Ozée 12 - MAWUXÓWÉMA

Jakɔ́bu ví lɛ́ɛ kó hu hwɛ dó Mawu sín do

¹ Mawu Mavɔmavɔ ɖɔ: “Togun Eflayímu tɔn nɔ ɖó adingban lɛ́ lɛ̌ dó mì. Akɔta Izlayɛ́li tɔn ɔ́ nɔ́ blɛ́ mɛ lɛ́ lɛ̌ dó mì. Akɔta Judáa tɔn ɔ́ ká kpo ɖo xwixwedó nyɛ Mawu wɛ, bó ɖo gbejí nú nyɛ mɛ e nyí Mǐmɛ́ bǐ ɔ́ é.

² Eflayímunu lɛ́ɛ nɔ sa ami nú Ejípunu lɛ́ɛ. Xɔ́ntɔn zun wɛ yě ɖe gbɔn mɔ̌ nɛ́. Xɔ́ntɔn énɛ́ lɛ́ɛ e zun wɛ yě ká ɖe ɔ́, nǔ wa dó jɔhɔn mɛ wɛ yě ɖe. Asilíinu lɛ́ɛ e nu alɛ xá wɛ yě nɔ́ ɖe ɔ́, jɔhɔn e nɔ xú nǔ bǐ ɔ́ wɛ yě nyǐ, bɔ yě ɖo gǔdo yětɔn ayǐhɔ́ngbe ayǐhɔ́ngbe. Yě nɔ́ fɔ́n, bó nɔ ɖo adingban ɖó wɛ, bó nɔ́ ɖo dǎka xo wɛ.”

³ Mawu Mavɔmavɔ ɖo hwɛ ɖɔ xá akɔta Judáa tɔn ɔ́ wɛ. É ná dɔn tó nú togun Jakɔ́bu tɔn ɔ́, ɖó gbɛ nyanya e é zán ɔ́ wú. Nǔ nyanya e é wa ɔ́ sín ya wɛ Mawu Mavɔmavɔ ná dó n'i.

⁴ Jakɔ́bu ɔ́, é kó tɔ́n sín nɔ tɔn xomɛ cóbó kó ɖo za li xá nɔví tɔn wɛ ǎ. Ée é wá su ɔ́, é fun ahwan xá Mawu.

⁵ Jakɔ́bu fun ahwan xá wɛnsagun Mawu tɔn ɖokpó, bó ɖu ɖ'é jí. É ya avǐ, bó dó kɛnklɛ́n. É mɔ Mawu ɖo Betɛ́li, bɔ Mawu ɖɔ xó n'i.

⁶ Mawu Mavɔmavɔ wɛ nyí Mawu Nǔbǐwúkpétɔ́. Nyǐkɔ tɔn nyí Mawu Mavɔmavɔ.

⁷ É ɖɔ nú Jakɔ́bu ɖɔ: “A ɖǒ ná lɛ́ kɔ wá nyɛ Mawu Mavɔmavɔ, Mawu towe gɔ́n. Nɔ nyɔ́ xomɛ bó nɔ́ wa nǔ jlɔ́jlɔ́. Nɔ ɖeji dó nyɛ Mawu towe ɔ́ wú hwebǐnu.”

⁸ Togun Eflayímu tɔn ɔ́ cí ajɔ̌tɔ́ e hɛn nǔdagan e má sɔgbe ǎ alɔ mɛ é ɖɔhun. É yí wǎn nú mɛblɛ́ɖu.

⁹ Bɔ Eflayímu ɖɔ: “Un jɛ dɔkun nǔgbó, un ɖó nǔ gěgé nǔgbó. Amɔ̌, nǔ énɛ́ lɛ́ɛ bǐ ɔ́, azɔ̌ e un wa ɔ́ sín le wɛ; è nǎ mɔ hwɛ ɖé bó dó mì ǎ, un wa nǔ nyanya ɖě dó jɛ dɔkun ǎ.”

¹⁰ Nyɛ ɔ́, Mawu Mavɔmavɔ, Mawu towe wɛ un nyí sín hwenu e a ɖo Ejípu é. Un ná bló bɔ a nǎ lɛ́ nɔ azava sá, xóxó hwenu ɖɔhun.

¹¹ Un ɖɔ xó nú gbeyíɖɔ ce lɛ́ɛ, un ɖe nǔ alɔkpa alɔkpa lɛ́ɛ xlɛ́ yě. Gbeyíɖɔ ce lɛ́ɛ jí wɛ un nɔ gbɔn bó nɔ́ dó lǒ.

¹² Galadinu lɛ́ɛ ɔ́, nǔnyanyawatɔ́ wɛ yě nyí titewungbe. Yě nyǐ nǔɖé wa nú ǎ. Yě nɔ́ zé nyibúsú lɛ́ɛ dó sá vɔ̌ ɖě jɛ ɖě jí lɛ́ɛ ná ɖo goxɔ Gilugalu tɔn ɔ́ mɛ. Lo ɔ́, vɔ̌sákpe yětɔn lɛ́ɛ ná cí awǐnnya e è lǐ ɖó sonu sonu ɖo hwɛnxlo mɛ, ɖo gle mɛ lɛ́ɛ ɖɔhun.

¹³ Jakɔ́bu hɔn yi Mɛzopotamíi, Izlayɛ́li nɔ wa azɔ̌ nú mɛ ɖěvo ɖó nyɔ̌nu wú. Nyɔ̌nu wú wɛ é húzú lɛ̌ngbɔ́nyitɔ́.

¹⁴ Mawu Mavɔmavɔ gbɔn gbeyíɖɔ tɔn lɛ́ɛ ɖokpó jí, bó ɖe Izlayɛ́li ví lɛ́ɛ tɔ́n sín Ejípu. Gbeyíɖɔ tɔn lɛ́ɛ ɖokpó wɛ é zɔ́n ɖɔ é ní kpé nukún dó togun émítɔn ɔ́ wú.

¹⁵ Eflayímunu lɛ́ɛ dó xomɛsin nú Mawu Mavɔmavɔ ɖésú. Énɛ́ ɔ́ wú ɔ́, Mawu Mavɔmavɔ yětɔn ná ɖíɖá mɛ e yě hu lɛ́ɛ sín agban yě. Winnyá e jɛ xá yě ɔ́ wɛ é ná dó yě.