Hlɔ̌manu 1 - MAWUXÓWÉMA

Gbedómɛ

¹ Nyɛ Pɔ́lu mɛsɛntɔ́ Klísu Jezu tɔn e Mawu ylɔ́ bónú ma nyí mɛsɛ́dó ɔ́ wɛ ɖo wěma élɔ́ sɛ́ dó mi wɛ, bó ɖo gbe dó mi wɛ; Mawu wɛ ɖe mì ɖó vo bónú ma jlá Wɛn Ɖagbe tɔn.

² Wɛn Ɖagbe énɛ́ ɔ́, Mawu ko dó akpá tɔn gbɔn gbeyíɖɔ tɔn lɛ́ɛ jí din ɔ́, é ko lín, bɔ yě wlán dó Mawuxówéma ɔ́ mɛ.

³ Wɛn Ɖagbe énɛ́ ɖɔ xó dó Vǐ tɔn Aklúnɔ mǐtɔn Jezu Klísu ɔ́ wú. Đo gbɛtɔ́ nyínyí tɔn mɛ ɔ́, Davídi kúnkan mɛ wɛ é jɔ ɖe;

⁴ amɔ̌, ɖo yɛ mímɛ́ nyínyí tɔn mɛ ɔ́, è ɖe e xlɛ́ kpódó hlɔ̌nhlɔ́n kpó ɖɔ Mawu ví wɛ é nyí gbɔn kú e é kú bó fɔ́n ɔ́ gbla mɛ.

⁵ Mawu jɔwǔ mì gbɔn Klísu jí, bó sɔ́ mì mɛsɛ́dó, bónú ma sɔ́ Klísu nyǐkɔ su, bó ná sixú dɔn gbɛtɔ́ ɖo to lɛ́ɛ bǐ mɛ, bónú yě ná ɖi nǔ n'i, bó se tónú n'i.

⁶ Mi lɔ, mi ɖo mɛ énɛ́ lɛ́ɛ mɛ, mi mɛ e Mawu ylɔ́ bɔ mi nyí Jezu Klísu tɔn lɛ́ɛ é.

⁷ Un ɖo wěma élɔ́ wlán sɛ́ dó mi mɛ e ɖo Hlɔ̌ma lɛ́ɛ wɛ; mi mɛ e Mawu yí wǎn ná, bó ylɔ́ mi, bó ɖe mi ɖó vo, bɔ mi ná nyí togun tɔn é bǐ. Mawu Tɔ́ mǐtɔn kpódó Aklúnɔ mǐtɔn Jezu Klísu kpó ní ná fɛ́nú kpódó fífá kpó mi.

Pɔ́lu jló ná yi ba klísusɛntɔ́ e ɖo Hlɔ̌ma lɛ́ɛ kpɔ́n

⁸ Cóbónú un ná ɖɔ xó e ná ɖɔ nú mi wɛ un ɖe é ɔ́, un ná tó dó kú nú Mawu ce gbɔn Jezu Klísu jí, dó mi bǐ sín tamɛ hwɛ̌, ɖó è ɖo nǔ e mi ɖi nú Klísu ɔ́ sín xó ɖɔ wɛ gbɔn gbɛ ɔ́ bǐ mɛ.

⁹ Mawu e sɛn wɛ un ɖe kpódó ayixa ce bǐ kpó, gbɔn Wɛn Ɖagbe e ɖɔ xó dó Vǐ tɔn wú ɔ́ jlájlá gbla mɛ ɔ́, tunwun ɖɔ nǔgbó ɖɔ wɛ un ɖe; é tunwun ɖɔ un ɖo ɖɛ xo wɛ hweɖěbǔnu ɔ́, nǔ mitɔn nɔ ɖo ayi mɛ nú mì.

¹⁰ Un nɔ byɔ́ ɛ ɖɔ ɖo jlǒ tɔn mɛ ɔ́, ní bló bónú ma sixú mɔ ali, lobo wá mi gɔ́n lo.

¹¹ Đó é jló mì ɖésú ɖɔ ma wá mɔ mi, bó hɛn nǔníná Yɛsinsɛn tɔn ɖé wá nú mi, bónú mi ná lí dǒ ɖo nǔ e mi ɖi nú Klísu ɔ́ mɛ.

¹² Nǔ e ɖɔ wɛ un ɖe ɔ́ wɛ nyí ɖɔ é jló mì ɖɔ nyɛ kpó mi kpó ná nɔ kpɔ́, bó ná dó ná akɔ́nkpinkpan mǐɖée. Nyɛ ná ná akɔ́nkpinkpan mi gbɔn nǔɖiɖi ce gbla mɛ, bɔ mi lɔ ná ná akɔ́nkpinkpan mì gbɔn nǔɖiɖi mitɔn gbla mɛ.

¹³ Nɔví lɛ́ɛ mi, un jló ɖɔ mi ní tunwun ɖɔ un ko lin azɔn mɔ̌kpán ná wá gɔn mitɔn, amɔ̌ káká jɛ din ɔ́, nǔ ɖo jijɛ mɛ nú mì wɛ. Un ka ko nɔ ba ɖɔ azɔ̌ e wa wɛ un ɖe ɔ́ ní ɖó le ɖo tɛ́ntin mitɔn, lě e é ɖó le gbɔn ɖo togun ɖě lɛ́ɛ mɛ é.

¹⁴ É ɖo dandan mɛ nú mì ɖɔ ma yi mɛ lɛ́ɛ bǐ gɔ̌n; mɛ e hun nukún lɛ́ɛ kpó mɛ e ma hun nukún ǎ lɛ́ɛ kpó; mɛ e se wěma lɛ́ɛ kpódó mɛ e ma se wěma ǎ lɛ́ɛ kpó.

¹⁵ Énɛ́ ɔ́ wútu wɛ é jló mì ɖésú ɖɔ ma wá jlá Wɛn Ɖagbe ɔ́ mi mɛ e ɖo Hlɔ̌ma lɛ́ɛ lɔmɔ̌.

Wɛn Ɖagbe ɔ́ ɖó hlɔ̌nhlɔ́n

¹⁶ Un ɖo Wɛn Ɖagbe ɔ́ jlá wɛ ɔ́, winnyá nɔ hu mì ǎ, ɖó hlɔ̌nhlɔ́n e Mawu nɔ zán dó hwlɛ́n mɛ e ɖi nǔ é bǐ gán é wɛ; Jwifu lɛ́ɛ jɛ nukɔn, bɔ mɛ e ma nyí Jwifu ǎ lɛ́ɛ bɔ d'é wú.

¹⁷ Nǔgbó ɔ́, Wɛn Ɖagbe ɔ́ ɖe lě e Mawu nɔ zé gbɛtɔ́ lɛ́ɛ dó húzú hwɛjijɔnɔ ná ɖo nukɔn tɔn gbɔn ɔ́ xlɛ́; sín bǐbɛ́mɛ káká yi vivɔnu ɔ́, nǔɖiɖi kɛ́ɖɛ́ jí wɛ é nɔ zé yě dó húzú hwɛjijɔnɔ ná gbɔn lě e Mawuxówéma ɔ́ ɖɔ gbɔn é; é wɛ nyí ɖɔ: “Mɛ e Mawu mɔ dó mɔ hwɛjijɔnɔ ɖó nǔɖiɖi tɔn wú ɔ́ ná nɔ gbɛ.”

Gbɛtɔ́ bǐ wɛ wa nǔ nyi do

¹⁸ Nǔgbó mɛ e ma nɔ se tónú nú Mawu ǎ, bó nɔ́ ɖo nǔ nyanya wa wɛ lɛ́ɛ ɔ́, Mawu nɔ́ ɖe xomɛsin tɔn xlɛ́ yě bǐ sín jǐxwé, nǔ énɛ́ lɛ́ɛ wɛ nɔ zɔ́n bɔ gbɛtɔ́ lɛ́ɛ ma nɔ sixú tunwun nǔgbó ɔ́ ǎ.

¹⁹ Mawu nɔ dɔn tó nú yě, ɖó nǔ e è hɛn ɔ́, è nǎ tunwun dó Mawu wú ɔ́ ɖo wɛn nú yě: Mawu ɖésúnɔ ɖe nǔ énɛ́ xlɛ́ yě céɖécéɖé.

²⁰ Nǔgbó ɔ́, sín hwenu e Mawu ko ɖó gbɛ ɔ́, nǔ e é nyí bɔ è ma nɔ mɔ ǎ ɔ́, é wɛ nyí ɖɔ: hlɔ̌nhlɔ́n tɔn mavɔ mavɔ ɔ́ kpódó nǔ e é nyí nǔgbó ɔ́ kpó ɔ́, è nɔ tunwun gbɔn nǔ e é wa lɛ́ɛ gbla mɛ; énɛ́ ɔ́ wútu ɔ́, kɛnklɛ́n sɔ́ ɖ'é mɛ nú yě ǎ.

²¹ Yě tunwun Mawu; lo ɔ́, yě nɔ ná susu e jɛ xá ɛ é ǎ; yě ka nɔ lɛ́ dó kú n'i lě e é jɛ xá gbɔn é ǎ; é nyɔ́ wa ɔ́, nǔ e yě nɔ lin ɔ́ nɔ ɖó ta ɖé ǎ; nǔɖé ɖo ayixa yětɔn mɛ ǎ; ayixa yětɔn nɔ mɔ nǔ ǎ.

²² Yě nɔ ɖɔ nǔnywɛ́tɔ́ wɛ émí nyí; xlonɔ wɛ yě ka nyí.

²³ Yě nɔ́ gɔn susu kpa nú Mawu e ma nɔ kú ǎ é, bó nɔ kpa susu nú bǒcyɔ gbɛtɔ́ e nɔ kú é tɔn, bó nɔ́ kpa nú bǒcyɔ xɛ lɛ́ɛ tɔn, kanlin e ɖó afɔ ɛnɛ lɛ́ɛ tɔn kpódó kanlin e nɔ sá lɛ́ɛ tɔn kpán.

²⁴ Énɛ́ ɔ́ wútu wɛ Mawu jǒ yě dó bɔ yě nɔ́ wa nǔblíblí lě e é jló yě gbɔn é, bó nɔ ɖo agbaza yětɔn zé dó wa winnyánú ná wɛ ɖo yěɖée tɛ́ntin.

²⁵ Yě gbɛ́ nǔgbó e ɖɔ xó dó Mawu wú ɔ́ yí, bó ka yí gbe nú adingban. Yě nɔ́ sɛn nǔɖíɖó Mawu tɔn lɛ́ɛ, bó nɔ́ se tónú nú yě, bó nɔ́ jó é ɖésúnɔ Gbɛɖótɔ́ ɔ́ dó; é wɛ è ka ɖó ná kpa susu ná káká sɔ́yi. Amǐ.

²⁶ Énɛ́ ɔ́ wú wɛ Mawu jó yě dó bɔ yě nɔ wa agbaza sín jlǒ e nyí winnyánú lɛ́ɛ. Nyɔ̌nu yětɔn lɛ́ɛ ɖésú nɔ́ ɖó xó xá nyɔ̌nu yě ɖɔhun lɛ́ɛ; é ka nyɔ́ mɔ̌ ǎ.

²⁷ Mɔ̌ ɖokpó ɔ́, súnnu lɛ́ɛ nɔ́ jó nyɔ̌nu lɛ́ɛ dó, bɔ jlǒ ɖaxó ɖé nɔ dɔn yě mɛ súnnu énɛ́ lɛ́ɛ, bɔ yě nɔ ɖo winnyánú wa wɛ, kpó súnnu yě ɖɔhun lɛ́ɛ kpó. Énɛ́ ɔ́ wú wɛ Mawu dɔn tó nú yě, bɔ é sɔgbe xá nǔ nyanya e yě wa lɛ́ɛ.

²⁸ Ée yě gbɛ̌ ɖɔ émí kún ná tunwun Mawu ó é ɔ́, Mawu jǒ yě dó bɔ yě nɔ wa nǔ e linlin masɔgbe yětɔn jló lɛ́ɛ é, bó nɔ́ ɖo nǔ e yě má ɖó ná wa ǎ é wa wɛ.

²⁹ Nǔmasɔgbe tɛnmɛ tɛnmɛ wiwa bǐ kpó nǔ nyanya wiwa tɛnmɛ tɛnmɛ bǐ kpó wɛ gɔ́ ayi yětɔn mɛ; mɛnújlójló tɛnmɛ tɛnmɛ bǐ kpó adǎnúwiwa tɛnmɛ tɛnmɛ bǐ kpó wɛ gɔ́ ayi yětɔn mɛ. Wǔhwinhwan kpó mɛhuhu kpó, kpódó jlɛɖiɖɔ kpán wɛ gɔ́ ayi yětɔn mɛ; sísɛ́ kpódó bǐbí kpó wɛ gɔ́ ayi yětɔn mɛ; yě nɔ́ ɖo xó ɖɔ kpé wɛ,

³⁰ bó nɔ́ ɖo xó nyanya ɖɔ dó yěɖée wú wɛ; Mawu sín kɛntɔ́ wɛ yě nyǐ. Yě nɔ sí mɛ ǎ; yě nɔ ɖo go yí wɛ, bó nɔ́ ɖo ajɔ̌ jlá nú yěɖée wɛ. Yě nɔ ɖo nǔ nyanya wiwa sín wlɛnwín yɔ̌yɔ́ lɛ́ɛ ɖe wɛ; yě nɔ́ vɛ́ tóli nú mɛjitɔ́ yětɔn lɛ́ɛ.

³¹ Ayixa yětɔn nɔ mɔ nǔ ǎ; yě dó akpá ɔ́, yě nɔ ɖe ǎ; yě yǐ wǎn nú mɛ ǎ; mɛ nú nɔ blá wǔ nú yě ǎ.

³² Yě tunwun ganjí ɖɔ sɛ́n Mawu tɔn ɖɔ mɛ e nɔ zán gbɛ gbɔn mɔ̌ lɛ́ɛ ɔ́, kú wɛ jɛ xá yě, cóbó ka nɔ kpo ɖo nǔ mɔ̌hun lɛ́ɛ wa wɛ, lobo nɔ lɛ́ yí hwɛ dó mɛ e nɔ wa nǔ mɔ̌hun lɛ́ɛ jí.