Sɛ́nflínmɛ 18 - MAWUXÓWÉMA

¹ Levíi ví vɔ̌sánú-xwlémawutɔ́ lɛ́ɛ kpó mɛ e ɖo Levíi sín akɔta mɛ lɛ́ɛ kpó ɖó ayǐkúngban ɖě Izlayɛ́li ví ɖě lɛ́ɛ ɖɔhun ǎ. Vɔ̌ e è wǎ sá nú Mawu Mavɔmavɔ lɛ́ɛ kpó nǔ e nyí Mawu Mavɔmavɔ tɔn lɛ́ɛ kpó ɔ́, éé nyí kanta yětɔn ɖ'é mɛ lɛ́ɛ wɛ yě ná nɔ́ ɖu.

² Yě ná ɖó ayǐkúngban ɖěbǔ ɖo Izlayɛ́li ví ɖě lɛ́ɛ tɛ́ntin ǎ; Mawu Mavɔmavɔ wɛ nyí nǔ e yě ɖǒ é.

³ Vɔ̌sánú-xwlémawutɔ́ lɛ́ɛ ɖó acɛ bó ná yí nyibú abǐ gbɔ̌ e Izlayɛ́li ví lɛ́ɛ hu bó dó sá kɔnɖókpɔ́ vɔ́ ná lɛ́ɛ ɖě: è ɖǒ ná ná kanlin lɛ́ɛ sín abɔ̌ kpó aglan kpó adɔ lɛ́ɛ kpó yě.

⁴ Mi ná ná jinukún e mi ná ya dó nukɔn lɛ́ɛ yě; mi ná ná vɛ̌ɛn kpó ami kpó yě; mɔ̌ ɖokpó ɔ́, fún nukɔntɔn e mi ná kpa sín gbɔ̌ lɛ́ɛ wú é ɔ́, mi na ná yě.

⁵ Đó Mawu Mavɔmavɔ, Mawu mitɔn sɔ́ Levíi kpó ví tɔn lɛ́ɛ kpó ɖó vo ɖo akɔta lɛ́ɛ bǐ mɛ, bónú yě ná wa azɔ̌ n'i káká sɔ́yi.

⁶ Ényí Levíi ví ɖé jló ná gosín Izlayɛ́li toxo e mɛ é ɖe ɔ́ mɛ, bó ná wá nɔ fí e Mawu Mavɔmavɔ ná sɔ́ é ɔ́,

⁷ é sixú wá fínɛ́ bó wa azɔ̌ nú Mawu Mavɔmavɔ, Mawu tɔn, Levíi ví ɖě lɛ́ɛ e ɖo Mawu xwé gbe é ɖɔhun.

⁸ Kanta e Levíi ví ɖě lɛ́ɛ nɔ́ yí é wɛ é lɔmɔ̌ ná yí gɔ́ nú tɔ́ tɔn gú e é sa lɛ́ɛ.

Gbeyíɖɔ Mawu tɔn lɛ́ɛ kpó gbeyíɖɔnyíjɛtɔ́ lɛ́ɛ kpó

⁹ Ée mi ná jɛ to e Mawu Mavɔmavɔ, Mawu mitɔn ná ná mi é mɛ ɔ́, mi ma jɛ nǔ baɖabaɖa e wa wɛ mɛ e ɖo fínɛ́ din lɛ́ɛ ɖe ɔ́ wa jí ó.

¹⁰ Mɛ ɖěbǔ ní má ɖo mi mɛ, bó dó vǐ tɔn súnnu abǐ nyɔ̌nu zo nú vodún ó; mɛ ɖěbǔ ní má bló majíki abǐ é ní kan fá ó, mɛ ɖěbǔ ní má kan amɔɛ abǐ é ní ɖu azě ó;

¹¹ mɛ ɖěbǔ ní má ɖó bǒ nú mɛ ó; mɛ ɖěbǔ ní má yi bonu ó.

¹² Đó mɛ e nɔ wa nǔ mɔ̌hun lɛ́ɛ nɔ́ vɛ́ mɔ nú Mawu Mavɔmavɔ, Mawu mitɔn; mɛ e ɖo to e ná ná mi wɛ Mawu Mavɔmavɔ ɖe ɔ́ mɛ lɛ́ɛ wɛ nɔ́ wa nǔ énɛ́ lɛ́ɛ; énɛ́ wú wɛ, nú mi wá to ɔ́ mɛ ɔ́, é ná nya mɛ e ɖo to ɔ́ mɛ lɛ́ɛ ɖo nukɔn mitɔn.

¹³ Amɔ̌, midɛɛ lɛ́ɛ ɔ́, mi ní zán gbɛ bónú Mawu Mavɔmavɔ, Mawu mitɔn ma mɔ nǔɖé d'é wú ó.

¹⁴ Đó togun énɛ́ lɛ́ɛ e sín tɛnmɛ nɔ gbé wɛ mi ja ɔ́, nǔ e majíkiblótɔ́ lɛ́ɛ, abǐ nǔkantɔ́ lɛ́ɛ nɔ kplɔ́n yě ɔ́ wɛ yě nɔ́ ɖótó. Mawu Mavɔmavɔ, Mawu mitɔn ka gbɛ́ ɖɔ midɛɛ lɛ́ɛ ní má wa nǔ gbɔn mɔ̌ ó.

¹⁵ É ká ná sɛ́ gbeyíɖɔ nyɛ Mɔyízi ɖɔhun ɖokpó dó mi, togun mitɔn mɛ nu wɛ é ná nyí: mi ná ɖótó nǔ e é ná ɖɔ nú mi é.

¹⁶ Nǔ e mi ka byɔ́ Mawu Mavɔmavɔ gbe e gbe mi kplé ɖo Holɛ́bu só ɔ́ kpá é nɛ́. Mi ɖɔ gbe énɛ́ gbe ɖɔ: “Mǐ sɔ́ ba nú Mawu Mavɔmavɔ, Mawu mǐtɔn ná nɔ ɖɔ xó sɛ́ dó mǐ tlɔlɔ ǎ! Mǐ sɔ́ ba ná mɔ myɔ hɛhɛ énɛ́ ɖě ǎ! Mǐ táá kú.”

¹⁷ Fínɛ́ jɛ́n Mawu Mavɔmavɔ ɖɔ nú mì ɖe gbe énɛ́ gbe ɖɔ: “Xó énɛ́ ɔ́ e togun ɔ́ ɖɔ ɔ́, hwɛ tɔn jɔ.

¹⁸ Un ná sɛ́ gbeyíɖɔ hwi ɖɔhun ɖokpó dó yě, bɔ é ná nyí to yětɔn mɛ nu. Xó e un ná ɖɔ é ní ɖɔ nú mi lɛ́ɛ ɔ́, é ná ɖɔ bǐ nú mi.

¹⁹ Ényí mɛ ɖé má ké ya nú xó e gbeyíɖɔ ɔ́ ná ɖɔ dó nyǐkɔ ce mɛ é ǎ ɔ́, nyi ɖésú wɛ ná kan nǔ e wú wɛ ɔ́ byɔ́ ɛ.

²⁰ Lo ɔ́, é nyí gbeyíɖɔ ɖěvo glá káká bó yi ɖɔ xó e un ma ɖɔ n'i ǎ é, dó nyǐkɔ ce mɛ abǐ é ɖɔ xó dó nǔmɛsɛn ɖé sín nyǐkɔ mɛ ɔ́, è nǎ hu i.”

²¹ Afɔ nyɔ́ ɔ́, mi sixú ɖo kinkanbyɔ́ miɖée wɛ ɖɔ nɛ̌ émí sixú wa gbɔn bó tunwun ɖɔ wɛn ɔ́ kún gosín Mawu Mavɔmavɔ gɔ́n ó.

²² Éɖíe, ényí gbeyíɖɔ ɖé ɖɔ nǔɖé dó Mawu Mavɔmavɔ sín nyǐkɔ mɛ, bɔ nǔ ɔ́ má jɛ ǎ ɔ́, hǔn xó e é ɖɔ ɔ́ gosín Mawu Mavɔmavɔ gɔ́n ǎ nɛ́. Gbeyíɖɔ ɔ́ ɖésú wɛ syɛ́n ta bó ɖɔ xó énɛ́ ɔ́. Mi ma ké ya nú xó tɔn ó.