Sɛ́nflínmɛ 19 - MAWUXÓWÉMA

¹ Akɔta e ɖo to e ná ná mi wɛ Mawu Mavɔmavɔ, Mawu mitɔn ɖe ɔ́ mɛ lɛ́ɛ ɔ́, Mawu Mavɔmavɔ ná vívá kún yětɔn, bó ná ná ayǐkúngban yětɔn lɛ́ɛ mi, bɔ mi ná nɔ toxo yětɔn lɛ́ɛ mɛ, mi ná nɔ xwé yětɔn lɛ́ɛ gbe.

² To énɛ́ e Mawu Mavɔmavɔ ná ná mi, bɔ é ná nyí mitɔn ɔ́, mi ná sɔ́ toxo atɔn ɖ'é mɛ.

³ Mi ná ɖe ali yi toxo atɔn énɛ́ lɛ́ɛ bǐ mɛ, bɔ mɛ ɖé hu mɛ ɔ́, mɛ ɔ́ hɛn ɔ́, é ná hɔn yi toxo énɛ́ lɛ́ɛ ɖě mɛ. To e Mawu Mavɔmavɔ, Mawu mitɔn ná ná mi, bɔ é ná nyí mitɔn ɔ́, mi ná má ɖó atɔn.

⁴ Mɛ e ma jló ná hu mɛ ǎ, bó ka hu mɛ ɔ́, bɔ mɛ e é hu ɔ́ kpó é kpó má kó kpé nǔɖé ɖ'ayǐ ǎ ɔ́, mɛ mɔ̌hun kɛ́ɖɛ́ wɛ ná hɔn yi cí toxo énɛ́ lɛ́ɛ ɖokpó mɛ, bó ná gán.

⁵ Kpɔ́n d'é wú ɖokpó ɖíe: Nya ɖé kpó hǎgbɛ́ tɔn kpó zɔn yi atínkan mɛ, bɔ hwenu e é zé asyɔ́ tɔn, bó ɖo atín gbo wɛ ɔ́, asyɔ́ví ɔ́ sún sín atín ɔ́ kɔ, bó yi xo hǎgbɛ́ ɔ́ bɔ é kú. Ényí nǔ cí mɔ̌ ɔ́, nya e jí nǔ mɔ̌hun jɛ dó ɔ́ hɛn ɔ́, é ná hɔn yi cí toxo énɛ́ lɛ́ɛ ɖokpó mɛ, bó ná gán.

⁶ Ényí ali e yi toxo énɛ́ lɛ́ɛ mɛ lɛ́ɛ lín, bónú mɛ e ɖo hlɔn ba wɛ ɔ́ ɖo xomɛsin jí, bó nya ɛ káká bó xwedó wǔ tɔn, bó hu i ɔ́, é ná nyɔ́ ǎ. È ɖǒ ná hu i ǎ, ɖó mɛ e é hu ɔ́ kpó é kpó kó kpé nǔɖé ɖ'ayǐ ǎ.

⁷ Énɛ́ ɔ́ wú wɛ un ɖɔ nú mi ɖɔ mi ní sɔ́ toxo atɔn, bónú mɛ mɔ̌hun lɛ́ɛ ná hɔn yi cí mɛ.

⁸ Hwenu e Mawu Mavɔmavɔ, Mawu mitɔn ná gbló ada nú ayǐkúngban mitɔn, bó ná ná to e sín akpá é dó nú tɔ́gbó mitɔn lɛ́ɛ mi ɔ́,

⁹ mi ná lɛ́ sɔ́ toxo atɔn dó atɔn nukɔntɔn lɛ́ɛ jí. Amɔ̌, cóbónú Mawu Mavɔmavɔ ná bló mɔ̌ ɔ́, sɛ́n e ná mi wɛ é ɖe égbé din lɛ́ɛ bǐ wɛ mi ná nɔ́ nyi, bó ná yí wǎn n'i, lobo ná nɔ́ wa jlǒ tɔn tɛgbɛ.

¹⁰ Mi bló mɔ̌ ɔ́, è nǎ hu xomɛvɔ́nɔ ɖěbǔ ɖo to e Mawu Mavɔmavɔ, Mawu mitɔn ná ná mi é mɛ ǎ. É má nyí mɔ̌ ǎ ɔ́, kɔ mitɔn wɛ kú mɔ̌hun ná nɔ.

¹¹ Lo ɔ́, ényí mɛ ɖé gbɛ́ wǎn nú mɛ ɖé, bó ɖo wu yi n'i wɛ káká, bó wá kpé wǔ tɔn bó hu, lobo hɔn yi cí toxo énɛ́ lɛ́ɛ ɖěbǔ mɛ ɔ́,

¹² tomɛxó e ɖo toxo tɔn mɛ lɛ́ɛ ná sɛ́ mɛ dó gbě tɔn mɛ, bɔ yě ná yi wlí i wá, bó ná zé e dó alɔ mɛ nú mɛ e ɖó ná ba hlɔn mɛ e kú ɔ́ tɔn é, bɔ é ná hu i.

¹³ Nǔ tɔn má blá wǔ nú mi ó; mɔ̌ wɛ mi ná sú kún dó nú mɛ e nɔ hu xomɛvɔ́nɔ é gbɔn ɖo Izlayɛ́li, lobo ná mɔ agbɔ̌n.

Mi ma fin ayǐkúngban ó

¹⁴ Ée mi ná yi cí to e ná ná mi wɛ Mawu Mavɔmavɔ, Mawu mitɔn ɖe ɔ́ sín ayǐkúngban jí ɔ́, mi ma sɛ tɛn nú mɛ e ko wá fínɛ́ dó nukɔn nú mi lɛ́ɛ sín dogbó ó.

Kúnnuɖetɔ́ lɛ́ɛ

¹⁵ Kúnnuɖiɖe mɛ ɖokpó géé tɔn kpé bónú è nǎ ɖó hwɛ nú mɛ e è vɛ nǔ baɖabaɖa ɖé dó, abǐ mɛ e hu hwɛ, abǐ mɛ e dó nǔ alɔkpa ɖé sin é ǎ. Kúnnuɖiɖe mɛ ɖokpó tɔn kpé ǎ. Mɛ we abǐ mɛ atɔn wɛ ná to ɖe kúnnu nú lě e nǔ lɛ́ɛ nyí gbɔn é hwɛ̌.

¹⁶ Ényí mɛ ɖé ɖe kúnnu agɔ dó mɛ ɖé wú ɔ́,

¹⁷ mi ná kplá é kpódó mɛ e nu ɖó adingban dó wɛ é ɖe ɔ́ kpó, bɔ yě mɛ we lɛ́ɛ bǐ ná wá Mawu Mavɔmavɔ xwé gbe. Yě ná wlí lě e nǔ lɛ́ɛ nyí gbɔn ɔ́ ɖɔ nú vɔ̌sánú-xwlémawutɔ́ ɔ́ kpó hwɛɖɔtɔ́ e ɖo azɔ̌ wa ɖo xwé ɔ́ gbe wɛ hwenɛ́nu lɛ́ɛ kpó.

¹⁸ Énɛ́ ɔ́, hwɛɖɔtɔ́ lɛ́ɛ ná ba do nú lě e nǔ lɛ́ɛ nyí gbɔn é céɖécéɖé: ée yě ná mɔ ɖɔ mɛ e ɖo kúnnu ɖe wɛ ɔ́, kúnnu agɔ ɖe tɔ́ wɛ é nyí, bó ɖo xó kpa ɖɔ dó nɔví tɔn nu wɛ ɔ́,

¹⁹ hwɛ e é jló ɖɔ è nǐ ɖó nú nɔví émítɔn ɔ́, mi ná ɖó nú éyɛ́. Lě e mi ná sú kún dó nú nǔ nyanya gbɔn ɖo mi mɛ é nɛ́.

²⁰ Mɛ ɖě lɛ́ɛ ná se nǔ énɛ́ e jɛ é, bó ná ɖi xɛsi bó sɔ́ ná dó nǔ mɔ̌hun sin ǎ.

²¹ Mi ma kú nǔbláwǔ nú mɛ e hu hwɛ é ó; è ɖǒ ná dɔn tó n'i: mɛɖé hu mɛ ɔ́, è nǎ hu é lɔmɔ̌; mɛɖé tɔ́n nukún mɛ ɔ́, è nǎ tɔ́n nukún é lɔmɔ̌; mɛ ɖé sún aɖǔ mɛ ɔ́, è nǎ sún aɖǔ é lɔmɔ̌; mɛɖé wɛ́n alɔ mɛ ɔ́, è nǎ wɛ́n alɔ é lɔmɔ̌; mɛɖé wɛ́n afɔ mɛ ɔ́, è nǎ wɛ́n afɔ é lɔmɔ̌.