Sɛ́nflínmɛ 22 - MAWUXÓWÉMA

¹ Nú mi mɔ nyibú nɔví mitɔn tɔn, abǐ gbɔ̌ tɔn ɖo flúflú wɛ hǔn, mi ma jó dó ó; mi kplá wá n'i.

² Ényí fí e kanlinnɔ ɔ́ ɖe ɔ́ lín dó mi, abǐ mi ma tunwun ǎ hǔn, mi ná kplá kanlin ɔ́ dó xwé mitɔn gbe, bɔ é ná ɖo fínɛ́ káká bɔ kanlinnɔ ɔ́ ná tɔ́n kanlin tɔn gbé, bɔ mi ná sɔ́ jó.

³ Ényí tócí tɔn wɛ bú bɔ mi mɔ ɔ́, mɔ̌ wɛ mi ná bló gbɔn awu tɔn wɛ bú bɔ mi mɔ ɔ́, mɔ̌ wɛ mi ná wa nǔ gbɔn; ényí nǔ tɔn ɖěbǔ wɛ bú bɔ mi mɔ ɔ́, mɔ̌ wɛ mi ná bló gbɔn; mi ná jó dó ǎ.

⁴ Mǐ ní ɖɔ nɔví mitɔn kplá tócí tɔn, abǐ nyibú tɔn bɔ yě ɖo yiyi wɛ bɔ tócí ɔ́ j'ayǐ, abǐ nyibú ɔ́ j'ayǐ bɔ mi mɔ. Ényí mi mɔ mɔ̌ ɔ́, mi ná jó é ɖokpónɔ dó bɔ é ná fɔ́n kanlin ɔ́ sí te ǎ; mi ɖó ná d'alɔ ɛ bɔ é ná fɔ́n kanlin ɔ́ sí te.

Sɛ́n ɖěvo lɛ́ɛ

⁵ Nyɔ̌nu ɖó ná dó nǔ e súnnu nɔ́ dó lɛ́ɛ ǎ; mɔ̌ ɖokpó ɔ́, súnnu ɖó ná dó nǔ e nyɔ̌nu nɔ́ dó lɛ́ɛ ǎ. Mɛ e bló mɔ̌ ɔ́ nɔ́ vɛ́ mɔ nú Mawu Mavɔmavɔ, Mawu mitɔn.

⁶ Nú mi ɖo yiyi wɛ, bó yi mɔ xɛdɔ́ ɖo atín jí abǐ kɔ́ mɛ, bɔ vǐ ɖ'é mɛ, abǐ azin ɖ'é mɛ, bɔ xɛ nɔkɔ́ ɔ́ ɖo vǐ tɔn lɛ́ɛ jí, abǐ é fɛ azin ɔ́, mi ná wlí xɛ nɔkɔ́ ɔ́ kpó vǐ tɔn lɛ́ɛ kpó ǎ;

⁷ vǐ lɛ́ɛ kɛ́ɖɛ́ wɛ mi ná fɔ, bɔ é ná nyí mitɔn. Mi ná jó xɛ nɔkɔ́ ɔ́ dó bɔ é ná yi; énɛ́ ɔ́, nǔ ná nyɔ́ nú mi, bɔ mi ná dɔ́ ji.

⁸ Nú mi bló xɔ yɔ̌yɔ́ ɔ́, mi ná sú ta ná, bɔ è hɛn ɔ́, è nǎ nɔ ɖi zɔnlin gbɔn xɔ ɔ́ ta , bɔ mi ná mɛ nǔ gbɔn tó tɔn lɛ́ dó; é má nyí mɔ̌ ǎ ɔ́, gbɛtɔ́ táá wá j'ayǐ sín xɔ ɔ́ ta, bɔ kanjɔ ná wá kɔn nyi ayǐ ɖo xwé mitɔn gbe.

⁹ Mi ná tun atín ɖěvo gbɔn vǐwungbo mitɔn mɛ ǎ. É má nyí mɔ̌ ǎ ɔ́, è nǎ sɔ́ atín we lɛ́ɛ bǐ sín sínsɛ́n ɖó vo nú Mawu Mavɔmavɔ, vǐwun lɛ́ɛ kpó atín ɖěvo e mi tun é sín sínsɛ́n lɛ́ɛ kpó.

¹⁰ Mi ná sin mɔ e è nɔ dó lɛ gle ná ɔ́ dó kɔ nú nyibúsú kpó tócí kpó ɖó kpɔ́ dó lɛ gle ǎ.

¹¹ Nǔzínzán e è sɔ́ gbɔ̌fún kpó lɛ̌ɛnkan kpó ɖó kpɔ́ dó lɔn ɔ́, mi ná dó ɖě ǎ.

¹² Avɔ mitɔn e mi nɔ cyɔ́n ɔ́, mi ná sin kan ɖagbe ɖagbe dó tó tɔn ɛnɛ lɛ́ɛ.

Sɛ́n e ɖɔ xó dó xó ɖó xá nyɔ̌nu wú é

¹³ Ényí mɛɖé da asi, bó kó ɖó xó xá ɛ, bó má ká sɔ́ wá yí wǎn n'i ǎ,

¹⁴ bó jɛ hɛ̌n dó e jí ɖɔ: “Nyɔ̌nu élɔ́ e un da ɔ́, un mɔ ɛ ɖo alɔ jí ǎ.”

¹⁵ Nǔ cí mɔ̌ ɔ́, vǐtɔ́ ɔ́ kpó vǐnɔ ɔ́ kpó ná sɔ́ nǔ e ɖe xlɛ́ ɖɔ vǐ émítɔn nɔ alɔ jí bó yi asúxwé ɔ́ xlɛ́, bó yi xlɛ́ tomɛxó lɛ́ɛ ɖo toxo ɔ́ sín hɔntogbó jí.

¹⁶ Nyɔ̌nu ɔ́ sín tɔ́ ná ɖɔ nú tomɛxó lɛ́ɛ ɖɔ: “Nyɔ̌nu élɔ́ ɔ́, vǐ ce wɛ, bɔ un sɔ́ ná dǎwe élɔ́, bɔ é ná nɔ así tɔn; é ká sɔ́ ba ɛ din ǎ,

¹⁷ bó jɛ hɛ̌n dó e jí, bó ɖɔ nú mì ɖɔ: ‘Vǐ towe ɔ́, un mɔ ɛ ɖo alɔ jí ǎ.’ Nǔ e ká ɖe xlɛ́ ɖɔ vǐ ce zɔn alɔ jí yi asúxwé é ɖíe.” É ɖɔ mɔ̌ ɔ́, mɛ tɔn lɛ́ɛ ná vlɔ́n avɔ e jí yě dɔ̌, bɔ hun kɔn nyi mɛ ɔ́ ɖo tomɛxó lɛ́ɛ nukɔn.

¹⁸ Bɔ tomɛxó lɛ́ɛ ná wlí dǎwe e dó nǔ mɔ̌hun sin é, bó ná dɔn tó n'i,

¹⁹ bɔ é ná sú gankwɛ́ kanwe ko (100) nyɔ̌nu ɔ́ sín tɔ́, ɖó nyǐkɔ nyanya wɛ é sun Izlayɛ́li ví nyɔ̌nu e zɔn alɔ jí yi asúxwé é. Nyɔ̌nu ɔ́ ká ná nyí asi tɔn káká yi gbe e gbe é ná kú é.

²⁰ Ényí nǔ ká nyí mɔ̌ nǔgbó, bɔ súnnu ɔ́ má mɔ nyɔ̌nu ɔ́ ɖo alɔ jí nǔgbó ǎ ɔ́,

²¹ è nǎ kplá ɛ wá tɔ́ tɔn hɔnto, bɔ súnnu e ɖo toxo ɔ́ mɛ lɛ́ɛ ná nyi awǐnnyaglo dó hu i, ɖó winnyánú wɛ é dó sin ɖo Izlayɛ́li tomɛ, bó lɛ aga ɖo tɔ́ tɔn xwé. Lě e mi ná ɖe nǔ nyanya sín tɛ́ntin mitɔn gbɔn ɔ́ nɛ́.

²² Ényí mɛɖé ɖo mɛsi ba wɛ, bɔ è gbo e dó ɔ́, è nǎ hu yě mɛ we lɛ́ɛ bǐ; è nǎ hu súnnu ɔ́, bó hu nyɔ̌nu ɔ́. Lě e mi ná ɖe nǔ nyanya sín tɛ́ntin mitɔn gbɔn ɔ́ nɛ́.

²³ Ényí ɖyɔ̌vǐ ɖé tíin, bó kó ɖó asúxɔ́ntɔn, bónú súnnu ɖé mɔ ɛ ɖo toxo mɛ bó ɖó xó xá ɛ ɔ́,

²⁴ mi ná kplá yě mɛ we lɛ́ɛ bǐ wá toxo ɔ́ sín hɔnto, bó ná nyi awǐnnyaglo dó yě káká bɔ yě ná kú. Mi ná hu yě mɛ we lɛ́ɛ bǐ, ɖó nyɔ̌nu ɔ́ sú xó ǎ, có toxo tɛ́ntin wɛ é ɖe, bɔ súnnu ɔ́ ká ba mɛsi. Lě e mi ná ɖe nǔ nyanya sín tɛ́ntin mitɔn gbɔn ɔ́ nɛ́.

²⁵ É ká nyí gběhan mɛ zɔ fí ɖé wɛ súnnu ɔ́ kpé nyɔ̌nu ɔ́ ɖe, bó hú gǎn ɛ, bó ɖó xó xá ɛ ɔ́, súnnu ɔ́ kɛ́ɖɛ́ wɛ è nǎ hu;

²⁶ mi ná wa nǔ ɖěbǔ nú nyɔ̌nu ɔ́ ǎ, ɖó é hu kúhwɛ ɖé ǎ. Mi ná ɖɔ hwɛ énɛ́ ɔ́ lě e è nɔ ɖɔ mɛ e hu mɛ ɔ́ sín hwɛ gbɔn é.

²⁷ Đó gběhan mɛ wɛ é kpé vǐ ɔ́ ɖe, bɔ é sú xó, mɛɖé ká se bó wá ǎ.

²⁸ Ényí súnnu ɖé mɔ ɖyɔ̌vǐ e má ɖó asúxɔ́ntɔn ǎ é, bó zunfán, bó ɖo xó ɖó xá ɛ wɛ, bɔ è gbo yě dó ɔ́,

²⁹ súnnu e ɖó xó xá ɖyɔ̌vǐ ɔ́ ná ná gankwɛ́ kanɖé wǒ (50) vǐ e é ɖó xó xá é sín tɔ́; bɔ ée é ká kó ɖó xó xá vǐ ɔ́ é ɔ́, é ɖó ná da, bó ká ɖó ná nya ɛ gbeɖé cóbó kú ǎ.