Sɛ́nflínmɛ 24 - MAWUXÓWÉMA

¹ Mǐ ní ɖɔ mɛɖé da nyɔ̌nu ɖé, bɔ é wá su gbe ɖokpó, bɔ nyɔ̌nu ɔ́ sín nǔ sɔ́ nyɔ́ nukún tɔn mɛ ǎ, ɖó é mɔ nǔjɛdo ɖé ɖo wǔ tɔn. Énɛ́ ɔ́, é wlán wěma ɖɔ émí gbɛ́ ɛ, bó sɔ́ dó así n'i, lobo nya ɛ,

² bɔ nyɔ̌nu ɔ́ tɔ́n sín xwé tɔn gbe, bó yi da asú ɖěvo,

³ bɔ asú énɛ́ lɔ wá gbɛ́ wǎn n'i bó wlán wěma ɖɔ émí gbɛ́ ɛ, bó sɔ́ n'i, bó nya ɛ sín xwé tɔn gbe, abǐ asú énɛ́ wá kú.

⁴ Ényí nǔ cí mɔ̌ ɔ́, asú tɔn nukɔntɔn ɔ́ sɔ́ ná yí i dó xwé gbe ǎ, ɖó é kó húzú mɛ blíblí n'i. Nǔ mɔ̌hunkɔtɔn ɔ́, Mawu Mavɔmavɔ nɔ mɔ dó mɔ hɛ̌n nǔ. To e Mawu Mavɔmavɔ, Mawu mitɔn ná ná mi bɔ é ná nyí mitɔn ɔ́, mi ma zán walɔ mɔ̌hunkɔtɔn dó hɛn gblé ó.

Mɛ e da asi yɔ̌yɔ́ é

⁵ Mɛ e da asi yɔ̌yɔ́ ɔ́ ná yi ahwan ǎ. È ka nǎ wá dó tagba ɖěbǔ n'i ɖo xwé tɔn gbe ǎ; è nǎ zɔ́n nǔ ɖěbǔ i ǎ káká nú xwe ɖokpó, bɔ é ná kpé nukún dó xwé tɔn wú, bɔ asi tɔn ná ɖu asú gbɛ.

Nǔ yí ɖó gbanu

⁶ È nǎ yí sé e jí mɛɖé nɔ́ li linfín ɖe abǐ sénukwɛn tɔn ɖó gbanu ǎ. Nú è blǒ mɔ̌ hǔn, nǔ e nɔ́ ná nǔɖuɖu i ɔ́ nɛ́ è yǐ ɖó gbanu nɛ́.

Gbɛtɔ́ finfin

⁷ Ényí Izlayɛ́li ví ɖé fin nɔví tɔn, bó sɔ́ ɛ dó ɖó kannumɔ abǐ é sɔ́ ɛ sa ɔ́, è nǎ hu mɛ e bló mɔ̌ ɔ́. Lě e mi ná ɖe nǔ nyanya sín tɛ́ntin mitɔn gbɔn ɔ́ nɛ́.

Gudu

⁸ Mi cɔ́ miɖée dó gudu tɛnmɛ tɛnmɛ lɛ́ɛ wú, bó xwedó nǔ e vɔ̌sánú-xwlémawutɔ́ Levíi ví lɛ́ɛ ná ɖɔ é bǐ ganjí. Mi ɖó ayi te, bo xwedó nǔ e un zɔ́n yě lɛ́ɛ bǐ,

⁹ bó flín nǔ e Mawu Mavɔmavɔ, Mawu mitɔn bló xá Miliamu ɖo ali jí hwenu e mi tɔ́n sín Ejípu é.

È ma sá kan mɛ ó

¹⁰ Ényí mi nya nǔɖé nú nɔzo mitɔn ɔ́, mi ma byɔ́ xɔ tɔn mɛ bó yi yí nǔɖé ɖó gbanu ó.

¹¹ Kɔ́xo wɛ mi ná nɔ bɔ mɛ e mi nya nǔ ná ɔ́ ná sɔ́ nǔ e ná sɔ́ ɖó gbanu wɛ é ɖe é wá nú mi.

¹² Ényí mɛ ɔ́ má ɖó nǔɖé ǎ, bɔ awu tɔn ɖaxó ɔ́ wɛ é sɔ́ ɖó gbanu ɔ́, mi ná hɛn bɔ ayǐ ná hɔ́n dó ǎ.

¹³ Ényí hwe yi xɔ ɔ́, mi ná sɔ́ wá n'i, bɔ é ná dó awu ɔ́ bó yi xɔ, bó ná xo ɖɛ nú mi. Mi bló mɔ̌ ɔ́, é ná nyí nǔ ɖagbe bɔ mi ná wa ɖo Mawu Mavɔmavɔ, Mawu mitɔn nukɔn.

Mi ma táfú wamamɔnɔ ó

¹⁴ Mɛ e ɖo azɔ̌ wa nú mi wɛ ɔ́, ényí mɛ ɔ́ nyí mɛ má ɖó mɛɖé kpó é nyí wamamɔnɔ kpó ɔ́, mi ɖǒ ná táfú i ǎ. É na bó nyí nɔví mitɔn kpó é nyí jǒnɔ e wá ɖo to mitɔn mɛ lɛ́ɛ ɖě kpó ɔ́, mi ɖó ná táfú i gbeɖé ǎ.

¹⁵ Gbe e gbe é wa azɔ̌ nú mi ɔ́ jɛ́n mi ná sú axɔ́ ɛ, hwe ná yi xɔ có mi ná sú axɔ́ ɛ ǎ. Đó é ɖó nǔɖé ǎ, bɔ énɛ́ mi kɔtán dó wɛ é ɖe. Mi má nú é jɛ hwɛ mitɔn nú Mawu Mavɔmavɔ ó, ɖó hwɛ wɛ é ná nyí, bó nɔ kɔ nú mi.

Mɛ e wa nǔ nyi do ɔ́ wɛ è nǎ dɔn tó ná

¹⁶ È nǎ hu tɔ́ ɖó vǐ tɔn nu ǎ. È nǎ hu vǐ ɖó tɔ́ tɔn nu ǎ. Mɛ e wa nǔ nyi do é wɛ è nǎ hu ɖó nǔ e é wa ɔ́ nu.

Sɛ́n e ɖɔ xó dó wamamɔnɔ wú lɛ́ɛ

¹⁷ Mi ma dó hwɛ agɔ nú jǒnɔ e ɖo to mitɔn mɛ lɛ́ɛ ɖě, abǐ tɔ́cyɔvǐ ɖé ó. Mi ma yí avɔ asúkúsi tɔn ɖó gbanu ó.

¹⁸ Mi ná flín ɖɔ kannumɔ wɛ émí kó nyí ɖo Ejípu, bɔ Mawu Mavɔmavɔ, Mawu mitɔn wá hwlɛ́n mi ɖ'é mɛ. Énɛ́ ɔ́ wú wɛ un zɔ́n mi ɖɔ mi ní bló ɖó xó énɛ́ lɛ́ɛ e un ɖɔ nú mi din é jí.

¹⁹ Ényí mi ya jinukún ɖo gle mitɔn mɛ, bó wɔn nǔkúnkɔ ɖě sɔ́ nyi gle ɔ́ mɛ hǔn, mi ma lɛ́ kɔ bó yi sɔ́ ó. Nǔkúnkɔ énɛ́ ɔ́ ná nyí jǒnɔ e ɖo to ɔ́ mɛ lɛ́ɛ tɔn, tɔ́cyɔvǐ lɛ́ɛ kpó asúkúsi lɛ́ɛ kpó tɔn. Mi bló mɔ̌ ɔ́, Mawu Mavɔmavɔ, Mawu mitɔn ná dó acɛ nǔ e mi ná wa lɛ́ɛ bǐ jí.

²⁰ Ényí mi gbɛ olívu mitɔn ɔ́, mi sɔ́ ná lɛ́ vɔ́ wá gbɛ azɔn wegɔ́ ɔ́ ǎ; éé kpo ɔ́ ná nyí jǒnɔ lɛ́ɛ tɔn, tɔ́cyɔvǐ lɛ́ɛ kpó asúkúsi lɛ́ɛ kpó tɔn.

²¹ Mi gbɛ vǐwun mitɔn ɔ́, mi ná lɛ́ wá gbɔn jí, bó gbɛ azɔn wegɔ́ ɔ́ ǎ; éé kpo lɛ́ɛ ná nyí jǒnɔ lɛ́ɛ tɔn, tɔ́cyɔvǐ lɛ́ɛ kpó asúkúsi lɛ́ɛ kpó tɔn.

²² Mi ná flín ɖɔ kannumɔ wɛ émí ko nyí ɖo Ejípu. Énɛ́ ɔ́ wú wɛ un zɔ́n mi ɖɔ mi ní bló ɖó xó énɛ́ lɛ́ɛ e un ɖɔ nú mi din lɛ́ɛ jí.