Sɛ́nflínmɛ 2 - MAWUXÓWÉMA

¹ Énɛ́ ɔ́ gúdo ɔ́, mǐ lɛ́ kɔ gbɔn gbětótló mɛ, bó tunta Xu Vɔvɔ ɔ́ wá jí, lě e Mawu Mavɔmavɔ ɖɔ nú mì gbɔn é. Mǐ nɔ ɖo gɔnu ɖó lɛ́ dó Seyíi só ɔ́ wɛ, bó nɔ fínɛ́ xɔ azǎn.

Mɔyízi flín lě e Izlayɛ́li ví lɛ́ɛ gbɔn Edɔ́mu kpó Mɔwabu kpó, kpódó Amumɔ́ɔ kpó dín gbɔn ɔ́ yě

² Mawu Mavɔmavɔ ɖɔ nú mì ɖɔ:

³ “Fí e mi nɔ só élɔ́ kɔn jɛ din é kpé. Din ɔ́, mi bo lɛ́ kɔ kpan ta totaligbé.”

⁴ Mawu Mavɔmavɔ ɖɔ nyi ní ɖɔ nú mi ɖɔ: “Mi ná gbɔn Seyíi dín, ɖo fí e nɔví mitɔn Esawu ví lɛ́ɛ ɖe ɔ́. Yě ná ɖi xɛsi nú mi; amɔ̌, mi ka nɔ acéjí.

⁵ Mi ma wa nǔ ɖěbǔ nú yě ó, ɖó nyɛ Mawu Mavɔmavɔ, Mawu mitɔn ná ná ayǐkúngban afɔkpákpá ɖokpó mi ɖo to yětɔn mɛ ǎ. Esawu wɛ un ná Seyíi só ɔ́, bɔ é nyí étɔn.

⁶ Nǔɖuɖu e mi ná ɖu ɔ́, akwɛ́ wɛ mi ná zé dó xɔ ná ɖo yě sí. Sin vɔ́vɔ́ e mi ná nu ɔ́, akwɛ́ wɛ mi ná zé dó jɛ ná ɖo yě sí.”

⁷ Đó nyɛ Mawu Mavɔmavɔ, Mawu mitɔn dó acɛ azɔ̌ e mi wa lɛ́ɛ bǐ jí. Un nya xɛ ɖo mi jí hwenu e mi ɖo gbětótló ɖaxó nɛ́ mɛ gbɔn dín wɛ é. Xwe kanɖé nɛ́ é nɔ kpɔ́ xá mi xɔ nɛ́, bɔ nǔ ɖěbǔ hwedó mi ǎ.

⁸ Énɛ́ ɔ́, mǐ sɔ́ gbɔn Seyíi gbé jí fí e nɔví mǐtɔn Esawu ví lɛ́ɛ ɖe é ǎ, mǐ ká sɔ́ gbɔn ali e gbɔn tɔdo mɛ é ǎ. Mǐ gbɔn Eyilati kpó Esiɔ́ni-Gevɛ́ɛ kpó sín slá lɛ́ɛ mɛ ǎ. Mǐ húzú ali bó gbɔn Mɔwabu sín gbětótló mɛ dín.

⁹ Mawu Mavɔmavɔ ɖɔ nú mì ɖɔ: “Mi ma ba nǔ ɖɔ Mɔwabunu lɛ́ɛ ó, mi ma tɔ́n ahwan yě ó, ɖó un ɖo nǔ ɖěbǔ ná ná mi wɛ ɖo ayǐkúngban yětɔn jí ǎ: Lɔ̌ti ví lɛ́ɛ wɛ un ná Áa toxo énɛ́.”

¹⁰ Đ'ayǐ ɔ́, Emíti lɛ́ɛ wɛ nɔ Áa toxo ɔ́ mɛ. Emíti lɛ́ɛ ɔ́, togun syɛ́nsyɛ́n ɖé wɛ yě nyǐ, yě sukpɔ́ ɖésú; gbɛtɔ́ jɔ asú wɛ yě nyǐ Anáki ví lɛ́ɛ ɖɔhun.

¹¹ Mɛ ɖé lɛ́ɛ nɔ́ vɛdó ɖɔ Hlafa ví wɛ yě nyǐ Anáki ví lɛ́ɛ ɖɔhun sín, lo ɔ́, Mɔwabunu lɛ́ɛ nɔ́ ylɔ́ yě ɖɔ Emíti.

¹² Holiti lɛ́ɛ wɛ nɔ Seyíi gbé ɔ́ jí ɖ'ayǐ cóbɔ Esawu ví lɛ́ɛ wá nya yě, bó sú kún yětɔn dó, bó jɛ tɛn yětɔn mɛ, lě e Izlayɛ́li ví lɛ́ɛ bló gbɔn bó ɖo to e Mawu Mavɔmavɔ ná yě bɔ é nyí yětɔn ɔ́ mɛ gbɔn é.

¹³ Mawu Mavɔmavɔ ɖɔ: “Din ɔ́, mi bo jɛ ali bó dó asá Zelɛ́di tɔ ɔ́, bó dín.” Énɛ́ ɔ́, mǐ jɛ ali bó dó asá tɔ ɔ́.

¹⁴ Cóbónú mǐ nǎ gosín Kadɛ́ci-Baanɛ́ya bó gbɔn Zelɛ́di tɔ ɔ́ mɛ dín ɔ́, xwe gbantɔ́n-nukún-atɔn (38) wɛ mǐ bló. Hwenɛ́nu ɔ́, mɛ e ɖó xwe e ná fun ahwan lɛ́ɛ bǐ kó kú, lě e Mawu Mavɔmavɔ ko ɖɔ gbɔn nú yě ɖ'ayǐ é.

¹⁵ Mawu Mavɔmavɔ ɖésú tɔ́n ahwan yě bó sú kún yětɔn dó káká yi fó.

¹⁶ Ée gbɛtɔ́ énɛ́ lɛ́ɛ bǐ xwíí vɔ ɔ́,

¹⁷ Mawu Mavɔmavɔ ɖɔ nú mì ɖɔ:

¹⁸ “Din ɔ́, mi ná gbɔn Áa toxo ɔ́ mɛ, Mɔwabu dogbó ɔ́ jí dín,

¹⁹ bó ná wá jɛ Amumɔ́ɔ nu lɛ́ɛ sín to nukɔn; mi ma ba nǔ ɖɔ yě ó; mi ma tɔ́n ahwan yě ó, ɖó un ɖo nǔ ɖěbǔ ná ná mi wɛ ɖo ayǐkúngban yětɔn jí ǎ: ɖó Lɔ̌ti ví wɛ nú yě lɔmɔ̌; yě wɛ un ná ayǐkúngban énɛ́ ɔ́.”

²⁰ È nɔ ɖɔ to énɛ́ ɔ́, Hlafa ví lɛ́ɛ sín to wɛ, ɖó Hlafa ví lɛ́ɛ e Amumɔ́ɔ ví lɛ́ɛ nɔ ylɔ́ ɖɔ Zamuzumímu lɛ́ɛ é wɛ ko nɔ fínɛ́ ɖ'ayǐ.

²¹ Togun ɖaxó ɖé wɛ yě nyí, yě sukpɔ́ ɖésú, bó jɔ asú, Anáki ví lɛ́ɛ ɖɔhun. Lo ɔ́, Mawu Mavɔmavɔ sú kún yětɔn dó ɖo Amumɔ́ɔ ví lɛ́ɛ nukɔn, bɔ Amumɔ́ɔ ví lɛ́ɛ bɛ́ nǔ yětɔn lɛ́ɛ bǐ, bó jɛ tɛn yětɔn mɛ.

²² Mɔ̌ wɛ Mawu Mavɔmavɔ bló gbɔn nú Esawu ví lɛ́ɛ ɖo Seyíi; é sú Holiti lɛ́ɛ sín kún dó ɖo nukɔn yětɔn. Esawu ví lɛ́ɛ bɛ́ nǔ yětɔn lɛ́ɛ, bó jɛ tɛn yětɔn mɛ, bó ɖo fínɛ́ káká jɛ égbé.

²³ Awanu lɛ́ɛ lɔmɔ̌ ɔ́, káká Gaza gletoxo lɛ́ɛ mɛ wɛ yě nɔ́ nɔ ɖ'ayǐ, lo ɔ́ Kafutɔ́ɔnu lɛ́ɛ gosín to yětɔn mɛ, bó wá sú kún yětɔn dó bó jɛ tɛn yětɔn mɛ.

²⁴ Énɛ́ gúdo ɔ́, Mɔyízi ɖɔ Mawu Mavɔmavɔ ɖɔ: “Mi sí te bó jɛ ali; mi gbɔn Aanɔ́ni tɔ ɔ́ mɛ dín. Un ná jó axɔ́sú Hɛcibɔ́ni tɔn Amɔliti e è nɔ ylɔ́ ɖɔ Sihɔ́ni ɔ́ kpódó to tɔn kpó nú mi. Mi jɛ to ɔ́ yí jí; mi tɔ́n ahwan yě.

²⁵ Bɛ́ sín égbé ɔ́, un ná bló bɔ akɔta e ɖo gbɛ ɔ́ mɛ lɛ́ɛ bǐ ná ɖo xɛsi jí, bó ná lɛ́ ɖo adohu jí ɖó mi wú. Ényí è ɖɔ xó mitɔn lě bónú yě se lě tlóló ɔ́, xɛsi ná jɛ yě jí, bɔ yě ná nɔ́ sísɔ́.”

Mɔyízi flín lě e Izlayɛ́li ví lɛ́ɛ yí axɔ́súɖuto Sihɔ́ni tɔn gbɔn ɔ́ yě

²⁶ Mɔyízi ɖɔ: “Hwenu e mǐ ɖo Kedemɔ́ti sín gbětótló mɛ ɔ́, un sɛ́ wɛnsagun dó Hɛcibɔ́ni xɔ́sú Sihɔ́ni, nú yě ní yi ɖɔ xɔ́ntɔn xɔ́ntɔn xó n'i ɖɔ:

²⁷ ‘Mǐ jló ná gbɔn to towe mɛ dín. Mǐ ná wlí ali bó ná dín tlɔlɔ; mǐ ná zɛ dó ɖisí ǎ, mǐ ká ná zɛ dó amyɔ ǎ.

²⁸ Mǐ ná sú nǔ e mǐ ná ɖu é kpó sin e mǐ ná nu é kpó sín axɔ́ we. Vɛ̌ kó jó mǐ dó kpowun bónú mǐ ná gbɔn to towe mɛ dín.

²⁹ Esawu ví lɛ́ɛ ɔ́, yě kó jó mǐ dó bɔ mǐ gbɔn Seyíi dín; Mɔwabunu lɛ́ɛ lɔ jó mǐ dó bɔ mǐ gbɔn Áa toxo ɔ́ mɛ dín. Mǐ nǎ gbɔn Judɛ́ɛn tɔ ɔ́ mɛ dín, bó byɔ́ to e ná mǐ wɛ Mawu Mavɔmavɔ, Mawu mǐtɔn ɖe é mɛ.’

³⁰ Lo ɔ́, axɔ́sú Sihɔ́ni ná gbe mǐ, bónú mǐ nǎ gbɔn to tɔn mɛ dín ǎ, ɖó Mawu Mavɔmavɔ, Mawu mǐtɔn hɛn ayixa tɔn syɛ́n bǐ dégbédégbé, bónú mi ná sixú yí to tɔn e mɛ mi ɖe égbé din é.

³¹ Mawu Mavɔmavɔ ɖɔ nú mì ɖɔ: ‘Đǒtó mì, bɛ́ sín din ɔ́, un jó Sihɔ́ni kpó to tɔn kpó nú we. Jɛ to ɔ́ yí jí.’

³² Sihɔ́ni kpódó togun tɔn bǐ kpó wá kpé mǐ ɖo Yaxisa bó fun ahwan xá mǐ.

³³ Mawu Mavɔmavɔ, Mawu mǐtɔn ká jó e nú mǐ, bɔ mǐ ɖu ɖo é kpódó vǐ tɔn lɛ́ɛ kpó, kpódó togun ɔ́ bǐ kpó jí.

³⁴ Mǐ yí toxo tɔn lɛ́ɛ bǐ. Mǐ gba toxo lɛ́ɛ bǐ, bó hu mɛxó kpó yɔkpɔ́vú kpó e ɖo toxo ɔ́ mɛ lɛ́ɛ bǐ. Mǐ jó mɛ ɖěbǔ dó nyi gbɛ ǎ.

³⁵ Nǔ e jló mǐ bɔ mǐ bɛ́ wá yi xwé lɛ́ɛ wɛ nyí kanlin lɛ́ɛ kpódó dɔkun e ɖo toxo e mǐ yí lɛ́ɛ mɛ lɛ́ɛ é kpó.

³⁶ Bɛ́ sín Alowɛ́ɛ toxo e ɖo Aanɔ́ni tɔ ɔ́ kpá ɔ́ yi toxo e ɖo tɔdo mɛ ɔ́ mɛ káká yi Galadi ɔ́, toxo ɖěbǔ ɖo fí énɛ́ lɛ́ɛ bó hú gǎn mǐ ǎ. Mawu Mavɔmavɔ, Mawu mǐtɔn zé bǐ dó acɛ mǐtɔn mɛ.

³⁷ Lo ɔ́, mǐ ya agba Amumɔ́ɔ ví lɛ́ɛ sín to wú ǎ: mǐ ya agba toxo yětɔn e ɖo Yabɔ́ku tɔ ɔ́ tó lɛ́ɛ ɖě wú ǎ; mǐ ká ya agba toxo yětɔn e ɖo sókan mɛ lɛ́ɛ ɖě wú ǎ; mǐ ká ya agba fí e Mawu Mavɔmavɔ, Mawu mǐtɔn gbɛ́ nú mǐ ɖɔ mǐ má wa nǔɖé ná ó lɛ́ɛ ɖě wú ǎ.”