Ozée 4 - MAWUXÓWÉMA

Mawu ɖó hwɛ nú togun tɔn

¹ Mawu Mavɔmavɔ ɖo hwɛ dó mɛ e ɖo to ɔ́ mɛ lɛ́ɛ wɛ. Izlayɛ́li ví lɛ́ɛ mi, mi bo ɖótó xó e Mawu Mavɔmavɔ ɖɔ é; é ɖɔ: “Gbejínɔtɔ́ ɖě sɔ́ ɖo to ɔ́ mɛ ǎ, xomɛnyɔ́tɔ́ ɖě sɔ́ ɖo to ɔ́ mɛ ǎ, mɛɖé ká sɔ́ tunwun nyɛ Mawu ɖo to ɔ́ mɛ ǎ.

² Nu jɛ́n yě nɔ́ dó nɔzo yětɔn, yě nɔ́ ɖó adingban, yě nɔ́ hu mɛ, yě nɔ́ ja ajo, yě nɔ́ lɛ aga. Asú wɛ yě nɔ́ fán mɛ; yě fɔ́n ɔ́, mɛ hu wɛ jɛ́n yě nɔ́ ɖe.

³ Énɛ́ ɔ́ wú wɛ mɛ e ɖo to ɔ́ mɛ lɛ́ɛ ná jɛ aluwɛ mɛ; mɛ e nɔ nɔ to ɔ́ mɛ lɛ́ɛ bǐ ná blá wǔ; yě kpó gběkanlin lɛ́ɛ kpó, kpódó xɛ lɛ́ɛ kpó bǐ wɛ ná blá wǔ, hweví lɛ́ɛ lɔ ná sú kún dó.”

Vɔ̌sánú-xwlémawutɔ́ lɛ́ɛ wa yɛ nú Mawu

⁴ Mawu Mavɔmavɔ ɖɔ: Éeǒ! Ényí mɛɖé kpowun wɛ è ɖǒ ná dó hwɛ ǎ; mɛɖé kpowun wɛ è nǎ xa hwɛ̌ dó kɔ ná ǎ. Lo ɔ́, hwi vɔ̌sánú-xwlémawutɔ́ ɖaxó ɔ́ ɖɔ hwɛ xá wɛ un ɖe. Đó togun towe cí mɛ e nɔ ɖɔ jlɛ xá vɔ̌sánú-xwlémawutɔ́ lɛ́ɛ ɖɔhun.

⁵ A nǎ klɛ́n afɔ bo jɛ ayǐ kéze ɖéɖé, bɔ hǎgbɛ́ towe gbeyíɖɔ ɔ́ lɔmɔ̌ ná klɛ́n afɔ bo jɛ ayǐ zǎn mɛ. Un ná sú nɔ towe sín kún dó.

⁶ Togun ce gba, ɖó é tunwun mɛ alɔkpa e un nyí ɔ́ ǎ wú. Amɔ̌, hwi lɔmɔ̌ ɔ́, a ko ba ná tunwun nǔ ɖěbǔ dó wǔ ce ǎ. Énɛ́ ɔ́ wú wɛ un ma sɔ́ ba we ǎ. A sɔ́ ná nɔ xwlé vɔ̌sánú ɖě mì ǎ. Nǔkplɔ́nmɛ ce lɛ́ɛ e a wɔn ɔ́ wú wɛ nyi lɔmɔ̌ ná wɔn vǐ towe lɛ́ɛ.

⁷ Yě fɔ́n bó ɖo jiji wɛ ɔ́, hwɛhuhu yětɔn nɔ́ ɖo jijɛ jí wɛ. Un ná zé susu e yě ɖó ɔ́ dó húzú hɛ̌n.

⁸ Vɔ̌ e togun ce nɔ wá sá nú mì ɖó hwɛ e yě hu ɔ́ tamɛ ɔ́ wɛ nyí nǔɖuɖu yětɔn. Hǔn, nǔ ɖokpó e nɔ́ myá nukún nú yě ɔ́ wɛ nyí ɖɔ togun ce ní fɔ́n bó ɖo hwɛ hu wɛ .

⁹ Amɔ̌, nǔ e gbo togun ɔ́ wɛ ná gbo mɛ e nɔ xwlé vɔ̌sánú mì lɛ́ɛ. Lě e yě zán gbɛ gbɔn ɔ́ sín tó wɛ un ná dɔn nú yě.

¹⁰ Yě ná nɔ ɖu nǔ káká, bó ká ná nɔ́ gɔ́ xo ǎ. Yě ná nɔ lɛ aga káká, yě ká ná ji vǐ ǎ. Đó yě jó mì dó, yě jó nyɛ Mawu Mavɔmavɔ ɔ́ dó bó jɛ aga lɛ jí.

¹¹ Aga kpó vɛ̌ɛn xóxó kpó vɛ̌ɛn yɔ̌yɔ́ kpó gba tamɛ nú togun ce.

¹² Togun ce yi kan nǔ ɖo atín vodún tɔn ɔ́ gɔ́n; é ɖɔ vodún ɔ́ ní ɖɔ xó nú émí. Aga jɔhɔn dɔn yě bú. Yě klán sín nyɛ Mawu yětɔn ɔ́ wú, yě dó afɔ gbě.

¹³ Yě nɔ́ sá vɔ̌ ɖo só lɛ́ɛ ta; yě nɔ́ dó zǎlínkpɔ́n zo ɖo só kpɛví kpɛví lɛ́ɛ jí, ɖo cɛ́nitín lɛ́ɛ kpó pepliyéetín lɛ́ɛ kpó, kpódó telebɛ́ntitín lɛ́ɛ kpó sá. Atín énɛ́ lɛ́ɛ sín yɛtɛn nyɔ́ ganjí. Énɛ́ ɔ́ wú wɛ vǐ yětɔn nyɔ̌nu lɛ́ɛ nɔ́ lɛ aga, bɔ vǐ yětɔn sín asi lɛ́ɛ nɔ dó afɔ gbě.

¹⁴ Lo ɔ́, un ná dɔn tó nú vǐ mitɔn nyɔ̌nu lɛ́ɛ ɖó aga e yě nɔ́ lɛ ɔ́ wú ǎ. Un ná dɔn tó nú vǐ mitɔn sín asi lɛ́ɛ ɖó afɔ e yě nɔ́ dó gbě ɔ́ wú ǎ. Mi vɔ̌sánú-xwlémawutɔ́ lɛ́ɛ wɛ un ná dɔn tó ná, ɖó mi nɔ kplá agalɛtɔ́ lɛ́ɛ yi jɛ vo; mi kpó agalɛtɔ́ lɛ́ɛ kpó nɔ́ yi sá vɔ̌. È nɔ dó lǒ ɖé ɖɔ: Togun e ma tunwun nǔ ɖagbe ɖo nǔ nyanya mɛ ǎ ɔ́, éɖée wɛ é zé nyi gbě.

¹⁵ Óo! Izlayɛ́linu lɛ́ɛ mi! Mi fɔ́n bó ɖo aga lɛ wɛ. Amɔ̌, Judáanu lɛ́ɛ mi, mi ma hu hwɛ e yě hu ɔ́ ó. Mi ma yi Gilugalu ó, mi ma yi Bɛti-Awɛni ó, mi ma ka xwlé nǔ bó ɖɔ: “Mawu Mavɔmavɔ ɖo gbɛ” ó.

¹⁶ Izlayɛ́linu lɛ́ɛ fɔ́n gǔ nyibúsixwɛ e è ma sixú dé ǎ é ɖɔhun. Amɔ̌, din ɔ́, nyɛ Mawu Mavɔmavɔ ná kplá ɛ yi ama ɖu gbé lɛ̌ngbɔ́ví ɖé ɖɔhun ɖo ayǐkúngban wɛnjɛ ɖé jí.

¹⁷ Eflayímunu lɛ́ɛ ɖó kan dó vodún sinsɛn wú. Mi tin dó yě.

¹⁸ Yě nu ahan gɔ́ xo lě tlóló ɔ́, aga lɛ jí jɛ́n yě nɔ́ jɛ. Winnyánúwiwa jɛ́n nɔ́ myá nukún nú gǎn yětɔn lɛ́ɛ.

¹⁹ Axásáxásá jɔhɔn ná dɔn yě yi. Vɔ̌ e yě sá lɛ́ɛ ná hu winnyá nú yě.