Hlɔ̌manu 9 - MAWUXÓWÉMA

Mawu kpó togun tɔn Izlayɛ́li kpó

¹ Nǔgbó ɖɔ wɛ un ɖe, ɖo bǔ e un ɖe xá Klísu ɔ́ mɛ; un nɔ ɖó adingban ǎ. Ayixa ce ɖe kúnnu nú mì gbɔn Yɛsinsɛn jí ɖɔ nǔgbó ɖɔ wɛ un ɖe.

² Un ɖo aluwɛ ɖaxó mɛ; un ɖo wǔvɛ́ mɔ wɛ hwebǐnu ɖo ayi mɛ.

³ Nyɛ ɖésúnɔ ɔ́, un jló ɖɔ Mawu ní dó nu mì, bó ɖe mì ɖó zɔ nú Klísu, nú ɖagbe nɔví ce lɛ́ɛ tɔn; yě mɛ e nyí akɔta ce lɛ́ɛ é.

⁴ Yě wɛ nyí Izlayɛ́li ví lɛ́ɛ. Mawu sɔ́ yě dó ɖó vǐ; é ná kpɔ́nɔxámɛ tɔn susunɔ ɔ́ yě; é jɛ akɔ xá yě; é ná sɛ́n yě, é ɖɔ lě e è nǎ sɛn ɛ gbɔn ɔ́ nú yě; é dó akpá tɔn lɛ́ɛ nú yě.

⁵ Tɔ́gbó mitɔn lɛ́ɛ sín vǐ wɛ yě nyí , bɔ Klísu ɔ́, ɖo gbɛtɔ́ nyínyí tɔn sín alixo ɔ́, akɔta yětɔn mɛ wɛ é jɔ ɖe. Susu nú Mawu e ɖo axɔ́sú ɖu ɖo mǐ bǐ nu wɛ káká sɔ́yi é. Amǐ!

⁶ Ényí akpá e Mawu dó ɔ́ gɔn azɔ̌ wa ɖɔ wɛ un ɖe ǎ. Đó é nyí mɛ e Izlayɛ́li ji lɛ́ɛ bǐ wɛ nyí togun Izlayɛ́li tɔn nǔgbó ɔ́ ǎ.

⁷ Mɔ̌ ɖokpó ɔ́, vǐ e Ablaxámu ji lɛ́ɛ bǐ wɛ nyí vǐ titewungbe n'i ǎ; ɖó Mawu ɖɔ nú Ablaxámu ɖɔ: “Izáki jí wɛ a nǎ ɖó vǐ e sín akpá un dó nú we lɛ́ɛ gbɔn.”

⁸ É ɖo nyǐnyí wɛ ɖɔ é kún nyí vǐ e Ablaxámu ji lɛ́ɛ bǐ wɛ nyí Mawu ví ó; lo ɔ́, vǐ e sín akpá Mawu dó bɔ è ji lɛ́ɛ wɛ Mawu nɔ mɔ dó mɔ vǐ nǔgbó nǔgbó.

⁹ Đó Mawu dó akpá, bó ɖɔ: “Ényí hwenu e un ɖó ɔ́ su ɔ́, un ná lɛ́ wá, bɔ Sala ná ɖó vǐ súnnu ɖokpó.”

¹⁰ Bǐ ká kó nɛ́ ǎ. Hlebeka ví we lɛ́ɛ ɔ́, tɔ́ ɖokpó ɔ́ wɛ ji yě; é wɛ nyí tɔ́gbó mǐtɔn Izáki.

^11-12 Amɔ̌, Mawu ɖó tito tɔn, bó ná dó cyán gbɛtɔ́ lɛ́ɛ ná: é ɖésú wɛ nɔ́ jló bó nɔ́ cyán mɛ; é nyí nǔwiwa mɛtɔn wɛ é nɔ́ kpɔ́n ǎ. Bó ná dó ɖe xlɛ́ ɖɔ émí ɖo gbejí nú tito énɛ́ ɔ́, é ɖɔ nú Hlebeka ɖɔ: “Vǐ súnnu mɛxó ɔ́ ná nɔ yɔkpɔ́vú ɔ́ sín acɛ mɛ;” có é ká kó ji vǐ énɛ́ lɛ́ɛ hwenɛ́nu ǎ; hǔn yě kó wa nǔ ɖagbe abǐ nǔ nyanya ɖěbǔ hwenɛ́nu ǎ.

¹³ Lě e Mawuxówéma ɔ́ ɖɔ gbɔn ɔ́: “Un yí wǎn nú Jakɔ́bu; lo ɔ́, un gbɛ́ wǎn nú Esawu.”

¹⁴ Étɛ́ mǐ ka ná ɖɔ lo? Mawu ɔ́, hwɛ agɔdótɔ́ wɛ é nyí a? Gbeɖé kpɔ́n.

¹⁵ Đó é ɖɔ nú Mɔyízi ɖɔ: “Un ná kú nǔbláwǔ nú mɛ e un jló ná kú nǔbláwǔ na é, bó ná nyɔ́ xomɛ dó mɛ e wú un jló na nyɔ́ xomɛ dó é.”

¹⁶ Hǔn, é nyí jló gbɛtɔ́ tɔn wɛ na zɔ́n bɔ Mawu ná kú nǔbláwǔ nú mɛ abǐ é ná nyɔ́ xomɛ dó mɛ wú ǎ; é ka nyí gǎndídó gbɛtɔ́ tɔn lɛ́ɛ wú wɛ ǎ. Lo ɔ́, Mawu e nɔ kú nǔbláwǔ nú mɛ ɔ́ wɛ.

¹⁷ Mawu ɖɔ nú axɔ́sú Ejípu tɔn ɖo Mawuxówéma ɔ́ mɛ ɖɔ: “Nǔ e wú un sɔ́ we axɔ́sú tawun lɛ́ɛ wɛ nyí ɖɔ un ná ɖe hlɔ̌nhlɔ́n ce xlɛ́ gbɔn jǐ towe; un sɔ́ we axɔ́sú, bónú nyǐkɔ ce ná gba kpé ayǐkúngban ɔ́ bǐ jǐ.”

¹⁸ Énɛ́ ɔ́, Mawu nɔ kú nǔbláwǔ nú mɛ e jló e ɔ́, bó nɔ bló bɔ mɛ e é jló ɖɔ é ní tlí tó ɔ́ nɔ húzú tótlítɔ́.

Xomɛsin Mawu tɔn kpó nǔbláwǔkúnúmɛ tɔn kpó

¹⁹ Afɔ nyɔ́ ɔ́, è nǎ kanbyɔ́ mǐ ɖɔ: “Ényí nǔ ɖo mɔ̌ ɔ́, ani sín hwɛ dó gbɛtɔ́ lɛ́ɛ wɛ Mawu ka lɛ́ ɖe? Đó mɛ ɖěbǔ sixú nɔ te ɖo jlǒ tɔn nukɔn ǎ.”

²⁰ Hwi gbɛtɔ́ ɔ́, ani a ka nyí, bó ná dɔn nǔ xá Mawu? Kozɛ́n sixú kanbyɔ́ mɛ e bló é ɔ́ ɖɔ nɛ̌ ká gbɔn bɔ é bló émí gbɔn lě ají a?

²¹ Zɛ̌nmɛtɔ́ sixú zé ko dó wa nǔ e jló é ná: ko ɖokpó e é nya ɔ́, é sixú zé dó mɛ zɛ̌n e è nɔ zán nú nǔjɔnǔ é; é ka sixú lɛ́ zé dó mɛ zɛ̌n e è nɔ zán nú nǔ yǎyá é.

²² Étɛ́ è ka ná ɖɔ dó Mawu wǔ? É jló ná ɖe xomɛsin tɔn xlɛ́, bó ná bló bɔ è nǎ tunwun hlɔ̌nhlɔ́n tɔn. Énɛ́ ɔ́, gbɛtɔ́ e cí zɛ̌n e è nɔ zán nú nǔ yǎyá lɛ́ɛ ɖɔhun bɔ Mawu ɖó ná sin xomɛ dó, bó ɖo gbesisɔ mɛ, bó ná sú kún yětɔn dó lɛ́ɛ ɔ́, é ɖó sɔxwixwe ɖaxó, bó yí gbe bɔ yě nɔ kɔ jí n'i.

²³ É jló ná ɖe lě e susu tɔn ma ɖó dogbó ǎ gbɔn ɔ́ xlɛ́ mǐ mɛ e cí zɛ̌n e è nɔ zán nú nǔjɔnǔ lɛ́ɛ ɖɔhun bɔ é kú nǔbláwǔ ná lɛ́ɛ é; mǐ mɛ e é kó blóɖó ɖ'ayǐ, bɔ mǐ ná mɔ susu tɔn yí lɛ́ɛ.

²⁴ Đó mǐdɛɛ lɛ́ɛ wɛ nyí mɛ e é ylɔ́ lɛ́ɛ; é ka nyí mɛ e é ylɔ́ sín Jwifu lɛ́ɛ mɛ lɛ́ɛ kɛ́ɖɛ́ wɛ ǎ, lo ɔ́, mɛ e é ylɔ́ sín togun ɖě lɛ́ɛ mɛ lɛ́ɛ lɔ ɖ'é mɛ.

²⁵ Nǔ énɛ́ wɛ Mawu ɖɔ ɖo Ozée sín wěma mɛ; Mawu ɖɔ: “Un ná ylɔ́ togun e ma nyí togun ce ɖ'ayǐ ǎ lɛ́ɛ ɖɔ togun ce; un ná ylɔ́ akɔta e un ma yí wǎn ná ɖ'ayǐ ǎ ɖɔ wǎnyínámɔ ce vívɛ́ná.

²⁶ Fí e è ko ɖɔ nú yě ɖɔ: ‘Mi nyí togun ce ǎ’ ɖe ɔ́, fí énɛ́ ɖokpó ɔ́ wɛ è nǎ lɛ́ ylɔ́ yě ɖɔ Mawu gbɛɖe ɔ́ sín vǐ ɖe.”

²⁷ Ezayíi ɔ́, éyɛ́ sú xó, bó ɖɔ dó Izlayɛ́li togun ɔ́ wú ɖɔ: “Ényí Izlayɛ́li ví na bo sukpɔ́ sɔ nyɛ̌kɛ́n e ɖo xutó ɔ́, mɛ kpɛɖé jɛ́n ná kpo ɖo yě mɛ bó ná mɔ hwlɛngán.

²⁸ Hwɛ e Aklúnɔ ná ɖɔ xá mɛ e ɖo ayǐkúngban jí lɛ́ɛ ɔ́, hwɛɖónúmɛ e ɖ'é mɛ ɔ́, é ná dɔn tó tɔn nú yě hawun, kpó hlɔ̌nhlɔ́n kpó.”

²⁹ Bɔ lě e Ezayíi ɖokpó énɛ́ ɔ́ kó ɖɔ gbɔn ɖ'ayǐ ɖɔ: “Ényí Aklúnɔ Nǔbǐwúkpétɔ́ ɔ́ ma ko jó vǐ mǐtɔn ɖě lɛ́ɛ dó nú mǐ ǎ ɔ́, mǐ ná kó cí Sodɔ́mu ɖɔhun, bó ná kó cí Gomɔ́ɔ ɖɔhun.”

Wɛn Ɖagbe ɔ́ nyí Izlayɛ́li ví lɛ́ɛ lɔmɔ̌ tɔn

³⁰ Étɛ́ mǐ ná ɖɔ lo? Mǐ ná ɖɔ mɛ e ma nyí Jwifu ǎ, bó ma ka ba na nyí hwɛjijɔnɔ ɖo Mawu nukɔn ǎ lɛ́ɛ ɔ́, Mawu sɔ́ yě dó húzú hwɛjijɔnɔ gbɔn nǔɖiɖi gbla mɛ.

³¹ Lo ɔ́, togun Izlayɛ́li tɔn e ka ɖo sɛ́n lɛ́ɛ bǐ ba ná nyi wɛ pɛ́pɛ́pɛ́, bó ná nyí hwɛjijɔnɔ ɖo Mawu nukɔn lɛ́ɛ ɔ́, nǔ e wú sɛ́n ɔ́ tíin ɔ́, yě kpé wú bó wa ǎ.

³² Aniwú yě ma ka kpé wú ǎ? Yě kpé wú ǎ, ɖó yě ba ná sɔ́ jiɖiɖe yětɔn dó Mawu wú ǎ; yě vɛdó ɖɔ émí ná nyí hwɛjijɔnɔ ɖo Mawu nukɔn gbɔn nǔwiwa émítɔn lɛ́ɛ gbla mɛ wɛ sín. Yě klɛ́n afɔ dó awǐnnya e wú è nɔ klɛ́n afɔ dó é wú.

³³ Awǐnnya énɛ́ xó wɛ Mawuxówéma ɔ́ ɖɔ bó ɖɔ: “Éɖíe! Un dó awǐnnya e wú è nɔ klɛ́n afɔ dó, bó nɔ fún sa é ɖokpó do nyi Sinyɔ́ɔ; awǐnnya ɖé wɛ bó nɔ́ zin mɛ dɛ́; amɔ̌ mɛ e ɖi nǔ n'i ɔ́ ná ɖu winnyá ǎ.”