Hlɔ̌manu 3 - MAWUXÓWÉMA

¹ È nyǐ Jwifu ɔ́, le tɛ́ wɛ ɖ'é mɛ? È gbo ada ɔ́, ɖagbe tɛ́ wɛ ɖ'é mɛ?

² Le ɔ́ d'agba ɖo ali bǐ nu; ɖó le nukɔntɔn e Jwifu lɛ́ɛ ɖó ɔ́ wɛ nyí ɖɔ Mawu sɔ́ xó tɔn lɛ́ɛ dó así nú yě.

³ Ényí mɛɖé lɛ́ɛ ɖo yě mɛ, bó ma nɔ gbejí ǎ ɔ́, nɛ̌ è ka ná ɖɔ gbɔn? Mawu ná gbɛ́ ɖɔ émí kún ná nɔ gbejí ó, ɖó yědɛɛ lɛ́ɛ ma nɔ gbejí wútu wɛ a?

⁴ Gbeɖé kpɔ́n! Mi ɖó ná tunwun ɖɔ ényí gbɛtɔ́ lɛ́ɛ bǐ ná bo ɖo adingban ɖó wɛ ɔ́, Mawu ɔ́, nǔgbó wɛ é nyí, lě e Mawuxówéma ɔ́ ɖɔ gbɔn é; Mawuxówéma ɔ́ ɖɔ: “Xó ɖiɖɔ towe lɛ́ɛ mɛ ɔ́, è ɖǒ ná nɔ́ mɔ ɖɔ xó towe sɔgbe, bɔ è ɖɔ hwɛ xá we ɔ́, a ɖǒ ná nɔ́ ɖu ɖ'é jí.”

⁵ Ényí nǔ nyanya e mǐ nɔ́ wa ɔ́ nɔ́ ɖe hwɛjijɔ Mawu tɔn xlɛ́ ɔ́, nɛ̌ mǐ ka ná ɖɔ gbɔn? Mǐ ná ɖɔ Mawu nɔ́ dó hwɛ agɔ, ɖó é nɔ́ dɔn tó nú mǐ wútu wɛ a? Lě e gbɛtɔ́ lɛ́ɛ nɔ́ ɖɔ xó gbɔn ɔ́ ɖɔ gbɔn wɛ un ɖe ɖo fí.

⁶ Gbeɖé kpɔ́n! Xógbe énɛ́ sɔgbe ǎ; ɖó ényí Mawu nɔ́ dó hwɛ agɔ ɔ́, nɛ̌ wɛ é ka ná sixú ɖɔ hwɛ xá gbɛ ɔ́ gbɔn?

⁷ Lo ɔ́, ényí adingban ce nɔ lɛ́ ɖe nǔgbó Mawu tɔn xlɛ́ d'é jí, bó nɔ́ sɔ́ ɛ su ɔ́, étɛ́ wú Mawu ka ná ɖó hwɛ nú mì hwɛhutɔ́ wɛ un nyí ɖɔhun?

⁸ Ényí mɔ̌ wɛ é nyí ɔ́, étɛ́wú mǐ ma ka ná ɖɔ mi wá nú mǐ ná wa nǔ nyanya bónú nǔ ɖagbe ná tɔ́n sín mɛ ǎ? Mɛ e jló ná ɖɔ xó ce nyanya lɛ́ɛ nɔ́ ɖɔ mɔ̌ wɛ nyi nɔ ɖɔ. Mɛ énɛ́ lɛ́ɛ ɔ́, è nǎ ɖó hwɛ nú yě; nǔ e yě wa é ka byɔ́ mɔ̌.

Mɛ bǐ wɛ hu hwɛ

⁹ Lo ɔ́, étɛ́ ka wɛ? Mǐ mɛ Jwifu lɛ́ɛ ɔ́, mǐ nyɔ́ hú gbɛtɔ́ ɖě lɛ́ɛ wɛ a? Gbeɖé kpɔ́n! Đó un ko ɖe xlɛ́ ɖɔ Jwifu lɛ́ɛ kpódó gbɛtɔ́ ɖě lɛ́ɛ bǐ kpó wɛ kplé bó ɖo hwɛ sín acɛ mɛ.

¹⁰ Mawuxówéma ɔ́ ɖɔ mɔ̌; Mawuxówéma ɔ́ ɖɔ: “Gbɛtɔ́ ɖěbǔ tíin, bó nyí hwɛjijɔnɔ ɖo Mawu nukún mɛ ǎ. Mɛ ɖokpó géé lě tíin ǎ.

¹¹ Mɛɖěbǔ tíin, bó mɔ nukúnnú jɛ nǔ e sɔgbe ɔ́ mɛ ǎ; mɛ ɖěbǔ ɖo Mawu ba wɛ ǎ.

¹² Gbɛtɔ́ lɛ́ɛ bǐ wɛ gosín ali ɖagbe ɔ́ jí; yě bǐ gosín ali ɖagbe ɔ́ jí ɖó kpɔ́, bó sɔ́ nyí nǔɖéwanú nú Mawu ǎ. Mɛɖěbǔ tíin bó nɔ́ wa ɖagbe ǎ; mɛ ɖokpó géé lě tíin ǎ.

¹³ Nu yětɔn cí yɔdo e ɖo nuvo é ɖɔhun; yě nɔ sɔ́ ɖɛ̌ yětɔn dó blɛ́ mɛ ná. É cí dan sín aɖǐvɛ́ wɛ nɔ tɔ́n sín nu yětɔn mɛ ɖɔhun.

¹⁴ Yě kɛ nu ɔ́, nu jɛ́n yě nɔ dó mɛ, bó nɔ́ ɖɔ dǎnǔ nú mɛ.

¹⁵ Mɛhuhu wɛ yě nɔ́ hwlɛ́n dó.

¹⁶ Yě gbɔn fí ɖěbǔ ɔ́, yě nɔ́ hɛn nǔ gblé; yě nɔ́ dɔn mɛ dó nyladó mɛ.

¹⁷ Yě tunwun ali e è nɔ gbɔn bó nɔ́ mɔ fífá é ǎ.

¹⁸ Yě nɔ́ sí Mawu ɖěbǔ ɖo gbɛzán yětɔn mɛ ǎ.”

¹⁹ Mǐ ka tunwun ɖɔ nǔ e ɖɔ wɛ sɛ́n lɛ́ɛ ɖe ɔ́ bǐ ɔ́, mɛ e ɖo sɛ́n lɛ́ɛ glɔ́ lɛ́ɛ ɖɔ ná wɛ yě ɖe, bónú è nǎ xwe nu yětɔn dó xɔ, bónú Mawu ná ɖɔ hwɛ xá gbɛtɔ́ e ɖo gbɛ ɔ́ mɛ lɛ́ɛ bǐ.

²⁰ Đó mɛ ɖěbǔ ná nyí hwɛjijɔnɔ ɖo Mawu nukún mɛ, ɖó é wa nǔ e sɛ́n lɛ́ɛ zɔ́n lɛ́ɛ wútu ǎ; ɖó nǔ e sɛ́n ɔ́ wa kpowun ɔ́ wɛ nyí ɖɔ é nɔ́ bló bɔ gbɛtɔ́ lɛ́ɛ nɔ tunwun ɖɔ émí hu hwɛ.

Nɛ̌ Mawu ka nɔ́ hwlɛ́n gbɛtɔ́ gán gbɔn?

²¹ Amɔ̌, din ɔ́, Mawu xlɛ́ mǐ lě e é nɔ́ sɔ́ mǐ dó húzú hwɛjijɔnɔ ná gbɔn é. Mɛ sɔ́ dó húzú hwɛjijɔnɔ ná énɛ́ ka ɖó xó ɖé xá sɛ́n lɛ́ɛ nyinyi ǎ. Gbeyíɖɔ Mawu tɔn lɛ́ɛ kpódó sɛ́n e Mawu nǎ Jwifu lɛ́ɛ kpó ɖɔ xó d'é wú; yě ɖɔ:

²² Mawu nɔ́ sɔ́ gbɛtɔ́ lɛ́ɛ dó húzú hwɛjijɔnɔ ná ɖo nukún tɔn mɛ, gbɔn nǔ e yě ɖi nú Jezu Klísu é jí. É nɔ wa mɔ̌ nú mɛ e nɔ ɖi nǔ nú Klísu lɛ́ɛ bǐ, ɖó ɖo Mawu gɔ́n ɔ́, vogbingbɔn ɖěbǔ ɖo yě mɛ ǎ.

²³ Đó gbɛtɔ́ lɛ́ɛ bǐ wɛ hu hwɛ bɔ susu e Mawu nɔ́ ná mɛ ɔ́, yě ɖó ɖě ɖ'é mɛ ǎ.

²⁴ Amɔ̌, Mawu ɔ́, ɖo xomɛnyínyɔ́ tɔn mɛ ɔ́, é sɔ́ yě mɛ e ɖi nǔ nú Klísu Jezu lɛ́ɛ bǐ dó húzú hwɛjijɔnɔ ná vɔ̌nu ɖo nukún tɔn mɛ gbɔn Klísu Jezu e nɔ ɖe yě sín hwɛ mɛ ɔ́ jí.

²⁵ Mawu sɔ́ Klísu ɖó te nú vɔ̌sísá, bónú gbɔn hun tɔn gbla mɛ ɔ́, Klísu ná mɔ hwɛ sɔ́ kɛ mɛ yí nú mɛ e ɖi nǔ n'i lɛ́ɛ é. Lě e Mawu nyí hwɛjijɔnɔ gbɔn é wɛ é jló ná ɖe xlɛ́ gbɔn mɔ̌. Đ'ayǐ ɔ́, Mawu ɖó suúlu, bó nɔ́ ɖo nǔ wa wɛ gbɛtɔ́ lɛ́ɛ kún hu hwɛ ó ɖɔhun.

²⁶ Amɔ̌, din ɔ́, é ɖe lě e é nɔ́ sɔ́ gbɛtɔ́ lɛ́ɛ dó húzú hwɛjijɔnɔ ɖo nukún tɔn mɛ gbɔn ɔ́ xlɛ́, ɖó é nyí hwɛjijɔnɔ, bó ná lɛ́ sɔ́ mɛ e ɖi nǔ nú Jezu lɛ́ɛ lɔmɔ̌ dó húzú hwɛjijɔnɔ.

²⁷ Hǔn, nǔ e wú gbɛtɔ́ lɛ́ɛ ná ɖó dó, bó dó yí go ɔ́ ɖě sɔ́ tíin a? Éeǒ! Đokpó géé lě tíin ǎ. Étɛ́wú nǔ ká nyí mɔ̌? Đó yě nɔ bló nǔ e sɛ́n ɔ́ zɔ́n ɔ́ wútu wɛ a? Éeǒ! Lo ɔ́, nǔ e yě ɖi nú Klísu ɔ́ wútu wɛ.

²⁸ Đó mǐ mɔ ɖɔ nǔ e gbɛtɔ́ ɖi nú Klísu ɔ́ wɛ nɔ zɔ́n bɔ Mawu nɔ́ sɔ́ ɛ dó húzú hwɛjijɔnɔ ná ɖo nukún tɔn mɛ; é nyí é nɔ bló nǔ e sɛ́n lɛ́ɛ zɔ́n ɔ́ wútu wɛ ǎ.

²⁹ Abǐ, Mawu ɔ́, Jwifu lɛ́ɛ sín Mawu kɛ́ɖɛ́ wɛ é nyí a? É nyí togun ɖě lɛ́ɛ lɔmɔ̌ tɔn ǎ cé? Ɛɛn, é nyí Mawu togun ɖě lɛ́ɛ lɔ tɔn ganjí.

³⁰ Đó Mawu ɖokpó géé wɛ tíin, bó ná kpɔ́n dó nǔɖiɖi e Jwifu lɛ́ɛ ɖó ɔ́ wú, bó ná sɔ́ yě dó húzú hwɛjijɔnɔ ná; mɔ̌ ɖokpó ɔ́, é ná lɛ́ kpɔ́n dó nǔɖiɖi e mɛ e ma nyí Jwifu ǎ lɛ́ɛ lɔmɔ̌ ɖó ɔ́ wú, bó ná sɔ́ yě dó húzú hwɛjijɔnɔ.

³¹ Ée mǐ ɖɔ Mawu nɔ sɔ́ mɛ e ɖi nǔ nú Klísu lɛ́ɛ dó húzú hwɛjijɔnɔ na ɔ́ wɛ zɔ́n bɔ è nǎ ɖɔ sɛ́n lɛ́ɛ nyí nǔ yǎyá a? Gbeɖé kpɔ́n! É nyɔ́ wa ɔ́, nǔ e sɛ́n lɛ́ɛ nyí tawun ɔ́ ɖe xlɛ́ wɛ mǐ ɖe.