Sɛ́nflínmɛ 21 - MAWUXÓWÉMA

¹ Hwenu e mi ná ɖo to e Mawu Mavɔmavɔ, Mawu mitɔn ná ná mi é mɛ ɔ́, ayǐ ɖokpó sixú wá hɔ́n, bɔ è nǎ mɔ è hu mɛ ɖé sɔ́ nyi gběhan mɛ fí ɖé, bɔ è ka tunwun mɛ e hu i é ǎ.

² Nǔ cí mɔ̌ ɔ́, tomɛxó mitɔn lɛ́ɛ kpó hwɛɖɔtɔ́ mitɔn lɛ́ɛ kpó ná yi fí e cyɔ ɔ́ ɖe ɔ́, bó ná jlɛ́ fí e cyɔ ɔ́ ɖe dó toxo e lɛ́ lɛ̌ dó fínɛ́ lɛ́ɛ kpɔ́n,

³ bó ná mɔ toxo e sɛkpɔ́ cyɔ ɔ́ hú toxo ɖě lɛ́ɛ bǐ é. Énɛ́ ɔ́, tomɛxó e ɖo toxo énɛ́ ɔ́ mɛ lɛ́ɛ ná sɔ́ nyibúsixwɛ e è ma dó wa azɔ̌ ná kpɔ́n gbeɖé ǎ, è ma ka sin kpo dó kɔ ná kpɔ́n gbeɖé ǎ é ɖokpó.

⁴ Bó ná kplá yi tɔsisa e ma nɔ mɛ gbeɖé ǎ é ɖokpó nu, ɖo fí e è ma lɛ gle ɖe ǎ é, è ma ka dó nǔ ɖěbǔ ɖe ǎ é ɖokpó, bó ná gba nyibúsixwɛ ɔ́ sín zogúdo ɖo fínɛ́.

⁵ Énɛ́ ɔ́, vɔ̌sánú-xwlémawutɔ́ Levíi ví lɛ́ɛ ná wá, ɖó yě wɛ Mawu Mavɔmavɔ sɔ́, bɔ yě ná nɔ́ wa azɔ̌ n'i, bó ná nɔ́ xo ɖɛ dó togun ɔ́ jí ɖo nyǐkɔ tɔn mɛ, bɔ adɔn ɖěbǔ tíin ɔ́, yě ná nɔ́ gbo; nú mɛɖé gblé wǔ mɛɖé ɔ́, yě wɛ ná nɔ́ ɖɔ gbo.

⁶ Énɛ́ ɔ́ gúdo ɔ́, tomɛxó toxo énɛ́ ɔ́ tɔn lɛ́ɛ bǐ ná klɔ́ alɔ kɔn nyi nyibúsixwɛ e è gba zogúdo ná é jí ɖo tɔ ɔ́ nu,

⁷ bó ná ɖɔ: “Mǐ wɛ hu i ǎ, mǐ ká ɖo do tɔn mɛ ǎ.

⁸ Mawu Mavɔmavɔ, sɔ́ hwɛ kɛ togun towe e a hwlɛngán é. Ma jó xomɛvɔ́nɔ sín hun dó nyi kɔ nú Izlayɛ́li togun towe ɔ́ ó.” Énɛ́ ɔ́, Mawu nǎ sɔ́ hwɛ kɛ mi.

⁹ Nú mi blǒ gbɔn mɔ̌ ɔ́, nǔ e nɔ́ nyɔ́ Mawu Mavɔmavɔ nukún mɛ lɛ́ɛ wɛ mi bló, bɔ xomɛvɔ́nɔ sín hun ná nɔ kɔ nú mi ǎ.

Nyɔ̌nu ahwanwlíkannumɔ dida

¹⁰ Ényí mi yi tɔ́n ahwan kɛntɔ́ mitɔn lɛ́ɛ, bɔ Mawu Mavɔmavɔ, Mawu mitɔn jó yě nú mi, bɔ mi wlí kannumɔ yětɔn ɔ́,

¹¹ ényí mɛɖé ɖo mi mɛ, bó mɔ nyɔ̌nu ɖé ɖo yě mɛ, bɔ é nyɔ́ ɖɛkpɛ, bɔ é yí wǎn n'i, bó jló ná da ɔ́,

¹² é na kplá nyɔ̌nu ɔ́ yi xwé gbe. Nyɔ̌nu ɔ́ ná xwlɛ́ ta bó ná kpa fɛn,

¹³ bó ná ɖyɔ́ awu e é dó hwenu e ahwan wlí i é, bó nɔ súnnu ɔ́ sín xwé gbe. Nyɔ̌nu ɔ́ ná ví tɔ́ tɔn kpó nɔ tɔn kpó káká nú sun ɖokpó. Énɛ́ ɔ́ gúdo ɔ́, súnnu ɔ́ ná ɖó xó xá ɛ, bɔ é ná húzú asi tɔn.

¹⁴ Nú é wá yá nú súnnu ɔ́ má sɔ́ ɖó wǎn yíyí nú nyɔ̌nu ɔ́ ǎ ɔ́, é ná jó e dó, bɔ é ná yi. Amɔ̌, é sɔ́ ɖó acɛ e sɔ́ ɛ sa, bó yí akwɛ́ é ǎ; é ká ɖó ná sɔ́ ɛ dó ɖó kannumɔ ná ǎ, ɖó é kó da ɛ gǎnnugǎnnu.

Acɛ e nyí vǐ súnnu ɖaxó ɔ́ tɔn é

¹⁵ Mǐ ní ɖɔ súnnu ɖé da asi we, bó yí wǎn nú mɛ ɖokpó hú mɛ ɖokpó. Nyɔ̌nu we lɛ́ɛ bǐ ji vǐ súnnu n'i, bɔ vǐ súnnu ɖaxó ɔ́ ká nyí nyɔ̌nu e é má yí wǎn ná sɔ mɔ̌ ǎ é tɔn.

¹⁶ Nǔ cí mɔ̌ ɔ́, hwenu e é ná ja dɔkun tɔn lɛ́ɛ má nú vǐ tɔn lɛ́ɛ gbe ɔ́, é ná kpɔ́n dó mɔ̌ wú bó ná zé vǐ súnnu ɖaxó sín acɛ ɔ́ jó nú nyɔ̌nu e é yí wǎn ná é sín vǐ ǎ.

¹⁷ É nyɔ́ wa ɔ́, é ná tunwun vǐ súnnu ɖaxó tɛnmɛ nú mɛ e é má yí wǎn ná ǎ sín vǐ, bó ná sɔ́ nǔ e nyí étɔn é bǐ sín donu we n'i. Đó é wɛ nyí vǐ súnnu tɔn nukɔntɔn ɔ́, bó ɖó vǐ súnnu ɖaxó sín acɛ.

Vǐ e má nɔ́ se tónú ǎ é.

¹⁸ Mǐ ní ɖɔ nya ɖé ɖó vǐ súnnu ɖé, bɔ é nɔ́ se tónú nú tɔ́ kpó nɔ kpó ɖě ǎ, bó nɔ́ ɖo gǔ fɔ́n wɛ. Mɛjitɔ́ tɔn lɛ́ɛ ná bó ɖo tó dɔn n'i wɛ ɔ́, é nɔ́ se tónú ǎ.

¹⁹ Nǔ cí mɔ̌ ɔ́, tɔ́ ɔ́ kpó nɔ ɔ́ kpó ná wlí i, bó ná kplá ɛ yi tomɛxó lɛ́ɛ nukɔn, ɖo toxo ɔ́ sín hɔntogbó jí,

²⁰ bó ná ɖɔ nú tomɛxó lɛ́ɛ ɖɔ: “Vǐ mǐtɔn élɔ́ nɔ́ se tónú ǎ, gǔ fɔ́n wɛ jɛ́n é nɔ́ ɖe; é nɔ́ ké ya nú xó mǐtɔn ǎ; é nɔ́ ɖo nǔ kwíji lɛ́ɛ wa wɛ, bó nɔ́ ɖo ahan nu mú wɛ.”

²¹ Énɛ́ ɔ́, súnnu e ɖo toxo tɔn mɛ lɛ́ɛ bǐ ná nyi awǐnnyaglo dó e káká bɔ é ná kú. Lě e mi ná ɖe nǔ nyanya sín tɛ́ntin mitɔn gbɔn ɔ́ nɛ́. Izlayɛ́li toxo ɔ́ bǐ ná se xó énɛ́, bó ná ɖó sísí nú Mawu.

Mɛ e è dǒ kan kɔ ná ɔ́ sín cyɔ

²² Mǐ ní ɖɔ mɛɖé hu hwɛ, bɔ è ɖǒ kúhwɛ n'i, bó dó kan dó atín wú bɔ é kú.

²³ Cyɔ tɔn ná dɔ́ atín ɔ́ jí ǎ. È nǎ ɖi i gbe énɛ́ gbe. Đó mɛ e è dǒ kan dó atín wú ɔ́, nu wɛ Mawu dó e. Hǔn mi bo ma hɛn ayǐkúngban e Mawu Mavɔmavɔ, Mawu mitɔn ná ná mi ɔ́ blí ó.