Sɛ́nflínmɛ 28 - MAWUXÓWÉMA

¹ Ényí mi ɖótó Mawu Mavɔmavɔ, Mawu mitɔn nǔgbó, bó ɖó ayi te, bó bló nǔ e é zɔ́n mi, bɔ un ɖo ɖiɖɔ nú mi wɛ égbé din lɛ́ɛ bǐ ɖ'é jí ɔ́, Mawu Mavɔmavɔ, Mawu mitɔn ná bló, bɔ mi ná hú gǎn togun e ɖo gbɛ ɔ́ mɛ lɛ́ɛ bǐ.

² Đɛ e Mawu Mavɔmavɔ, Mawu mitɔn xo dó mi jí bɔ mi se tónú n'i ɔ́, é ná nyí ɖagbe nú mi lɛ́ɛ ɖíe:

³ Mawu Mavɔmavɔ ná xo ɖɛ dó mi jí ɖo toxo mitɔn lɛ́ɛ mɛ, bó ná xo dó mi jí ɖo gle mitɔn lɛ́ɛ mɛ.

⁴ Mawu Mavɔmavɔ ná xo ɖɛ dó vǐ e mi ná ji lɛ́ɛ, jinukún e mi ná sɔ́ lɛ́ɛ, gbɔ̌ mitɔn lɛ́ɛ, lɛ̌ngbɔ́ mitɔn lɛ́ɛ kpó nyibú mitɔn lɛ́ɛ kpó jí, bɔ yě ná sukpɔ́.

⁵ Mawu Mavɔmavɔ ná xo ɖɛ dó mi jí bɔ nǔɖuɖu ná hán mi ǎ: atínsínsɛ́n ná gɔ́ xasun mitɔn lɛ́ɛ, jinukún ná gɔ́ kɔ́zún mitɔn lɛ́ɛ.

⁶ Mawu Mavɔmavɔ ná xo ɖɛ dó nǔ e mi ná wa lɛ́ɛ bǐ jí.

⁷ Ényí kɛntɔ́ wá tɔ́n ahwan mi ɔ́, Mawu Mavɔmavɔ ná bló bɔ mi ná ɖu ɖo kɛntɔ́ jí. Ényí ali ɖokpó wɛ yě gbɔn bó wá tɔ́n ahwan mi ɔ́, ali tɛ́nwe wɛ yě ná hɔn gbɔn bó yi.

⁸ Mawu Mavɔmavɔ, Mawu mitɔn ná xo ɖɛ dó nǔkún e mi ná ya dó agɔ̌ mɛ lɛ́ɛ bǐ jí, bó ná dó acɛ nǔ e mi ná wa lɛ́ɛ bǐ jí. É ná xo ɖɛ dó mi jí ɖo to e é ná ná mi ɔ́ mɛ.

⁹ Ényí mi bló nǔ e Mawu Mavɔmavɔ, Mawu mitɔn zɔ́n mi lɛ́ɛ, bó wa jlǒ tɔn ɔ́, é ná sɔ́ mi bɔ mi ná nyí togun tɔn lě e é kó dó akpá tɔn gbɔn nú mi é.

¹⁰ Togun e ɖo gbɛ ɔ́ mɛ lɛ́ɛ bǐ ná mɔ ɖɔ Mawu Mavɔmavɔ tɔn wɛ mi nyí, bó ná nɔ́ ɖi xɛsi nú mi.

¹¹ Mawu Mavɔmavɔ ná ná vǐ gěgé mi, kanlin mitɔn lɛ́ɛ ná ji gba, bɔ jinukún e mi ná sɔ́ lɛ́ɛ ná sukpɔ́. É ná bló mɔ̌, bó dó wa ɖagbe nú mi ɖo to e é ɖɔ nú tɔ́gbó mitɔn lɛ́ɛ ɖɔ émí ná ná yě ɔ́ mɛ.

¹² Mawu Mavɔmavɔ ná hun agbanxɔ tɔn ɖagbe ɖagbe e ɖo jǐnukúnsin ɔ́, bɔ jǐ ná nɔ́ ja dó ayǐkúngban mitɔn jí, bɔ nǔ e mi ná wa lɛ́ɛ bǐ ná nyɔ́ nú mi. Mi ná nɔ́ nya nǔ nú akɔta gěgé, midɛɛ lɛ́ɛ ká ná nya nǔɖé ɖo mɛɖé sí ǎ.

¹³ Mawu Mavɔmavɔ ná sɔ́ mi ɖó nukɔn nú akɔta lɛ́ɛ bǐ; mi ná nɔ gǔdo ǎ. Aga wɛ mi ná nɔ nú yě tɛgbɛ; mi sɔ́ ná nɔ do ǎ. Amɔ̌, cóbónú nǔ ná nyí mɔ̌ ɔ́, nǔ e Mawu Mavɔmavɔ, Mawu mitɔn zɔ́n bɔ un ɖo ɖiɖɔ nú mi wɛ égbé din lɛ́ɛ ɔ́, mi ná xwedó bǐ dó wa azɔ̌ ná ganjí.

¹⁴ Mi ɖó ná zɛ sín ali e xlɛ́ mi wɛ un ɖe ɔ́ jí, bó ná yi sɛn nǔ ɖěvo ǎ.

Nǔ e ɖo tónú má se mɛ é

¹⁵ Mi ma ka se Mawu Mavɔmavɔ, Mawu mitɔn sín gbe bó nɔ acéjí, bó bló nǔ e é zɔ́n mi lɛ́ɛ, bó nyi sɛ́n e é dó nú mi, bɔ un ɖo ɖiɖɔ nú mi wɛ égbé din lɛ́ɛ ǎ ɔ́, nǔ nyanya e ná gbo mi lɛ́ɛ ɖíe:

¹⁶ É ná dó nu mi ɖo toxo ɔ́ mɛ, bó ná dó nu mi ɖo gle lɛ́ɛ mɛ.

¹⁷ É ná dó nu xasun mitɔn lɛ́ɛ bɔ yě ná jɛ vɔ̌, bó dó nu kɔ́zún mitɔn lɛ́ɛ bɔ yě ná jɛ vɔ̌.

¹⁸ É ná dó nu vǐ e ná tɔ́n sín xo mitɔn mɛ lɛ́ɛ, bó dó nu nǔkún e ná nyɔ́ ɖo ayǐkúngban mitɔn jí lɛ́ɛ, bó dó nu nyibú mitɔn asi lɛ́ɛ, bó dó nu gbɔ̌ mitɔn asi lɛ́ɛ.

¹⁹ É ná dó nu nǔ e mi ná wa lɛ́ɛ bǐ.

²⁰ Mi sɔ́ nǔ ɖěbǔ bó ná wa ɔ́, Mawu Mavɔmavɔ ná dó nu. É ná dó bǐ agudu, ɖě ná yi ta ǎ, káká bɔ kún mitɔn bǐ ná sú dó, ɖó hwɛ énɛ́ e mi hu ɔ́ jǒ wɛ mi jó Mawu Mavɔmavɔ dó.

²¹ Mawu Mavɔmavɔ ná sɛ́ jɛmɛjí dó mi ɖo to e mɛ mi xwe é mɛ, bɔ mi ná ɖo kúkú wɛ káká bɔ kún mitɔn bǐ ná sú dó.

²² Mawu Mavɔmavɔ ná ɖó gǒxúxú kpó flɔ́flɔ́ kpó nú mi, abǐ é ná ɖó avivɔ nú mi. É ná sɛ́ akú dó, jɔhɔn zozo ná fyɔ́ nǔkún mitɔn lɛ́ɛ dó te, abǐ bǐ ná nyɔ. Nǔ nyanya énɛ́ lɛ́ɛ bǐ ná ɖo mi gbo wɛ káká bɔ mi bǐ ná vɔ.

²³ Jǐnukúnsin e ɖo ta mitɔn nu ɔ́ ná syɛ́n ganvɔ ɖɔhun, bɔ ayǐkúngban e jí gbɔn wɛ mi ɖe ɔ́ ná syɛ́n gan ɖɔhun.

²⁴ Mawu Mavɔmavɔ ná sɛ́ kɔ́ kpó afúntúntún kpó dó sín jǐxwé, bɔ yě ná nɔ́ ja dó ayǐkúngban mitɔn jí ɖó jǐ do mɛ, bɔ é ná ɖo jija wɛ mɔ̌ káká bɔ mi bǐ ná vɔ.

²⁵ Mawu Mavɔmavɔ ná jó kɛntɔ́ dó bɔ kɛntɔ́ ná ɖu ɖo mi jí. Nú ali ɖokpó wɛ mi gbɔn bó yi tɔ́n ahwan kɛntɔ́ ɔ́, ali tɛ́nwe wɛ mi ná hɔn gbɔn ɖo nukɔn tɔn, bɔ axɔ́súɖuto e ɖo gbɛ ɔ́ mɛ é ɖěbǔ mɔ nǔ e gbo mi ɔ́, xɛsi ná jɛ jǐ tɔn.

²⁶ Cyɔ mitɔn ná nyí nǔɖuɖu nú xɛ kpó kanlin kpó, bɔ mɛɖé ká ná ɖe lɔ bó dó tagba nú yě ǎ.

²⁷ Mawu Mavɔmavɔ ná sɛ́ nǔtitɛ e é sɛ́ dó Ejípunu lɛ́ɛ ɔ́ dó mi, bó ná sɛ́ yonutúntún dó mi, bó ná sɛ́ cíɖɔ́ kpó akli kpó dó mi, bɔ ɖě ká ná gbɔ gbeɖé ǎ.

²⁸ Mawu Mavɔmavɔ ná dó taɖu mi, é ná va nukún mi, é ná dó yɛyi mi.

²⁹ Hwemɛ cíɖíɖí wɛ mi ná nɔ́ dlá avi nukúntíntɔ́nnɔ ɖɔhun. Nǔ e mi ná wa lɛ́ɛ ɖě ná yi ta ǎ. Mi ná nyí gbɛtɔ́ bɔ ayǐ hɔ́n tɛgbɛ ɔ́, è nǎ nɔ táfú, bó ná nɔ́ wló ɖu. Mɛɖé ká ná gɔ́ alɔ nú mi ǎ.

³⁰ Asixɔ́ntɔn e mi ná ɖó ɔ́, mɛ ɖěvo ná da. Xwé e mi ɖésú ná gbá ɔ́, mi ná nɔ mɛ ǎ. Vǐwun e mi ná tun ɔ́, mi ná gbɛ sínsɛ́n tɔn nukɔntɔn ɔ́ vɔ́vɔ́ ǎ.

³¹ È nǎ hu nyibú mitɔn lɛ́ɛ ɖo nukún mitɔn mɛ, bɔ mi ka ná dó lan tɔn ɖɛ̌ ǎ. È nǎ fin tócí mitɔn lɛ́ɛ ɖo nukún mitɔn mɛ, bɔ yě sɔ́ ná lɛ́ kɔ wá nú mi gbeɖé ǎ. Kɛntɔ́ mitɔn lɛ́ɛ ná bɛ́ lɛ̌ngbɔ́ mitɔn lɛ́ɛ, mi ka ná mɔ mɛɖé d'é wú ǎ.

³² È nǎ bɛ́ vǐ mitɔn súnnu kpó nyɔ̌nu kpó jó nú togun ɖěvo lɛ́ɛ, bɔ mi ná ɖó nukún yě káká bɔ é ná cikɔ. Mi ka sixú wa nǔ ɖěbǔ ǎ.

³³ Nǔkún e ná nyɔ́ ɖo ayǐkúngban mitɔn jí lɛ́ɛ kpó nǔ e mi ná jɛ tagba bó wa lɛ́ɛ kpó ɔ́, togun e mi ma tunwun vɔ́vɔ́ ǎ lɛ́ɛ wɛ ná ɖu bǐ. Bɔ ayǐ hɔ́n tɛgbɛ ɔ́, è nǎ nɔ táfú mi, bó ná nɔ́ wló mi ɖu.

³⁴ Nǔ e mɔ wɛ nukún mitɔn ɖe lɛ́ɛ ná zɔ́n bɔ mi ná bɛ́ taɖu.

³⁵ Mawu Mavɔmavɔ ná sɛ́ nǔtitɛ dó mi, bɔ é ná tɛ mi dó koli, bó tɛ mi dó asá; nǔ ná tɛ mi sín afɔkpákpá mɛ káká yi ta; ɖě ká ná gbɔ gbeɖé ǎ.

³⁶ Mawu Mavɔmavɔ ná sɛ́ mi kpó axɔ́sú e mi ná sɔ́ nú miɖée é kpó dó to ɖěvo mɛ, to e mi ma tunwun ǎ, bɔ tɔ́gbó mitɔn lɛ́ɛ lɔ ma tunwun ǎ é mɛ, bɔ mi ná sɛn nǔ ɖěvo lɛ́ɛ ɖo fínɛ́. Mi ná sɛn nǔ e è zě atín dó bló lɛ́ɛ, bó ná sɛn éé è zě awǐnnya dó bló lɛ́ɛ.

³⁷ Bɔ mi nǎ húzú nǔkpínkpɔ́n, winnyánú, nǔkiko ɖo togun e Mawu Mavɔmavɔ ná jó mi bɔ ahwan ná wlí mi hɛn yi mɛ lɛ́ɛ mɛ.

³⁸ Mi ná dó nǔkún gěgé ɖó gle mitɔn mɛ, amɔ̌, wɛn lɛ́ɛ wɛ ná ɖu bǐ, bɔ mi ná mɔ nǔjɔnǔ ɖé ǎ.

³⁹ Mi ná tun vǐwuntín bó kpé nukún d'é wú, mi ka ná nu vɛ̌ɛn tɔn ɖě ǎ; mi ná gbɛ vǐwun lɛ́ɛ vɔ́vɔ́ ǎ, ɖó wǎnvú ná ɖu bǐ.

⁴⁰ Olívutín mitɔn lɛ́ɛ ná gbɔn to ɔ́ bǐ mɛ, mi ka ná mɔ ami e mi ná sá é vɔ́vɔ́ ǎ, ɖó gloglóe tɔn lɛ́ɛ bǐ ná kɔn nyi ayǐ.

⁴¹ Mi ná ji vǐ súnnu bó ji nyɔ̌nu, ɖě ká ná nɔ gɔ̌n mitɔn ǎ; yě bǐ ná yi kannumɔgbénu.

⁴² Atín mitɔn lɛ́ɛ kpó nǔ e ná wú ɖo gle mitɔn mɛ lɛ́ɛ kpó ɔ́, bɔ ná ɖu bǐ.

⁴³ Mɛ e nyí jǒnɔ ɖo to mitɔn mɛ lɛ́ɛ ɔ́, acɛ yětɔn ná ɖo jijɛ jí wɛ, bɔ mitɔn ná ɖo ɖiɖe kpo wɛ.

⁴⁴ Yě wɛ na nɔ́ nya nǔ nú mi, midɛɛ ka ná ɖó nǔɖé bó ná nya nú yě ǎ. Jǒnɔ lɛ́ɛ wɛ ná nɔ nukɔn, bɔ midɛɛ lɛ́ɛ ka ná nyí gǔdo nú.

⁴⁵ Awě énɛ́ lɛ́ɛ bǐ ná xo mi, bɔ nǔ nyanya énɛ́ lɛ́ɛ bǐ ná ɖo gbigbo mi wɛ káká bɔ mi ná vɔ ɖ'é mɛ, ɖó tó e mi má ná ɖó Mawu Mavɔmavɔ, Mawu mitɔn bó nyi sɛ́n tɔn lɛ́ɛ, bó wa nǔ e é zɔ́n mi lɛ́ɛ ǎ é wú.

⁴⁶ Nǔ énɛ́ lɛ́ɛ ná jɛ dó mi jí, bó ná nɔ́ ɖo nǔ flín mi kpó vǐ mitɔn lɛ́ɛ kpó wɛ káká sɔ́yi.

⁴⁷ Hǔn, ényí mi ma sɛn Mawu Mavɔmavɔ, Mawu mitɔn kpó xomɛhunhun kpó, kpó awǎjijɛ kpó, kpó ayi mitɔn bǐ kpó hwenu e nǔ nyɔ́ nú mi é ǎ ɔ́,

⁴⁸ mi ná nɔ xovɛ́, bó nɔ nugblá, bó nɔ mɛ̌, bó nɔ nǔɖé má ɖó, bó sɛn kɛntɔ́ e Mawu Mavɔmavɔ ná sɛ́ dó mi lɛ́ɛ. Azɔ̌ syɛ́nsyɛ́n wɛ Mawu Mavɔmavɔ ná ɖó kɔ jí nú mi káká bó ná sú kún mitɔn dó.

⁴⁹ Mawu Mavɔmavɔ ná sɛ́ akɔta ɖokpó dó mi sín zɔ vóéé, sín fí e gbɛ ɔ́ kponu ɖó é, bɔ mi ná se gbe e é nɔ́ dó ɔ́ ǎ; akɔta ɔ́ ná kplɔ́ bó wá zɔn mi jí lě e gangan nɔ sá nǔ gbɔn ɔ́.

⁵⁰ Súnnu e ɖo akɔta énɛ́ ɔ́ mɛ lɛ́ɛ jɔ lan, yě ɖó sísí nú mɛxó ǎ, yɔkpɔ́vú nú ká nɔ́ blá wǔ nú yě ǎ.

⁵¹ Yě ná ɖu vǐ e kanlin mitɔn lɛ́ɛ ná ji lɛ́ɛ, bó ná ɖa nǔ e ná nyɔ́ ɖo gle mitɔn mɛ lɛ́ɛ bǐ ɖu, yě ná ɖo ɖuɖu wɛ káká, bɔ kún mitɔn ná sú dó. Yě ná jó vɛ̌ɛn mitɔn ɖě dó nú mi ǎ; yě ná jó jinukún ɖě dó nú mi ǎ, yě ná jó ami mitɔn ɖě dó ǎ, nyibú mitɔn asinɔ lɛ́ɛ kpó gbɔ̌ mitɔn asinɔ lɛ́ɛ kpó ɔ́, yě ná jó ɖěbǔ dó nú mi ǎ: yě ná wa nǔ énɛ́ lɛ́ɛ xá mi káká jɛ hwenu e mi bǐ nǎ vɔ sín ayǐkúngban ɔ́ jí dó é.

⁵² Yě ná xá mi gbɔn fí e mi ɖe lɛ́ɛ bǐ káká bɔ ahohó e wú mi nɔ ɖeji dó lɛ́ɛ bǐ ná mu. Yě ná xá mi gbɔn toxo e ɖo to e Mawu Mavɔmavɔ, Mawu mitɔn na ná mi lɛ́ɛ bǐ mɛ.

⁵³ Hwenu e kɛntɔ́ mitɔn ná xá mi ɔ́, mi ná ɖo ya ji wɛ káká bó ná jɛ vǐ mi ɖésúnɔ tɔn lɛ́ɛ ɖu jí. Vǐ súnnu kpó nyɔ̌nu kpó e Mawu Mavɔmavɔ ná mi lɛ́ɛ ɔ́, mi ná ɖu lan yětɔn.

⁵⁴ Súnnu e nyí mɛjɔmɛ, mɛfífá hú mɛ bǐ ɖo toxo mitɔn mɛ ɔ́ ná sɔ́ nukún nyanya dó kpɔ́n nɔví tɔn, bó sɔ́ nukún nyanya dó kpɔ́n asi tɔn e ɖo xɔ tɔn sá é, bó ná sɔ́ nukún nyanya dó kpɔ́n vǐ tɔn e kpo lɛ́ɛ.

⁵⁵ Đó é táá wá ná vǐ tɔn e hu ɖa ɖu wɛ é ɖe lɛ́ɛ sín lan ɖě yě wútu. Ya e dó nú mi wɛ kɛntɔ́ e xá toxo mitɔn lɛ́ɛ ɖe ɔ́ syɛ́n sɔ mɔ̌, bɔ mɛjɔmɛ, mɛfífá énɛ́ e ɖo toxo mitɔn mɛ ɔ́ sɔ́ ɖó nǔɖé ná ɖu zɛ énɛ́ lɛ́ɛ wú ǎ.

⁵⁶ Nyɔ̌nu e nyí mɛjɔmɛ, mɛfífá, bó má nɔ́ jló nú afɔ tɔn vɔ́vɔ́ ná tɛ kɔ́ mɛ ǎ é ɔ́, xomɛ na sin i káká bɔ é ná mɔ asú é ɖésúnɔ tɔn dó mɔ nǔ ɖuɖu, bó ná mɔ vǐ é ɖésúnɔ tɔn súnnu kpó nyɔ̌nu kpó dó mɔ nǔ ɖuɖu.

⁵⁷ É ná ɖu vǐ yɛ̌yɛ́ e é ji tlóló ɔ́, bó ná ɖu nǔzínzán e mɛ vǐ ɔ́ zɔn wá é lɔ. Đó éé nǔ bǐ ná hán é ɔ́, é ná nɔ́ nɔ nǔglɔ́, bó ná nɔ́ ɖu nǔ énɛ́ lɛ́ɛ, hwenu e kɛntɔ́ e ná wá xá toxo ɔ́ lɛ́ɛ ná dɔn toxo ɔ́ dó ya mɛ bɔ é ná vɛ́ jlɛ́ é.

⁵⁸ Sɛ́n e Mawu zɔ́n bɔ è wlǎn dó wěma élɔ́ mɛ lɛ́ɛ ɔ́, mi kpé nukún dó bǐ wú bó nyi. Mi ɖó sísí nú mɛ e nyǐkɔ tɔn nɔ́ nyí “Mawu Mavɔmavɔ” é; é wɛ nyí Mawu mitɔn. Nyǐkɔ énɛ́ d'agba bó dó xɛsi.

⁵⁹ Mi ma bló mɔ̌ ǎ ɔ́, Mawu Mavɔmavɔ sín alɔ ná jɛ mi wú, bó jɛ vǐ mitɔn lɛ́ɛ wú; é ná gblé wǔ mi vantankánnyá, bɔ akpa ɔ́ ná kú ǎ; é ná dó azɔn baɖabaɖa lɛ́ɛ mi, bɔ yě ká ná gbɔ ǎ.

⁶⁰ É ná sɛ́ awě e mi hɔn ná ɖo Ejípu lɛ́ɛ bǐ dó mi, bɔ awě énɛ́ lɛ́ɛ ná xo mi.

⁶¹ Mawu Mavɔmavɔ ná sɛ́ azɔn e xó è ma ɖɔ ɖo wěma élɔ́ mɛ fí din ǎ é, kpó nǔ nyanya e xó è ma ɖɔ ɖo wěma élɔ́ mɛ fí din ǎ kpó dó mi. É ná ɖo nǔ wa xá mi wɛ mɔ̌ káká bɔ mi bǐ ná kú.

⁶² Mi mɛ e ná ko sukpɔ́, bó ná ko cí sunví e ɖo jǐxwé lɛ́ɛ ɖɔhun lɛ́ɛ ɔ́, é sɔ́ ná kpo mi mɛ nabí ɖé ǎ, ɖó tónú e mi ma se nú Mawu Mavɔmavɔ, Mawu mitɔn ǎ ɔ́ ná zɔ́n bɔ nǔ énɛ́ lɛ́ɛ bǐ ná gbo mi.

⁶³ Lě e é nyɔ́ Mawu Mavɔmavɔ nukún mɛ bɔ é wa ɖagbe nú mi, bó ná vǐ mi bɔ mi ji gba ɔ́, mɔ̌ ɖokpó ɔ́ wɛ é ná lɛ́ nɔ mi gúdo gbɔn káká bó ná ɖe mi bǐ sín ayǐkúngban e yí gbé mi ja ɔ́ jí, bó sú kún mitɔn bǐ dó.

⁶⁴ Mawu Mavɔmavɔ ná gba mi dó gbɔn akɔta e gbɔn gbɛ ɔ́ mɛ é bǐ mɛ, káká yi fí e gbɛ ɔ́ kponu ɖó é, bɔ mi ná sɛn nǔ ɖěvo lɛ́ɛ; nǔmɛsɛn énɛ́ lɛ́ɛ ɔ́, tɔ́gbó mitɔn lɛ́ɛ tunwun ɖě ǎ, mi lɔ ka tunwun ǎ. Nǔmɛsɛn énɛ́ lɛ́ɛ ɔ́, atín kpó awǐnnya kpó yǎyá wɛ è dǒ bló yě.

⁶⁵ Mi na mɔ agbɔ̌n ɖo akɔta énɛ́ lɛ́ɛ ɖě mɛ gbeɖé ǎ; mi ná mɔ fí e mi ná ɖó afɔ é ǎ. Ayi mitɔn ná jɛ ayǐ ǎ. Nukún mitɔn mɛ ná nɔ́ jɛ ayǐ ǎ, bɔ mi ná nɔ́ ɖo ya ji wɛ.

⁶⁶ Gbɛ mitɔn sɔ́ ná nyí gbɛ jɔ gbɛ ɖé ǎ. Mi ná nɔ́ ɖo xɛsi jí zǎn kéze. Gbɛ mitɔn ná ɖo gblɛlɛ mɛ.

⁶⁷ É su zǎnzǎn ɔ́, mi ná nɔ́ ɖɔ: “Ényí zǎn yá wǔ kú din ɔ́, é ná nyɔ́ mɛ!” É ká su gbadanu ɔ́, mi ná nɔ́ ɖɔ: “Ényí ayǐ yá wǔ hɔ́n din ɔ́, é ná nyɔ́ mɛ!” Xɛsi e ná ɖo mi jí ɔ́ kpó nǔ e mɔ wɛ mi ná ɖe lɛ́ɛ kpó ná zɔ́n bɔ mi ná nɔ́ ɖɔ mɔ̌

⁶⁸ Mawu Mavɔmavɔ ná lɛ́ lɛ́ kɔ nú mi yi Ejípu, bɔ mi ná gbɔn tɔjíhún mɛ lɛ́ kɔ yi to e mɛ é ɖɔ mi kún sɔ́ ná yi gbeɖé ó ɔ́ mɛ, bɔ mi ná ba ná sa miɖée xá kɛntɔ́ mitɔn lɛ́ɛ bó ná húzú kannumɔ yětɔn; mɛɖé ká ná xɔ mi ǎ.

XÓ GǓDO GÚDO TƆN E MƆYÍZI ĐƆ LƐ́Ɛ ( 28.69—30.20 )

⁶⁹ Xó e Mawu Mavɔmavɔ ɖɔ nú Mɔyízi ɖɔ é ní ɖɔ nú Izlayɛ́li ví lɛ́ɛ ɖo Mɔwabu tomɛ dó jɛ akɔ xá yě dó nyǐkɔ émítɔn mɛ ɔ́ ɖíe. Akɔ énɛ́ ɔ́ gɔ́ nú éé é jɛ xá yě ɖo Holɛ́bu só jí é.