Hlɔ̌manu 6 - MAWUXÓWÉMA

Mǐ kú ɖo hwɛ mǐtɔn lɛ́ɛ mɛ, bó ka ɖo gbɛ ɖo Klísu mɛ

¹ Étɛ́ mǐ ka ná ɖɔ din? Mǐ nǎ ɖo gbɛ ɖo hwɛ mɛ tɛgbɛ bónú fɛ́nú Mawu tɔn ní túnflá wɛ a?

² Gbeɖé kpɔ́n! Đo hwɛhuhu sín alixo ɔ́, mǐ kó kú; bɔ nɛ̌ mǐ ka ná lɛ́ kpo ɖo hwɛ hu wɛ gbɔn?

³ Abǐ mi tunwun ɖɔ mǐ mɛ e ko lɛ yɛhwesin, bó ɖo bǔ xá Klísu Jezu lɛ́ɛ ɔ́, mǐ bǐ kú kú e Klísu kú ɔ́ ǎ cé?

⁴ Hwenu e è lɛ yɛhwesin nú mǐ ɔ́, mǐ kú xá Klísu, bɔ è ɖi mǐ kpó e kpó, bónú lě e Mawu Tɔ́ ɔ́ sɔ́ hlɔ̌nhlɔ́n tɔn susunɔ ɔ́ dó fɔ́n Klísu ná ɔ́, mɔ̌ ɖokpó ɔ́, mǐ lɔ ná zán gbɛ yɔ̌yɔ́.

⁵ Đó ée mǐ ko ɖo bǔ xá ɛ, bó ko kú xá ɛ ɔ́, mɔ̌ ɖokpó ɔ́ jɛ́n mǐ ɖo bǔ xá ɛ bó ko fɔ́n sín kú xá ɛ.

⁶ Mǐ tunwun ganjí ɖɔ gbɛtɔ́ e mǐ ko nyí ɖ'ayǐ ɔ́, ká wɛ è ko ká gbɛtɔ́ énɛ́ kpódó Klísu kpó nyi aklúzu jí, bó ná sú kún dó nú hwɛhuhu sín ninɔmɛ e mǐ ɖó ɖ'ayǐ é, bónú mǐ ma sɔ́ nyí kannumɔ nú hwɛhuhu ɖě ó.

⁷ Đó mɛ e kú ɔ́ gosín hwɛhuhu sín hlɔ̌nhlɔ́n kan nu.

⁸ Ée mǐ kú xá Klísu ɔ́, mǐ ɖi nǔ ɖɔ mǐ lɔmɔ̌ mǐ ná nɔ gbɛ xá ɛ.

⁹ Đó mǐ tunwun ɖɔ ée Mawu fɔ́n Klísu sín kú ɔ́, Klísu kún sɔ́ ná kú ó; ɖó kú sɔ́ ɖó acɛ ɖo jǐ tɔn ǎ.

¹⁰ Đó Klísu kú; hwɛhuhu sɔ́ ná ɖó hlɔ̌nhlɔ́n ɖé ǎ wútu wɛ é kú azɔn ɖokpó géé, bɔ xó fó. Lo ɔ́, Klísu fɔ́n wá gbɛ; é ná nɔ gbɛ nú Mawu wútu wɛ é fɔ́n wá gbɛ.

¹¹ Mɔ̌ ɖokpó ɔ́, ɖo bǔ e mǐ ɖe xá Klísu Jezu ɔ́ mɛ ɔ́, mi lɔmɔ̌ mi ní nɔ mɔ miɖée dó mɔ mɛ e ko kú ɖo hwɛhuhu sín alixo ɔ́ na bo nɔ mɔ miɖée dó mɔ mɛ e ɖo gbɛ nú Mawu ɔ́ ná.

¹² Hǔn, hwɛhuhu ní ma ɖu axɔ́sú ɖo agbaza mitɔn e ná kú ɔ́ nu ó; mi ma se tónú nú jló agbaza tɔn lɛ́ɛ ó.

¹³ Mi ma sɔ́ miɖée dó wa azɔ̌ nú hwɛhuhu azɔ̌wanú e nɔ wa nǔ agɔ lɛ́ɛ é ɖɔhun ó; é nyɔ́ wa ɔ́, mi sɔ́ miɖée jó nú Mawu, ɖó mɛ e fɔ́n sín kú é wɛ mi nyí; mi sɔ́ miɖée bǐ jó nú azɔ̌ tɔn, azɔ̌wanú e nɔ wa nǔ jlɔ́jlɔ́ lɛ́ɛ é ɖɔhun.

¹⁴ Đó hwɛhuhu ná ɖó acɛ ɖo mi jí ǎ; ɖó mi sɔ́ ɖo sɛ́n ɔ́ sín acɛ mɛ ǎ; lo ɔ́, fɛ́nú Mawu tɔn mɛ wɛ mi ɖe.

Hwɛjijɔ wɛ mǐ nyí kannumɔ ná

¹⁵ Étɛ́ o! Ée mǐ ma ɖo sɛ́n ɔ́ sín acɛ mɛ ǎ, bó ɖo fɛ́nú Mawu tɔn mɛ ɔ́ wú wɛ mǐ ná hu hwɛ a? Gbeɖé kpɔ́n!

¹⁶ Mi tunwun ganjí ɖɔ ényí mi jó miɖée dó kannumɔ ɖɔhun nú mɛɖé, bó ná se tónú n'i ɔ́, kannumɔ mɛ e se tónú ná wɛ mi ɖe ɔ́ tɔn wɛ mi nyí. É sixú nyí hwɛhuhu e nɔ kplá mɛ yi kú é; é ka sixú nyí tónúse nú Mawu e nɔ sɔ́ mɛ dó húzú hwɛjijɔnɔ ɖo Mawu nukún mɛ é.

¹⁷ Lo ɔ́, è ní kpa susu nú Mawu! Mi mɛ e ko nyí kannumɔ nú hwɛhuhu ɖ'ayǐ ɔ́, din ɔ́, mi se tónú kpódó ayixa mitɔn bǐ sésé kpo nú kpɔ́ndéwú e ɖo kplɔ́n e mi yí ɔ́ mɛ é.

¹⁸ È hwlɛ̌n mi gán sín hwɛ sín acɛ mɛ, bɔ mi húzú kannumɔ nú hwɛjijɔ.

¹⁹ Un ɖo xó ɖɔ nú mi wɛ lě e gbɛtɔ́ nɔ ɖɔ xó gbɔn é, ɖó nukúnnú e mi ma nɔ yá wǔ mɔ jɛ nǔ e kan Mawu lɛ́ɛ mɛ ǎ wútu. Ɖ'ayǐ xóxó ɔ́, mi jó miɖée bǐ dó kannumɔ ɖɔhun nú nǔblíblí wiwa kpódó gbɛ nyanya zínzán kpán; nǔ énɛ́ lɛ́ɛ wiwa nɔ zɔ́n bɔ mi nɔ vɛ́ tóli nú Mawu. Mɔ̌ ɖokpó ɔ́, din ɔ́, mi jó miɖée dó bǐ kannumɔ ɖɔhun nú nǔjlɔ́jlɔ́wiwa; énɛ́ ná zɔ́n bɔ mi ná nɔ sixú zán gbɛ mímɛ́.

²⁰ Hwenu e mi nyí hwɛ sín kannumɔ ɖ'ayǐ ɔ́, é ɖo dandan nú mi ɖɔ mi ní nɔ wa nǔ jlɔ́jlɔ́ ǎ.

²¹ Nǔ énɛ́ lɛ́ɛ e mi wa ɖ'ayǐ, bɔ é ɖo winnyá nyí nú mi wɛ din ɔ́, étɛ́ mi ka mɔ ɖ'é mɛ? Nǔ énɛ́ lɛ́ɛ ɔ́, kú wɛ yě nɔ dɔn mɛ yi.

²² Amɔ̌, din ɔ́, è ɖe mi sín hwɛhuhu sín acɛ mɛ, bɔ mi ɖo azɔ̌ wa nú Mawu wɛ. Nǔ e mi ná mɔ ɖ'é mɛ ɔ́ wɛ nyí ɖɔ mi na zán gbɛ mímɛ́, bɔ vivɔnu ɔ́, mi ná mɔ gbɛ mavɔ mavɔ.

²³ Đó axɔ́ e hwɛhuhu nɔ sú mɛ ɔ́ wɛ nyí kú; amɔ̌ nǔ e Mawu nɔ ná mɛ vɔ̌nu ɔ́ wɛ nyí gbɛ mavɔ mavɔ e mǐ ɖó ɖo bǔ e mǐ ɖe xá Klísu Jezu Aklúnɔ mǐtɔn mɛ é.