́ ɔ́ wú ɔ́, mi ná kpé nukún dó xó e Mavɔmavɔ ɖɔ dó jɛ akɔ xá mi ɔ́ wú bó bló ɖ'é jí. Énɛ́ ɔ́, mi sɔ́ nǔɖé bó ná wa ɔ́, mi ná mɔ nu tɔn.

Mi ná sɔ́ akɔ e Mawu jɛ xá mi é ylɔ́ nǔjɔnǔ

⁹ Izlayɛ́li ví e mi! Mi bǐ xwíí ɖíe ɖo te Mawu Mavɔmavɔ, Mawu mitɔn nukɔn égbé din e: gǎn mitɔn lɛ́ɛ, gǎn e ɖo akɔta mitɔn mɛ lɛ́ɛ, tomɛxó mitɔn lɛ́ɛ, ahwangán mitɔn lɛ́ɛ, mi súnnu e ɖo Izlayɛ́li lɛ́ɛ bǐ,

¹⁰ vǐ mitɔn lɛ́ɛ, asi mitɔn lɛ́ɛ, káká jɛ jǒnɔ e ɖo ahwankpá mitɔn mɛ bó ná nɔ́ gbo atín nú mi, bó ná nɔ́ dun sin nú mi lɛ́ɛ kpó jí; mi bǐ xwíí ɖo fí.

¹¹ Mawu Mavɔmavɔ, Mawu mitɔn jɛ akɔ xá mi, bó sɔ́ nǔ slé jí. Akɔ énɛ́ ɔ́ ná bɛ́ azɔ̌ bɛ́ sín égbé.

¹² Énɛ́ ɔ́, mi ná húzú togun tɔn, bɔ é ná nyí Mawu mitɔn lě e é kó dó akpá tɔn gbɔn nú tɔ́gbó mitɔn Ablaxámu, Izáki kpó Jakɔ́bu kpó bó xwlé nǔ d'é jí é.

¹³ Akɔ élɔ́ e un ɖɔ mi ní jɛ xá Mawu Mavɔmavɔ bó xwlé nǔ d'é jí ɔ́, é nyí mi kɛ́ɖɛ́ wɛ Mawu Mavɔmavɔ jɛ xá ǎ.

¹⁴ É nyí mɛ e ɖo te fí din ɖo Mawu Mavɔmavɔ, Mawu mǐtɔn nukɔn lɛ́ɛ kɛ́ɖɛ́ tɔn wɛ ǎ, lo ɔ́, é lɛ́ nyí vǐ mǐtɔn e è ma ko ji din ǎ lɛ́ɛ lɔ tɔn.

¹⁵ Midɛɛ lɛ́ɛ ɔ́, mi tunwun lě e mǐ nɔ Ejípu gbɔn é, bó tunwun akɔta e yíkúngban jí mǐ gbɔn lɛ́ɛ.

¹⁶ Mi mɔ suɖunú e yě nɔ́ sɛn lɛ́ɛ, vodún e yě nɔ́ sɛn lɛ́ɛ, vodún e è sɔ́ atín dó bló lɛ́ɛ, éé è sɔ́ awǐnnya dó bló lɛ́ɛ, éé è sɔ́ kpatágan dó bló lɛ́ɛ, kpó éé è sɔ́ siká dó bló lɛ́ɛ kpó.

¹⁷ Mɛ ɖé má ɖo mi mɛ, súnnu oo, nyɔ̌nu, abǐ hwɛndo ɖé oo, abǐ akɔta ɖé bó lɛ́ kɔ sín Mawu Mavɔmavɔ, Mawu mǐtɔn gúdo, bó jɛ vodún akɔta énɛ́ lɛ́ɛ tɔn sɛn jí, bó húzú atín aɖǐvɛ́nɔ ɖo mi mɛ ó.

¹⁸ Mɛɖé má ɖo mi mɛ bó se akɔ e mi jɛ din ɔ́, bó wa yɛ nú éɖée bó ɖɔ nú éɖée ɖɔ: “Din ɔ́, un na bo wa nǔ e jló mì lɛ́ɛ ɔ́, un ná vo.” Ényí mɛ ɔ́ ɖɔ mɔ̌ bó dɔn mɛ ɖé, bɔ mɛ ɔ́ jɛ nǔ ɖěvo sɛn jí ɔ́,

¹⁹ Mawu Mavɔmavɔ ná sɔ́ hwɛ tɔn kɛ ɛ gbeɖé ǎ; é ná sin xomɛ dó e bɔ nǔ nyanya e sín xó è ɖɔ dó wěma mɛ fí lɛ́ɛ bǐ ná gbo e, bɔ Mawu Mavɔmavɔ ná súnsún nyǐkɔ tɔn sín hwe glɔ́ fí, bɔ mɛɖé sɔ́ ná flín i ǎ.

²⁰ Mawu Mavɔmavɔ ná ɖe e sín akɔta Izlayɛ́li tɔn lɛ́ɛ bǐ mɛ, bɔ awě e xó è ɖɔ ɖo akɔ e è jɛ bó wlán dó sɛ́nwéma ɔ́ mɛ lɛ́ɛ ná xo e.

²¹ Énɛ́ ɔ́, gbɛtɔ́ e ná wá jɛ mi gúdo lɛ́ɛ ɔ́, vǐ mitɔn e ná wá jɛ fínɛ́ lɛ́ɛ kpó jǒnɔ e ná gosín zɔ wá to mitɔn mɛ lɛ́ɛ kpó mɔ nǔ e Mawu Mavɔmavɔ dó sin xá to élɔ́ ɔ́, xó e yě ná ɖɔ ɔ́ ɖíe:

²² “Ayǐkúngban e ɖo to ɔ́ mɛ ɔ́ hwemí kpó jɛ kpó hɛn bǐ gblé. È sixú dó nǔɖé ɖo to ɔ́ mɛ ǎ; atín ɖo to ɔ́ mɛ ǎ, ama ɖěbǔ ɖo to ɔ́ mɛ ǎ, bɔ é cí Sodɔ́mu kpó Gomɔ́ɔ kpó ɖɔhun, bó cí Adima kpó Sevoyímu kpó ɖɔhun. Toxo énɛ́ lɛ́ɛ ɔ́, xomɛ ɖaxó ɖé wɛ Mawu Mavɔmavɔ sin bó gba bǐ.”

²³ Mɛ e ɖo akɔta ɖě lɛ́ɛ mɛ lɛ́ɛ bǐ ná sú xó, bó ɖɔ: “Étɛ́wú Mawu Mavɔmavɔ ka wa to élɔ́ nú gbɔn lě. Étɛ́wú xomɛ ɖaxó énɛ́ ká sin i.”

²⁴ Bɔ è nǎ yí gbe ɖɔ: “Akɔ e yě jɛ xá Mawu Mavɔmavɔ ɔ́ wɛ yě jó dó; akɔ e Mawu tɔ́gbó yětɔn lɛ́ɛ tɔn jɛ xá yě hwenu e é ɖe yě tɔ́n sín Ejípu é wɛ yě jó dó.

²⁵ Yě jɛ nǔ ɖěvo lɛ́ɛ sɛn jí, bó jɛ kɔ́ ɖe ná jí. Yě ká tunwun nǔmɛsɛn énɛ́ lɛ́ɛ ɖ'ayǐ ǎ. Mawu Mavɔmavɔ ka ná gbe tɔn yě ǎ.

²⁶ Énɛ́ ɔ́ zɔ́n bɔ Mawu Mavɔmavɔ sin xomɛ ɖaxó ɖé dó to ɔ́, bɔ awě e sín xó è ɖɔ ɖo wěma élɔ́ mɛ lɛ́ɛ bǐ xo yě.

²⁷ Mawu Mavɔmavɔ ɖe yě sín ayǐkúngban yětɔn jí kpó xomɛsin kpó, kpó adǎn kpó, kpódó zǐngídi kpó, bó nya yě sɛ́ dó to ɖěvo lɛ́ɛ mɛ, bɔ yě kpo ɖo dɔ̌n káká jɛ égbé.”

²⁸ Nǔ e ɖo hwlǎhwlá ɔ́, Mawu Mavɔmavɔ, Mawu mǐtɔn kɛ́ɖɛ́ wɛ tunwun. Lo ɔ́, mǐ tunwun éé é ɖe xlɛ́ mǐ kpó vǐ mǐtɔn lɛ́ɛ kpó bɔ é ná nɔ ayǐ káká sɔ́yi é. É wɛ nyí sɛ́n tɔn lɛ́ɛ bɔ mǐ ɖǒ ná nɔ́ nyi.