Sɛ́nflínmɛ 15 - MAWUXÓWÉMA

¹ Xwe tɛ́nwe mɛ tɛ́nwe mɛ tɛgbɛ ɔ́, mi ná nɔ́ zé axɔ́ kɛ mɛ e ɖu axɔ́ dó mi lɛ́ɛ bǐ.

² Lě e è ka ɖó ná nyi sɛ́n énɛ́ ɔ́ gbɔn é ɖíe: ée xwe e xwe è nǎ sɔ́ axɔ́ kɛ mɛ e ɖu axɔ́ ɔ́ dó sɔ́ Mawu Mavɔmavɔ su ɔ́ ná wá, bɔ è nǎ ɖɔ ɔ́, axɔ́tɔ́nɔ lɛ́ɛ bǐ ɖǒ ná sɔ́ axɔ́ kɛ nɔzo yětɔn e ɖu axɔ́ dó yě lɛ́ɛ; yě ká ɖó ná dó cɔcɔ nú yě ɖɔ yě ɖǒ ná sú axɔ́ émí cóbɔ hwe ɔ́ nu ná su ǎ.

³ Mi sixú dó cɔcɔ nú to ɖěvo mɛ nu e ɖu axɔ́ dó mi é ɖɔ é ní sú axɔ́ émítɔn émí; amɔ̌, mi ná sɔ́ axɔ́ e mɛ e nyí to mitɔn mɛ nu é ɖu dó mi é kɛ ɛ.

⁴ È ɖɔ è nǎ wa nǔ gbɔn mɔ̌ có wamamɔnɔ ɖěbǔ ká ná nɔ mi mɛ ǎ, ɖó Mawu Mavɔmavɔ, Mawu mitɔn ná ná dɔkun bǐ mi ɖo to e na ná mi wɛ é ɖe bɔ é ná nyí mitɔn ɔ́ mɛ.

⁵ Mi vɛ́ ko ɖo tónú se n'i wɛ, bó ɖo sɛ́n tɔn e xa nú mi wɛ un ɖe égbé lɛ́ɛ nyi wɛ ganjí ɔ́, é ná dó dɔkun nú mi.

⁶ Ée Mawu Mavɔmavɔ, Mawu mitɔn ná dó dɔkun nú mi lě e é ɖɔ gbɔn ɔ́, mɛ ɖěbǔ ná ɖo mi mɛ bó ná nya akwɛ́ ǎ; é nyɔ́ wa ɔ́, mi wɛ ná nɔ́ yí nǔ ɖó gbanu dó nya nǔ nú to ɖěvo mɛ nu gěgé. Mi ná hú gǎn akɔta gěgé; yě mɛ ɖě ká ná hú gǎn mi ǎ.

⁷ É ká nyí wamamɔnɔ ɖé wá tɔ́n ɖo mi mɛ vlafo, ɖo to e Mawu Mavɔmavɔ na ná mi é mɛ ɔ́, mi ma syɛ́n nukún, bó syɛ́n fɛn, bó gɔn nǔ nya n'i ó.

⁸ É nyɔ́ wa ɔ́, mi ná hun alɔ bó ná ɛ nǔ e ba wɛ é ɖe ɔ́.

⁹ Amɔ̌, mi cɔ́ miɖée! Mi ma nú linlin nyanya byɔ́ ayi mitɔn mɛ, bónú mi ɖɔ nú miɖée ɖɔ xwe tɛ́nwegɔ́ e mɛ è nɔ zé axɔ́ kɛ mɛ é kó ja, bónú é sín énɛ́ wú, bɔ mi ná syɛ́n nukún, bó tɛ nǔ e ba wɛ nɔzo mitɔn e ɖo ya ji wɛ ɔ́ ɖe ɔ́ ó. É táá wá jɛ hwɛ mitɔn nú Mawu Mavɔmavɔ, bɔ mi ná nyí nǔwanyidotɔ́.

¹⁰ Mi nya nǔ n'i; mi nya n'i kpó xomɛ ɖagbe kpó. Mawu Mavɔmavɔ, Mawu mitɔn ná kpɔ́n dó xomɛnyínyɔ́ mitɔn énɛ́ ɔ́ wú, bó ná dó acɛ nǔ e mi ná wa lɛ́ɛ bǐ jí.

¹¹ Wamamɔnɔ ná hán ɖo to mitɔn mɛ gbeɖé ǎ wútu wɛ un ɖɔ nú mi ɖɔ mi ní nyɔ́ xomɛ dó nɔzo mitɔn wamamɔnɔ gbɛ̌dónánɔ lɛ́ɛ wú.

È nǎ nɔ jó kannumɔ lɛ́ɛ xwe tɛ́nwe mɛ tɛ́nwe mɛ tɛgbɛ

¹² Ényí nɔví mitɔn Eblée ɖé wá sɔ́ éɖée sa kannumɔ ɖɔhun ɔ́, é ná sɛn mi nú xwe ayizɛ́n; é sixú nyí súnnu, é sixú nyí nyɔ̌nu. Amɔ̌, mi byɔ́ xwe tɛ́nwegɔ́ ɔ́ mɛ ɔ́, mi ná jó e dó bɔ é ná jɛ éɖée sí.

¹³ Mi ka ná jó e dó bɔ é ná yi asígbá alɔgbá ǎ.

¹⁴ Nyibú, gbɔ̌, lɛ̌ngbɔ́, jinukún kpó vɛ̌ɛn kpó e Mawu Mavɔmavɔ hun alɔ bó ná mi lɛ́ɛ ɔ́, mi ɖó na ná ɖě yě.

¹⁵ Mi flín ɖɔ kannumɔ wɛ émí lɔmɔ̌ ko nyí ɖo Ejípu, bɔ Mawu Mavɔmavɔ, Mawu mitɔn ɖe mi tɔ́n. Énɛ́ ɔ́ wú wɛ un ɖo sɛ́n énɛ́ xa nú mi wɛ égbé.

¹⁶ Ényí kannumɔ ɖé ká ɖɔ émí kún jló ná jó mi dó ó, ɖɔ émí yí wǎn nú mi kpó mɛ mitɔn lɛ́ɛ kpó, ɖɔ émí mɔ vivo ɖo gɔ̌n mitɔn ɔ́,

¹⁷ mi ná zé swe bó ná tɔ́n tó n'i dó hɔn wú, bɔ é ná húzú kannumɔ mitɔn káká yi. É ná bó nyí kannumɔ nyɔ̌nu hǔn, mi bló mɔ̌ n'i.

¹⁸ Mi jó kannumɔ ɖé hǔn, é ní má nɔ́ vɛ́ nú mi ó, ɖó azɔ̌ e é wa nú mi nú xwe ayizɛ́n ɔ́ kó yi azɔ̌ e mɛ e ná yí akwɛ́ ɔ́ ná wa ɔ́ donu we. Mi jó e nú é yi bónú Mawu Mavɔmavɔ, Mawu mitɔn ná dó acɛ nǔ e mi ná wa lɛ́ɛ bǐ jí.

Nukɔngbéví kanlin lɛ́ɛ tɔn

¹⁹ Vǐ nukɔntɔn e nyibú mitɔn lɛ́ɛ, gbɔ̌ mitɔn lɛ́ɛ, lɛ̌ngbɔ́ mitɔn lɛ́ɛ ná ji bɔ é ná nyí asú lɛ́ɛ ɔ́, mi ná zé yě ɖó vo nú Mawu Mavɔmavɔ, Mawu mitɔn. Mi ma zé nyibúsú nukɔntɔn lɛ́ɛ dó wa azɔ̌ ná ó, mi ma kpa fún nú nukɔngbéví lɛ̌ngbɔ́ lɛ́ɛ tɔn ó.

²⁰ Xwewú xwewú tɛgbɛ ɔ́, mi kpó mɛ mitɔn lɛ́ɛ kpó ná nɔ́ kplé bó ná nɔ́ ɖu kanlin énɛ́ lɛ́ɛ ɖo fí e Mawu Mavɔmavɔ, Mawu mitɔn ná sɔ́ é.

²¹ Ényí kanlin lɛ́ɛ ɖě ɖó blɔ̌: gǒ wɛ é lɔ́ a, nukún wɛ é tɔ́n a, abǐ blɔ̌ baɖabaɖa ɖěbǔ wɛ é ɖó hǔn, mi ma zé dó sá vɔ̌ ná nú Mawu Mavɔmavɔ, Mawu mitɔn ó.

²² Mi ɖo mǐmɛ́ jí oo, mi ma ɖo mǐmɛ́ jí oo, mi hɛn ɔ́, mi ná ɖu lan ɔ́ agbanlín abǐ hwǐn lan wɛ ɖɔhun, ɖo xwé mitɔn lɛ́ɛ gbe.

²³ Lo ɔ́, mi ma ɖu hun ɔ́ ó; mi ná kɔn nyi kɔ́ mɛ sin ɖɔhun.