Sɛ́nflínmɛ 10 - MAWUXÓWÉMA

Mawu sɔ́ hwɛ kɛ Izlayɛ́li ví lɛ́ɛ

¹ Mɔyízi ɖɔ: “Énɛ́ ɔ́ gúdo ɔ́, Mawu Mavɔmavɔ ɖɔ nú mì ɖɔ: ‘Kpa awǐnnyatɛ we nukɔntɔn lɛ́ɛ ɖɔhun, bó zé atín dó bló gbǎ ɖokpó ná. A blǒ bǐ ɔ́, a nǎ wá gɔ̌n ce ɖo só ɔ́ jí.

² Énɛ́ ɔ́, xó e ɖo awǐnnyatɛ e a hɛn gba lɛ́ɛ jí ɔ́, un ná lɛ́ wlán dó awǐnnyatɛ e a nǎ kpa lɛ́ɛ jí, bɔ a nǎ zé dó gbǎ ɔ́ mɛ.’

³ Ée Mawu Mavɔmavɔ ɖɔ mɔ̌ ɔ́, un zé kasyatín dó bló gbǎ ɔ́ ná, lobo kpa awǐnnyatɛ we, nukɔntɔn lɛ́ɛ ɖɔhun, bó bɛ́ awǐnnyatɛ lɛ́ɛ yi só ɔ́ jí.

⁴ Mawu Mavɔmavɔ wlán xó e é wlán dó awǐnnyatɛ nukɔntɔn lɛ́ɛ jí lɛ́ɛ dó awǐnnyatɛ yɔ̌yɔ́ lɛ́ɛ jí. Sɛ́n wǒ e Mawu Mavɔmavɔ nɔ myɔ tɛ́ntin, bó ná mi gbe e gbe mi kplé ɖo só ɔ́ kpá é wɛ Mawu Mavɔmavɔ lɛ́ wlán, lobo zé nú mì.

⁵ Énɛ́ ɔ́, un jɛ te sín só ɔ́ jí bó wá bɛ́ awǐnnyatɛ lɛ́ɛ dó gbǎ e un bló é mɛ. Yě nɔ gbǎ ɔ́ mɛ lě e Mawu Mavɔmavɔ ɖɔ gbɔn nú mì é.

⁶ “Izlayɛ́li ví lɛ́ɛ gosín sɛ́tɔ e ɖo Benɛ-Yakáni lɛ́ɛ kɔn, bó yi Mɔsela. Mɔsela fínɛ́ wɛ Aalɔ́ɔn kú bɔ è ɖi i dó. Vǐ tɔn Eleazáa jɛ do tɔn mɛ bó nɔ wa vɔ̌sánú-xwlémawutɔ́zɔ́.

⁷ Yě gosín Mɔsela bó yi Gudigoda, bó gosín Gudigoda bó yi Yotivata. Tɔsisa gěgé ɖo to énɛ́ mɛ.

⁸ Hwenɛ́nu ɔ́, Mawu Mavɔmavɔ ɖe akɔta Levíi tɔn ɔ́ ɖó vo, bó zé azɔ̌ élɔ́ lɛ́ɛ dó así nú yě: yě ná nɔ hɛn akɔjijɛgbá Mawu Mavɔmavɔ tɔn, yě ná nɔ́ ɖo xwé gbe bó ná nɔ ɖo azɔ̌ tɔn wa wɛ hwebǐnu, yě ná nɔ́ xo ɖɛ dó mɛ jí, ɖo Mawu Mavɔmavɔ sín nyǐkɔ mɛ. Yě wɛ kpo ɖo azɔ̌ énɛ́ lɛ́ɛ wa wɛ káká jɛ égbé.

⁹ Énɛ́ wɛ zɔ́n bɔ akɔta énɛ́ má ɖó ayǐkúngban ɖěbǔ ɖo akɔta ɖě lɛ́ɛ mɛ ǎ. Nǔ e yě ɖó acɛ ná ɔ́ wɛ nyí ɖɔ yě ná sɛn Mavɔmavɔ. Nǔ e Mawu Mavɔmavɔ, Mawu mitɔn ɖɔ nú yě ɔ́ nɛ́.

¹⁰ “Un bló zǎn kanɖé (40), kéze kanɖé (40), ɖo só ɔ́ jí lě e un bló gbɔn wá yi é, bɔ Mawu Mavɔmavɔ lɛ́ yí gbe nú ɖɛ ce bó sɔ́ vívá kún mitɔn ǎ.

¹¹ Mawu Mavɔmavɔ ɖɔ nú mì ɖɔ: ‘Din ɔ́, sɔ́ nǔ, bó nɔ togun ɔ́ nu, bónú mi jɛ ali; yě ní yi byɔ́ to e nyɛ Mawu Mavɔmavɔ zin alɔ dó akɔ́n ɖɔ un ná ná tɔ́gbó yětɔn lɛ́ɛ ɔ́ mɛ, bónú é ná nyí yětɔn.’ ”

Sɛ́n e ɖɔ xó dó wǎn yíyí kpó tónú sise kpó wú é

¹² Mɔyízi ɖɔ: “Izlayɛ́li ví lɛ́ɛ mi, étɛ́ ba wɛ Mawu Mavɔmavɔ, Mawu mitɔn ɖe ɖo mi gɔ́n? É jló ɖɔ mi ní nɔ sí émí, bó wa jlǒ émítɔn, bó yí wǎn nú émí, bó sɛn émí kpó ayi mitɔn bǐ kpó, kpódó lǐndɔ̌n mitɔn bǐ kpó.

¹³ É jló ɖɔ mi ní xwedó gbetakɛ́n émítɔn e un ná mi égbé din lɛ́ɛ, bó xwedó sɛ́n émítɔn e un ná mi égbé din lɛ́ɛ; énɛ́ ɔ́, é ná nyí ɖagbe nú mi.

¹⁴ Mawu Mavɔmavɔ, Mawu mitɔn wɛ ɖó jǐnukúnsin káká yi fí e é kponu ɖó é, bó ɖó ayǐkúngban kpó nǔ e ɖ'é jí lɛ́ɛ bǐ kpó.

¹⁵ Đ'ayǐ xóxó ɔ́, tɔ́gbó mitɔn lɛ́ɛ kɛ́ɖɛ́ wɛ Mawu Mavɔmavɔ nɔ́ nɔ kpɔ́ xá; yě wɛ é yí wǎn ná. Égbé din ɔ́, mi vǐ yětɔn lɛ́ɛ wɛ é sɔ́ ɖo akɔta lɛ́ɛ bǐ mɛ, lě e mɔ gbɔn wɛ mi ɖe é.

¹⁶ Mi bo jó miɖée dó bǐ nú Mawu Mavɔmavɔ, Mawu mitɔn, bó má sɔ́ tlí tó ɖě ó.

¹⁷ È ka ná ɖɔ ɔ́, Mawu Mavɔmavɔ, Mawu mitɔn ɔ́, é ɖokpónɔ wɛ nyí Mawu; é wɛ nyí Aklúnɔ aklúnɔ lɛ́ɛ tɔn; Mawu ɖaxó wɛ, lobo dó xɛsi. É nɔ́ nɔ awo mɛ nú mɛ ɖěbǔ ǎ; é ká nɔ́ yí ajɔ ɖo mɛ ɖěbǔ sí ǎ.

¹⁸ É nɔ́ jɛ ahwan tɔ́cyɔvǐ lɛ́ɛ kpó asúkúsi lɛ́ɛ kpó jí; é nɔ́ ná nǔɖuɖu kpó avɔ kpó to ɖěvo mɛ nu e ɖo mi gɔ́n lɛ́ɛ.

¹⁹ Hǔn mi lɔmɔ̌ ní yí wǎn nú to ɖěvo mɛ nu e ɖo mi mɛ lɛ́ɛ, bó ká nɔ́ flín ɖɔ émí lɔmɔ̌ kó nyí jǒnɔ ɖo Ejípu tomɛ kpɔ́n.

²⁰ “Mi ní ɖó sísí nú Mawu Mavɔmavɔ, Mawu mitɔn; mi nɔ sɛn ɛ; é ɖokpónɔ géé wú wɛ mi ná ɖó kan dó bó ná nɔ sɛn; é ɖokpónɔ sín nyǐkɔ wɛ mi ná nɔ́ xwlé.

²¹ É wɛ mi ná nɔ́ kpa susu ná; é wɛ nyí Mawu ɖokpó e mi ɖó é; é wɛ wa nǔ ɖaxó ɖaxó lɛ́ɛ, nǔ e dó xɛsi lɛ́ɛ bɔ mi mɔ.”

²² Tɔ́gbó mitɔn e yi Ejípu lɛ́ɛ sɔ́ hú kanɖé gban (70) ǎ. Égbé din ɔ́, Mawu Mavɔmavɔ, Mawu mitɔn bló bɔ mi sukpɔ́ winnini sunví e ɖo jǐxwé lɛ́ɛ ɖɔhun.