Ozée 13 - MAWUXÓWÉMA

Togun e fɔ́n gǔ dó Mawu jí ɔ́ kú

¹ Eflayímunu lɛ́ɛ ɖo xó ɖɔ wɛ ɖ'ayǐ ɔ́, ado wɛ nɔ hu mɛ bǐ. Aɖǔsó wɛ yě nyí ɖo Izlayɛ́li. Lo ɔ́, é wá sɛn vodún Baalu bó kú.

² Din ɔ́, Eflayímunu lɛ́ɛ fɔ́n bó ɖo hwɛ hu wɛ. Yě nɔ́ zé kpatágan yětɔn dó tun bǒcyɔ ná, yě nɔ́ tun vodún e yě ɖésúnɔ nɔ́ dó wá lɛ́ɛ. Nǔ énɛ́ lɛ́ɛ bǐ ɔ́, alɔnuzɔ́watɔ́ lɛ́ɛ sín nǔwiwa wɛ. È nɔ ɖɔ dó yě wú ɖɔ: “Yě nɔ́ hu gbɛtɔ́ dó sá vɔ̌, bó ká nɔ́ yi dó nu do nú nyibúví!”

³ Énɛ́ ɔ́ wú wɛ yě ná cí akpɔ́kpɔ́ zǎnzǎn tɔn ɖɔhun, yě ná cí amǔ e nɔ́ sú bɔ zaanɖé ɔ́, é nɔ́ kɛn ɔ́ ɖɔhun; yě ná cí nǔywɛ́ e jɔhɔn dó alɔ mɛ, bó fún sín kɔ́xota fí e è nɔ só jinukún ɖe ɔ́ ɖɔhun. Yě ná cí azizɔ e nɔ ɖo tíntɔ́n sín azɔgonu wɛ é ɖɔhun.

⁴ Mawu Mavɔmavɔ ɖɔ: “Izlayɛ́linu lɛ́ɛ mi, nyɛ ɔ́, Mawu Mavɔmavɔ, Mawu mitɔn wɛ un nyí sín hwenu e mi tɔ́n sín Ejípu é; mi tunwun Mawu ɖěvo zɛ nyɛ wú ǎ, Mɛhwlɛ́ngántɔ́ ɖěvo tíin zɛ nyɛ wú ǎ.

⁵ Hwenu e mi ɖo gbětótló mɛ, ɖo ayǐkúngban xúxú ɖé jí ɔ́, nyɛ wɛ nɔ nukɔn nú mi.

⁶ Mi yi ama ɖu gbé lě tlóló ɔ́, mi nɔ gɔ́ xo. Adɔgo mitɔn gɔ́ lě kpowun ɔ́, mi nɔ jɛ go yí jí. Nǔ e wútu mi wɔn mì ɔ́ nɛ́.

⁷ Énɛ́ ɔ́, un ná cí kinnikínní ɖɔhun nú mi, un ná cí kpɔ ɖɔhun nú mi. Un ná tɔwu nú mi, ɖo ali jí.

⁸ Un ná zɔn mi jí lɔnmɔ e è zě vǐ tɔn é ɖɔhun, bó ná tlɛ́n akɔ́nnu mitɔn. Un ná vún mi lě e kinnikínní asi nɔ vún lan ɔ́ ɖɔhun. Gběkanlin lɛ́ɛ ná já mi.

⁹ Izlayɛ́linu lɛ́ɛ mi, nǔ e dɔn kú wá nú mi ɔ́ wɛ nyí gǔ e mi fɔ́n dó jǐ ce ɔ́. Nyɛ mɛ e sixú wá dó alɔ mi ɔ́, mi fɔ́n gǔ dó jǐ ce.

¹⁰ Fítɛ́ axɔ́sú mitɔn ɔ́ ká ɖe? É ní bó hwlɛ́n mi gán gbɔn toxo ɖaxó mitɔn lɛ́ɛ bǐ mɛ bó! Tonukún mitɔn lɛ́ɛ e mi nɔ ɖɔ ná ɖɔ yě ní sɔ́ axɔ́sú ɖokpó nǔ émí, bó lɛ́ sɔ́ gǎn nú émí lɛ́ɛ ɔ́, fítɛ́ yě ɖe?

¹¹ Un sin xomɛ bó ná axɔ́sú ɖokpó mi; un ka ná yí i sín mi sí kpó adǎn kpó.

¹² Nǔ e togun Eflayímu tɔn ɔ́ wa nyi do lɛ́ɛ ɔ́, un ɖó kɛ́n yě jí; hwɛ e é hu ɔ́, un kplé ɖ'ayǐ n'i.

¹³ Yě ná mɔ wǔvɛ́ nyɔ̌nu ɖo ajidonu ɖɔhun. Vǐ xlonɔ wɛ nú yě: hwenu e é ná jɛ te dó ɔ́ su ɔ́, é nɔ gbɛ́ ɖɔ émí kún ná tɔ́n sín nɔ émítɔn xomɛ ó .

¹⁴ Bɔ nyɛ Mawu Mavɔmavɔ ɔ́, un ɖó ná yí mɛ énɛ́ lɛ́ɛ sín kú fɛn mɛ wɛ a? Un ná ɖe yě sín kútomɛ wɛ a? Kú e, fítɛ́ ahwanfunnú towe lɛ́ɛ ɖe? Kú e, ɖe acɛ towe e a nɔ dó hu mɛ ná ɔ́ xlɛ́. Un ɖo nǔbláwǔ ná kú nú mɛɖé wɛ ǎ.

¹⁵ Nǔ na bó ɖo nyǐnyɔ́ nú Eflayímunu lɛ́ɛ wɛ ɖo nɔví yětɔn lɛ́ɛ tɛ́ntin ɔ́, jɔhɔn e nɔ xú nǔ bǐ ɔ́ ná wá, jɔhɔn nyɛ Mawu Mavɔmavɔ tɔn ɔ́ ná fɔ́n sín gbětótló mɛ wá, bó ná xú tɔjɔtɛn yětɔn lɛ́ɛ, dotɔ yětɔn lɛ́ɛ. È nǎ bɛ̌ dɔkun lɛ́ɛ yi, è nǎ hɛn akwɛ́nú lɛ́ɛ bǐ gblé.”