Hlɔ̌manu 2 - MAWUXÓWÉMA

Mawu na ɖɔ hwɛ xá gbɛtɔ́ lɛ́ɛ bǐ

¹ Hwi mɛ e ɖo hwɛ dó mɛ ɖě lɛ́ɛ wɛ ɔ́, a na bo nyí nǔ ɖěbǔnɔ ɔ́, kɛnklɛ́n sɔ́ ɖ'é mɛ nú we ǎ; ɖó hwenu e a ɖo hwɛ dó mɛ ɖě lɛ́ɛ wɛ, bó ka nɔ ɖo nǔ ɖokpó ɔ́ wa wɛ yě ɖɔhun ɔ́, hwɛ ɖó nú hwiɖée wɛ a ɖe.

² Mǐ tunwun ɖɔ Mawu nɔ ɖɔ hwɛ xá mɛ e nɔ wa nǔ mɔ̌hun lɛ́ɛ lě e é sɔgbe xá nǔgbó ɔ́ gbɔn é.

³ Nya ce, hwi mɛ e nɔ ɖo hwɛ dó yě mɛ e nɔ ɖo nǔ énɛ́ lɛ́ɛ wa wɛ, bó ka ɖo nǔ ɖokpó ɔ́ wa wɛ yě ɖɔhun ɔ́, a vɛdó ɖɔ émí ná gán ɖo hwɛɖɔxámɛ Mawu tɔn mɛ wɛ sín a?

⁴ Abǐ a vɛdó ɖɔ émí ná hu tɛ́ nú xomɛnyínyɔ́ ɖaxó Mawu tɔn ɔ́ kpó sɔxwixwe tɔn kpó, kpódó xomɛfífá tɔn ɖaxó ɔ́ kpó wɛ sín a? Abǐ a tunwun ɖɔ xomɛnyínyɔ́ Mawu tɔn ɖo dindɔn we wɛ nú a na lɛ́ kɔ sín hwɛ towe lɛ́ɛ gúdo ǎ cé?

⁵ A ka tlí tó; a ɖo gbesisɔ mɛ bó ná lɛ́ kɔ sín hwɛ towe lɛ́ɛ gúdo ǎ; énɛ́ wútu wɛ a ɖo tó dɔn nú mɛ ɖaxó ɖé sín nǔ sɔ́ ɖ'ayǐ nú hwiɖée wɛ nú gbe e gbe Mawu ná ɖe xomɛsin tɔn kpó hwɛjlɔ́jlɔ́ ɖiɖɔ tɔn kpó xlɛ́ é.

⁶ Gbe énɛ́ gbe ɔ́, Mawu ná sú nǔ e mɛ ɖokpó ɖokpó wa ɔ́ sín axɔ́ ɛ.

⁷ É ná ná gbɛ mavɔ mavɔ mɛ e nɔ ɖó kan dó nǔ ɖagbe wiwa wú, bó nɔ́ ɖo susu kpó yɛ̌yi kpó, kpódó jɔmakú kpó ba ɖo gɔ̌n tɔn gbɔn mɔ̌ wɛ lɛ́ɛ.

⁸ Lo ɔ́, Mawu ná sin xomɛ ɖésú dó mɛ e nɔ fɔ́n gǔ dó jǐ tɔn, bó ma nɔ́ se tónú nú nǔgbó ɔ́ ǎ, bó nɔ́ kpo nú nǔ nyanya wiwa kɛ́ɖɛ́ lɛ́ɛ é.

⁹ Mɛ e ka nɔ wa nǔ nyanya lɛ́ɛ bǐ wɛ ná mɔ wǔvɛ́, bó ná mɔ akpɔ: Jwifu lɛ́ɛ jɛ nukɔn, bɔ mɛ e ma nyí Jwifu ǎ lɛ́ɛ ná bɔ d'é wú.

¹⁰ É ka ɖo mɔ̌ có Mawu ná ná susu, yɛ̌yi, kpódó fífá kpó mɛ e nɔ wa nǔ ɖagbe lɛ́ɛ bǐ. É ná ná Jwifu lɛ́ɛ jɛ nukɔn, bó ná ná mɛ e ma nyí Jwifu ǎ lɛ́ɛ bɔ d'é wú.

¹¹ Đó Mawu nɔ ɖe mɛɖé ɖó vo ɖo mɛ ɖé mɛ ǎ.

¹² Mɛ e ma tunwun sɛ́n e Mawu ná Jwifu lɛ́ɛ ǎ, bó hu hwɛ lɛ́ɛ bǐ ɔ́, yě ná dɔn sɛ́n lɛ́ɛ mɛvo; mɛ e ka tunwun sɛ́n lɛ́ɛ, bó hu hwɛ lɛ́ɛ ɔ́, è nǎ sɔ́ sɛ́n lɛ́ɛ dó ɖɔ hwɛ xá yě bǐ.

¹³ Đó ényí mɛ e nɔ ɖótó sɛ́n lɛ́ɛ kpowun lɛ́ɛ wɛ nɔ nyí hwɛjijɔnɔ ɖo Mawu nukɔn ǎ; lo ɔ́, mɛ e nɔ bló nǔ e sɛ́n lɛ́ɛ zɔ́n lɛ́ɛ wɛ nɔ nyí hwɛjijɔnɔ ɖo nukɔn tɔn.

¹⁴ Ényí mɛ e ma nyí Jwifu ǎ, bó ma ɖó sɛ́n lɛ́ɛ ǎ lɛ́ɛ nɔ yě ɖóɖó, bó jɛ nǔ e sɛ́n lɛ́ɛ zɔ́n lɛ́ɛ wa jí ɔ́, yě na bo ma ɖó sɛ́n lɛ́ɛ ǎ ɔ́, yě ɖe xlɛ́ ɖɔ émí tunwun nǔ e è ɖǒ ná wa é, abǐ nǔ e è ma ɖó ná wa ǎ é.

¹⁵ Lě e yě nɔ wa nǔ gbɔn ɔ́ nɔ ɖe xlɛ́ ɖɔ è wlǎn lě e sɛ́n ɔ́ zɔ́n ɖɔ è nǐ wa nǔ gbɔn ɔ́ dó ayi mɛ nú émí. Ayixa yětɔn lɔ nɔ ɖe kúnnu ná ɖɔ nǔgbó wɛ; mɔ̌ ɖokpó ɔ́, linlin yětɔn lɛ́ɛ e nɔ dó hwɛ yě hwe ɖé lɛ́ɛ nu, bó nɔ jɛ ahwan yě jí hwe ɖ'é lɛ́ɛ nu lɛ́ɛ lɔ nɔ ɖe xlɛ́.

¹⁶ Nǔ e ná jɛ gbe e gbe Mawu ná gbɔn Jezu Klísu jí, bó ɖɔ hwɛ dó nǔ e gbɛtɔ́ lɛ́ɛ nɔ wa ɖo nǔglɔ́ lɛ́ɛ é nɛ́, lě e Wɛn Ɖagbe e jlá wɛ un ɖe ɔ́ ɖɔ gbɔn é.

Sɛ́n lɛ́ɛ kpódó Jwifu lɛ́ɛ kpó

¹⁷ Amɔ̌, hwɛ ɔ́, a ɖɔ émí nyí Jwifu; a gǎn jɛ sɛ́n lɛ́ɛ wú, bó nɔ xɔ susu ɖó Mawu towe wú.

¹⁸ A tunwun nǔ e Mawu jló é, bɔ sɛ́n lɛ́ɛ kó kplɔ́n we ɖɔ hwi ní sɔ́ nǔ ɖagbe, bó jó nǔ nyanya dó.

¹⁹ A mɔ hwiɖée dó mɔ mɛ e nɔ xlɛ́ ali nukúntíntɔ́nnɔ lɛ́ɛ é, bó nɔ́ mɔ ɖɔ émí nyí wěziza nú mɛ e ɖo ablu mɛ lɛ́ɛ é.

²⁰ A mɔ ɖɔ émí nɔ́ kplɔ́n nǔ xlonɔ lɛ́ɛ, kpó mɛ e ma tunwun nǔɖé ǎ lɛ́ɛ kpó, ɖó a ɖeji ɖɔ émí nɔ́ mɔ nǔnywɛ́ titewungbe kpó nǔgbó titewungbe kpó ɖo sɛ́n ɔ́ mɛ.

²¹ Hwi mɛ e nɔ kplɔ́n nǔ mɛ ɖě lɛ́ɛ ɔ́, étɛ́ wú a ma ka nɔ kplɔ́n nǔ hwiɖée ǎ? A nɔ ɖɔ nú mɛ lɛ́ɛ ɖɔ è ma jɛ ajo ó; étɛ́wú hwi ɖésúnɔ ka nɔ jɛ ajo?

²² Hwi mɛ e nɔ ɖɔ è kún ɖó ná lɛ aga ó ɔ́, étɛ́ wú hwi ɖésúnɔ ka nɔ lɛ aga? Hwi mɛ e gbɛ́ wǎn nú vodún lɛ́ɛ bo ɖɔ ɔ́, étɛ́ wú a ka nɔ fin nǔ e ɖo xɔ yětɔn mɛ lɛ́ɛ bɛ́?

²³ Hwi mɛ e nɔ xɔ susu ɖó a ɖǒ Mawusɛ́n ɔ́ wútu ɔ́, a nɔ gba sɛ́n ɔ́, bó nɔ dó hɛn Mawu sín nyǐkɔ blí.

²⁴ Đó Mawuxówéma ɔ́ ɖɔ: “Mi mɛ Jwifu lɛ́ɛ wútu wɛ akɔta ɖě lɛ́ɛ nɔ́ ɖɔ xó nyanya dó Mawu wú.”

²⁵ Ényí a nɔ nyi sɛ́n ɔ́, ada e a gbo ɔ́ ɖó le nú we. Amɔ̌, ényí a ma ka nɔ nyi sɛ́n ɔ́ ǎ ɔ́, é cí a ma gbo ada ɖɔhun.

²⁶ Ényí mɛ e ma gbo ada ǎ é ka nɔ wa nǔ e sɛ́n ɔ́ zɔ́n ɔ́, Mawu ná sɔ́ ɛ dó mɔ mɛ e gbo ada é ná ǎ wɛ a?

²⁷ Mɛ e ma gbo ada ǎ, bó ka nɔ nyi sɛ́n lɛ́ɛ na ɖɔ hwɛ xá hwi mɛ e nyí Jwifu bo gbo ada, bó ɖó sɛ́nwéma ɔ́, bó ma ka nɔ wa nǔ e è wlán d'é mɛ lɛ́ɛ ǎ é.

²⁸ Nǔgbó ɔ́, mɛ e nyí Jwifu nǔgbó nǔgbó ɔ́ wɛ nyí mɛ e nyí ɖo nukún ta lɛ́ɛ ǎ; é ka nyí mɛ e è gbo ada ná kpowun ɖo wěxo é ǎ.

²⁹ Lo ɔ́, mɛ e nyí Jwifu nǔgbó nǔgbó ɔ́ wɛ nyí mɛ e nyí Jwifu ɖo ayi mɛ é, mɛ e gbo ada ɖo ayi mɛ é. Ada énɛ́ ɔ́, Yɛ Mawu tɔn wɛ nɔ gbo nú mɛ; ényí nǔ e è wlán dó sɛ́nwéma mɛ lɛ́ɛ wɛ nɔ́ gbo nú mɛ ǎ. Jwifu nǔgbó nǔgbó énɛ́ ɔ́, gbɛtɔ́ wɛ nɔ kpa susu n'i ǎ, lo ɔ́, Mawu wɛ nɔ́ kpa susu n'i.