Hlɔ̌manu 8 - MAWUXÓWÉMA

È ní zán gbɛ lě e Yɛsinsɛn jló gbɔn é

¹ Hǔn din ɔ́, hwɛɖónúmɛ sɔ́ ɖe nú mɛ e ɖo bǔ xá Klísu Jezu lɛ́ɛ ǎ.

² Đó Yɛsinsɛn e nɔ na gbɛ mɛ, ɖo bǔ e è ɖe xá Klísu Jezu ɔ́ mɛ ɔ́ sín sɛ́n hwlɛ́n mì ɖo sɛ́n e nɔ ɖe hwɛhuhu kpódó kú kpó xlɛ́ mì ɔ́ sí.

³ Nǔ e Mɔyízisɛ́n ɔ́ ma kpé wú bó bló ǎ ɖó hwɛhuhu sín ninɔmɛ e gbɛtɔ́ ɖó ɔ́ zɔ́n bɔ é vɔ́da wútu ɔ́, Mawu bló: é sɛ́ Vǐ é ɖésúnɔ tɔn dó, ɖó hwɛhuhu ɔ́ wútu, bɔ é zɔn agbaza mɛ wá; agbaza e mɛ é zɔn wá ɔ́ cí hwɛhuhu sín agbaza e gbɛtɔ́ ɖó é ɖɔhun. Mawu bló mɔ̌, bó dó ɖó hwɛ nú hwɛhuhu ɖo gbɛtɔ́ sín agbaza mɛ.

⁴ Mawu bló nǔ énɛ́ ɔ́, bónú nǔ e sɛ́n ɔ́ ɖɔ è ɖǒ na wa ɔ́, ní nyí wiwa ɖo mǐ mɛ; mǐ mɛ e ma sɔ́ nɔ zán gbɛ mǐtɔn lě e hwɛhuhu sín ninɔmɛ e mǐ ɖó ɔ́ jló gbɔn ɔ́ ǎ, bó nɔ zán lě e Yɛsinsɛn jló gbɔn é.

⁵ Nǔgbó ɔ́, mɛ e nɔ zán gbɛ lě e hwɛhuhu sín ninɔmɛ e mǐ ɖó ɔ́ jló gbɔn lɛ́ɛ ɔ́, ninɔmɛ hwɛhuhu tɔn sín nǔ lɛ́ɛ jí wɛ ayixa yětɔn nɔ́ nɔ; lo ɔ́, mɛ e nɔ zán gbɛ lě e Yɛsinsɛn jló gbɔn lɛ́ɛ ɔ́, Yɛsinsɛn sín nǔ lɛ́ɛ jí wɛ ayixa yětɔn nɔ́ nɔ.

⁶ Ényí ayixa mɛtɔn ɖo hwɛhuhu sín nǔ lɛ́ɛ jí ɔ́, kú wɛ é nɔ kplá mɛ yi; ayixa mɛtɔn ka ɖo Yɛsinsɛn sín nǔ lɛ́ɛ jí ɔ́, é nɔ kplá mɛ bɔ è nɔ mɔ gbɛ, bó nɔ mɔ fífá.

⁷ Mɛ e jí ninɔmɛ hwɛhuhu tɔn sín nǔ lɛ́ɛ nɔ ɖu gǎn ɖe lɛ́ɛ ɔ́, kɛntɔ́ Mawu tɔn wɛ yě nyǐ; ɖó yě nɔ yí gbe bó nɔ́ nɔ Mawusɛ́n ɔ́ sín acɛ mɛ ǎ; yě ka sixú kpé wú lɔ ǎ.

⁸ Yě mɛ e ɖo hwɛhuhu sín ninɔmɛ e yě ɖǒ ɔ́ sín acɛ mɛ lɛ́ɛ sixú wa nǔ bɔ é ná hun xomɛ nú Mawu ǎ.

⁹ Amɔ̌, midɛɛ lɛ́ɛ ɔ́, mi sɔ́ nɔ zán gbɛ mitɔn lě e hwɛhuhu sín ninɔmɛ e mi ɖó ɔ́ zɔ́n gbɔn é ǎ; lě e Yɛsinsɛn jló gbɔn ɔ́ wɛ mi nɔ zán gbɛ mitɔn gbɔn; ényí Yɛ Mawu tɔn ɖo mi mɛ nǔgbó ɔ́ nɛ́. Mɛ ɖé ma ɖó Yɛ Klísu tɔn ǎ ɔ́, mɛ ɔ́ nyí Klísu tɔn ǎ.

¹⁰ Ényí Klísu ɖo mi mɛ ɔ́, agbaza mitɔn ɖo te nú kú, ɖó hwɛhuhu wútu; có Yɛ ɔ́ nyí gbɛ ɖo mi mɛ ɖó Mawu zé mi dó húzú hwɛjijɔnɔ ná.

¹¹ Ényí Mawu e fɔ́n Jezu sín kú ɔ́ sín Yɛ ɖo mi mɛ ɔ́, mɛ e fɔ́n Klísu Jezu sín kú ɔ́ ná ná gbɛ agbaza mitɔn e ɖo te nú kú ɔ́ lɔmɔ̌ gbɔn Yɛ tɔn e ɖo mi mɛ é jí.

¹² Nɔví lɛ́ɛ mi! Ényí mɔ̌ hǔn, azɔ̌ ɖo te nú mi; é ka nyí hwɛhuhu sín ninɔmɛ e mǐ ɖó ɔ́ na wa azɔ̌ ná wɛ mǐ ɖe, bó ná zán gbɛ mǐtɔn lě e é jló mǐ gbɔn é ǎ.

¹³ Đó ényí mi nɔ zán gbɛ mitɔn lě e hwɛhuhu sín ninɔmɛ e mi ɖo ɔ́ nɔ jló gbɔn ɔ́, mi ná kú. Lo ɔ́, ényí mi gbɔn Yɛsinsɛn jí bó hu walɔ agbaza tɔn lɛ́ɛ ɔ́, mi ná nɔ gbɛ.

¹⁴ Mɛ e Yɛ Mawu tɔn nɔ́ xlɛ́ ali lɛ́ɛ bǐ wɛ nyí Mawu ví.

¹⁵ Đó Yɛ e Mawu na mi ɔ́ nyí, yɛ e na sɔ́ mi dó ɖó kannumɔ, bó ná bló bɔ mi na húzú xɛsinɔ é ǎ. Lo ɔ́, Yɛsinsɛn e sɔ́ mi dó húzú Mawu ví, bó lɛ́ ná acɛ mǐ, bɔ mi nɔ sú xó ylɔ́ Mawu ɖɔ: “Daá ce! Tɔ́ ce vívɛ́ná” ɔ́ wɛ.

¹⁶ Yɛ Mawu tɔn ɖésú ko yí gbe dó nǔ e yɛ mǐtɔn ɖɔ ɔ́ jí ɖɔ mǐ nyǐ Mawu ví.

¹⁷ Ée é nyí ɖɔ vǐ tɔn wɛ mǐ nyí é ɔ́, mǐ ná ɖó mǐmá ɖo ɖagbe e é sɔ́ ɖ'ayǐ nú togun tɔn ɔ́ mɛ, bó ná lɛ́ ɖó ɖagbe énɛ́ xá Klísu. Đó ényí mǐ ji ya xá Klísu ɔ́, mǐ ná lɛ́ ɖó mǐmá ɖo susu tɔn mɛ.

Susu e Mawu ná ɖe xlɛ́ mǐ é

¹⁸ Un mɔ ɖɔ nǔ e ɖo mǐ gbo wɛ ɖo hwenu e mǐ ɖe din ɔ́, è kún sixú jlɛ́ dó susu e Mawu ná wá ɖe xlɛ́ mǐ ɔ́ wú ó.

¹⁹ Nǔ e è blǒ lɛ́ɛ bǐ wɛ ɖo te, bó ɖó jló ɖaxó, bó ná mɔ hwenu e Mawu ná ɖe vǐ tɔn lɛ́ɛ xlɛ́ dó é.

²⁰ Nǔ e è blǒ lɛ́ɛ jɛ nǔ e ma nɔ kplá mɛ yi fí ɖé ǎ ɔ́ sín acɛ mɛ; é ka nyí yě ɖésúnɔ wɛ jló, bó jɛ acɛ tɔn mɛ ǎ; Mawu wɛ sɔ́ yě ɖó acɛ tɔn mɛ; é ɖo mɔ̌ có nukúnɖíɖó ɖé ka tíin.

²¹ Đó è nǎ ɖe yě sín acɛ nǔhɛngblétɔ́ e hɛn yě dó hɛn gantɔ́ ná ɔ́ tɔn mɛ gbe ɖokpó, bɔ yě ná ɖó mǐmá ɖo mɛɖée sí jijɛ susunɔ e Mawu ví lɛ́ɛ ɖó ɔ́ mɛ.

²² Nǔgbó ɔ́, mǐ tunwun ɖɔ káká jɛ din ɔ́, nǔ e è blǒ lɛ́ɛ bǐ wɛ ɖo azɔn wɛn wɛ, bó ɖo wǔvɛ́ mɔ wɛ nyɔ̌nu ɖo ajidonu ɖɔhun.

²³ Lo ɔ́, é nyí nǔ e è blǒ lɛ́ɛ kɛ́ɖɛ́ wɛ ɖo azɔn wɛn wɛ ǎ, mǐ mɛ e ko ɖó Yɛsinsɛn, bɔ é nyí nǔ nukɔntɔn e Mawu ná mǐ, ɖo nǔníná tɔn lɛ́ɛ mɛ ɔ́, mǐ lɔ ɖo azɔn wɛn wɛ ɖo ayi mɛ, lobo ɖo te kpɔ́n ɖɔ Mawu ní ɖe mǐ sín agbaza mǐtɔn mɛ, bó ná ɖɔ mǐ nyí vǐ émítɔn, lobo hwlɛ́n mǐ gan bǐ dégbédégbé.

²⁴ Đó è ko hwlɛ́n mǐ gán; lo ɔ́, mǐ ɖo nukún ɖó wɛ ɖɔ è ní hwlɛ́n mǐ gán bǐ dégbédégbé. Ényí è ɖo nǔ e ɖó nukún wɛ è ɖe ɔ́ mɔ wɛ ɔ́, hǔn é sɔ́ nyí nukúnɖíɖó ǎ; mɛ̌ ka ná lɛ́ kpo ɖo nukún ɖó nǔ e mɔ wɛ é ɖe ɔ́ wɛ?

²⁵ Ényí mǐ ɖo nukún ɖó nǔ e mɔ wɛ mǐ ma ɖe ǎ ɔ́ wɛ ɔ́, mǐ ɖo te kpɔ́n kpódó sɔxwixwe kpó.

²⁶ Mɔ̌ ɖokpó ɔ́, Yɛsinsɛn lɔ nɔ gɔ́ alɔ nú mǐ ɖo gǎnmaɖó mǐtɔn mɛ, ɖó mǐ nyɔ́ ɖɛ xo lě e é jɛ xá gbɔn é ǎ; lo ɔ́, Yɛ ɔ́ ɖésú nɔ xo ɖɛ dó ta mǐtɔn mɛ kpódó azɔnwinwɛn e è ma sixú ɖɔ ǎ é kpó.

²⁷ Bɔ Mawu e nɔ mɔ nukúnnú jɛ ayi mɛ ɔ́ mɔ nukúnnú jɛ nǔ e Yɛsinsɛn jló ná byɔ́ ɔ́ wú, ɖó Yɛ nɔ xo ɖɛ lě e Mawu jló gbɔn ɔ́ nú mɛ e nyí Mawu tɔn lɛ́ɛ é.

²⁸ Mǐ tunwun ɖɔ mɛ e yí wǎn nú Mawu lɛ́ɛ ɔ́, mɛ e é ylɔ́ ɖo tito tɔn mɛ lɛ́ɛ ɔ́, nǔ e nɔ jɛ dó yě jǐ lɛ́ɛ bǐ ɔ́, ɖagbe wɛ é nɔ dó wá nú yě.

²⁹ Đó mɛ e Mawu ko tunwun sín do lɛ́ɛ ɔ́, é lɛ́ ɖɔ ɖ'ayǐ ɖɔ émí na bló bɔ yě ná cí Vǐ émítɔn ɖɔhun, bónú vǐ tɔn ná nyí nukɔn ví ɖo nɔví gěgé tɛ́ntin.

³⁰ Mɛ e Mawu ɖe gbeta énɛ́ tɔ́n ɖ'ayǐ ná lɛ́ɛ ɔ́, é lɛ́ ylɔ́ yě; mɛ e é ylɔ́ lɛ́ɛ ɔ́, é sɔ́ yě dó húzú hwɛjijɔnɔ; mɛ e é sɔ́ dó húzú hwɛjijɔnɔ lɛ́ɛ ɔ́, é lɛ́ bló bɔ yě ɖó mǐmá ɖo susu tɔn mɛ.

Wǎn yíyí Mawu tɔn d'agba

³¹ Đo nǔ énɛ́ lɛ́ɛ bǐ mɛ ɔ́, étɛ́ mǐ ka na lɛ́ ɖɔ? Ényí Mawu ɖo mǐ jí ɔ́, mɛ ɖěbǔ sixú wa nǔ ɖěbǔ nú mǐ ǎ.

³² Éyɛ́ mɛ e ma hwlɛ́n Vǐ é ɖésúnɔ tɔn ǎ, bó sɔ́ ɛ jó dó mǐ bǐ tamɛ ɔ́, nɛ̌ é ma ka ná ná nǔ bǐ mǐ kpó Vǐ tɔn kpó ǎ gbɔn?

³³ Mɛ̌ ka ná dó hwɛ mɛ e Mawu cyán lɛ́ɛ? Mɛ ɖé ɖe ǎ, ɖó Mawu wɛ ɖɔ yě nyǐ hwɛjijɔnɔ.

³⁴ Mɛ̌ ka ná ɖó hwɛ nú yě lo? Mɛ ɖé ɖe ǎ, ɖó Klísu Jezu wɛ nyí mɛ e kú é; nǔ e hú gǎn mɔ̌ ɔ́ wɛ nyí é fɔ́n sín kú, bó ɖo tɛn ɖaxó mɛ ɖo ɖisíxwé nú Mawu, bó ɖo vo sa nú Mawu wɛ dó ta mǐtɔn mɛ.

³⁵ Étɛ́ ka sixú ɖe mǐ ɖó vo nú wǎn yíyí e Klísu ɖó nú mǐ é? Wǔvɛ́mimɔ wɛ a, nukúnmyámɛ wɛ a, yadónúmɛ wɛ a, xovɛ́ wɛ a, avɔvúnmɛ wɛ a, afɔkú wɛ a, kúdán wɛ a?

³⁶ Lě e Mawuxówéma ɔ́ ɖɔ gbɔn ɔ́: “Hwi wú wɛ è nɔ ɖo mǐ hu wɛ ayǐhɔ́ngbe ayǐhɔ́ngbe; è kplá mǐ lɛ̌ngbɔ́ e è kplá xwe lanhutɛn é ɖɔhun.”

³⁷ Lo ɔ́, nǔ énɛ́ lɛ́ɛ bǐ ɖo jijɛ wɛ, có Klísu e yí wǎn nú mǐ ɔ́ dó alɔ mǐ, bɔ mǐ ɖó ɖuɖéjí bǐ gbídígbídí.

³⁸ Đó un ɖeji ɖɔ nǔ ɖěbǔ kún sixú ɖe mǐ ɖó vo nú wǎn yíyí tɔn ó: mǐ ɖo gbɛ oo, mǐ ɖo kú oo, nǔ ɖěbǔ sixú ɖe mǐ ɖó vo nú wǎn yíyí tɔn ǎ; wɛnsagun lɛ́ɛ, acɛkpikpa lɛ́ɛ, kpódó hlɔ̌nhlɔ́n e ɖo jǐxwé lɛ́ɛ ɖěbǔ kpó sixú ɖe mǐ ɖó vo nú wǎn yíyí tɔn ǎ; mɔ̌ jɛ́n nǔ e ɖo jijɛ wɛ égbé lɛ́ɛ, kpódó éé ná wá jɛ sɔ lɛ́ɛ é kpán ma sixú ɖe mǐ ɖó vo nú wǎn yíyí tɔn ǎ é nɛ́.

³⁹ Nǔ e ɖo hwe glɔ́ lɛ́ɛ kpó nǔ e ɖo ayǐkúngban glɔ́ lɛ́ɛ é kpó, kpódó nǔ ɖěvo e è blǒ é ɖěbǔ kpán sixú ɖe mǐ ɖó vo nú wǎn yíyí e Mawu ɖe xlɛ́ mǐ gbɔn Aklúnɔ mǐtɔn Klísu Jezu jí é ǎ.