Hlɔ̌manu 7 - MAWUXÓWÉMA

Klísusɛntɔ́ e ma sɔ́ ɖo sɛ́n ɔ́ sín acɛ mɛ ǎ ɔ́ nɔ sɛn Mawu kpó walɔ yɔ̌yɔ́ kpó

¹ Nɔví lɛ́ɛ mi, nǔ e ná ɖɔ nú mi wɛ un ɖe ɔ́, mi ko tunwun, ɖó mi tunwun sɛ́n ɔ́. Hwenu e gbɛtɔ́ ɖo gbɛ ɔ́ jɛ́n sɛ́n ɔ́ nɔ kpa acɛ n'i.

² Nǔ e wú è nǎ kpɔ́n dó ɔ́ ɖíe: nyɔ̌nu e ɖo asúxwé ɔ́, sɛ́n ɔ́ cá ɛ dó asú tɔn wú, káká yi jɛ hwenu e asú tɔn ná nɔ gbɛ xɔ é bǐ; lo ɔ́, ényí asú ɔ́ kú ɔ́, nyɔ̌nu ɔ́ gosín sɛ́n e cá ɛ dó asú tɔn wú ɔ́ sín acɛ mɛ.

³ Hǔn ényí nyɔ̌nu énɛ́ jó éɖée dó nú súnnu ɖěvo hwenu e asú tɔn kpo ɖo gbɛ ɔ́, è nǎ ylɔ́ ɛ ɖɔ agalɛtɔ́; lo ɔ́, ényí asú tɔn kú ɔ́, ɖo sɛ́n ɔ́ sín alixo ɔ́, é jɛ éɖée sí, bó hɛn ɔ́, é ná húzú súnnu ɖěvo sín asi; hwe énɛ́ ɔ́ nu ɔ́, è sɔ́ na ylɔ́ ɛ ɖɔ agalɛtɔ́ ǎ.

⁴ Mɔ̌ ɖokpó ɔ́ nɔví ce lɛ́ɛ mi, ɖo sɛ́n ɔ́ sín alixo ɔ́, mi lɔmɔ̌ ɔ́, mi ko kú. Ée mi cá miɖée xá Klísu ɔ́, kú wɛ mi ko kú ɖo sɛ́n ɔ́ sín alixo. Din ɔ́, mɛ ɖěvo tɔn wɛ mi nyí; mɛ e fɔ́n sín kú é tɔn wɛ mi nyí, bónú mǐ ná nɔ́ wa nǔ e nyɔ́ Mawu nukún mɛ é.

⁵ Nǔgbó ɔ́, hwenu e mǐ ɖó hwɛhuhu sín ninɔmɛ ɖ'ayǐ ɔ́, jló nyanya e sɛ́n ɔ́ nɔ dɔn wá lɛ́ɛ nɔ wa azɔ̌ ɖo agbaza mǐtɔn bǐ mɛ, bó nɔ kplá mǐ yi kú.

⁶ Amɔ̌, din ɔ́, è ko ɖe mǐ sín sɛ́n ɔ́ sín acɛ mɛ; mǐ ko kú ɖo sɛ́n énɛ́ e hɛn mǐ dó hɛn gantɔ́ é sín alixo; hǔn din ɔ́, mǐ hɛn ɔ́, mǐ ná zé walɔ yɔ̌yɔ́ ɔ́ dó wa azɔ̌ nú Mawu, ɖo Yɛsinsɛn ɔ́ sín acɛ mɛ; é sɔ́ ná nyí walɔ xóxó e mǐ nɔ dó wa azɔ̌ n'i ɖo sɛ́n e è wlǎn ɔ́ sín acɛ mɛ é ǎ.

Sɛ́n ɔ́ kpódó hwɛhuhu kpán

⁷ Étɛ́ mǐ ka ná ɖɔ lo? Sɛ́n ɔ́ hwɛhuhu wɛ é nyí a? Gbeɖé kpɔ́n! Sɛ́n ɔ́ wɛ zɔ́n bɔ un tunwun nǔ e nyí hwɛhuhu é; ɖó sɛ́n ɔ́ ma ɖɔ: “Nukún towe ní má nɔ nɔzo towe sín nǔɖé wú ó” ǎ ɔ́, un ná tunwun nǔ e nyí mɛɖévonú jlójló é ǎ.

⁸ Ali e sɛ́n ɔ́ ɖe ɔ́ jí wɛ hwɛhuhu gbɔn, bó sɔ́ mɛnújlójló alɔkpa lɛ́ɛ bǐ dó ayi mɛ nú mǐ; ɖó sɛ́n ɔ́ ma tíin ǎ ɔ́, hwɛhuhu ɖó acɛ ɖé ǎ.

⁹ Đ'ayǐ ɔ́, hwenu e sɛ́n ɔ́ ma ɖe ǎ ɔ́, un ɖo gbɛ; amɔ̌, ée sɛ́n ɔ́ wá jɛ nǔ e è ma ɖó ná wa ǎ lɛ́ɛ ɖe tɔ́n jí ɔ́, hwɛhuhu ɔ́ bɛ́ azɔ̌wiwa,

¹⁰ bɔ nyɛ kú: sɛ́n e ɖó ná ná gbɛ mɛ ɔ́, kú wɛ é dɔn mì yi.

¹¹ Đó hwɛhuhu ɔ́ xwedó ali e é mɔ ɔ́, bó flú mì gbɔn sɛ́n ɔ́ jí; é lɛ́ gbɔn sɛ́n ɖokpó énɛ́ jí, bó hu mì.

¹² Hǔn sɛ́n ɔ́, nǔ mímɛ́ wɛ é nyí bɔ nǔ e é nɔ zɔ́n mɛ ɔ́ lɔ nyí nǔ mímɛ́, lobo nyí nǔ jlɔ́jlɔ́, nǔ ɖagbe.

¹³ Nǔ e nyí nǔ ɖagbe ɔ́, nǔ e nɔ́ hu mɛ ɔ́ wɛ é húzú nú nyɛ a? Gbeɖé kpɔ́n! Hwɛhuhu wɛ zɔ́n bɔ un kú; hwɛhuhu ɔ́, ninɔmɛ titewungbe e é ɖó ɔ́ wɛ é ɖe xlɛ́ gbɔn mɔ̌. É sɔ́ nǔ e nyí nǔ ɖagbe ɔ́ ɖó nukɔn, bó dó hu nyɛ ná. Lě e hwɛhuhu ɔ́ gbɔn nǔ e sɛ́n zɔ́n ɔ́ jí, bó húzú hwɛ e nylá ɖésú ɔ́ gbɔn é nɛ́.

Mɛ e ɖo ahwan fun xá hwɛhuhu e ɖo gbɛzán tɔn mɛ wɛ é

¹⁴ Nǔgbó ɔ́, mǐ tunwun ɖɔ sɛ́n ɔ́, Mawu gɔ́n wɛ é gosín; nyɛ ɔ́, un ka ɖó hwɛhuhu sín ninɔmɛ, bɔ è sa mì nú hwɛhuhu.

¹⁵ Đó un nɔ tunwun nǔ e wa wɛ un ɖe ɔ́ ǎ; un nɔ wa nǔ e un jló ná wa ɔ́ ǎ; nǔ e un nɔ gbɛ́ wǎn ná ɔ́ wɛ un nɔ wa.

¹⁶ Ée é nyí ɖɔ nǔ e un ma jló ná wa ǎ ɔ́ wɛ un nɔ wa ɔ́, un mɔ ɖɔ sɛ́n ɔ́, nǔ ɖagbe wɛ é nyí, gbɔn nǔ e un nɔ wa gbɔn mɔ̌ ɔ́ gbla mɛ.

¹⁷ Ényí nǔ cí mɔ̌ ɔ́, hǔn nǔ e wa wɛ un ɖe ɔ́, nyɛ ɖésú wɛ ɖo blǒbló wɛ ǎ; lo ɔ́, hwɛhuhu e ɖo nyɛ mɛ ɔ́ wɛ ɖo nǔ wa gbɔn mɔ̌ wɛ.

¹⁸ Đó un tunwun ɖɔ nǔ ɖagbe wiwa kún ɖo ayixa ce mɛ ó; é wɛ nyí ɖɔ nǔ ɖagbe wiwa ɖo hwɛhuhu sín ninɔmɛ e un ɖó ɔ́ mɛ ǎ; ɖó un jló bó ná wa nǔ ɖagbe; amɔ̌, un ɖó hlɔ̌nhlɔ́n e ná wa é ǎ.

¹⁹ Nǔ ɖagbe e un nɔ jló ná wa ɔ́, un nɔ wa ǎ; lo ɔ́, nǔ nyanya e un ma jló ǎ ɔ́ wɛ un nɔ wa.

²⁰ Ényí un ka nɔ bló nǔ e un ma jló ná wa ǎ ɔ́, hǔn é sɔ́ nyí nyɛ ɖésúnɔ wɛ ɖo nǔ wa gbɔn mɔ̌ wɛ ǎ, lo ɔ́ hwɛhuhu e ɖo ayi ce mɛ ɔ́ wɛ ɖo nǔ wa gbɔn mɔ̌ wɛ.

²¹ Hǔn, nǔ e un wá mɔ ɖo nyɛɖée mɛ ɔ́ ɖíe: un jló na wa ɖagbe hweɖěbǔnu ɔ́, nǔ nyanya kɛ́ɖɛ́ wú jɛ́n un nɔ kpé, bó nɔ wa.

²² Đo linlin ce mɛ ɔ́, Mawusɛ́n ɔ́ wɛ nɔ dó xomɛhunhun nú mì.

²³ Amɔ̌, sɛ́n ɖěvo tíin ɖo agbaza ce mɛ, bó ɖo hun xo xá sɛ́n e ɖo linlin ce mɛ é wɛ, bó sɔ́ mì dó ɖó gantɔ́ nú hwɛhuhu sɛ́n e ɖo agbaza ce mɛ é.

²⁴ Gbɛ ce blá wǔ; mɛ ka na xɔ mì ɖo agbaza élɔ́ e dɔn mì xwe kú ɔ́ sí?

²⁵ Mi ní kpa susu nú Mawu gbɔn Jezu Klísu Aklúnɔ mǐtɔn jí. Kléwún mɛ ɔ́, nyɛ ɖésúnɔ mɔ ɖɔ un nyí kannumɔ nú Mawusɛ́n ɔ́; lo ɔ́, ɖo hwɛhuhu sín ninɔmɛ e un ɖó ɔ́ mɛ ɔ́, un nyí kannumɔ nú hwɛhuhu sɛ́n ɔ́.