Sɛ́nflínmɛ 25 - MAWUXÓWÉMA

¹ Ayǐ ɖokpó sixú wá hɔ́n, bɔ Izlayɛ́li ví we ná ɖɔ jlɛ, bó ná wá hwɛ nukɔn; mɛ e nyɔ́ hwɛ ɔ́, è nǎ ɖɔ é nyɔ́ hwɛ; mɛ e ka kú hwɛ ɔ́, è nǎ ɖɔ é kú hwɛ.

² Ényí é byɔ́ ɖɔ è nǎ xo mɛ e kú hwɛ ɔ́, hwɛɖɔtɔ́ ɔ́ ná sɔ́ ɛ mlɔ́ ayǐ, bɔ è nǎ sɛ́n bǎ nabí e jɛ xá hwɛ e é hu ɔ́ n'i, ɖo hwɛɖɔtɔ́ ɔ́ nukɔn.

³ Nǔ e è nǎ dó e ɔ́ ná hú azɔn kanɖé ǎ, é má nyí mɔ̌ ǎ ɔ́, é sɔ́ ná ɖó wi ɖé ta ɖo nukún mitɔn mɛ ǎ.

Nyibú

⁴ Mi ma dó aja nu nú nyibú e ɖo nǔkún só ɖó afɔ wú wɛ é ó.

Asúkúsi e má ɖó vǐ súnnu ǎ é

⁵ Ényí nɔví nɔví ɖé lɛ́ɛ ɖo kpɔ́, nú mɛ ɖokpó da asi bó má ko ji vǐ súnnu n'i ǎ, bó kú ɔ́, nyɔ̌nu ɔ́ ná nyí mɛ ɖěvo tɔn zɛ nɔví tɔn lɛ́ɛ wú ǎ; asú tɔn nɔví ɖokpó ná sɔ́ ɛ da, bó ná nɔ asú tɔn tɛn mɛ.

⁶ Vǐ súnnu nukɔntɔn e nyɔ̌nu ɔ́ ná ji é ná nyí vǐ nú mɛ e kú é. Énɛ́ ɔ́, nyǐkɔ tɔn ná bú ɖo Izlayɛ́li gbeɖé ǎ.

⁷ Ényí mɛ ɔ́ má ká jló ná da nɔví tɔn sín asi ǎ ɔ́, nyɔ̌nu ɔ́ ná yi tomɛxó lɛ́ɛ gɔ́n ɖo toxo ɔ́ sín hɔntogbó jí, bó ná ɖɔ nú yě ɖɔ: “Asú ce nɔví gbɛ́ ɖɔ émí kún ná hɛn nɔví émítɔn sín nyǐkɔ ɖó te ɖo Izlayɛ́li ó. Asú ce nɔví jló ná nɔ asú do mɛ nú mì ǎ.”

⁸ Énɛ́ ɔ́, tomɛxó lɛ́ɛ ná ylɔ́ ɛ, bó ná ɖɔ xó n'i. Ényí é gbɛ́ jɛ́n wɛ ɔ́,

⁹ nɔví tɔn si ɔ́ ná sɛkpɔ́ ɛ ɖo tomɛxó lɛ́ɛ bǐ nukún mɛ, bó ná ɖe afɔkpa sín afɔ n'i, bó ná tún atán dó nukún mɛ n'i, bó ná yí xó, bó ɖɔ: “Lě e è nɔ wa nǔ gbɔn nú mɛ e ma jló ná ɖó donu nú nɔví tɔn ǎ é nɛ́.”

¹⁰ Énɛ́ ɔ́, bɛ́ sín gbe nɛ́ gbe ɔ́, è nǎ nɔ́ ylɔ́ xwédo tɔn ɖo Izlayɛ́li ɖɔ: “Mɛ e è ɖe afɔkpa ná ɔ́ sín xwédo.”

Fí e è ma ná dó nǔ mɛ dó ǎ é

¹¹ Ayǐ ɖokpó sixú wá hɔ́n, bɔ súnnu we ná ɖo hun xo wɛ; nú mɛ ɖokpó sín asi wá asú tɔn hwlɛ́n gbé, bó zunfán súnnuxwé mɛ ɖě ɔ́ tɔn ɔ́,

¹² è nǎ sɛ́n alɔ nyɔ̌nu énɛ́ ɔ́ tɔn; è nǎ kú nǔbláwǔ n'i ǎ.

Ajɔ̌tɔ́ ɖó ná hízí nǔ ǎ

¹³ Mi ma ɖó nǔdagan alɔkpa we ɖo glo mitɔn mɛ bó ná zé éé kló ɔ́ dó xɔ nǔ ná, lobo ná zé éé hwe ɔ́ dó sa nǔ ná ó.

¹⁴ Mi ma ɖó nǔjlɛ́ká alɔkpa we ɖo xwé mitɔn gbe bó ná zé éé kló ɔ́ dó xɔ nǔ ná, lobo ná zé éé hwe ɔ́ dó sa nǔ ná ó.

¹⁵ Lo ɔ́, nǔdagan e sɔgbe é kpó nǔjlɛ́ká e sɔgbe é kpó wɛ mi ná ɖó. Énɛ́ ɔ́, Mawu Mavɔmavɔ, Mawu mitɔn ná dó azǎn azǎn jí nú mi ɖo to e ná ná mi wɛ é ɖe é mɛ.

¹⁶ Mɛ ɖěbǔ bló mɔ̌ ɔ́, hwɛ wɛ é hu; nǔ e Mawu Mavɔmavɔ, Mawu mitɔn gbɛ́ wǎn ná ɔ́ wɛ é wa.

Kɛntɔ́ dodó Izlayɛ́li ví lɛ́ɛ tɔn

¹⁷ Mi flín nǔ e Amalɛ́ki ví lɛ́ɛ wa xá mi hwenu e mi gosín Ejípu ja xwé é.

¹⁸ Yě ɖó sísí ɖěbǔ nú Mawu ǎ. Énɛ́ ɔ́ wú wɛ hwenu e nǔ cikɔ nú mi bǐ bɔ mi ma sɔ́ ɖó gǎn ɖěbǔ ǎ é ɔ́, yě gbo ali nú mɛ mitɔn e kpo ɖo gǔdo lɛ́ɛ.

¹⁹ Din ɔ́, Mawu Mavɔmavɔ, Mawu mitɔn ná kplá mi yi to e ná ná mi wɛ é ɖe bɔ é ná nyí mitɔn ɔ́ mɛ, bó ná cyɔ́n alɔ mi jí, bɔ mi ná gló kɛntɔ́ e lɛ́dó mi lɛ́ɛ bǐ. Hwenɛ́nu ɔ́, mi ná sú Amalɛ́ki ví lɛ́ɛ sín kún dó, bɔ mɛɖé sɔ́ ná flín yě gbeɖé ɖo ayǐkúngban jí fí ǎ. Mi ɖó kɛ́n jí.