Hlɔ̌manu 15 - MAWUXÓWÉMA

È ma ba ná nyɔ́ ɖo mɛɖée sí ó

¹ Mǐ mɛ e ɖó gǎn ɖo nǔɖiɖi mɛ lɛ́ɛ ɔ́, mǐ ɖó ná dɛ ɖo mɛ e ma ɖó gǎn ɖo nǔɖiɖi mɛ ǎ lɛ́ɛ sín gǎnmaɖó nu; mǐ ɖó ná wa nǔ bó ná nyɔ́ ɖo mǐɖée sí ǎ.

² Đokpó ɖokpó mǐtɔn ɖó ná ba ná nyɔ́ ɖo nɔzo tɔn sí, nú ɖagbe nɔzo ɔ́ tɔn, bónú é ná yi nukɔn ɖo nǔɖiɖi mɛ.

³ Đó Klísu ɔ́ wa nǔ bó ná nyɔ́ ɖo éɖée sí ǎ; é nyɔ́ wa ɔ́, lě e Mawuxówéma ɔ́ ɖɔ gbɔn ɔ́: “Zun e nyí zun towe ɔ́, nyɛ wɛ yí bǐ.”

⁴ Nǔ e è ko wlán dó Mawuxówéma ɔ́ mɛ ɖ'ayǐ xóxó lɛ́ɛ bǐ ɔ́, è wlán yě, bó ná dó kplɔ́n nǔ mǐ, bónú mǐ ná ɖó nukún nǔ gbɔn sɔxwixwe kpó akɔ́nkpinkpan e Mawuxówéma ɔ́ nɔ ná mǐ ɔ́ kpó gbla mɛ.

⁵ Mawu e gɔ́n sɔxwixwe kpó kanmɛsyɛ́nsyɛ́n kpó nɔ gosín ɔ́, ní bló bónú mi ná sixú zán gbenɔkpɔ́ sín gbɛ ɖo miɖée tɛ́ntin Klísu Jezu ɖɔhun.

⁶ Bónú mi bǐ ná ɖó gbe kpɔ́ dó kpa susu nú Mawu, Aklúnɔ mǐtɔn Jezu Klísu sín Tɔ́ ɖó kpɔ́.

È nǐ jlá Wɛn Ɖagbe ɔ́ togun lɛ́ɛ bǐ

⁷ Hǔn, mi bo nɔ yí miɖée ganjí lě e Klísu yí mi gbɔn é, nú è nǎ kpa susu nú Mawu.

⁸ Nǔgbó ɔ́, un ɖo ɖiɖɔ nú mi wɛ ɖɔ Klísu húzú Jwifu lɛ́ɛ sín mɛsɛntɔ́, bó ná dó ɖe akpá e Mawu dó nú tɔ́gbó yětɔn lɛ́ɛ é, bó ná ɖe xlɛ́ gbɔn mɔ̌ ɖɔ Mawu kún nɔ́ dó akpá bó nɔ́ gɔn ɖiɖe ó.

⁹ É wá bónú mɛ e ma nyí Jwifu ǎ lɛ́ɛ lɔmɔ̌ ná kpa susu nú Mawu ɖó nǔbláwǔkúnúmɛ tɔn wútu; lě e Mawuxówéma ɔ́ ɖɔ gbɔn é; é wɛ nyí ɖɔ: “Énɛ́ ɔ́ wú wɛ un ná kpa susu nú we ɖo akɔta e ma nyí Jwifu ǎ lɛ́ɛ tɛ́ntin, bó ná ji han dó mlá we ná.”

¹⁰ Mawuxówéma ɔ́ lɛ́ ɖɔ: “Akɔta lɛ́ɛ mi, mi jɛ awǎ xá togun Aklúnɔ tɔn!”

¹¹ É lɛ́ ɖɔ: “Akɔta akɔta lɛ́ɛ mi, mi bǐ ní sɔ́ Aklúnɔ su, togun lɛ́ɛ bǐ ní kpa susu n'i!”

¹² Ezayíi lɔ ɖɔ: “Mɛ ɖé ná tɔ́n sín Jɛsée kún mɛ, bó ná wá; é ná sí te, bó ná ɖu axɔ́sú ɖo akɔta e ma nyí Jwifu ǎ lɛ́ɛ bǐ nu; é wɛ ná nyí nukúnɖíɖó akɔta e ma nyí Jwifu ǎ lɛ́ɛ bǐ tɔn.”

¹³ Mawu e gɔ́n nukúnɖíɖó nɔ gosín ɔ́, ní bló bónú awǎjijɛ e nǔ bǐ vɔ ɖ'é wú ɔ́ kpódó fífá e nǔ bǐ vɔ ɖ'é wú ɔ́ kpó ní gɔ́ ayi mɛ nú mi gbɔn nǔɖiɖi e mi ɖó n'i ɔ́ jí, bónú nukúnɖíɖó mitɔn ná túnflá gbɔn Yɛsinsɛn sín hlɔ̌nhlɔ́n jí.

Nǔ e Pɔ́lu lin dó azɔ̌ tɔn wú é

¹⁴ Nɔví ce lɛ́ɛ mi, nyɛ ɖésúnɔ ɔ́, un ɖó gǎnjɛwú ɖɔ mi nyɔ́ xomɛ titewungbe. Mi mɔ nukúnnú jɛ nǔ e è ɖǒ ná tunwun ɔ́ wú bǐ dégbédégbé, bɔ mi nyí mɛ bó hɛn ɔ́, mi ná kplɔ́n nǔ miɖée.

¹⁵ É ɖo mɔ̌ có, un syɛ́n ta, bó ɖɔ xó ɖé lɛ́ɛ sɛ́ dó mi, ɖo akpá gěgé xwé ɖo wěma élɔ́ mɛ, bó ná dó flín nǔ e mi ko tunwun ɖ'ayǐ lɛ́ɛ mi. Un wlán wěma ɔ́ gbɔn mɔ̌, ɖó fɛ́nú e Mawu ná mì,

¹⁶ bɔ un nyí mɛsɛntɔ́ Klísu Jezu tɔn ɖo togun e ma nyí Jwifu ǎ lɛ́ɛ tɛ́ntin ɔ́ wútu. Wɛn Ɖagbe Mawu tɔn e jlá wɛ un ɖe ɔ́, vɔ̌sánú-xwlémawutɔ́zɔ́ dó wa ná wɛ un ɖe, bó ɖo wiwa wɛ, bónú togun e ma nyí Jwifu ǎ lɛ́ɛ ná húzú vɔ̌sánú e nɔ́ nyɔ́ Mawu nukún mɛ, bɔ Yɛsinsɛn sɔ́ ɖó vo nú Mawu é.

¹⁷ Hǔn, ɖo bǔ e un ɖe xá Klísu Jezu ɔ́ mɛ ɔ́, un hɛn ɔ́, un ná gó, ɖó azɔ̌ e wa nú Mawu wɛ un ɖe ɔ́ wú.

¹⁸ Đó ényí un glá bó ɖɔ nǔɖé xó ɔ́, azɔ̌ e Klísu wa gbɔn jǐ ce, bó ná dɔn mɛ e ma nyí Jwifu ǎ lɛ́ɛ, bónú yě ná se tónú nú Mawu ɔ́ sín xó kɛ́ɖɛ́ jɛ́n é ná nyí; é wa azɔ̌ énɛ́ gbɔn xóɖiɖɔ kpó nǔwiwa kpó mɛ,

¹⁹ gbɔn nǔjíjlɛ́ lɛ́ɛ kpódó nǔdábaɖa lɛ́ɛ kpó sín hlɔ̌nhlɔ́n mɛ; gbɔn Yɛsinsɛn sín hlɔ̌nhlɔ́n mɛ. Lě e un gbɔn fí bǐ bɛ́ sín Jeluzalɛ́mu káká yi Ililíi gbé jí, bó jlá Wɛn Ɖagbe e ɖɔ xó dó Klísu wú ɔ́ kpíkpé tɔn gbɔn é nɛ́.

²⁰ Lo ɔ́, un tunwun ɖɔ fí e è ma ko se Klísuxó ɖe ǎ lɛ́ɛ kɛ́ɖɛ́ jɛ́n un ná jlá Wɛn Ɖagbe ɔ́ gbɔn dandan, bónú é ní ma cí dǒ e mɛɖěvo dó do ɔ́ jí wɛ un mɛ xɔ nyi ɖɔhun ó.

²¹ Lě e Mawuxówéma ɔ́ ɖɔ gbɔn ɔ́: “Mɛ e è ma ko ɖɔ xó tɔn ná kpɔ́n ǎ lɛ́ɛ ná mɔ ɛ, bɔ mɛ e ma ko se xó tɔn kpɔn ǎ lɛ́ɛ ná mɔ nukúnnú jɛ wú.”

Pɔ́lu ɖɔ xó dó Hlɔ̌ma e é lɛ́n ná yi ɔ́ wú

²² Azɔn nabí ɖé wɛ é sín Wɛn Ɖagbe jlájlá gbɔn fí e è ma ko se Klísuxó ɔ́ ɖe ǎ lɛ́ɛ é wú, bɔ un gɔn gɔ̌n mitɔn.

²³ Amɔ̌, din ɔ́, un ko fó azɔ̌ ce ɖo gbě énɛ́ lɛ́ɛ jí. Gɔ̌n mitɔn wiwa ɖo jlǒjló mì wɛ din ɔ́, xwe tɔn ko sukpɔ́.

²⁴ Un ka jló ɖɔ nú un xwe Ɛsipányi ɔ́, un ná wá gbɔn mi gɔ́n, bónú jló e un ɖó, bó ná nɔ mi gɔ́n ɔ́ jɛmɛ nú mì kpɛɖé ɔ́, mi ná d'alɔ mì bɔ un ná yi to énɛ́ mɛ.

²⁵ Amɔ̌, din ɔ́, un xwe Jeluzalɛ́mu, bó ná yi gɔ́ alɔ nú mɛɖeɖóvo Mawu tɔn e ɖo dɔ̌n lɛ́ɛ.

²⁶ Nǔgbó ɔ́, klísusɛntɔ́ e ɖo Masedwani kpó Akáyi kpó lɛ́ɛ ɖɔ émí ná jɔ akwɛ́ nú wamamɔnɔ e ɖo mɛɖeɖóvo Mawu tɔn mɛ, ɖo Jeluzalɛ́mu lɛ́ɛ.

²⁷ Yě ɖésúnɔ wɛ bló kpó xomɛhunhun kpó; lo ɔ́, è nǎ ɖɔ nǔgbó ɔ́, axɔ́ wɛ é nyí bɔ yě ɖu dó wamamɔnɔ énɛ́ lɛ́ɛ. Đó Jwifu e nyí klísusɛntɔ́ lɛ́ɛ má nyɔ̌ná Yɛsinsɛn tɔn e nyí yě ɖésúnɔ tɔn lɛ́ɛ xá mɛ e ma nyí Jwifu ǎ lɛ́ɛ. Hǔn mɛ e ma nyí Jwifu ǎ lɛ́ɛ lɔmɔ̌ ɖó ná sɔ́ nyɔ̌ná gbɛmɛ fí tɔn lɛ́ɛ dó dó alɔ yě ná.

²⁸ Ényí un ko ɖɔ xó énɛ́ gbo, bó ko sɔ́ nǔ e è jɔ lɛ́ɛ jó nú yě ɔ́, un ná ɖidó Ɛsipányi; un ka xweyǐgbe ɔ́, un ná gbɔn mi gɔ́n.

²⁹ Un ka tunwun ɖɔ un jǎwe mi gɔn ɔ́, un ná hɛn nyɔ̌ná kpíkpé Klísu tɔn wá nú mi.

³⁰ Nɔví ce lɛ́ɛ mi, nǔ e wú un ɖo vo sa nú mi wɛ gbɔn Aklúnɔ mǐtɔn Jezu Klísu kpó wǎn yíyí e Yɛsinsɛn nɔ ná mɛ ɔ́ kpán jí ɔ́ ɖíe: mi fun ahwan e fun wɛ un ɖe ɔ́ xá mì, bó sa vo nú Mawu dó ta ce mɛ.

³¹ Mi xo ɖɛ bónú ma gló nǔmaɖitɔ́ e ɖo Judée lɛ́ɛ, bónú alɔgɔ́númɛ sín azɔ̌ e wú un xwe Jeluzalɛ́mu ɔ́, mɛɖeɖóvo Mawu tɔn e ɖo dɔ̌n lɛ́ɛ ní kɛ alɔ bó yí.

³² Énɛ́ ɔ́, nú é jló Mawu ɔ́, un ná wá mi gɔ́n kpó awǎjijɛ ɖaxó kpó, bó ná gbɔjɛ́ ɖo tɛ́ntin mitɔn.

³³ Mawu e nɔ ná fífá mɛ ɔ́ ní nɔ kpɔ́ xá mi bǐ! Amǐ!