Ozée 9 - MAWUXÓWÉMA

Togun Mawu tɔn ɔ́ ná ba nǔ bǐ kpo

¹ Izlayɛ́linu lɛ́ɛ mi, mi ma xaji ɖu xwe bo j'awǎ togun ɖě lɛ́ɛ ɖɔhun ó, ɖó mi lɛ aga bó ɖo zɔ nú nyɛ Mawu mitɔn ɔ́. Đó mi ɖo akwɛ́ kwíji kwíji gbé mɛ, bó nɔ́ ɖo aga lɛ wɛ gbɔn kɔ́xota kɔ́xota fí e è nɔ só jinukún ɖe lɛ́ɛ bǐ.

² Lo ɔ́, jinukún e só wɛ è ɖe ɖo kɔ́xota é kpódó ami e fyɔ́n wɛ è ɖe ɖo amito mɛ é kpó ná kpé mì ǎ. Mi ɖo vɛ̌ɛn yɔ̌yɔ́ e nɔ te kpɔ́n wɛ mi ɖe ɔ́ ná mɔ nu wɛ ǎ.

³ Eflayímunu lɛ́ɛ ná sixú nɔ Mawu Mavɔmavɔ sín to ɔ́ mɛ ǎ, yě ɖǒ ná lɛ́ kɔ yi Ejípu, abǐ Asilíi, bó ná yi ɖu nǔ e vɛ́ yě lɛ́ɛ.

⁴ Énɛ́ ɔ́, yě sɔ́ ná ba ahan ɖě nú Mawu Mavɔmavɔ ǎ; yě ká sɔ́ ná nɔ́ xwlé vɔ̌sánú ɖěe, bó ná dó nyɔ́ ɖo así tɔn ǎ. É ná cí nǔwamɛ nǔɖuɖu ɖé ɖɔhun nú yě: mɛ e ná ɖu lɛ́ɛ bǐ ná ɖu su. Đó nǔɖuɖu yětɔn ɔ́, yě ɖokpónɔ wɛ ná ɖu. È ná zé byɔ́ Mawu Mavɔmavɔ xwé gbe ǎ.

⁵ Ani wɛ mi ná bló ɖo kplézán ɖaxó ɔ́ gbe? Xwezán Mawu Mavɔmavɔ tɔn ɔ́ gbe ɔ́, ani wɛ mi ná bló?

⁶ Hwenu e yě ná gosín to yětɔn e è gba ɔ́ mɛ ɔ́, Ejípunu lɛ́ɛ ná yí yě. Lo ɔ́, Mɛfísi toxo ɔ́ wɛ ná nyí yɔdo yětɔn. Akwɛ́nú e yě ɖó lɛ́ɛ, kpatágan yětɔn ɔ́, kpɔvɛwun wɛ ná vun blá. Wunkan wɛ ná wú ɖo goxɔ yětɔn lɛ́ɛ mɛ.

⁷ Hwenu e Mawu Mavɔmavɔ ná dɔn tó nú mɛ ɔ́ kó su, hwenu e Mawu Mavɔmavɔ ná kan nǔ e mɛ ɖokpó ɖokpó wa ɔ́ byɔ́ ɛ ɔ́ kó su. Izlayɛ́linu lɛ́ɛ ní tunwun ɖɔ é kó yá. Mi nɔ ɖɔ: “Gbeyíɖɔ Mawu tɔn ɔ́ hun taɖu. Mɛ e Mawu nɔ́ ɖɔ xó dó ayi mɛ ná ɔ́ ɖo gblǒ ɖɔ wɛ.” Hwɛ e mi hu lɛ́ɛ wɛ sukpɔ́ dín, gǔ e mi fɔ́n dó jǐ ce ɔ́ syɛ́n dín.

⁸ Gbeyíɖɔ Mawu tɔn e ɖo Eflayímu wú kpé nukún dó wɛ ɔ́, Mawu ɖo gǔdo tɔn; é ɖo mɔ̌ có, è nɔ ɖó mɔ n'i gbɔn ali tɔn lɛ́ɛ bǐ jí. È nɔ́ hun káká yi tɔ́n ahwan ɛ ɖo Mawu tɔn sín xwé gbe.

⁹ Yě kpo nú nǔ kwíji kwíji wiwa kɛ́ɖɛ́ lě e yě bló gbɔn ɖo Giveya ɖ'ayǐ xóxó ɔ́ ɖɔhun. Mawu Mavɔmavɔ ná flín nǔ e yě wa nyi do ɔ́. É ná dɔn hwɛ e yě hu ɔ́ sín tó nú yě.

Eflayímunu lɛ́ɛ dó awakanmɛkú nú Mawu

¹⁰ Mawu Mavɔmavɔ ɖɔ: “Đ'ayǐ xóxó ɔ́, un mɔ Izlayɛ́linu lɛ́ɛ, yě cí vǐwun e ɖo gbětótló mɛ é ɖɔhun. Un mɔ tɔ́gbó mitɔn lɛ́ɛ, yě cí fígi sín sínsɛ́n nukɔntɔn lɛ́ɛ ɖɔhun. Lo ɔ́, ée yě jɛ Baalu-Peɔ́ɔ tlóló ɔ́, yě jɛ vodún Baalu sɛn jí, bó jó yěɖée dó nú vodún hɛ̌n, bɔ yě kpó asú yětɔn vodún ɔ́ kpó bǐ húzú nǔ gbɛ́hɛn.

¹¹ Susu e Eflayímunu lɛ́ɛ ɖó ɔ́ ná zɔn yi xɛ ɖɔhun. Mɛ ɖé sɔ́ ná ji vǐ ǎ, mɛɖé sɔ́ ná mɔ xo ǎ, sun sɔ́ ná nɔ te nú mɛɖé ǎ.

¹² Yě ná bó tɛ́nkpɔ́n bó tɔ́jú vǐ yětɔn lɛ́ɛ ɔ́, yě ná su có nú un ná yí yě sín akɔn yětɔn ǎ. Un wá jó yě dó hweɖénu hǔn, heelú yě.

¹³ Lě e mɔ Eflayímunu lɛ́ɛ gbɔn wɛ un ɖe ɔ́, nǔ e gbo Tíi ɔ́ wɛ ɖo nǎ gbo e wɛ. Ayǐ nyɔ́ nú Eflayímu ganjí, lo ɔ́, é ná ɖe vǐ tɔn lɛ́ɛ tɔ́n bɔ è nǎ hu yě Tíi ɖɔhun.”

¹⁴ Mawu Mavɔmavɔ e, nú è nǎ zé bǎ ɖé dó xo yě ɔ́, bǎ ɖě tɛ́ wɛ è ɖǒ ná zé? Đe gbe bónú asi yětɔn lɛ́ɛ ní nɔ́ gblé xo, sin ní má nɔ anɔ̌ yětɔn mɛ ó.

¹⁵ Mawu Mavɔmavɔ ɖɔ: “Adǎnú e yě wa ɔ́ bǐ jɛ wěxo ɖo Gilugalu. Sín fínɛ́ wɛ un jɛ wǎn gbɛ́ nú yě ɖe jí. Hǔn, un ná nya yě sín xwé ce gbe, ɖó nǔ nyanya e yě wa lɛ́ɛ wú. Un sɔ́ ná yí wǎn nú yě ɖě ǎ. Gǎn yětɔn lɛ́ɛ bǐ wɛ nyí gǔfɔ́ntɔ́.

¹⁶ Alɔ jɛ Eflayímunu lɛ́ɛ wú titewungbe. Eflayímu to ɔ́, ɖɔ tɔn xú, é sɔ́ ná sɛ́n ɖě ǎ. Eflayímunu lɛ́ɛ ɔ́, yě ná bó ɖó vǐ vívɛ́ná ɔ́, un ná hu bǐ.”

¹⁷ Mawu ce ná gbɛ́ yě, ɖó yě ɖótó e ǎ. Yě ná nɔ́ ɖo flúflú wɛ gbɔn akɔta lɛ́ɛ mɛ akɔta lɛ́ɛ mɛ.