Sɛ́nflínmɛ 16 - MAWUXÓWÉMA

¹ Mi ɖu Dǐndínwáyixwe ɔ́ ɖo Abibu sun ɔ́ mɛ, bó dó zé Mawu Mavɔmavɔ, Mawu mitɔn su, ɖó sun énɛ́ ɔ́ mɛ wɛ Mawu Mavɔmavɔ ɖe mi tɔ́n sín Ejípu zǎn mɛ.

² Kanlin e mi ná hu dó ɖu Dǐndínwáyixwe ɔ́ nú Mawu Mavɔmavɔ, Mawu mitɔn ɔ́, mi ná zé ɖo nyibú mitɔn lɛ́ɛ mɛ, gbɔ̌ mitɔn lɛ́ɛ mɛ. Mi ná hu kanlin ɔ́ ɖo tɛn e Mawu Mavɔmavɔ ná sɔ́, bó ná ɖe susu tɔn xlɛ́ ɖe ɔ́ mɛ.

³ Mi ná ɖu wɔ̌xúxú e mɛ è dǒ tɔ́n ɔ́ xwe ɔ́ hwenu ǎ. Lo ɔ́, wɔ̌xúxú e mɛ è ma dó tɔ́n ǎ é wɛ mi ná ɖu káká nú azǎn tɛ́nwe. Énɛ́ xlɛ́ ɖɔ kpitikpiti wɛ mi tɔ́n sín Ejípu. Mi ɖo wamamɔnɔ wɔ̌xúxú énɛ́ ɖu wɛ ɔ́, é ná nɔ́ flín azǎn e gbe mi tɔ́n sín Ejípu é mi, bɔ mi ná wɔn gbeɖé ǎ.

⁴ È nǎ mɔ tɔ́n ɖěbǔ ɖo xwé mitɔn gbe azǎn tɛ́nwe énɛ́ lɛ́ɛ mɛ ǎ; è ka ná mɔ ɖo to mitɔn mɛ ǎ. Ayǐ ká ná hɔ́n dó kanlin e mi hu ɔ́ sín lan xwe ɔ́ sín azǎn nukɔntɔn ɔ́ gbe ǎ.

⁵ Mi ná ɖu Dǐndínwáyixwe ɔ́ ɖo toxo e Mawu Mavɔmavɔ, Mawu mitɔn ná ná mi lɛ́ɛ ɔ́ ɖě mɛ kpowun ǎ.

⁶ Toxo e mɛ Mawu Mavɔmavɔ, Mawu mitɔn ná sɔ́ tɛn ɖe bó ná ɖe susu tɔn xlɛ́ ɖe ɔ́ mɛ kɛ́ɖɛ́ jɛ́n mi ná ɖu xwe ɔ́ ɖe. Gan e mɛ mi tɔ́n sín Ejípu ɔ́ mɛ wɛ mi ná sá vɔ̌ ɔ́; hǔn gbadanu, hwe ɖo xɔ yi wɛ ɔ́ wɛ mi ná hu kanlin ɔ́.

⁷ Mi ná ɖa lan ɔ́ ɖo tɛn e mɛ Mawu Mavɔmavɔ, Mawu mitɔn ná sɔ́ ɔ́ mɛ, lobo ná ɖu. Ayǐ hɔ́n ɔ́, mi ná lɛ́ kɔ yi xwé mitɔn lɛ́ɛ gbe.

⁸ Mi ná ɖu wɔ̌xúxú e mɛ è ma dó tɔ́n ǎ é káká nú azǎn ayizɛ́n. É jɛ azǎn tɛ́nwegɔ́ ɔ́ gbe ɔ́, mi ná ɖu xwe ɖaxó ɖokpó, bó ná zé Mawu Mavɔmavɔ, Mawu mitɔn su. Mi ná wa azɔ̌ ɖěbǔ gbe énɛ́ gbe ǎ.

Pantekótuxwe ɔ́

⁹ Mi ná xa aklúnɔzángbla tɛ́nwe, bɛ́ sín hwenu e mi jɛ jinukún mitɔn lɛ́ɛ ya jí ɔ́,

¹⁰ lobo ná ɖu Pantekótuxwe ɔ́, bó ná dó zé Mawu Mavɔmavɔ, Mawu mitɔn su. Mi mɛ ɖokpó ɖokpó ná hɛn nǔníná e mi ɖó jlǒ bó ná ná é wá, lě e Mawu Mavɔmavɔ, Mawu mitɔn dó nú mi gbɔn é.

¹¹ Mi ná j'awǎ ɖo Mawu Mavɔmavɔ nukɔn, ɖo tɛn e é ná sɔ́ bó ná ɖe susu tɔn xlɛ́ ɖe ɔ́ mɛ. Mi kpó vǐ mitɔn súnnu kpó nyɔ̌nu kpó, mɛsɛntɔ́ mitɔn súnnu kpó nyɔ̌nu kpó, Levíi ví e ɖo mi mɛ lɛ́ɛ kpó jǒnɔ e ɖo mi mɛ lɛ́ɛ kpó, tɔ́cyɔvǐ lɛ́ɛ kpódó asúkúsi e ɖo mi mɛ lɛ́ɛ bǐ kpó ná j'awǎ.

¹² Mi flín ɖɔ émí kó nyí kannumɔ kpɔ́n ɖo Ejípu; énɛ́ wú ɔ́, mi ɖó ayi te bó nyi sɛ́n énɛ́ lɛ́ɛ.

Azavaxwe ɔ́

¹³ Ée mi ná fún jinukún lɛ́ɛ fó, bó ná fyɔ́n vǐwun fó ɔ́, mi ná ɖu Azavaxwe ɔ́ káká nú azǎn tɛ́nwe.

¹⁴ Mi kpó vǐ mitɔn súnnu kpó nyɔ̌nu kpó, mɛsɛntɔ́ mitɔn súnnu kpó nyɔ̌nu kpó, Levíi ví e ɖo mi mɛ lɛ́ɛ kpó jǒnɔ e ɖo mi mɛ lɛ́ɛ kpó, tɔ́cyɔvǐ lɛ́ɛ kpódó asúkúsi e ɖo mi mɛ lɛ́ɛ bǐ kpó ná ɖu xwe ɔ́ kpó awǎjijɛ kpó.

¹⁵ Ée Mawu Mavɔmavɔ ná bló bɔ gle mitɔn lɛ́ɛ ná nyɔ́, bɔ é ná dó acɛ nǔ e mi ná wa lɛ́ɛ bǐ jí é ɔ́, mi ná ɖo awǎ jɛ wɛ kpowun; mi ná ɖu xwe ɔ́ káká nú azǎn tɛ́nwe, bó ná dó zé Mawu Mavɔmavɔ, Mawu mitɔn su, ɖo tɛn e é ná sɔ́ ɔ́ mɛ.

¹⁶ Hǔn xwewú xwewú ɔ́, súnnu e ɖo togun mitɔn mɛ lɛ́ɛ bǐ ná nɔ́ yi Mawu Mavɔmavɔ, Mawu mitɔn nukɔn azɔn atɔn ɖo tɛn e é ná sɔ́ é mɛ: yě ná nɔ́ yi Dǐndínwáyixwe ɔ́ hwenu, bó ná nɔ́ yi Pantekótuxwe ɔ́ hwenu, bó ná nɔ́ yi Azavaxwe ɔ́ hwenu. Yě ná zɔn asígbá alɔgbá yi Mawu Mavɔmavɔ nukɔn ǎ;

¹⁷ lo ɔ́, mɛ ɖokpó ɖokpó ná kpɔ́n lě e Mawu Mavɔmavɔ, Mawu tɔn dó n'i gbɔn é, bó ná hɛn nǔníná e wú é kpé ɔ́ yi ná ɛ.

Hwɛɖiɖɔ

¹⁸ Mi ná zé hwɛɖɔtɔ́ kpó hwɛgbotɔ́ kpó gbɔn akɔta ɖokpó ɖokpó mɛ ɖo toxo e Mawu Mavɔmavɔ, Mawu mitɔn ná ná mi lɛ́ɛ bǐ mɛ, bɔ yě ná nɔ́ ɖɔ hwɛ ɖó sɛ́nxwi jí ɖo togun ɔ́ mɛ.

¹⁹ Mi ma táfú mɛ ɖo hwɛ nukɔn ó, mi ma kpɔ́n mɛ nukúnta dó ɖɔ hwɛ ó, mi ma yí nǔ ɖu bó dó hwɛ agɔ ó, ɖó nǔ ɖu ɖo nǔ mɛ nɔ́ tɔ́n nukún nǔnywɛ́tɔ́ lɛ́ɛ, bɔ mɛ e hwɛ tɔn nyɔ́ é nɔ́ kú hwɛ.

²⁰ Nǔ ɖokpó e ɖo tají ɔ́ wɛ nyí è nǐ ɖɔ hwɛ jlɔ́jlɔ́. Énɛ́ ɔ́, mi ná nɔ gbɛ, bó ná yí to e Mawu Mavɔmavɔ, Mawu mitɔn ná ná mi bɔ é ná nyí mitɔn ɔ́ mɛ.

Sinsɛn sín walɔ e è gbɛ̌ lɛ́ɛ

²¹ Mi ma tun kpo, abǐ bǒcyɔ ɖěbǔ ɖó vɔ̌sákpe e mi ná mɛ nú Mawu Mavɔmavɔ, Mawu mitɔn é kpá ó.

²² Mi ma tun awǐnnya ɖěbǔ te bó sɛn ó, ɖó Mawu Mavɔmavɔ, Mawu mitɔn gbɛ́ wǎn nú walɔ mɔ̌hunkɔ lɛ́ɛ.