Hlɔ̌manu 5 - MAWUXÓWÉMA

Mǐ nyǐ hwɛjijɔnɔ ɖo Mawu nukún mɛ

¹ Hǔn, ée Mawu sɔ́ mǐ dó húzú hwɛjijɔnɔ gbɔn nǔɖiɖi gbla mɛ ɔ́, fífá ɖo mǐ kpo Mawu kpo tɛ́ntin, gbɔn Aklúnɔ mǐtɔn Jezu Klísu sín nǔwiwa lɛ́ɛ gbla mɛ.

² Nǔɖiɖi mǐtɔn zɔ́n bɔ mǐ kpé wú, bó mɔ fɛ́nú e Mawu ná mǐ ɔ́ yí gbɔn Jezu jí; fɛ́nú énɛ́ wɛ zɔ́n bɔ mǐ lí dǒ din. Nǔ e nɔ dó xomɛhunhun nú mǐ ɔ́ wɛ nyí nukún e ɖó wɛ mǐ ɖe ɖɔ mǐ ná ɖó mǐmá ɖo susu Mawu tɔn mɛ é.

³ Ée lɛ́ hú mɔ̌ ɔ́ wɛ nyí ɖɔ mǐ na bo ɖo wǔvɛ́ mɔ wɛ ɔ́, xomɛ nɔ hun mǐ, ɖó mǐ tunwun ɖɔ wǔvɛ́mimɔ nɔ ná bɔ è nɔ ɖó suúlu;

⁴ bɔ suúluɖíɖó nɔ́ ná bɔ è nɔ dɛ ɖo tɛ́nkpɔ́n nu, bɔ didɛ ɔ́ nɔ́ ná bɔ è nɔ ɖó nukúnɖíɖó.

⁵ Nukúnɖíɖó énɛ́ ka nɔ flú mɛ ǎ, ɖó Mawu kɔn wǎn yíyí tɔn dó ayi mǐtɔn mɛ gbɔn Yɛsinsɛn e é ná mǐ ɔ́ jí.

⁶ Đó hwenu e mǐ ma kó ɖó gǎn ɖé ǎ ɔ́, Klísu kú dó mǐ mɛ e ma nɔ sí Mawu ǎ lɛ́ɛ tamɛ, ɖo hwenu e Mawu ɖó dó é.

⁷ É ná vɛ́ wǔ ɖésú, bɔ è nǎ yí gbe bo kú dó hwɛjijɔnɔ ɖé tamɛ. Afɔ wɛ ná nyɔ́ bɔ mɛɖé ná ɖó akɔ́nkpinkpan bó kú dó ɖagbewatɔ́ ɖé tamɛ.

⁸ Amɔ̌, Mawu ɖe lě e é yí wǎn nú mǐ sɔ́ ɔ́ xlɛ́ mǐ, ɖó hwenu e mǐ kpo ɖo hwɛhutɔ́ nyí wɛ ɔ́ wɛ Klísu kú dó ta mǐtɔn mɛ.

⁹ Din ɔ́, Mawu sɔ́ mǐ dó húzú hwɛjijɔnɔ gbɔn hun Jezu tɔn e kɔn nyi ayǐ ɔ́ gbla mɛ. Hǔn é ɖo gannaganna ɖɔ Mawu ná lɛ́ hwlɛ́n mǐ gán ɖo xomɛsin tɔn kpó hwɛɖɔxámɛ tɔn kpó sí.

¹⁰ Kɛntɔ́ Mawu tɔn wɛ mǐ kó nyí ɖ'ayǐ; lo ɔ́, Mawu dó hwɛ gbɔ xá mǐ gbɔn kú e Vǐ tɔn kú ɔ́ gbla mɛ. Din e Mawu dó hwɛ gbɔ xá mǐ ɔ́, é ɖo gannaganna ɖɔ é ná hwlɛ́n mǐ gán gbɔn vǐ tɔn sín gbɛ gbla mɛ.

¹¹ Énɛ́ ɔ́ kɛ́ɖɛ́ ka wɛ ǎ; lo ɔ́, mǐ tlɛ lɛ́ ɖo awǎ jɛ wɛ ɖo Mawu mɛ gbɔn Aklúnɔ mǐtɔn Jezu Klísu e Mawu zé dó dó hwɛ gbɔ xá mǐ é jí.

Vogbingbɔn e ɖo Adámu kpó Klísu kpó mɛ é

¹² Hwɛhuhu ɔ́, gbɛtɔ́ ɖokpó géé jí wɛ é gbɔn bó wá gbɛ ɔ́ mɛ; mɛ énɛ́ wɛ nyí Adámu; hwɛhuhu ɔ́ ka dɔn kú wá. Énɛ́ ɔ́, gbɛtɔ́ lɛ́ɛ bǐ nɔ kú, ɖó mɛ bǐ wɛ hu hwɛ.

¹³ Cóbónú Mawu ná ná sɛ́n ɔ́ Mɔyízi ɔ́, hwɛhuhu ko tíin ɖo gbɛ ɔ́ mɛ; lo ɔ́, ée sɛ́n ɔ́ ma kó ɖe ǎ ɔ́, Mawu nɔ lɛ́n hwɛ dó kɔ nú mɛɖé ɖ'ayǐ ǎ.

¹⁴ É ɖo mɔ̌ có, bɛ́ sín Adámu hwenu ɖokpóó káká wá jɛ Mɔyízi hwenu ɔ́, kú ɔ́ ɖu axɔ́sú; é ɖu axɔ́sú ɖo mɛ e sín hwɛ ma tlɛ cí hwɛ e Adámu hu é ɖɔhun ǎ lɛ́ɛ lɔ jí; Adámu e vɛ́ tóli nú Mawu é. Adámu ɔ́, mɛ e ɖó ná wá ɔ́ sín akpajlɛ́ wɛ é nyí.

¹⁵ È sixú jlɛ́ nǔníná Mawu tɔn vɔ̌nu ɔ́ dó nǔ e Adámu wa nyi do ɔ́ wú ǎ; ɖó é sín nǔ e gbɛtɔ́ ɖokpó géé énɛ́ wa nyi do ɔ́ wú, bɔ mɛ gěgé kú; lo ɔ́ fɛ́nú Mawu tɔn ɔ́ hú gǎn nǔwanyido Adámu tɔn ɔ́ ɖaxó, bɔ nǔníná e é ná mɛ gěgé vɔ̌nu gbɔn gbɛtɔ́ ɖokpó géé jí ɔ́ (Jezu Klísu) lɛ́ ɖo tají hú mɔ̌.

¹⁶ Nǔ e nǔníná Mawu tɔn nɔ wa ɔ́ gbɔn vo nú nǔ e hwɛ e gbɛtɔ́ ɖokpó géé (Adámu) énɛ́ hu ɔ́ dɔn wá é. Đó hwɛ e è ɖɔ dó nǔwanyido gbɛtɔ́ ɖokpó géé énɛ́ tɔn ɔ́ dɔn hwɛɖónúmɛ wá gbɛ ɔ́ mɛ. Nǔníná vɔ̌nu e Mawu ná mǐ dó nǔwanyido gěgé gúdo ɔ́ ɖe mǐ sín hwɛ mɛ.

¹⁷ Ée é sín nǔ e gbɛtɔ́ ɖokpó géé wa nyi do ɔ́ wú, bɔ kú ɖu axɔ́sú gbɔn gbɛtɔ́ ɖokpó géé énɛ́ jí ɔ́, é ɖo gannaganna ɖɔ mɛ e Mawu ná fɛ́nú kpódó nǔníná hwɛjijɔ tɔn kpó, bɔ é túnflá lɛ́ɛ ná nɔ gbɛ bó ná ɖu axɔ́sú ɖo hwɛhuhu jí, ɖó nǔ e Jezu-Klísu wa é wútu.

¹⁸ Hǔn nǔ e gbɛtɔ́ ɖokpó géé wa nyi do ɔ́ dɔn hwɛɖónúmɛ wá nú gbɛtɔ́ bǐ, mɔ̌ ɖokpó ɔ́ jɛ́n azɔ̌ jlɔ́jlɔ́ e gbɛtɔ́ ɖokpó géé (Jezu Klísu) wa ɔ́ ɖe gbɛtɔ́ lɛ́ɛ bǐ sín hwɛɖónúmɛ mɛ, bó ná gbɛ yě.

¹⁹ Đó lě e tónúmase gbɛtɔ́ ɖokpó géé tɔn zɔ́n bɔ gbɛtɔ́ gěgé húzú hwɛhutɔ́ ɔ́, mɔ̌ jɛ́n tónúsise gbɛtɔ́ ɖokpó géé tɔn zɔ́n bɔ gbɛtɔ́ gěgé húzú hwɛjijɔnɔ ɖo Mawu nukún mɛ.

²⁰ Sɛ́n ɔ́ wá, bónú hwɛhuhu ná sukpɔ́; fí e hwɛhuhu ka sukpɔ́ ɖe ɔ́, fɛ́nú Mawu tɔn nɔ túnflá ɖo fínɛ́.

²¹ Hǔn énɛ́ ɔ́ wú wɛ lě e hwɛhuhu ko ɖu axɔ́sú gbɔn kú jí ɔ́, mɔ̌ ɖokpó ɔ́ jɛ́n fɛ́nú Mawu tɔn ɖo axɔ́sú ɖu wɛ gbɔn hwɛjijɔ jí, bó ná kplá mǐ yi gbɛ mavɔ mavɔ mɛ gbɔn Jezu Klísu Aklúnɔ mǐtɔn jí.