Sɛ́nflínmɛ 12 - MAWUXÓWÉMA

MAWU MAVƆMAVƆ SÍN SƐ́N ĐĚVO LƐ́Ɛ ( 12.1—26.19 )

¹ Mɔyízi ɖɔ: “Mi yi jɛ to e ná mi wɛ Mawu Mavɔmavɔ, Mawu e tɔ́gbó mitɔn lɛ́ɛ sɛn ɔ́ mɛ, bó yí ɔ́, sɛ́n kpó gbetakɛ́n kpó e mi ná nɔ́ se tónú ná bó ná nɔ́ bló ɖ'é jí lɛ́ɛ ɖíe:

Fí ɖokpó géé wɛ è nǎ nɔ sɛn Mawu ɖe

² “Mi ná gba vodún xwé lɛ́ɛ bǐ hánnyá: vodún xwé e ɖo só jí lɛ́ɛ, ée ɖo kpó ta lɛ́ɛ, ée ɖo atínkan mɛ lɛ́ɛ, mi ná gba bǐ. Mi ná gba fí e akɔta e mi nya tɔ́n lɛ́ɛ nɔ́ sɛn nǔmɛsɛn yětɔn lɛ́ɛ ɖe lɛ́ɛ bǐ.

³ Mi ná flí vɔ̌sákpe yětɔn lɛ́ɛ bǐ xwe, bó ná gba awǐnnya e yě tun te bó nɔ sɛn lɛ́ɛ bǐ, bó ná dó kpo e yě tun te bó nɔ́ sɛn lɛ́ɛ bǐ zo, bó ná gba bǒcyɔ yětɔn lɛ́ɛ bǐ. Mi ná sú nǔmɛsɛn yětɔn lɛ́ɛ sín kún dó, bɔ mɛ ɖé sɔ́ ná flín yě ǎ.

⁴ Mi ma zán walɔ akɔta énɛ́ lɛ́ɛ tɔn ɖěbǔ dó sɛn Mawu Mavɔmavɔ, Mawu mitɔn ó.

⁵ Lo ɔ́, fí e é ná sɔ́ ɖo akɔ mitɔn lɛ́ɛ sín ayǐkúngban jí, bó ná nɔ́ nɔ, bó ná nɔ́ ɖe susu tɔn xlɛ́ ɖe é kɛ́ɖɛ́ wɛ mi ná nɔ́ yi sɛn ɛ ɖe.

⁶ Fínɛ́ wɛ mi ná hɛn vɔ̌ mitɔn lɛ́ɛ wá; é sixú nyí vɔ̌ e è nɔ dó zo é, é sixú nyí kɔnɖókpɔ́ vɔ́, é sixú nyí mǎɖówǒ jinukún mitɔn lɛ́ɛ tɔn, é sixú nyí nǔ e mi ɖésú ɖó jlǒ bó ná lɛ́ɛ, é sixú nyí nǔ e wá ayi mɛ nú mi bɔ mi ná lɛ́ɛ, abǐ éé mi ná dó ɖe akpá e mi dó é ná lɛ́ɛ, é sixú nyí nyibú mitɔn lɛ́ɛ, kpó gbɔ̌ mitɔn lɛ́ɛ kpó sín nukɔngbéví.

⁷ Nǔɖuɖu e è nɔ xwlé Mawu Mavɔmavɔ, Mawu mitɔn ɔ́, nukɔn tɔn fínɛ́ wɛ mi kpó hɛ̌nnumɔ mitɔn lɛ́ɛ kpó ná ɖu éé nyí mitɔn ɔ́ ɖe; mi ná jɛ awa, ɖó nǔ e Mawu Mavɔmavɔ, Mawu mitɔn ná xo ɖɛ dó mi jí bɔ mi ná mɔ lɛ́ɛ wú.

⁸ “Mi sɔ́ ná sɛn Mawu Mavɔmavɔ lě e mǐ ɖ'é wú gbɔn égbé din bɔ nǔɖé nyɔ́ mɛɖé nukún mɛ ɔ́, é nɔ́ bló é ǎ.

⁹ Đó to e ná ná mi wɛ Mawu Mavɔmavɔ, Mawu mitɔn ɖe, bɔ é ná nyí mitɔn, bɔ mi ná vo ɖ'é mɛ ɔ́, mi ko yi to ɔ́ mɛ ǎ.

¹⁰ Amɔ̌, mi ná dó asá Judɛ́ɛn tɔ ɔ́, bó ná yi nɔ to e ná mi wɛ Mawu Mavɔmavɔ ɖe é mɛ. É ná cyɔ́n alɔ mi jí, bɔ kɛntɔ́ mitɔn e lɛ́ lɛ̌ dó mi lɛ́ɛ ná kpé mi wú ǎ, bɔ ayi mitɔn ná j'ayǐ.

¹¹ Énɛ́ ɔ́ gúdo lo ɔ́, mi ná hɛn nǔ e xó un ɖɔ nú mi lɛ́ɛ bǐ wá fí e Mawu Mavɔmavɔ ná sɔ́, bó ná ɖe susu tɔn xlɛ́ ɖe é. Nǔ e xó un ko ɖɔ nú mi lɛ́ɛ wɛ; yě wɛ nyí: vɔ̌ e è nɔ dó zo lɛ́ɛ, kɔnɖókpɔ́ vɔ́ lɛ́ɛ, mǎɖówǒ jinukún lɛ́ɛ tɔn, nǔ e mi ɖésú jló bó ná lɛ́ɛ, kpó nǔ e sín akpá mi dó bó ná ná Mawu Mavɔmavɔ lɛ́ɛ kpó.

¹² Xomɛ ná hun mi kpó vǐ mitɔn lɛ́ɛ kpó, mɛsɛntɔ́ mitɔn súnnu kpó nyɔ̌nu kpó, ɖo Mawu Mavɔmavɔ nukɔn fínɛ́. Xomɛ ná hun Levíi ví e ɖo toxo mitɔn mɛ lɛ́ɛ, xomɛ ná hun yě có yě ɖǒ ayǐkúngban ɖě ǎ.

¹³ “Mi cɔ́ miɖée; mi ma mɔ fí ɖé kpowun bó nɔ́ sá vɔ̌ ɖe ó.

¹⁴ Fí ɖokpó wɛ mi ná nɔ́ sá vɔ̌ ɖe; fí e Mawu Mavɔmavɔ ná sɔ́ ɖo akɔta mitɔn lɛ́ɛ ɖokpó sín ayǐkúngban jí ɔ́ kɛ́ɖɛ́ wɛ mi ná nɔ́ sá vɔ̌ lɛ́ɛ ɖe. Fínɛ́ wɛ mi ná bló nǔ e un ɖɔ nú mi lɛ́ɛ bǐ ɖe.

¹⁵ Nǔ ɖo mɔ̌ có, é jló mi hweɖěbǔnu ɔ́, mi ná wlí kanlin e jló mi é ɖokpó, bó ná hu bó ɖu ɖo toxo mitɔn mitɔn mɛ; mi sixú ɖo mǐmɛ́ jí, mi ka sixú gɔn mǐmɛ́ jí má nɔ. Mi ná ɖu lan ɔ́ agbanlín abǐ hwǐn lan wɛ ɖɔhun. Lě e Mawu Mavɔmavɔ, Mawu mitɔn ná dó dɔkun nú mɛ ɖokpó ɖokpó gbɔn é wɛ mi ná kpɔ́n.

¹⁶ Nǔ ɖokpó ká tíin, mi ná ɖu kanlin ɔ́ sín hun ǎ, mi ná zé kɔn nyi kɔ́ mɛ sin ɖɔhun.

¹⁷ “Nǔ e nyí Mawu tɔn bɔ mi ɖó ná ná ɛ lɛ́ɛ ɔ́, mi ma sɔ́ ɖó xwé gbe bó ɖu ó; yě wɛ nyí: mǎɖówǒ blěe mitɔn tɔn, mǎɖówǒ vɛ̌ɛn mitɔn tɔn, mǎɖówǒ ami mitɔn tɔn, nukɔngbéví nyibú mitɔn lɛ́ɛ tɔn, kpó gbɔ̌ mitɔn lɛ́ɛ tɔn kpó; nǔ e mi ɖésú jló bó ná lɛ́ɛ, kpó nǔ e mi ná dó ɖe akpá e mi dó nú Mawu Mavɔmavɔ lɛ́ɛ ná é kpó.

¹⁸ Mawu Mavɔmavɔ, Mawu mitɔn xwé jɛ́n mi kpó vǐ mitɔn súnnu kpó nyɔ̌nu kpó, mɛsɛntɔ́ mitɔn súnnu kpó nyɔ̌nu kpó kpódó Levíi ví e ɖo toxo mitɔn lɛ́ɛ mɛ lɛ́ɛ kpó ná ɖu nǔ énɛ́ lɛ́ɛ ɖe, ɖo Mawu Mavɔmavɔ nukɔn. Nǔ e ɖo mi sí lɛ́ɛ bǐ ná dó xomɛhunhun nú mi.

¹⁹ Ényí mi kpo ɖo gbɛ ɖo to mitɔn mɛ jɛ́n wɛ hǔn, mi ma dó vɛ̌ nú Levíi ví lɛ́ɛ gbeɖé ó.

²⁰ “Hwenu e Mawu Mavɔmavɔ, Mawu mitɔn ná gbló ada nú dogbó mitɔn lɛ́ɛ lě e é ɖɔ gbɔn nú mi ɔ́, ényí lan jló mi hwenɛ́nu ɔ́, mi ná ɖu lě e é jló mi gbɔn é.

²¹ É ká nyí fí e mi ɖe ɔ́ lín dó fí e Mawu Mavɔmavɔ, Mawu mitɔn ná sɔ́, bó ná ɖe susu tɔn xlɛ́ ɖe ɔ́, mi sixú kpɔ́n nyibú mitɔn lɛ́ɛ, abǐ gbɔ̌ mitɔn lɛ́ɛ e Mawu Mavɔmavɔ ná mi é mɛ, bó hu kanlin ɖokpó, lobo ɖu lan tɔn lě e é jló mi gbɔn é. Mi ká bló lě e un ɖɔ gbɔn nú mi é.

²² Mi ɖo mǐmɛ́ jí oo, mi ma ɖo mǐmɛ́ jí oo, mi hɛn ɔ́, mi ná ɖu lan ɔ́ agbanlín abǐ hwǐn lan wɛ ɖɔhun.

²³ Amɔ̌, nǔ e ɖ'é mɛ ɔ́, mi ma ɖu hun ɔ́ gbeɖé ó, ɖó hun ɔ́ mɛ wɛ gbɛ ɖe. Mi ma ɖu lan ɔ́ kpó gbɛ ɔ́ kpó ó.

²⁴ Lo ɔ́, mi ná kɔn hun ɔ́ nyi kɔ́ mɛ sin ɖɔhun.

²⁵ Mi wa nǔ gbɔn mɔ̌ ɔ́, mi kpó vǐ mitɔn lɛ́ɛ kpó ná mɔ nyɔ̌ná, ɖó mi wa nǔ e nyɔ́ Mawu Mavɔmavɔ nukún mɛ é.

²⁶ “Amɔ̌, kanlin e mi sɔ́ ɖó vo nú Mawu Mavɔmavɔ lɛ́ɛ abǐ kanlin e mi sɔ́ bó ná dó ɖe akpá e mi dó lɛ́ɛ ná ɔ́, kanlin énɛ́ lɛ́ɛ ɔ́, mi ná hɛn wá fí e Mawu Mavɔmavɔ na sɔ́ bó ná ɖe susu tɔn xlɛ́ ɖe é.

²⁷ Ényí vɔ̌ e è nɔ dó zo ɔ́ wɛ ɔ́, lan ɔ́ kpó hun tɔn kpó bǐ wɛ ná yi vɔ̌sákpe Mawu Mavɔmavɔ, Mawu mitɔn tɔn jí. É ká nyí kɔnɖókpɔ́ vɔ́ wɛ ɔ́, mi ná kɔn hun ɔ́ dó vɔ̌sákpe ɔ́ jí bó ná ɖu lan ɔ́.

²⁸ “Mi ɖó ayi te bó bló nǔ e ɖɔ nú mi wɛ un ɖe lɛ́ɛ; énɛ́ ɔ́, nǔ ná nyɔ́ nú mi kpó vǐ mitɔn lɛ́ɛ kpó hwebǐnu, ɖó mi wa nǔ e nyɔ́ bó sɔgbe Mawu Mavɔmavɔ, Mawu mitɔn nukún mɛ é.”

Mi cɔ́ miɖée dó vodún Kanáanu lɛ́ɛ tɔn wú

²⁹ Mawu Mavɔmavɔ, Mawu mitɔn ná vívá kún nú akɔta e ɖo to e mɛ ná byɔ́ wɛ mi ɖe lɛ́ɛ bǐ ɖo nukɔn mitɔn, bɔ mi ná bɛ́ nǔ yětɔn lɛ́ɛ bǐ, bó ná nɔ to yětɔn mɛ.

³⁰ Ée Mawu Mavɔmavɔ ka ná vívá kún yětɔn ɖo nukɔn mitɔn ɔ́, mi cɔ́ miɖée, bó má wa nǔ yě ɖɔhun, bó sɔ́ mɔ ó. Mi ma ɖó kɔ nǔmɛsɛn yětɔn lɛ́ɛ wú ó, mi ma ɖo do ba nú lě e yě nɔ́ sɛn vodún yětɔn gbɔn ɔ́ wɛ, lobo jɛ walɔ yětɔn lɛ́ɛ zán jí ó.

³¹ Mi ma zé walɔ yětɔn dó sɛn Mawu Mavɔmavɔ, Mawu mitɔn ná ó, ɖó akɔta énɛ́ lɛ́ɛ nɔ ɖo nǔ e Mawu Mavɔmavɔ gbɛ́ wǎn ná, bɔ é nyí nǔvɛ́mɔ n'i lɛ́ɛ kɛ́ɖɛ́ bló nú vodún yětɔn lɛ́ɛ wɛ káká bó nɔ́ dó vǐ yětɔn súnnu zo, bó nɔ́ dó, vǐ yětɔn nyɔ̌nu zo nú vodún yětɔn lɛ́ɛ.